New Testament in a Year

Tinuya ng mga Kawal si Jesus^(A)

²⁷ Dinala si Jesus ng mga kawal ng gobernador sa Pretorio at tinipon nila ang buong batalyon ng mga kawal sa harapan niya. ²⁸ Siya'y kanilang hinubaran at isinuot sa kanya ang isang balabal na matingkad na pula. ²⁹ Gumawa sila ng isang koronang tinik at ipinatong sa kanyang ulo. Ipinahawak nila sa kanang kamay niya ang isang tambo at sila'y lumuhod sa harapan niya at siya'y kanilang nilibak, sa pagsasabing, “Mabuhay ang Hari ng mga Judio!” ³⁰ Siya'y kanilang dinuraan. Kinuha nila ang tambo at paulit-ulit na inihampas sa kanyang ulo. ³¹ Matapos siyang kutyain, hinubaran siya ng balabal at isinuot sa kanya ang kanyang mga damit. Pagkatapos, siya ay kanilang inilabas upang ipako sa krus.

Si Jesus ay Ipinako sa Krus^(B)

³² Habang lumalabas sila sa lungsod, nakasalubong nila ang isang lalaking taga-Cirene, na nagngangalang Simon. Pinilit nila itong magpasan ng kanyang krus. ³³ Dumating sila sa isang pook na tinatawag na Golgotha (na ang ibig sabihin ay “Ang Pook ng Bungo”). ³⁴ Doon, siya ay kanilang binigyan ^(C) ng maiinom na alak na may halong apdo. Subalit nang kanyang matikman ay ayaw niyang inumin. ³⁵ At ^(D) nang siya'y maipako nila sa krus, nagpalabunutan sila upang mapaghati-hatian ang kanyang mga damit. ³⁶ Pagkatapos, umupo sila at nagbantay sa kanya roon. ³⁷ Sa itaas ng kanyang ulo ay kanilang inilagay ang paratang sa kanya, na may ganitong nakasulat: “Ito si Jesus, ang Hari ng mga Judio.” ³⁸ May dalawang tulisan na ipinakong kasama niya, isa sa kanan at isa sa kaliwa. ³⁹ Ang mga nagdaraan ^(E) ay nangungutya sa kanya at pailing-iling ⁴⁰ na ^(F) nagsasabi, “Ikaw na magwawasak sa templo, at sa ikatlong araw ay muling magtatayo nito, iligtas mo ang iyong sarili! Kung ikaw ang Anak ng Diyos, bumaba ka sa krus!” ⁴¹ Sa gayunding paraan ay kinutya siya ng mga punong pari, kasama ng mga tagapagturo ng Kautusan at ng matatandang pinuno. Wika nila, ⁴² “Iniligtas niya ang iba ngunit hindi niya mailigtas ang kanyang sarili. Siya raw ang Hari ng Israel. Bumaba siya ngayon sa krus, at maniniwala tayo sa kanya. ⁴³ Nagtiwala ^(G) siya sa Diyos. Tingnan natin ngayon kung ililigtas siya ng Diyos, kung gusto niya, sapagkat sinabi niyang siya ang Anak ng Diyos.” ⁴⁴ Kinutya rin siya ng mga tulisang ipinako sa krus na kasama niya.

Namatay si Jesus^(H)

⁴⁵ Mula sa katanghaliang-tapat^[a] hanggang sa ikatlo ng hapon^[b] ay nagdilim sa buong lupain. ⁴⁶ At ^(I) nang malapit na ang ikatlo ng hapon, sumigaw si Jesus nang napakalakas, na sinasabi, “Eli, Eli, lama sabacthani?” na ang ibig sabihin ay “Diyos ko, Diyos ko, bakit mo ako pinabayaan?” ⁴⁷ Nang marinig ito ng ilan sa mga nakatayo roon ay sinabi nila, “Tinatawag ng taong ito si Elias.” ⁴⁸ Agad na tumakbo ^(J) ang isa sa kanila, kumuha ng isang espongha at isinawsaw sa suka,^[c] ikinabit sa isang tambo, at ibinigay sa kanya upang inumin. ⁴⁹ Ngunit ang iba'y nagsabi, “Hayaan muna ninyo siya. Tingnan natin kung darating si Elias upang siya'y iligtas.” ⁵⁰ Muling sumigaw si Jesus nang napakalakas at nalagot ang kanyang hininga.