Chronological
यहोवा अउर देव मूरतियन
10 इस्राएल क परिवार, यहोवा क सुना। 2 जउन यहोवा कहत ह, उ इ अहइ:
“अन्य रास्ट्रन क लोगन क तरह जिन रहा।
अकासे क खास संकेतन स जिन डेराअ।
दूसर रास्ट्र ओन संकेतन स डेरात हीं जेनका उ पचे अकासे मँ लखत हीं।
किन्तु तू पचन्क ओन चीजन स नाहीं डेराइ चाही।
3 दूसर लोगन क रीति रिवाज ब्यर्थ अहइँ।
ओनकर देव मूरतियन जंगल क लकड़ी क अलावा कछू नाहीं।
ओनकर देव मूरतियन कारीगर क छैनी स बनी अहइँ।
4 उ पचे आपन देव मूरतियन क सोना चाँदी स सुन्नर बनावत हीं।
उ पचे आपन देव मूरतियन क हथौड़न
अउर कीलन स लटकावत हीं जेहसे उ सबइ लटके रहइँ, गिर न पड़इँ।
5 दूसर देसन क देव मूरतियो,
ककड़ी क खेते मँ खड़े फूस क पुतले क समान अहइँ।
उ सबइ न बोल सकत हीं,
अउर न चल सकत हीं।
ओनका उठाइके लइ जाब पड़त ह
काहेकि उ सबइ चल नाहीं सकतिन।
ओनसे जिन डेराअ।
उ सबइ न तउ तू पचन्क चोट पहुँचाइ सकत हीं
अउर न ही कउनो लाभ।”
6 यहोवा तू जइसा कउनो दूसर नाहीं अहइ।
तू महान अहा।
तोहार नाउँ महान अउर सक्तितपूर्ण अहइ।
7 परमेस्सर, हर एक मनई क तोहार सम्मान करना चाही।
तू सबहिं रास्ट्रन क राजा अहा।
तू ओनके सम्मान क पात्र अहा।
रास्ट्रन मँ अनेक बुद्धिमान मनई अहइँ।
किन्तु कउनो मनई तोहरे समान बुद्धिमान नाहीं अहइ।
8 दूसर रास्ट्रन क सबहिं लोग बेहुदा अउर मूरख अहइँ।
ओनकर देवतन क सिच्छा केवल लकड़ी क टुकड़ा अहइँ।
9 उ पचे आपन मूरतियन क तर्सीस नगर क चाँदी
अउर उफाज नगर क सोने क उपयोग कइके बनावत हीं।
उ सबइ देव मूरतियन बढ़इयन अउ सुनारन क जरिये बनाई जात हीं।
उ पचे ओन देव मूरतियन क अच्छा किसिम क कीमती नीले अउर बैंगनी वस्त्र पहिरावत हीं।
इ सबइ “कुसल कारीगरन” दुआरा बनाए गए रहेन।
10 किन्तु केवल यहोवा ही सच्चा परमेस्सर अहइ।
उ एकमात्र परमेस्सर अहइ जउन चेतन अहइ।
उ सास्वत सासक अहइ।
जब परमेस्सर किरोध करत ह तउ धरती काँप जात ह।
रास्ट्रन क लोग ओकरे किरोध क रोक नाहीं सकतेन।
11 यहोवा कहत ह, “ओन लोगन क इ सँदेसा द्या:
‘ओन लबार देवतन पृथ्वी अउ सरग नाहीं बनाएन
अउर उ पचे देवता नस्ट कइ दीन्ह जइहीं,
अउर पृथ्वी अउर सरग स लुप्त होइ जइही।’”
12 उ परमेस्सर एक ही अहइ जउन आपन सक्ति स पृथ्वी बनाएस।
परमेस्सर आपन बुद्धि क उपयोग किहस अउर संसार क रचना कइ डाएस।
आपन समुझ क अनुसार परमेस्सर पृथ्वी क ऊपर अकास क फइलाएस।
13 परमेस्सर कड़कत बिजली बनावत ह
अउर उ अकास स बड़े जल क बाढ़ क सिरावत ह।
उ पृथ्वी क हर एक स्थान पइ, अकासे मँ मेघ क उठावत ह।
उ बिजली क बर्खा क साथ पठवत ह।
उ आपन गोदामन स पवन क निकारत ह।
14 लोग एतना बेवकूफ अहइँ।
सुनार ओन देव मूरतियन स मूरख बनावा गएन ह जेनका उ पचे खुद बनाएन ह।
इ सबइ मूरतियन झूठ क अलावा कछू नाहीं अहइँ,
उ सबइ निस्कृय अहइँ।
15 उ सबइ देव मूरतियन कउनो काम क नाहीं।
उ सबइ कछू अइसी अहइँ जेनकर मजाक उड़ावा जाइ सकइ।
निआउ क समइ आवइ पइ उ सबइ देव मूरतियन नस्ट कइ दीन्ह जइहीं।
16 किन्तु याकूब क परमेस्सर ओन देव मूरतियन क समान नाहीं अहइ।
परमेस्सर सबहिं वस्तुअन क सृस्टि किहस,
अउर इस्राएल उ परिवार अहइ जेका परमेस्सर आपन लोग क रूप मँ चुनेस।
परमेस्सर क नाउँ, “सर्वसक्तिमान यहोवा” अहइ।
बिनास आवत अहइ
17 तू पचे जउन कि सहर रहत ह आपन सबहिं चिजियन जमा कइ ल्या
अउर जाइ क तइयार हो जा।
18 यहोवा कहत ह,
“इ समय मइँ यहूदा क लोगन क इ देस स बाहेर लोकाइ देब।
मइँ ओनका पीड़ा अउ परेसानी देब।
मइँ अइसा करब जेहसे उ सबइ पाठ सीख सकइँ।”
19 ओह, मइँ बुरी तरह घायल अहउँ।
मइँ ठीक नाहीं होइ सकत।
तउ भी मइँ खुद स कहेउँ,
“इ मोर बेरामी अहइ, मोका एहसे पीड़ित होइ चाही।”
20 मोर डेरा बर्बाद होइ गवा।
डेरे क सारी रस्सियन टूट गइन ह।
मोर बच्चन मोका तजि गएन।
उ पचे चला गएन।
कउनो मनई मोर डेरा लगावइ क नाहीं बचा ह।
कउनो मनई मोरे बरे सरण ठउर बनावइ क नाहीं बचा ह।
21 गड़रियन (प्रमुख) मूर्ख अहइँ।
उ पचे यहोवा क पावइ क जतन नाहीं करतेन।
उ पचे बुद्धिमान नाहीं अहइँ,
एह बरे ओनकर रेवड़न (लोग) बिखर गइन अउर नस्ट होइ गइन ह।
22 धियान स सुना।
एक कोलाहल, कोलाहल उत्तर स आवत अहइ।
इ यहूदा क नगरन क नस्ट कइ देइ।
यहूदा एक सुनसान रेगिस्तान बन जाइ।
इ गीदड़न क माँद बन जाइ।
23 हे यहोवा, मइँ जानत हउँ कि मनई फुरइ आपन जिन्नगी क मालिक नाहीं अहइ।
लोग फुरइ आपन भविस्स क जोजना नाहीं बनाइ सकत हीं।
लोग फुरइ नाहीं जानतेन कि कइसे ठीक जिअत रहा जाइ।
24 हे यहोवा, हमार अनुसान करा,
किन्तु निआव स।
किरोध मँ हमका सजा जिन द्या।
नाहीं तउ तू मोका नस्ट कइ देब्या।
25 जदि तू कोहान अहा तउ दूसर रास्ट्रन क सजा द्या।
उ पचे, न तोहका जानत हीं न ही तोहार सम्मान करत हीं।
उ सबइ लोग तोहार आराधना नाहीं करतेन।
ओन रास्ट्रन याकूब क परिवारे क नस्ट किहन।
उ पचे इस्राएल क पूरी तरह बर्बाद कइ दिहन।
उ पचे इस्राएल क जन्मभूमि क नस्ट किहन।
करार टूटी
11 इ उ सँदेसा अहइ जउन यिर्मयाह क मिला। यहोवा क इ सँदेसा आवा। 2 “यिर्मयाह इ करार क सब्दन क सुना। एन बातन क बारे मँ यहूदा क लोगन स कहा। इ सबइ बातन यरूसलेम मँ रहइवाले लोगन स कहा। 3 ओन लोगन स कहा: इ उ अहइ, जउन इस्राएल क परमेस्सर यहोवा कहत ह, ‘जउन मनई इ करार क पालन नाहीं करी ओह सरापि जाइँ। 4 इ उ करार रही जेका मइँ तोहरे पुरखन क संग किहेउँ, जब मइँ ओनका मिस्र स बाहेर लिआएउँ। मिस्र अनेक मुसीबतन क जगह रही इ लोहा क टेघराइ देइवाली गर्भ भट्टी क तरह रही।’ मइँ ओन लोगन स कहेउँ, ‘मोर आग्या माना अउर उ सब करा जेकर मइँ तू पचन्क आदेस देउँ। जदि तू पचे इ करब्या तू मोर लोग होब्या अउर मइँ तोहार पचन्क परमेस्सर होब।’
5 “मइँ इ तोहार पचन्क पुरखन क दीन्ह गए वचन क पूरा करइ बरे करत रहेउँ ह। मइँ ओनका बहोत उपजाउ भुइँया देइ क प्रतिग्या किहेउँ, अइसी भुइँया जेहमाँ दूध अउर सहद की नदी बहत अहइ अउर आजु तू पचे उ देस मँ रहत अहा।”
मइँ जवाब दिहेउँ, “हे यहोवा, आमीन।”
6 यहोवा मोहसे कहेस, “यिर्मयाह, इ सँदेसा क सिच्छा यहूदा क नगरन अउर यरूसलेम क सड़कन पइ द्या। सँदेसा इ अहइ, ‘इ करार क बातन क सुना अउर तब ओन नेमन क पालन करा। 7 मइँ तोहरे पचन्क पुरखन क मिस्र देस स बाहेर लिआवइ क समइ एक चिताउनी दिहे रहेउँ। मइँ ओनसे आपन आग्या क पालन करइ बरे कहेउँ। 8 किन्तु तोहरे पचन्क पुरखन मोर एकउ न सुनेन। उ पचे हठी रहेन अउर उहइ किहन जउन ओनकर आपन बुरे हिरदय चाहेन। तउ मइँ उ सबइ बिपत्तियन जउन मोर करार मँ लिखा भवा ह ओह पइ लाएस, जउन कि मोर अवग्या करइ स मिलइ चाही जे उ पचे किहेस ह।’”
9 यहोवा मोहसे कहेस, “यिर्मयाह, मइँ जानत हउँ कि यहूदा क लोग अउर यरूसलेम क निवासी लोग गुप्त जोजनन बनाइ राखेन ह। 10 उ सबइ लोग वइसे ही पाप करत अहइँ जेनका ओनकर पुरखन किहन ह। ओनकर पुरखन मोर सँदेस क सुनइ स इन्कार किहेन। उ पचे दूसर देवतन क अनुसरण किहन अउर ओनका पूजेन। इस्राएल क परिवार अउर यहूदा क परिवार उ करार क तोड़ेन ह जेका मइँ ओनके पुरखन क संग किहे रहेेउँ।”
11 एह बरे यहोवा कहत ह: “मइँ यहूदा क लोगन पइ हाली ही भयंकर विपत्तियन ढाउब। उ पचे बच नाहीं पइहीं अउर जब उ पचे मदद बरे मोका गोहरइहीं। मइँ ओनकर एक न सुनब। 12 यहूदा क नगरन क लोग अउर यरूसलेम नगर क लोग जइहीं अउर आपन देव मूरतियन स पराथना करिहीं। उ सबइ लोग ओन देव मूरतियन क सुगन्धि यहूदा धूप वारत हीं। किन्तु उ सबइ देव मूरतियन क लोगन क मदद नाहीं कइ पइहीं जब उ भयंकर विपत्ति क समइ आइ।
13 “यहूदा क लोगो, तोहरे पचन्क लगे बहोत स देवमूरतियन अहइँ, हुआँ ओतनी देवमूरतियन अहइँ जेतना यहूदा नगर मँ अहइँ। तू पचे उ घिनौनी बाल क पूजा बरे बहोत स बेदियन बनाइ राख्या ह यरूसलेम मँ जेतनी सड़कन अहइँ ओतनी ही वेदियन अहइँ।
14 “यिर्मयाह, जहाँ तलक तोहार बात अहइ, यहूदा क एन लोगन बरे पराथना न करा। ओनके बरे याचना न करा। मइँ ओनका नाहीं सुनब जब उ कस्ट मँ रहिहीं अउ मोहसे मदद बरे गोहारहीं।
15 “मोर प्रिया (यहूदा) मोरे घरे मँ काहे अहा?
ओका हुवाँ रहइ क अधिकार नाहीं अहइ।
उ बहोत स बुरे काम किहेन ह,
यहूदा का तू सोचति अहा कि खास प्रतिग्यन
अउर पसु बलि तोहका बर्बाद होइ स बचाइ लेइहीं?
का तू आसा करति अहा कि तू ओका बलि भेट कइके सजा पावइ स बच जाबिउ?”
16 यहोवा तोहका एक ठु नाउँ दिहे रहा।
“उ तोहका हरा भरा जैतून क बृच्छ कहे रहा जेकर सुन्दरता निहारइ क जोग्य अहइ”
किन्तु एक प्रबल आँधी क गरज क संग,
यहोवा उ बृच्छ क आगी मँ झुलसाई देइ अउर एकर डारन जरि जइहीं।
17 सर्वसक्तिमान यहोवा तोहका रोपेस, अउर उ इ घोसना किहेस ह कि तोहे पइ बर्बादी डाउब्या। काहेकि इस्राएल क रास्ट्र अउर यहूदा क परिवार बुरे करम किहेन ह। उ पचे बाल क बलि भेंट कइके मोका क्रोधित किहेन ह।
यिर्मयाह क खिलाफ बुरी जोजनन
18 यहोवा मोका देखाएस कि अनातेन क मनई मोरे खिलाफ सड्यंत्र करत अहइँ। यहोवा मोका उ सब देखाएस जउन उ पचे करत अहइँ। एह बरे मइँ जानेउँ कि उ पचे मोरे खिलाफ रहेन। 19 जब यहोवा मोका देखाएस कि लोग मोरे विरूद्ध अहइँ एकरे पहिले मइँ उ भोले मेमने क समान रहेउँ जउन काट दीन्ह जाइ क प्रतीच्छा मँ होइ। मइँ नाहीं समुझत रहेउँ कि उ पचे मोरे खिलाफ अहइँ। उ पचे मोरे बारे मँ इ कहत रहेन: “आवा, हम लोग पेड़ अउर ओकर फल क नस्ट कइ देइ। आवा हम ओका मारि डाइ। तब लोग ओक बिसरि जइहीं।” 20 किन्तु यहोवा तू एक निआइ निआवाधीस अहा। तू लोगन क हिरदय अउर मन क परीच्छा करइ जानत अहा। मइँ आपन तर्कन क तोहरे समन्वा प्रस्तुत करब अउर मइँ तोहका ओनका सजा देइ क कहब जेकर उ पचे पात्र अहइँ।
21 अनातोन क लोग यिर्मयाह क मार डावइ क जोजना बनावत रहेन। ओन लोग यिर्मयाह स कहेन, “यहोवा क नाउँ भविस्सवाणी न करा वरना हम तोहका मार डाउब।” यहोवा अनातोत क ओन लोगन क बारे मँ निर्णय लिहस। 22 सर्वसक्तिमान यहोवा कहेस, “मइँ हाली ही अनातोत क ओन लोगन क सजा देब। ओनकर नउजवान जुद्ध मँ मारा जइहीं। ओनकर पूत अउर बिटियन भूखन मरिहीं। 23 अनातोत नगर मँ कउनो भी मनई नाहीं बची। कउनो मनई जिअत नाहीं रही। मइँ ओनका सजा देब। मइँ ओनके संग कछू बुरा घटित होइ देब।”
यिर्मयाह परमेस्सर स सिकाइत करत ह
12 यहोवा। मइँ तोहसे तर्क करत हउँ,
तू सदा सही निकरत ह।
किन्तु मइँ तोहसे ओन सब क बारे मँ पूछइ चाहत हउँ जउन सही नाहीं लगतिन।
दुट्ठ लोग सफल काहे अहइ?
जउन तोह पइ बिस्सास नाहीं करतेन, ओनकर जीवन ऍतना सुखी काहे अहइ?
2 तू ओन दुट्ठ लोगन क हिआँ बसाया ह।
जउन मजबूत जरवाले पौधे अहइँ जउन बढ़त अउ फल देत हीं।
आपन मूँह स उ पचे तोहका आपन नजदीकी अउर प्रिय कहत हीं।
किन्तु आपन हिरदइ स उ पचे असल मँ तोहसे बहोत दूर अहइँ।
3 मुला मोर यहोवा, तू मोरे हिरदइ क जानत ह।
तू मोका अउर मोरे मन क लखत अउर परखत अह,
मोर हिरदइ तोहरे संग अहइ।
ओन दुट्ठ लोगन क मारी जाइवाली भेड़ी क नाई घसीटा।
बलि दिवस बरे ओनका चुना।
4 कब तलक भुइँया पियासी पड़ी रहब?
घास कब तलक झुरान अउ मरी रही?
इ भूइँया क जनावर अउर पंछी मर चुका अहइँ
अउर उ दुट्ठ लोगन क अपराध अहइ।
काहेकि उ सबइ दुट्ठ लोग किहा,
“उ हम लोगन क अन्त नाहीं लखिहीं।”
परमेस्सर क यिर्मयाह क जवाब
5 “यिर्मयाह, जदि तू मनइयन क गोड़ दौड़ मँ थक जात ह
तउ तू घोड़न क मुकाबले मँ कइसे दउड़ब्या?
जदि तू सुरच्छित देस मँ थक जात ह
तउ तू यरदन नदी क किनारन पइ उहइ भयंकर कँटीली झाड़ियन मँ पहोंचिके का करब्य?
6 इ सबइ लोग तोहार आपन भाई अहइँ।
तोहरे आपन परिवार क सदस्य तोहरे खिलाफ जोजना बनावत अहइँ।
तोहरे आपन परिवार क लोग तोह पइ चिचियात अहइँ।
जदि उ सबइ मीत जइसा बोलइँ, ओन पइ बिस्सास जिन करा।”
यहोवा आपन लोगन अर्थात् यहूदा क तजत ह
7 “मइँ (यहोवा) आपन घर तजि दिहे हउँ।
मइँ आपन बिरासत अस्वीकार कइ दिहे हउँ।
मइँ जेहसे (यहूदा) पियार किहे हउँ,
ओका ओकरे दुस्मनन क दइ दिहे हउँ।
8 मोर आपन लोग मोरे बरे जंगली सेर बन गवा अहइँ।
उ पचे मोह पइ गरजत हीं, एह बरे मइँ ओनसे घिना करत हउँ।
9 मोर आपन लोग गीधन स घेरा भवा,
मरत भवा जनावर बन गवा अहइँ।
उ सबइ पंछी ओह पइ मँडरात अहइँ।
जंगली जनावरो आवा।
अगवा बढ़ा, खाइ क कछू पावा।
10 अनेक गड़रियन मोरे अंगूरे क खेतन क नस्ट किहेन ह।
अउ मोरे खेत क पौधन क रौंदेन ह।
ओन गड़रियन मोर सुन्नर खेत क सुनसान रेगिस्तान मँ बदलेन ह।
11 उ पचे मोरे खेत क रेगिस्तान मँ बदल दिहन ह।
इ झुराइ गवा अउर मरि गवा।
कउनो भी मनई हुवाँ नाहीं रहत।
पूरा देस ही सुनसान रेगिस्तान अहइ।
उ खेते क देखभाल करइवाला कउनो मनई नाहीं बचा ह।
12 अनेक फउजी ओन सूनी पहाड़ियन क रौंदत गएन ह।
यहोवा ओन फउजन क उपयोग उ देस क सजा देइ बरे किहस।
समस्त देस बार्बाद रगिस्तान अहइ,
किन्तु एकर देख-रेख करइवाला कउनो नाहीं अहइ।
13 लोग गोहूँ बोइहीं, किन्तु उ पचे सिरिफ काँटा ही कटिहीं।
उ सबइ बहोत जियादा थकइ तलक काम करिहीं,
किन्तु उ पचे आपन सारे कामन क बदले कछू भी नाहीं पइहीं।
उ पचे आपन फसल पइ लजाइ जइहीं।
यहोवा क किरोध इ सब कछू किहस।”
इस्राएल क पड़ोसियन क यहोवा क बचन
14 यहोवा जउन कहत ह, उ इ अहइ: “मइँ तू पचन्क बताउब कि मइँ इस्राएल देस क चारिहुँ कइँती रहइवाले सबहिं लोगन बरे का करब। उ सबइ लोग बहोत दुट्ठ अहइँ। उ पचे उ देस क नस्ट किहेन जेका मइँ इस्राएल क लोगन क दिहे रहेउँ। मइँ ओन दुट्ठ लोगन क उखाड़ब अउर ओनके देस स ओनका बाहेर लोकाइ देब। अउ मइँ यहूदा क ओकर बीच स उखाड़ देब। 15 किन्तु ओन लोगन क ओनके देस स उखाड़ फेकइ क पाछे मइँ ओनके बरे अफसोस करब। मइँ हर एक परिवार क ओनकर आपन सम्पत्ति अउर आपन भुइँया पइ वापस लिआउब। 16 मइँ चाहत हउँ कि उ सबइ लोग अब मोरे लोगन क तरह रहब सीख लेइँ। बीते समइ मँ ओन लोग हमरे लोगन क सपथ खाइ बरे बाल क नाउँ क उपयोग करब सिखाएन। अब, मइँ चाहत हउँ कि उ सबइ लोग सीखइ ल्या कि मोर नाउँ कइसे उपयोग करइ होइ। मइँ चाहत हउँ कि उ सबइ लोग कहइँ, ‘काहेकि यहोवा सास्वत अहइ।’ जदि उ सबइ लोग वइसा करत हीं तउ मइँ ओनका सफल होइ देब अउर ओनका आपन लोगन क बीच रहइ देब। 17 किन्तु जदि कउनों रास्ट्र मोरे सँदेसा क अनसुना करत ह तउ मइँ ओका पूरी तरह नस्ट कइ देब।” यहोवा कहत ह।
अधो वस्त्र
13 जउन यहोवा मोहसे कहेस उ इ अहइ: “यिर्मयाह, आवा अउर एक ठु सन (कीमती सूती कपड़ा) क अधोवस्त्र बेसहा। तब एक आपन कमर मँ लपेटा। अधोवस्त्र क गीला न होइ द्या।”
2 एह बरे मइँ एक ठु सन क अधोवस्त्र बेसहेउँ, जइसा कि यहोवा करइ क कहे रहा अउर मइँ एका आपन कमर मँ लपेटेउँ। 3 तब यहोवा क सँदेसा मोरे लगे दुबारा आवा। 4 सँदेसा इ रहा: “यिर्मयाह आपन बेसहा गए अधोवस्त्र क ल्या अउर परात क जा। अधोवस्त्र क चट्टानन क दराइ मँ छिपाइ द्या।”
5 एह बरे मइँ परात गएउँ अउर जइसा यहोवा कहे रहा, मइँ अधोवस्त्र क हुवाँ छुपाइ दिहेउँ। 6 कइउ दिनन बाद यहोवा मोहसे कहेस, “यिर्मयाह, अब तू परात जा। उ अधोवस्त्र क ल्या जेका मइँ छुपावइ क कहे रहेउँ।”
7 एह बरे मइँ परात क गएउँ अउर मइँ खोदके अधोवस्त्र क निकारेउँ, मइँ ओका चट्टानन क दरार स निकारेउँ जहाँ मइँ ओका छुपाइ राखे रहेउँ। किन्तु अब मइँ अधोवस्त्र क पहिर नाहीं सकत रहेउँ काहेकि उ गलि चुका रहा, उ कउनो भी काम क नाहीं रह गवा रहा।
8 तब यहोवा क सँदेसा मोका मिला। 9 यहोवा जउन कहेस, उ इ अहइ: “अधोवस्त्र गल चुका बा अउर कउनो भी काम क नाहीं रह गवा ह। इहइ प्रकार मइँ यहूदा अउर यरूसलेम क घमण्डी लोगन क बर्बाद करब। 10 उ पचे मोरे सँदेसन क सुनइ स इन्कार किहेन ह। उ पचे हठी अहइँ अउर उ पचे सिरिफ उ करत हीं जउन उ पचे करइ चाहत हीं। उ पचे दूसर देवतन क अनुसरण अउर ओनकर पूजा करत हीं। उ पचे यहूदा क लोग इ सने क अधोवस्त्र क तरह होइ जइहीं। उ पचे बर्बाद होइहीं अउर कउनो काम क नाहीं रइहीं। 11 अधोवस्त्र मनई क कमर स कसिके लपेटा जात ह। उहइ तरह मइँ पूरे इस्राएल अउर यहूदा क परिवारन क आपने चारिहुँ कइँती लपेटेउँ।” इ सँदेसा यहोवा क हिआँ स अहइ। “मइँ वइसा एह बरे किहेउँ कि उ सबइ लोग मोर लोग होइहीं। तब मोर लोग मोका जस, तारीफ अउर प्रतिस्ठा प्रदान करिहीं। किन्तु मोर लोग मोर एक नाहीं सुनेन।”
यहूदा क चेताउनियन
12 “यिर्मयाह, यहूदा क लोगन स कहा: ‘इस्राएल क परमेस्सर यहोवा जउन कहत ह, उ इ अहइ: हर एक दाखरस क मसक दाखरस स भरी जाइ चाही।’ उ सबइ लोग हँसिहीं अउर तोहसे कहिहीं, ‘निहचय ही हम जानित ह कि हर एक दाखरस क मसक दाखरस स भरी जाइ चाही।’ 13 तब तू ओनसे कहब्या, ‘यहोवा जउन कहत ह उ इ बाटइ: मइँ इ देस क हर एक निवासी क ओन राजा क जउन दाऊद क सिंहासने पइ बइठत हीं, याजकन, नबियन अउर सबहिं लोगन क मदमत्त क नाई बेसहारा करब। 14 मइँ यहूदा क लोगन क ठोकर खाइ अउर एक दूसरे पइ महराइ देब। पिता अउ पूत एक दूसर पइ भहरइहीं।’ इ सँदेसा यहोवा क अहइ। ‘मइँ ओनके बरे अफसोस नाहीं करब अउर न ओन पइ द्या। मइँ करूणा क, यहूदा क लोगन क नस्ट करइ स रोकइ नाहीं देब।’”
15 सुना अउ धियान द्या।
यहोवा तू पचन्क सँदेस दिहे अहइ।
घमण्डी जिन बना।
16 आपन परमेस्सर यहोवा क सम्मान करा,
ओकर स्तुति करा नाहीं तउ उ अँधियारा लाई।
अँधेरी पहाड़ियन पइ लड़खड़ाइ अउर गिरइ स पहिले ओकर स्तुति करा।
यहूदा क लोगो, तू पचे प्रकास क आसा करत अहा।
किन्तु यहोवा प्रकास क घोर अँधियारा मँ बदली।
यहोवा प्रकास क बहोत गहिर आँधियारा स बदल देई।
17 यहूदा क लोगो, जदि तू पचे यहोवा क अनसुनी करत अहा
तउँ मइँ छुपि जाब अउर रोउब।
तोहार पचन्क घमण्ड मोका रोवाई।
मइँ फूटि-फूटिके रोउब।
मोर आँखिन आँसुअन स भरि जइहीं।
काहेकि यहोवा क रेवड़ धरी जाइ।
18 इ सबइ बातन राजा अउर ओकर रानी स कहा,
“आपन सिंहासनन स उतरा।
तोहार पचन्क सुन्नर मुकुट तोहरे पचन्क मूँड़न स गिर चुका अहइँ।”
19 नेगव रेगिस्ताने क नगरन मँ ताला पड़ चुका अहइ,
ओनका कउनो खोल नाहीं सकत।
यहूदा क लोगन क देस निकारा दिया जाइ चुका बाटइ।
ओन सबहिं क बंदी क रूप मँ लइ जावा गवा अहइ।
20 यरूसलेम, धियान स लखा।
दुस्मनन क उत्तर स आवत लखा।
तोहार पचन्क रेवड़ कहाँ अहइँ?
परमेस्सर तू पचन्क सुन्नर रेवड़ दिहे रहा।
तू पचन्स उ रेवड़ क देखरेख क आसा रही।
21 जब यहोवा उ रेवड़ क हिसाब तू पचन्स माँगी
तउ तू पचे ओका का जवाब देब्या?
तू पचन्स आसा रही कि तू पचे परमेस्सर क बारे मँ लोगन क सिच्छा देब्या।
तोहरे पचन्क नेता लोगन स लोगन क अगुवई करइ क आसा रही।
लेकिन उ पचे इ कारज नाहीं किहन।
एह बरे तू पचन्क बहोत दुःख व पीरा भुगतइ होइ।
22 तू पचे आपन स पूछ सकत अहा,
“इ बुरी बिपत्ति मोह पइ काहे आइ?”
इ सबइ बिपत्तियन तोहरे पचन्क अनेक अपराधन क कारण आई।
तू पचन्क निर्वस्त्र कीन्ह गवा अउर तोहार संग
हिसंक अउर सरमनाक बेउहार कीन्ह गवा।
23 एक ठु करिया मनई आपन चमड़ी क रंग बदल दिहस।
अउर कउनो चीता आपन धब्बन नाहीं बदल सकत।
ओ यरूसलेम, उहइ तरह तू भी बदल नाहीं सकत्या, नीक काम नाहीं कइ सकत्या।
तू सदा ही बुरे करम करत अहा।
24 “मइँ तू पचन्क आपन घर तजइ क मजबूर करब,
जब तू पचे पराब्या तब हर दिसा मँ दउड़ब्या।
तू पचे उ भूसे क तरह होब्या जेका रेगिस्ताने क हवा उड़ाइ लइ जात ह।
25 इ सबइ उ सबइ चीजन अहइँ जउन तोहरे पचन्क संग होइहीं,
इ मोर जोजना क तोहार पचन्क हींसा अहइ।”
इ सँदेसा यहोवा क अहइ।
“इ काहे होइ?
काहेकि तू पचे मोका बिसरि गया,
तू पचे लबार देवतन पइ बिस्सास किहा।
26 यरूसलेम मँ, मइँ तोहरे पचन्क वस्त्र उतारब
लोग तोहार नंगा होइ के देखिहीं
अउर तू पचे लज्जा स गड़ जाब्या।
27 मइँ ओन खउफनाक कामन क लखेउँ जउन तू किहा।
मइँ तोहका हँसत अउर आपन पिरेमियन क संग तने क सम्बन्ध करत लखेउँ।
मइँ जानत हउँ कि तू रण्डी क तरह दुस्कर्म किहे ह।
मइँ तोहका पहाड़ियन अउर खेतन मँ लखेउँ ह।
यरूसलेम, इ तोहरे बरे बहोत बुरा होइ।
तू कब तलक आपन गंदे पापन क करत रहब्या?”
Awadhi Bible: Easy-to-Read Version. Copyright © 2005 Bible League International.