Revised Common Lectionary (Semicontinuous)

⁶ યહોવાએ પોતે જેને અભિષિકત કર્યા છે, તેને વિજય અપાવે છે,
    તે પવિત્ર આકાશમાંથી પોતાના જમણા હાથની
    તારક શકિતથી તેને જવાબ આપશે.
⁷ કોઇ રાષ્ટ્રો પોતાના સૈન્યો અને શસ્રો વિષે અભિમાન કરે છે,
    બીજા કોઇ તેમના રથો અને ઘોડાઓ પર અભિમાન કરે છે.
પણ અમે અમારા દેવમાં વિશ્વાસ રાખીએ છીએ.
    અમે અમારા યહોવાના નામના પોકાર કરીશું.
⁸ તેઓ નમીને પડી ગયા છે;
    પણ આપણે અડગ ઊભા રહીશુ.

⁹ હે યહોવા, અમારા રાજાને વિજય આપો.
    અમે ભાર પૂર્વક વિનંતી કરીએ છીએ ત્યારે તમે જવાબ આપો.

³ હે યહોવા, જેમનાં ચિત્ત ચલિત થતાં નથી,
    તેમને તું પૂરેપૂરી શાંતિમાં રાખે છે;
    કારણ કે તેઓ તારા પર વિશ્વાસ રાખે છે.

⁴ સદા યહોવા પર ભરોસો રાખો,
    તે જ આપણો સનાતન ખડક છે.
⁵ તેણે ઊંચી હવેલીઓમાં વસનારાઓને નીચા નમાવ્યાં છે,
    તેમના ગગનચુંબી નગરને
તેણે તોડી પાડીને ભોંયભેગુ કરી નાખ્યું છે.
    ધૂળભેગું કર્યું છે.
⁶ તે પગ તળે કચડાય છે, ને દીનદલિતોના પગ તળે તે રોળાય છે.

⁷ ન્યાયીના માર્ગે ચાલનારનો રસ્તો સુગમ છે;
    તમે યહોવા એને સરળ બનાવો છો.
⁸ અમે તમારા નિયમોને માર્ગે ચાલીએ છીએ,
    અને તમારી જ પ્રતિક્ષા કરીએ છીએ,
તમારું નામસ્મરણ એ જ અમારા
    પ્રાણની એકમાત્ર ઝંખના છે.
⁹ આખી રાત હું તમારા માટે ઉત્કંઠિત રહ્યો છું;
    મારા ખરા હૃદયથી આગ્રહપૂર્વક હું તમને શોધીશ;
કારણ કે જ્યારે તમે પૃથ્વીનો ન્યાય કરીને શિક્ષા કરો છો,
    ત્યારે લોકો પોતાની દુષ્ટતાથી પાછા ફરે છે અને યોગ્ય માર્ગે વળે છે.