Revised Common Lectionary (Semicontinuous)

⁶ યહોવાને ધન્ય છે કે જેણે અમને તેઓના દાંતમાં શિકાર તરીકે પકડાવા ન દીધા,
    અને તેમણે અમારો નાશ થવા દીધો નહિ.

⁷ જેમ પારધીની જાળમાંથી પક્ષી છટકી જાય;
    તેમ અમારા જીવ બચી ગયા છે;
    જાળ તૂટી ગઇ છે અને અમે બચી ગયા છીએ.
⁸ આકાશ અને પૃથ્વીના સર્જનહાર;
    યહોવા જ અમારા મદદગાર છે.

“કારણ, યહોવાના આશીર્વચન છે કે,
    સોહાગણ સ્ત્રી કરતાં ત્યકતાને વધારે સંતાન અવતરશે.”

² “તારો તંબુ વિશાળ બનાવ,
    તારા તંબુના પડદા પહોળા કર,
    તેની દોરી ઠેઠ સુધી લંબાવ
અને ખીલા બરાબર ઠોકી દે;
³     કારણ કે તું તારી સરહદો ચારે બાજુએ વિસ્તારીશ.
તારા વંશજો બીજી પ્રજાઓના તાબા હેઠળના પ્રદેશો કબજો કરશે
    અને વેરાન નગરોને વસતાં કરશે.
⁴ ગભરાઇશ નહિ;
    તારે ફરી શરમાવું નહિ પડે,
તારે શરમાવાનું હવે કોઇ કારણ નહિ રહે.
    તારી યુવાવસ્થાની શરમ
અને તારા વૈધવ્યનાં દુ:ખને હવેથી
    સંભારવામાં આવશે નહિ.
⁵ કારણ કે તારા સર્જનહાર જ તારા ‘પતિ’ થશે.
    ‘સૈન્યોના દેવ યહોવા’ તેમનું નામ છે;
ઇસ્રાએલના પવિત્ર દેવ
    અને સમગ્ર પૃથ્વીના યહોવા, તારા ઉદ્ધારક છે.

⁶ “તું દુ:ખમાં ડૂબેલી ત્યકતા જેવી છે.
    તારા દેવ, યહોવા,
    તને પાછી બોલાવીને કહે છે કે,
જુવાનીમાં જેનો હાથ પકડ્યો હતો
    તેને શી રીતે તજી શકાય?”
⁷ યહોવા કહે છે, “મેં ક્ષણવાર માટે તારો ત્યાગ કર્યો હતો.
    પણ હવે પુષ્કળ સહાનુભૂતિથી હું તને પાછી લાવીશ.
⁸ ક્રોધના આવેશમાં ક્ષણભર મેં તારાથી મોં ફેરવ્યું હતું.
    પણ હવે ચિરંતન કરુણાથી પ્રેરાઇને હું તારા પર દયા કરીશ.”
    એમ તારો ઉદ્ધાર કરનાર યહોવા કહે છે.

⁹ દેવ કહે છે, “આ તો નૂહના વખતના જેવું છે,
    જેમ તે વખતે મેં પ્રતિજ્ઞા કરી હતી કે,
હું ફરી કદી પૃથ્વી ઉપર જળપ્રલય નહિ લાવું.
    તેમ આજે હું તને વચન આપું છું કે,
ફરી કદી હું તારા પર ગુસ્સો કરીશ નહીં,
    કે તને ઠપકો દઇશ નહિ.”

¹⁰ યહોવા કહે છે, “ભલે પર્વતો ખસી જાય
    અને ડુંગરોનું અસ્તિત્વ નાશ પામે,
પણ મારી ભલાઇ હંમેશા તમારી સાથે રહેશે.
    તમારી સાથે કરેલો મારો શાંતિનો કરાર
    કદી ખંડિત થશે નહિ.”
એમ તમારા પર દયા કરનાર યહોવા કહે છે.