Revised Common Lectionary (Semicontinuous)
4 Ne Mawaltijtuk taekuj ijtik iweyka. Anmejemet nusan shimumatikan ken yaja pal anmupalewiat. Ika kwak titaekujtiwit tik tuweyka, tamik ne tateyekchijtuk, 2 pal kiane intea yawi panu ne tujtunal nakat ken kielewiat takamet asunte ken kineki Teut. 3 Ika techajsik ne panutuk pal tikchiwat ne tay ajwiak pal ne tejtechan kwak tinejnentiwit ijtik susultailwitilis, taelewilis, mutawantilis, yujyualu kan antawanket, wan teutzintankwaketzalis teyek, 4 wan yejemet te kimatit taika te anmusenputzuat kan yawit kichiwat muchi tay te yek, wan kukujtaketzat. 5 Yejemet yawit nankiliat iishpan yajane ká nemi pal kichiwa juzgar ne yujyultuk wan ne mijmiktuk, 6 wan yajika nusan muyeknawatilijtiwit ne mijmiktuk, pal yawit muchiwat juzgar ken takamet kipiat inweyka wan pal muwikat ken iijiu Teut.
7 Muchi yawia tami. Yajika, ma nemi yek anmutzuntekun wan shiktajtanikan Teut nejnejmach. 8 Ne achtu ipal muchi, ma shimutasujtakan sujsul sejse iwan sejseuk ika ne tetasujtalis kitzakwa miak tateyekchijtuk.
Ne shaput
57 Kwak tayuakik, né ajsik se takat pal Ramatay kipia wey tumin, itukay Yosep. Yaja nusan se imumachtiani Yeshu. 58 Yajki itech Pilatus kitajtani ne mikini. Kwakuni ne Pilatus tatuktij ma kimakakan, 59 wan Yosep kikwij ne mikini wan kitakentij tik se ikwenyu pupujtik, 60 wan kitalij ijtik ne yankwik shaput yaja kiwawantuk tik ne tesual, wan kimimiluj se wey tet hasta iten ne shaput, wan yajki. 61 Unisan nemituyat imelawka ne shaput Maryam pal Magdala wan ne seuk Maryam.
62 Panuk ne tunal ipal tajshitilis, wan ne weypalejmet wan ne Parishayujmet mutepewket peyna iishpan Pilatus 63 inat:
—Tajtzin, tikelnamikketa ka uni tashijshikuani ina katka yultuk:
"Kwak panut yey tunal niaw nimuyulkwi."
64 Yajika, shitatukti ma mutentzakwa yek ne shaput hasta ma panukan yey tunal pal inte welit witzet ne imujmumachtiani kichtekit ne mikini ika asu inte ijkiuni, welit kinhilwiat muchi ka yaja muyulkwij wan tipan yawit kinshijshikuat mas que achtu!
65 Ne Pilatus kinhilwij:
—Shikwikakan ne guardiaj wan shumet shiktentzakwakan ken ankimatit.
66 Yajket kitentzakwat ne shaput, wan kitetilijket yek ne tet iwan ne guardiaj.
Ne shaput
38 Tipan, sé kitajtan ne Pilatus ma kiajkawa kiana ne mikini, wan kiajkaw. Yaja Yosep ipal Ramatay, se imumachtiani Yeshu minashtuk ipanpa mawi ipal ne Yudayujmet. Ajsik wan kianki ne mikini. 39 Nusan walaj Nikodemos, ne ajsituya ka tayua kalwika sejse pajti majmalijtuk, achka sentzunti libraj. 40 Kwakuni kikwijket ne imikini wan kiululujket ijtik ikwenyu iwan pajtipuputuka, ken kichiwat katka ne Yudayujmet pal kintalpachuat ne mijmikini. 41 Kan mucruzpiluj nemituya se mil wan ijtik ne mil se yankwik shaput kan inte aka mutekatuk. 42 Ikuni kitekaket ne Yeshu ipanpa ne tajshitilis ika inte nemi wejka.
Ne Bibliaj Tik Nawat · © 2008, 2012 Jan Morrow