Old/New Testament
Dee 105 Psalm
1 O jäft Dank to däm Herr Gott; roopt sien Nome aun; moakt siene Woakje bekaunt mank dee Mensche.
2 Sinjt to Am; sinjt Preis to Am; räd fonn siene Wundasch.
3 Doot enn sien heilje Nomen harlijche; lot dän dee däm Herr Gott seakje sikj friehe.
4 Seakjt däm Herr Gott un siene Macht; seakjt sien Jesejcht oone Enj.
5 Behool dee Wundasch dee Hee jedone haft; siene Wundateakjens, un Jerejchte ut sien Mul.
6 O jie Obrahaum sien Some; O jie Joakopp Säns, siene Utjewälde.
7 Hee es dee Herr Gott onns Gott; siene Jerejchte sent enn aule Welt;
8 Hee haft sien Bunt behoole fa emma; daut Wuat daut hee befool to dusent Jennerazione;
9 daut Hee met Obrahaum muak, sien Eit to Isaak;
10 un Hee deed daut jrinde met Joakopp fa en Fäaschreft, to Israel fa en eewja Bunt.
11 un säd: "To die woa ekj daut Kanaan Launt jäwen, daut Loos aus dien Oafgoot,"
12 aus dee noch mau weinijch enn Numma weare; seeha weinijch, un Framde enn daut Launt,
13 un see jinje fonn Nazion no Nazion; fonn een Kjeeenichrikj no en aundret Folkj.
14 Hee erlaubd kjeen Maun an to bedrekje; jo, Hee deed Kjeenije dodle omm äa haulwe;
15 un säd: "Doot mien Enjesaulwda kjeen Schode," un, "doot miene Profeete kjeen Schode."
16 Un hee brocht ne Hungaschnoot no daut Launt; Hee bruak daut gaunset Häakunft fonn daut Broot.
17 Hee schekjt an en Maun feropp – Josef, däm aus en Sklow fekoft wort;
18 Siene Feet deede am wee wäajen dee Kjäde; siene Seel wia soo aus Iesa,
19 bott sien Wuat kjeem; däm Herr Gott sien Wuat deed am proowe.
20 Dee Kjeenijch schekjt un muak am loos, en Harscha äwa daut Folkj, un muak am frie.
21 Hee muak am Herr äwa sien Hus, en Harscha äwa aules daut hee eajend;
22 Siene Ferschte faust to binje no sien Welle, un siene Elteste Weisheit enn to leare.
23 Israel kjeem uk no Iejipte; un Joakopp wond enn Ham sien Launt.
24 En sien Folkj femead sikj seeha, un muak am stoakja aus siene Fiend.
25 Hee dreid äa Hoat sien Folkj to huasse, un lestich met siene Deena to haundle.
26 Hee schekjt sien Deena Mooses; Oant däm Hee jewält haud.
27 Dee deede Dinja fonn siene Wunda mank an, un Wundateakjens enn daut Ham Launt.
28 Hee schekjt Dunkelheit, un muak daut Diesta; un dee weare nich jäajenaun to sien Wuat.
29 Hee dreid äa Wota to Bloot un brocht äare Fesch omm.
30 Daut Launt schwoarmd met Pogge enn dee Kjeenije äare Stowe.
31 Hee räd, un schwoarme Fleaje kjeeme; un Moschkje enn äare Jrense.
32 Hee jeef an Hoagel fa Räajen, flaumendet Fia enn äa Launt.
33 Hee schluach uk äare Wienranke, un äare Fiejenbeem, un bruak dee Beem enn äare Omjäajende.
34 Hee räd, un Heischrakje kjeeme, un Warm oone Enj,
35 un dee aute aul dee Plaunte enn daut Launt; un dee aute daut Frucht fonne Ead.
36 Hee schluach uk aul dee Easchtjebuarne enn daut Launt; daut easchte Frucht fonn aul äare Macht.
37 Un he leid an rut met Selwa un Golt; un doa wia nich eena dee stolpad mank äare Jeschlachte.
38 Iejipte wia froo aus see wajch jinje, dan äare Forcht wia opp an jefolle.
39 Hee spreed ne Wolkj fa äa bedakje, un Fia an Lijcht to jäwe enne Nacht.
40 Hee fruach, un Hee jeef jacht Fäajel, un deed an tofräd stale met Äte fomm Himmel.
41 Hee muak dän Steen op, un Wota rand rut; see jinje enn dreaje Städe soo aus en Riefa.
42 Dan hee behilt sien heiljet Wuat, un Obrahaum sien Deena;
43 Un Hee brocht sien Folkj rut met Freid, siene Utjewälde met Freid;
44 un Hee jeef an dee Nazione äare Lenda; un see deede dee Oabeit oawe fonn dee Felkja,
45 soo daut dee siene Fäaschrefte beoobachte wudde un siene Jesatse hoole, Preis to däm Herr Gott.
Dee 106 Psalm
1 Preis däm Herr Gott; jeff Dank to däm Herr Gott dan Hee es goot; dan sien Erboarme es fa emma.
2 Wäa kaun däm Herr Gott siene majchtje Woakje utdrekjenn, ooda sien Preis heare moake?
3 Jesäajent sent dee, dee Jerechte hoole; dee Jerajchtichkjeit deit to aule Tiede.
4 Denkj aun mie, Herr Gott, met daut Gonst fa dien Folkj; O beseakj mie met diene Radunk.;
5 daut Goodet to seene enn diene Utjewälde; froo to senne enn dee Freid fonn diene Nazion; to juble enn dien Oafgoot.
6 Wie un onnse Fodasch ha jesindicht; wie sent Gottloos jewast, wie deede Orrajcht.
7 Oonse Fodasch festunde nich diene Wundasch enn Iejipte; dee behilde nich diene fäl Erboarmunge, un muake die Oajalich bie dän See, bie dän Rooda See.
8 Oba Hee deed dän rade omm sien Nome haulwe, sien Nome bekaunt to moake.
9 Un Hee deed dän Rooda see dodle , un dreajd dän opp; un Hee muak dän derjch daut deepet gone, soo aus derjch dee Wiltnis.
10 Un Hee rad dän fonn dän äare Haunt dee an hausste; jo, rad dän fonn dee Fiend äare Haunt.
11 Un daut Wota bedakjt dän äare Fiend, doa wia nich eena äwajebläwe.
12 Donn jleewde see siene Wead; dee sunge sien Preis.
13 see spoode sikj, see fegaute siene Woakje; see luade nich no sien Rot;
14 un dee deede opp earnst leste enne Wiltnis, en deede am proowe enn daut dreajet.
15 Un Hee jeef an äa Felange, oba schekjt Fewäsunk enn äare Seele.
16 Dee deede neide äwa Mooses un Oant sien Loaga, däm Herr Gott sien Heilja.
17 Dee Ead muak sikj op un schlukt Datan opp, un bedakjt Abiram siene Metjlieda.
18 En Fia brend mank äare Metjlieda, dee Flaum deed dee Beese opp brenne.
19 Dee muake en Kaulf enn Horeb, un deede daut jegotnet Bilt aunbäde;
20 Un see endade äare Harlichkjeit to en Bilt fonn en Oss dee Graus äte deit.
21 See fegaute Gott äa Rada dee groote Dinje deed enn Iejipte,
22 Wundasch enn daut Ham Launt; besondre Dinje bie dän Rooda See.
23 Un Hee säd daut dän sull fenicht woare; oba Sien Utjewälda Mooses haud fer Am jestone enn dän Bruch, omm sien Oaja wajch to dreihe soo daut dän nich wudd fenicht woare.
24 Un see deede daut scheene Launt feachte, en jleewde Sien Wuat nich.
25 Un see murrde enn äare Zelte un horchte nich no däm Herr Gott siene Stem;
26 Un Hee deed siene Haunt enne hecht häwe, dän faule moaken enne Wiltnis;
27 dän äa Some uk faule moake mank dee Nazione, un dän to festreihe enn dee Lenda.
28 Dee schloote sikj uk aun met Baal-peor, un aute dee Opfa fonn dee Doode;
29 un deede Am ennoajre met waut see deede; un ne Ploag bruak ut mank an.
30 Donn stunt Finias opp un deed mank staupe, un dee Ploag wort opp jehoole;
31 un am wort daut too jeräakjent fa Jerajchtichkjeit fonn Jennerazion to Jennerazion fa emma.
32 Un dee deede Am ennoajre bie dee Meriba Wotasch, soo daut daut waut schlajchtet wia fa Mooses wäajen an;
33 dan dee deede sien Jeist ennoajre soo daut hee onbesonne räd met siene Leppe.
34 Dee deede daut Folkj nich fenichte soo aus dee Herr Gott to an jesajcht haud,
35 Oba femischte sikj mank dee Felkja un leade dän äare Woakje.
36 Un dee deende äare Aufjetta , un dee weare ne Schlenj to an;
37 jo, dee deede äare Säns un äare Dajchta to dee beese Jeista opfre;
38 Un dee deede Onnschuldjet Bloot fejeete, äare Säns un äare Dajchta äa Bloot, dän see to dee Kanaanieta äare Aufjetta opfade; un daut Launt wia enjesuddelt met daut Bloot.
39 Soo weare see Onrein met äare Woakje, un dreewe Huararie enn waut see deede.
40 Un däm Herr Gott sien Oaja brend jäajen sien Folkj; en Hee deed sien Oafgoot feachte.
41 Un Hee äwajeef an enn dee Fiend äare Henj; un dee an hausste, deede äwa an rejiare.
42 Un äare Fiend deede an bedrekje; un dee deede an deemootje unja äare Henj.
43 Hee deed an fäl mol rade, oba dee stiepade sikj jäajen sien Plon, un fesunke enn äare Sind.
44 Un Hee kjikjt opp äare Noot aus Hee äa Schriehe heare deed;
45 Un Hee docht aun sien Bunt fa an, un deed sefte, no dee Menj fonn siene Erboarmunge.
46 Un Am jaumad daut äwa an wäajen aul äare Jefangenschoft.
47 Rad ons, O Herr Gott onns Gott; un saumel onns toop fonn aul dee Nazione, dien Heilja Nome Dank to jäwe, die enn Pries froo to senne.
48 Jesäajent es Israel äa Herr Gott fonn Eewijchkjeit bott Eewijchkjeit, un lot aul dee Felkja sajen, Amen, Preis däm Herr Gott!
3 En ekj, Breeda, kunn nich to junt raede aus to jeistliche, oba aus to fleeschliche, soo aus to kjleene Kjinje.
2 Ekj ha ju met Malkj jefoodat, en nich met stoakjet Aete, dan jie kunne daut nich fedroage, en kjenne nu uk noch nich,
3 dan jie sent noch fleeschlich. Dan soo aus jie noch aufjenstich sent, en doa Striet es, se jie nich fleeschlich en waundle so aus Mensche?
4 Dan wan eena sajcht: "Ekj hool met Paul", en noch eena: "Ekj hool met Apollus", se jie nich fleeschlich?
5 Dan waut es Apollus, en waut es Paul? Wie sent Deena derch waem jie tom Gloowe jekome sent, jrod soo aus de Herr to en jiedrem jejaeft haft.
6 Ekj ha jeplaunt, Apollus haft jewotat, oba Gott muak daut wause;
7 Aulsoo es dee nich waut, dee plaunte deit, uk nich dee, dee wotre deit, oba Gott dee daut wause moakt.
8 Dee doa plaunte deit, en dee doa wotre deit, sent eent; en en jieda woat jeloont woare doano aus siene Oabeit es jewast.
9 Dan wie sent Gott siene Metoabeida; jie sent Gott sien Akawoakj, jie sent Gott sien Bu.
10 No Gott siene Jnod dee mie jejaeft es, ha ekj daen Grunt jelajcht soo aus en weisa Bumeista, oba en aundra but doanopp. Oba lot en jieda eena faeasechtich senne woo hee doa bowe but.
11 Dan en aundra Grunt kaun kjeena laje buta daen dee aul jelajcht es, en daut es Jesus Christus.
12 Nu, wan irjenwaea opp dis Grunt but met Gollt, Selwa, kjestliche Steena, Hollt, Hei, Stoppel;
13 en jiedrem siene Oabiet woat jeoppenboat woare; dan dee Dach woat daut derch Fia oppenboa moake, en daut Fia woat en jiedrem siene Oabeit bewiese, wautet es.
14 Wan daut waut hee opp daen Grunt jebut haft bestone woat, dan woat hee beloont woare.
15 Wan irjenwaem sien woakj febrenne woat, woat hee Schode liede, oba hee selfst woat seelich woare, doch soo aus derch Fia.
16 Weet jie nich daut jie Gott sien Tempel sent, en daut Gott en ju wont?
17 Wan waea Gott sien Tempel to schaunde moakt, daem woat Gott to schaunde moake, dan Gott sien Tempel es heilich, en daut sent jie.
18 Lot kjeenem sikj selfst aunschmaeare. Wan irjentwaea mank ju denkt daut hee weis es enn dise Welt, lot am to en Noa woare, so daut hee Weis woare kaun.
19 Dan dise Welt Weisheit es Noarheit bie Gott, dan daut steit jeschraewe: "Hee bejript dee Weise enn aeare eajne Polluckichkjeit".
20 En wada: "De Herr kjant dee Weise aeare Jedanke, daut dee fejaefs sent..
21 Aulsoo lot kjeena sikj enn Mensche puche. Dan aules jeheat junt;
22 Auf daut Paul es, oda Apollos, oda Seefas, oda de Welt, oda Laewe, oda de Doot, oda waut jaeajenwoat es, oda waut enne Tookunft es;
23 En jie jeheare Christus aun, en Christus jeheat Gott aun.
Copyright © 2001 by Elmer Reimer