Chronological

¹⁰ दुस्मन हाथ बढ़ाएस अउर ओकर सब उत्तिम वस्तु लूट लिहस।
    वास्तव मँ, उ पराये देस क अपने पवित्र ठउरे मँ घुसत भए लखेस।
हे यहोवा, इ हुकुम तू ही दिहे रहया कि
    उ सबइ लोग तोहरी सभा मँ प्रवेस नाहीं करिहीं।
¹¹ यरूसलेम क सबहिं लोग कराहत अहइँ, ओकर सबहिं लोग खइया क खोज मँ अहइँ।
    उ सबइ खइया जुटावइ क आपन कीमती चिजियन बेंचत अहइँ।
    उ पचे अइसा करत हीं ताकि ओनकर जिन्नगी बनी रहइ।
यरूसलेम कहत ह, “लखा यहोवा, तू मोका लखा।
    लखा, लोग मोका कइसे घिना करत हीं।
¹² मारग स होत भए जब तू सबहिं लोग मोरे लगे स गुजरत अहा तउ अइसा लगत ह जइसे धियान नाहीं देत अहा।
    किन्तु मोह पइ निगाह डावा अउर जरा लखा,
का कउनो अइसी पीरा अहइ जइसी पीरा मोका अहइ?
    का अइसा कउनो दुःख अहइ जइसा दुःख मोह पइ परा अहइ?
का अइसा कउनो कस्ट अहइ जइसा कस्ट क दण्ड
    यहोवा आपन भयंकर किरोध क दिन पइ मोका दिहस ह।
¹³ यहोवा ऊपर स आगी क पठएस ह
    अउर उ आगी मोरी हाड़न क छेद दिहस।
उ मोरे गोड़न क बरे एक फंदा फेंकेस
    अउर उ मोका पाछे ढकेल इदहस ह।
उ मोका वीरान कइ डाएस ह
    अउर मइँ बीमार रहत हउँ।

¹⁴ “मोर पाप मोह पइ जुए क नाई कसा गएन।
    यहोवा क हाथन क जरिये मोर पाप मोह पइ कसे गएन।
यहोवा क जुआ मोरे कँधन पइ अहइ।
    यहोवा मोका दुर्बल बनाइ दिहस ह।
यहोवा मोका ओन लोगन क सौंपेस जउन ओतना जियादा सक्तीसाली अहइ कि
    मइँ ओकरे संग लराइ नाहीं कइ सकत।
¹⁵ मोर सबहिं वीर जोधा क नगर क भीतर ठहिरइ क रहेन
    काहेकि यहोवा ओनका मदद नाहीं किहस किन्तु नकार दिहेस।
यहोवा मोरे विरोध मँ फुन एक भीड़ पठएस,
    उ मोर युवा फउजी क मरवावइ ओन लोगन क लिआए रहा।
यहोवा यरूसलेम क नोकरानियन क वइसे ही कुचर दिहस
    जइसे लोग अंगूर कोल्हू मँ कुचरत ह।

¹⁶ “एन सबहिं बातन क लइके मइँ चिल्लाएउँ।
    मोर नैन जल मँ बूड़ि गएन।
मोरे लगे कउनो नाहीं मोका चैन देइ।
    मोरे लगे कउनो नाहीं जउन मोका तनिक सान्ति देइ।
मोर संतानन अइसी बनिहीं जइसे उजाड़ होत ह।
    उ पचे अइसे भवा कि दुस्मन जीत गवा रहा।”

¹⁷ सिय्योन मदद बरे आपन हाथ पसारे अहइ।
    कउनो अइसा मनई नाहीं रहा जउन ओका ढाढ़स देत।
यहोवा याकूब क दुस्मनन क ओका घेर लेइ क आग्या दिहे रहा।
    यहोवा यरूसलेम असुद्ध मेहरारु क नाईं होइ गइ रहीं।

¹⁸ यरूसलेम कहा करत ह, “मइँ यहोवा क खिलाफ बिद्रोह किहस हउँ
    यह बरे उ जउन बात मोहे बरे करत ह उ उत्तिम बाटइ।
तउ, हे सबहिं लोगो, सुना।
    तू मोर कस्ट लखा।
मोर जवान मेहरारू अउर मनसेधू
    बन्दी बनाइ लइ गवा अहइँ।
¹⁹ मइँ आपन पिरेमियन क गोहराएउँ।
    किन्तु उ पचे मोका धोका दिहस।
नगर क याजक अउर बुजुर्ग
    मर गएन काहेकि उ पचे
खइया खोजेस किन्तु
    कछु नाहीं पाएन।

²⁰ “हे यहोवा, मोका लखा।
    मइँ दुःखे मँ पड़ी अहउँ।
मोर अन्तरंग बेचैन अहइ।
    मोर हिरदइ दुःखे मँ अहइ
काहेकि मइँ बिद्रोह किहा रहिउँ।
    गलियन मँ मोरे गदेलन क तरवार काट डाए अहइ।
घरन क भितरे मउत क बास रहा।

²¹ “मोर सुना, काहेकि मइँ कराहत हउँ।
    मोरे लगे कउनो नाहीं अहइ जउन मोक ढाढ़रस देइ,
मोर सब दुस्मनन मोरे दुःखन क बात सुनि लिहेन ह।
    उ पचे बहोत खुस अहइँ
काहेकि तू मोरे संग अइसा सलूक किहस।
    अब उ दिन क लइ आवा जेकर तू घोसणा किहे रह्या।
उ दिन तू मोरे दुस्मनन क वइसा ही बनाइ द्या
    जइसी मइँ अब ही अहउँ।

²² “मोरे दुस्मनन क बुरा करम क आपन समन्वा आवइ द्या।
    फिन ओनके संग तू वइसा ही करब्या
    जइसा मोरे अपराध क बदले मँ तू मोरे संग किहा।
अइसा करा काहेकि बार बार कराहत रहेउँ।
    अइसा करा काहेकि मोर हिरदइ निरास अहइ।”

⁵ यहोवा दुस्मन होइ गवा रहा
    अउर उ इस्राएल क लील लिहस।
ओकर सबहिं महलन क उ लील लिहस
    ओकर सबहिं गढ़ियन क लील लिहे रहा।
उ आपन प्रिय यहूदा बरे बहोत जियादा रुलाएस
    अउर बहोत विलाप कराएस।

⁶ यहोवा आपन ही मन्दिर नस्ट किहे रहा
    जइसे उ कउनो उपवन होइ,
उ उ ठाँव क नस्ट किहेस
    जहाँ लोग ओकर उपासना करइ बरे जमा होत रहेन।
यहोवा लोगन क अइसा बनाइ दिहस
    कि उ पचे सिय्योन मँ खास मिलन अउर आराम क खास दिनन क बिसरि जाइँ।
यहोवा याजक अउ राजा क नकार दिहस।
    उ बड़े किरोध मँ भरिके ओनका नकारेस।
⁷ यहोवा आपन ही वेदी क नकार दिहस
    अउर उ आपन उपासना क पवित्तर ठउरे क नकार दिहे रहा।
यरूसलेम क महलन क देवारन क उ दुस्मन क सौंपि दिहस।
    यहोवा क मन्दिर मँ दुस्मन सोर करत रहा।
उ पचे अइसे सोर करत रहेन
    जइसे कउनो छूट्टी क दिन होइ।
⁸ उ सिय्योन क बिटिया क
    देवार नस्ट करब सोचेस ह।
उ कउनो नापइ क डोरी स ओह पइ निसान डाएस ह।
    उ खुद क इका बिनास करइ स नाहीं रोकस।
उ दुःख मँ भरिके फसीलन
    अउर देवार क रोवाइ दिहस।

⁹ यरूसलेम क दरवाजन टुटिके धरती पइ बइठ गएन।
    फाटक क सलाखन क तोड़िके ओका तहस-नहस कइ दिहस।
सिय्यन क राजा अउर नेता लोगन
    दुसर देसन मँ बिखेर दीन्ह गएन।
ओनके बरे आजु कउनो धार्मिक सिच्छा ही नाहीं रही।
    नबी भी यहोवा स कउनो दिव्य दर्सन नहीं पउतेन।

¹⁰ सिय्योन क बुजुर्ग अब धरती पइ बइठत हीं।
    उ पचे धरती पइ बइठत हीं अउर चुप रहत हीं।
आपन माथन पइ फूल मलत हीं
    अउर सोक वस्त्र पहिरत हीं।
यरुसलेम क जुवतियन दुःख मँ
    आपन माथा धरती पइ नवावत हीं।

¹¹ जब मइँ रोवत हउँ तउ मोर नैन मँ दर्द होत ह।
    मोर अंतरंग बियाकुल अहइ।
मोरे लोगन क बिनास क कारण
    मोर मन क अइसा लागत ह जइसे
उ बाहर निकरिके धरती पइ गिरा होइ।
    गदेलन अउर दूध पइ वाले बच्चे गलियन मँ बेहोस पड़ा अहइँ।
¹² उ पचे बिलाखत भए आपन महतरियन स पुछत हीं,
    “कहाँ बाटइ महतारी, कछू क खइया अउर पिअइ क?”
    उ पचे इ सवाल अइसे पूछत हीं जइसे जख्मी सिपाही सहर क गलियन मँ गिरत प्राणन क तजत, उ पचे इ सवाल पूछत हीं।
    उ पचे आपन महतरियन क गोदी मँ लोटत भए प्राणन क तजत हीं।
¹³ हे यरूसलेम क बिटिया, मइँ केहसे तोहार तुलना करउँ?
    तोहका केकरे समान कहउँ?
हे सिय्योन क कुवाँरी कन्या,
    तोहका केहसे तुलना करउँ?
तोहका कइसे ढाढ़स बँधावउँ? तोहार जख्म सगरे जइसा बिसाल अहइ।
    अइसा कउनो भी नाहीं जउन तोहार उपचार करइ।

¹⁴ तोहार नबियन तोहरे बरे दिब्ब दर्सन लिहे रहेन।
    किन्तु उ पचे सबहिं बियर्थ अउर लबार सिद्ध भएन।
उ पचन्क तोहका बिनास स दूर रखइ बरे,
    तोहरे पापन क खिलाफ उपदेस दिन्ह चाही रहेन।
किन्तु उ पचे अइसा नाहीं किहन।
    उ पचे तोहका झूटे चिजियन क सिच्छा दिहन जउन कि तोहका भटकइ दिहेस।

¹⁵ बटोही राह स गुजरत भए
    स्तब्ध होइके तोह पइ ताली बजावत हीं।
यरूसलेम क बिदिया पइ उ पचे सीटियन बजावत
    अउर माथा नयावत हीं।
उ सबइ लोग पुछत हीं, “का इहइ उ नगरी अहइ जेका लोग कहा करत रहेन,
    ‘एक संपूर्ण सुन्नर नगर’ तथा
    ‘समुचइ संसार क आनन्द’?”

¹⁶ तोहार सबहिं दुस्मन तोह पइ आपन मुँह खोलत हीं।
    तोह पइ सीटियन बजावत हीं अउर तोह पइ दाँत पीसत हीं।
उ पचे कहा करत हीं, “हम ओनका लील लीन्ह।
    फुरइ इहइ उ दिन अहइ जेकर हमका प्रतीच्छा रही।
    अउर अब हम पचे एँका घटत भए लाखि लीन्ह।”

¹⁷ यहोवा वइसा ही किहस जइसी ओकर जोजना रही।
    उ वइसा ही किहस जइसा उ करइ बरे कहे रहा।
    बहोत दिनन पहिले जइसा उ आदेस दिहे रहा, वइसा ही कइ दिहस।
उ बर्बाद किहस, ओहका दाया तलक नाहीं आइ।
    उ तोहरे दुस्मनन क खुस किहस कि तोहारे संग अइसा घटा।
    उ तोहारे दुस्मनन क ताकत बढ़ाइ दिहस।

¹⁸ ओनका दिल यहोवा क पुकारेस।
    सिय्योन क देवार आँसुअन क
    नदी क नाई बहइ दया।
दिन अउर रात आपन आँसुअन क गिरइ द्या।
    तू ओनका जिन रोका।

¹⁹ जाग उठा।
    राति मँ विलाप करा।
राति क हर पहर क सुर मँ विलाप करा।
    आँसुअन मँ आपन मन बाहेर निकार द्या जइसा उ पानी होइ।
आपन मन यहोवा क समन्वा निकार राख।
    यहोवा क पराथना मँ आपन हाथ ऊपर उठावा।
ओहसे आपन संतानन क जीवन माँगा।
    ओहसे तू ओन संतानन क जीवन माँग ल्या जउन भूख स हर कुचे गली मँ बेहोस होइके गिर जात ह।

²⁰ हे यहोवा, मोह पइ निगाह करा।
    लखा कउन अहइ उ जेकर संग तू अइसा किहा।
तू मोहका इ सवाल पूछइ दया: का महतारी क ओन गदेलन क खाइ जा नीक अहइ
    जेनका उ जनत ह का महतारी क ओन गदेलन क खाइ जा नीक अहइ
जेनका उ पोसत रही ह का यहोवा क मन्दिर मँ याजक
    अउ नबियन क प्राणन क लीन्ह जा नीक अहइ?
²¹ लरिकन अउ बुजुर्गन
    नगर क गलियन मँ धरती पइ पड़ा रहइँ।
मोर जवान मेहररुअन अउर जवान मनसेधू
    तरवारे क धार उतारे गए रहेन।
हे यहोवा, तू आपन किरोध क दिन पइ ओनकर बध किहा ह।
    तू ओनका बगैर कउनो करुणा क मारा ह।

²² तू मोह पइ हर एक जगह स दुःख व मुसीबत अइसे बोलाया जइसे इ पर्व क दिन होइ।
    ओह दिन जब यहोवा किरोध किहस
अइसा कउनो मनई नाहीं रहा जउन बचिके भाग पाया होइ।
    जेनका मइँ बढ़ाए रहेउँ अउर मइँ पालेउँ, पोसेउँ ओनका मोर दुस्मनन मारि डाएन ह।

²⁵ यहोवा ओनके बरे उत्तिम अहइ जउन ओकर बाट जोहत हीं।
    यहोवा ओनके बरे उत्तिम अहइ जउन ओकर खोज मँ रहा करत हीं।
²⁶ इ उत्तिम अहइ कि कउनो मनई चुपचाप यहोवा क प्रतीच्छा करइ
    कि उ ओकर रच्छा करी।
²⁷ इ उत्तिम अहइ कि कउनो मनई यहोवा क जुए क धारण करइ,
    उ समइ स ही जब उ युवक होइ।
²⁸ मनई क चाही कि उ अकेल्ला चुप बइठे ही रहइ
    जब यहोवा आपन जुए क ओह पइ धरत ह।
²⁹ उ मनई क चाही कि यहोवा क समन्वा उ दण्डवत प्रणाम करइ।
    होइ सकत ह कि कउनो आस बची होइ।
³⁰ उ मनई क चाही कि उ आपन गाल कइ देइ, उ मनई क समन्वा जउन ओह पइ प्रहार करत होइ।
    उ मनई क चाही कि उ अपमान झेलइ क तत्पर रहइ।
³¹ उ मनई क चाही उ याद राखइ
    कि यहोवा कउनो क भी सदा-सदा बरे नाहीं बिसरावत।
³² यहोवा दण्ड दण्ड देत भए भी आपन कृपा बनाए राखत ह।
    उ आपन पिरेम अउ दया क कारण आपन कृपा राखत ह।

³³ यहोवा कबहुँ भी नाहीं चाहत कि लोगन क दण्ड देइ।
    ओका नाहीं भावत कि लोगन क दुःखी करइ।
³⁴ यहोवा क इ सबइ बातन नाहीं भावत हीं: ओका नाहीं भावत कि
    कउनो मनई आपन गोड़न क तले धरती क सबहिं बंदियन क कुचरी डावइ।
³⁵ ओका नाहीं भावत ह कि कउनो मनई कउनो मनई क छलइ।
    कछु लोग ओकरे मुकदमे मँ परम प्रधान परमेस्सर क समन्वा ही अइसा किया करत हीं।
³⁶ ओका नाहीं भावत कि कउनो मनई अदालत मँ कउनो स छल भरइ।
    यहोवा क एनमाँ स कउनो भी बात नाहीं भावत ह।