Chronological

¹¹ हे अस्सूर, एक मनई तोहसे ही आवा अहइ।
    जउन यहोवा क खिलाफ सड्यंत्र रचेस अउर पापे स भरी सलाह दिहस।
¹² यहोवा यहूदा स इ सबइ बातन कहे रहा:
“अस्सूर क जनता पूरी सक्तीसाली अहइ।
    ओकरे लगे बहोत स फउजी अहइँ।
    मुला ओन सबन्क काटिके लोकाइ दीन्ह जाइ।
    सबन्क अन्त कीन्ह जाइ।
हे मोर लोगो, मइँ तू पचन्क बहोत स कस्ट दिहेउँ
    मुला अब आगे तू पचन्क अउर कस्ट नाहीं देबउँ।
¹³ अब मइँ तोहरे पचन क काँधे स उ जुआ उतारि देब।
    तोहार सबन्क जंजीरन जेनमाँ मँ तू पचे बँधा अहा
    मइँ अब तोरि देब।”

¹⁴ हे अस्सूर क राजा, तोहरे बारे मँ यहोवा इ आदेस दिहस ह:
    “तोहार नाउँ लेवइया कउनो भी संतान न रही।
तोहार खुदी भइ मूर्तियन अउ धातु क मूर्तियन क मइँ बर्बाद कइ देब
    जउन तोहरे देवतन क मन्दिरन मँ रखा भवा अहइँ।
मइँ तोहरे बरे कब्र बनावत हउँ
    काहेकि तोहार अंत आवति अहइ।”

¹⁵ लखा यहूदा।
    लखा हुआँ, पहाड़े क ऊपर स कउनो आवत अहइ।
    कउनो हरकारा सुसंदेस लइकि आवत अहइ।
    लखा उ कहत अहइ कि हिआँ पइ सान्ति अहइ।
यहूदा, तू आपन खास छुट्टी क दिन मनाइ ल्या।
    यहूदा, तू आपन मन्नतन मनाइ ल्या।
अब फुन कबहुँ दुर्जन तोह पइ वार न करिहीं अउर उ पचे फुन तोहका हराइ न पइहीं।
    ओन सबहिं दुर्जनन क अन्त कइ दीन्ह ग अहइ।

³ ओन जोधन क ढार लाल बाटइ।
    ओकरे फउजियन क वदिर्यन चमकीला लाल कपड़ा स बना अहइँ।
जब उ जुद्ध बरे तइयार होत हीं,
    ओकरे रथन पौलिस कीन्ह भवा लोहा क जइसा चमकत अहइँ।
    ओनकर भालन जुद्ध बरे तइयार रहत अहइँ।
⁴ ओनकर रथन गलियन मँ बहोत तेजी स भागत परात अहइँ।
    उ सबइ नगर क चउराहन मँ आगे पीछे भागत हीं।
उ सुलगत मसालन स देखाँत हीं
    अउर अइसे लगात हीं जइसे बिजुरी हिआँ-हुवाँ चमकत होइ।

⁵ राजा आपन ओन फउजियन क बोलावत अहइ जउन सर्वश्रेष्ठ अहइँ।
    मुला उ पचे आपन रास्ते मँ ठोकर खात अहइँ।
उ पचे किला क कइँती दउड़त अहइँ,
    अउर उ पचे सुरच्छा अवरण बनावत अहइँ।
⁶ मुला उ सबइ दुआर जउन नदियन क किनारे अहइँ, खुला अहइँ।
    दुस्मन ओनमाँ स जात अहइ अउर राजा क महल क गलाइके बैठाइ देत ह।
⁷ लखा, इ दुस्मन रानी क उठाइ लइ जात ह
    अउर ओकर दासियन बिलखत हीं जइसेन दुःखे स भरी भइन कबूतरिन होइँ।
    उ पचे आपन दुःख परगट करइ बरे आपन छाती पीटति अहइँ।

⁸ नीनवे अइसे तलाब जइसा होइ ग अहइ जेकर पानी बहिके बाहेर निकरत होइ।
    उ सबइ लोग पुकारिके कहत अहइँ,
“रुका! रुका! ठहरे रहा, कहूँ पराइ जिन जा।”
    मुला कउनो न ही रुकत बाटइ अउर न ही कउनो ओन पइ धियान देत ह!

⁹ हे फउजियो, तू पचे जउन नीनवे क बिनास करत अहा।
    तू पचे चाँदी लइ ल्या अउर इ सोना लइ ल्या।
हिआँ पइ लेइके बहुतेरी चिजियन अहइँ।
    हिआँ पइ बहोत स खजाना भी अहइँ!
¹⁰ अब नीनवे खाली अहइ,
    सब कछू लुटि ग अहइ।
    सहर बर्बाद होइ ग अहइ।
लोग आपन हिम्मत खोइ दिहे बाटेन।
    ओनकर मन डर स टेघरत बाटेन,
ओनकर घुटना आपुस मँ टकरात अहइँ।
    ओनकर तन काँपत अहइ,
    ओनकर मुँहना डरे स पिअर पड़ि गवा अहइँ।

¹¹ नीनवे जउन कबहुँ सिंह क माँद रहा,
    अब उ कहाँ अहइ?
जहाँ सिंह अउ सिंहिनी रहा करत रहेन।
    ओनकर बच्चन बेडर रहेन।
¹² जउन सिंह (नीनवे क राजा) आपन बच्चन
    अउ सबइ मादा क तृप्ति देइ बरे केतना ही सिकार मारे रहा।
उ माँद अउर आपन गुफा क
    ओसे भरेस जेनका मारे रहा।

¹³ सर्वसक्तीमान यहोवा कहत ह,
    “नीनवे, मइँ तोहरे खिलाफ हउँ।
मइँ तोहरे रथन क जुद्ध मँ बारि देब।
    जुद्ध मँ मइँ तोहरे ‘जवान सिंहन’ क हत्या करब।
    तू फुन कबहुँ इ धरती पइ कउने भी आपन सिकार नाहीं मारि पाइ।
लोग फुन कबहुँ तोहरे सँदेसवाहकन क
    वाणियन क नाहीं सुनिहीं।”

⁵ सर्वसक्तीमान यहोवा कहत ह,
“हे नीनवे, मइँ तोहरे खिलाफ अहउँ।
    मइँ तोहरे ओढ़ना क तोहरे मुँहना तलक उठाइ देब।
तोहरी नंगी देह क सारे देसन क देखाउब।
    मइँ तोहार लज्जा राज्जन क देखाउब।
⁶ मइँ तोहरे ऊपर घिनौनी चीज लोकाउब।
    मइँ तोहसे घिना क संग बर्ताव करब।
    लोग तोहका लखिहीं अउर तोह पइ हँसिही।
⁷ जउन कउनो भी तोहका लखी तोहसे दूर पराई।
    उ पचे कहब, ‘नीनवे नस्ट होइ गवा,
    मुला कउन ओकरे बरे रोब्या?’
मइँ कहाँ देखउँ जउन तोहका सुख चैन देइ?”