Beginning
Dee 26 Psalm
En Psalm fonn Doft.
1 Doo mie rejchte, O Herr Gott, dan ekj ha enn daut Follstendijchkjeit fonn mien Hoat jewankt, ekj ha uk enn däm Herr Gott fetruet. Ekj woa nijch wajch rutsche.
2 Forsch mie ut, O Herr Gott, un proow mie, moak mien Jewesse un mien Hoat rein.
3 Dan dien Erboarme es fer miene Uage, un ekj ha enn diene Woarheit jewaundelt.
4 Ekj ha nijch met Mensche jesäte dee leaje; un ekj woa nijch bie dee Heijchle enenn gone.
5 Ekj ha dee Beese äare Fesaumlunj jehaust, un woa nijch met dee Gottloose sette.
6 Ekj woa miene Henj enn Onnschult wausche, soo woa ekj romm dien Aultoa gone, O Herr Gott,
7 to heare moake met dee Stem fonn Danke, un aul diene wunndafolle Woakje tale.
8 O Herr Gott, ekj ha dän Plauts fonn dien Hus leef jehaut, un dee Städ wua diene Harlijchkjeit wont.
9 Nem miene Seel nijch wajch met dee Sinda, oda mien Laewe met dee bloodrije Mane,
10 enn waems Henj doa en Plon es, un enn äare rajchte Haunt es Schmeijchel Jelt.
11 Oba ekj woa enn miene Opprajchtijchkjeit waundle; rad mie, un sie mie jnädijch.
12 Mien Foot steit opp ne jlikje Städ, ekj woa daem Herr Gott säajne enn dee Fesaumlunje.
Dee 27 Psalm
En Psalm fonn Doft.
1 Dee Herr Gott es mien Lijcht un miene Radunk, wäm sull ferjchte? Dee Herr Gott es dee Krauft enn mien Laewe, fa wäm sull ekj mie enjste?
2 Aus dee, dee Beeset aungone, miene Fiend un miene Jäajne, no mie kjeeme mien Fleesch opp to fräte, stolpade dee un folle dol.
3 Wan ne Armee sikj sull jäajen mie loagre, wudd ekj enn mien Hoat nijch engste; wan doa uk sull Kjrijch jäajen mie oppkome, woa ekj enn dit fetruehe.
4 Ekj ha däm Herr Gott no eent jefroacht, daut woa ekj seakje, daut ekj aul miene Doag enn däm Herr Gott sien Hus wone kaun, däm Herr Gott sien Straumet to seene, un enn sien Tempel aun to froage.
5 Dan enn dee Beese Doag woat hee mie festäakje enn daut Jeheemet fonn sien Aundachts Zelt; Hee woat mie opp dän groota Steen oppstale.
6 En nu woat hee mie opphäwe hejcha aus miene Fiend dee mie ommrinje, un ekj woa Freid Opfa brinje enn sien Aundachts Zelt; ekj woa sinje, Jo, ekj woa Preis sinje to däm Herr Gott.
7 Horjch, O Herr Gott wan ekj die aunroop, un doo mie Gonnst bewiese, un doo auntwuate.
8 Mien Hoat saed to die: "Seakj mien Jesejcht;" O Herr Gott, ekj woa dien Jesejcht seakje.
9 Doo dien Jesejcht nijch fonn mie festäakje, schekj dien Deena nijch wajch enn Oaja. Du best mien Help jewast, felot mie nijch, doo nijch fesieme, O mien Radunks Gott!
10 Wan mien Foda un miene Mutta mie felote, dan woat dee Herr Gott mie oppnäme.
11 Lea mie dien Wajch, O Herr Gott, un leid mie enn en jlikja Wajch wäajen dän dee mie beoobachte.
12 Aewajef mie nijch aun miene Fiend aeare Seel, dan faulsche Zeij sent jäajen mie oppejstone, un soone dee Ommenschlijchet püste.
13 Buta wan ekj jejleeft haud daut ekj däm Herr Gott sien Goots jeseene haud enn dee Läwendje äa Launt.
14 Hop enn dän Herr Gott; sie stoakj, en Hee woat dien Hoat stoakje; jo, hop enn däm Herr Gott.
Dee 28 Psalm
En Psalm fonn Doft.
1 Ekj woa to die roope, O Herr Gott; Mien Groota Steen, sie nijch Doof to mie, sest wan du stel best woa ekj soona senne dee fejlikjt woat met soone dee rauf gone no dee Kul.
2 Hea dee Stem fonn mien Jebäd enn mien schriehe to die, wan ekj miene Henj opphäw to daut Wuat fonn diene Heilijchkjeit.
3 Nem mie nijch wajch met dee Beese, oda met soone dee Gottloosijchkjeit eewe; dee fonn Fräd raede met aeare Nobasch, oba Beeset es enn äa Hoat.
4 Jef an no äa Doone, no daut Beeset daut see aungone; soo aus enn äare Henj äare Oabeit es, soo jef an.
5 Wiels see jaewe kjeene Oobacht to däm Herr Gott siene Woakje, un to dee Oabeit fonn siene Henj; Hee woat dän fenijchte, un woat dän nijch oppbuehe.
6 Jesäajent es dee Herr Gott, wiels hee haft dee Stem fonn mien Jebäd jeheat.
7 Dee Herr Gott es mien Krauft un mien Schilt, mien Hoat Toofetruehe es enn am, doaromm freit sikj mien Hoat butamote, un ekj woa am Dank jäwe met mien Jesank.
8 Dee Herr Gott es Macht to an, un hee es dee Fastinj fonn sien Ennjesaulwda siene Radunk.
9 Rad dien Folkj, en doo dien Oawgoot säajne; un jef daen Äte, un häw dän fa emma nehejcht.
Dee 29 Psalm
En Psalm fonn Doft.
1 Jeff to däm Herr Gott, dee Matjchtja äare Säns, jäft to daem Herr Gott Harlijchkjeit un Krauft.
2 Jäft to däm Herr Gott dee Harlijchkjeit fonn sien Nome; doot däm Herr Gott aunbäde enn dee Madastijchkjeit fonn siene Heilijchkjeit.
3 Däm Herr Gott siene Stem es opp dee Wotasch; dee Harlijchkljeits Gott deit donnre; dee Herr Gott es bowe fael Wotasch.
4 Däm Herr Gott siene Stem enn Macht; däm Herr Gott siene Stem enn Madastijchkjeit.
5 Däm Herr Gott siene Stem brakjt dee Tseeda entwei, jo, dee Herr Gott brakjt dee Lebanon Tseeda.
6 Hee moakt dän uk sprinje soo aus en Kaulf; Lebanon un Sirion soo aus en junja wila Oss.
7 Däm Herr Gott siene Stem schnitt derjch dee Fiaflaum.
8 Däm Herr Gott siene Stem scheddat dee Wiltnes; dee Herr Gott scheddat dee Kadesch Wiltnes.
9 Däm Herr Gott siene Stem moakt dee Mutta Ree äa Kaulf to Welt to brinje, un dakjt dee Woolt op; un aules enn sien Tempel sajcht "Harlijchkjeit!"
10 Dee Gerr Gott set opp dee Äweschwaminj; jo, dee Herr Gott set aus Kjeenijch fa emma.
11 Dee Herr Gott woat Krauft jäwe to sien Folkj; dee Herr Gott woat sien Folkj säajne met Fraed.
Dee 30 Psalm
En Psalm: En Ennweihunjs Leet fa Doft sien Hus.
1 Ekj woa die feharlijche, O Herr Gott; dan du hast mie nehejcht jehäft, un hast nijch erlaubt daut miene Fiend sikj äwa mie freihe sulle.
2 O Herr Gott mien Gott, ekj schreajch no die, un du hast mie jeheelt.
3 O Herr Gott, du hast mie fonn daut Grauf enopp jebrocht, du hast mie aum läwe jehoole fonn enn dän Kul enenn gone.
4 Sinjt Preis to däm Herr Gott, O jie siene Heilje; un jäft Dank to daut Aunjedenkj fonn siene Heilijchkjeit.
5 Dan sien Oaja es bloos fa eene Moment; enn sien Gonnst es Läwe. Hiele mucht fa eene Owent duare, oba Freid kjemt enn dän Morje.
6 Un enn mien Woolhabent woa ekj sejchalijch saje: "Ekj woa niemols festat woare fa emma.
7 O Herr Gott, enn dien Gonnst hast du mien stoakja Boajch bestädijcht; du deetst dien Jesejcht festäakje, ekj wea jetrubbelt;
8 Oba ekj woa dien aunroope, O Herr Gott, un ekj woa to daem Herr Gott baede.
9 Waut fonn Jewennst es doa enn mien Bloot, enn rauf to gone no dee Kul? Saul daut Stoff oppe Ead die danke? Saul daut diene Woarheit fekjindje?
10 Horjch, O Herr Gott, un ha en Jefaule aun mie; O Herr Gott, sie mien Halpa.
11 Du hast mien Truare fewaundelt enn Daunse fa mie; du hast mien Saktseijch auf jeräte, un hast mie met Freid jekjleet.
12 Soo saul mien Harlijchkjeit die preise, un nijch stel senne. O Herr Gott, mien Gott, ekj woa die Dank jäwe fa emma.
Dee 31 Psalm
To dän haupt Musikaunt, en Psalm fonn Doft.
1 Ekj socht Tooflucht enn die, O Herr Gott; lot mie niemols to schaund kome, rad mie enn diene Jerajchtijchkjeit.
2 Beaj dien Ua dol no mie, rad mie schwind, sie en stoakja Steen to mie fa en Fasting Hus fa mie, mie to rade.
3 Dan du best mien groota Steen, un miene Fastinj, leid un lenk mie omm dien Nome haulwe.
4 Brinj mie ut daut Nat daut see fa mie festoake ha, dan du best miene Krauft.
5 Ekj äwajäw mien Jeist enn dien Henj enenn, dan du hast mie aufjeleewat, O Herr Gott, dee Woarheits Gott.
6 Ekj ha dän jehaust dee nutsloose Jetta habe, oba ekj doo enn däm Herr Gott fetruehe.
7 Un ekj woa froo senne un mie freihe enn dien Erboarme, dan du hast mien Älend jeseene; du weetst dee Trubbels enn miene Seel,
8 un hast mie nijch äwajäft enn mien Fiend äare Henj; du hast miene Feet enn ne breede Städ bestädijcht.
9 Sie mie jnädijch, O Herr Gott, dan ekj sie enn Trubbel, mien Uag es moaga jeworde derjch Trua, miene Seel un mien Buk.
10 Dan mien Läwe kjemt to en enj derjch Trua, un miene Joare met sefte, miene Krauft feschwinjt wäajen miene Sind, un mien Knoakes sent oolt jeworde.
11 Ekj wea en Fe-achte mank aul miene Fiend, oba besondasch to miene Nobasch, un en Forjcht to miene Frind; dee mie buta sage rande wajch fonn mie.
12 Mensche ha fonn mie fejäte soo aus doodja Maun, fonn daut Jedajchtnes wajch, ekj sie soo aus en Jefäs daut feschwinjt.
13 Dan ekj ha daut Noräde fonn Fäl jeheat, doa wea Ansgt aun aule Kaunte, wäarent see sikj toop beräde jäajen mie, see plonde mien Laewe wajch to naeme.
14 Oba ekj deed enn die fetruehe O Herr Gott, ekj säd: "Du best mien Gott."
15 Miene Tiede sent enn diene Henj, rad mie fonn miene Fiend äare Henj un fonn dän dee mie hinjaraun sent.
16 Moak dien Jesejcht opp dien Deena to schiene; rad mie enn dien Erboarme.
17 Halp mie soo daut ekj mie nijch schäme bruck, O Herr Gott; dan ekj ha die aunjeroopt; lot dee Gottloose sikj schäme; lot dän stel senne enn daut Grauf.
18 Lot dee Leppe dee leaje stel jemoakt woare, dee onnbekjemmat jäajen dee Jerajchte räde met Stolltheit en Spott.
19 Woo Groot es dien Goots daut du oppjelajcht hast fa dän dee die ferjchte; Du hast jeoabeit fa dän dee fer Menscheit enn die fetruede.
20 Du woascht dän festäakje enn daut Jeheemet fonn dien Doasenne, fonn Mensche aea Plone; du woascht dän bedakje enn ne Bood fonn daut Sträwe met Tunje.
21 Jesäajent es dee Herr Gott, dan hee haft wunndaboa jeoabeit met sien Erboarme to mie enn ne beloagada Grootstaut.
22 Dan ekj säd enn mien Haust, ekj sie aufjeschnäde fonn diene Uage; sejchalijch hast du miene Jebäde jeheat aus ekj to die schreajch.
23 O hat däm Herr Gott leef, aul jie siene Heilje; dee Herr Gott deit dee Truehe oppbewoare, un deit dee Stollte trigj tole emm folle.
24 Sie stoakj, un Hee woat dien Hoat stoakje, aul jie dee enn däm Herr Gott hope.
Copyright © 2001 by Elmer Reimer