Chronological

⁶ “तेज धावक पराइके निकरि नाहीं सकतेन।
    ताकतवर फउजी बचिके पराइ नाहीं सकत।
उ पचे सबहिं ठोकर खइहीं
    अउर उत्तर मँ परात नदी क किनारे पइ गिरब्या।
⁷ नील नदी क नाई कउन उमड़त आवत अहइ?
    उ बलवती अउ तेज नदी क नाई कउन बढ़त बाटइ?
⁸ इ मिस्र अहइ जउन उमड़त नील नदी जइसा आवति अहइ।
    इ मिस्र अहइ जउन बलवती तेज नदी जइसा आवत अहइ।
मिस्र कहत ह: ‘मइँ आउब अउर पृथ्वी क पाट देब,
    मइँ नगरन अउर ओनकर लोगन क बर्बाद कइ देब।’
⁹ घुड़सवारो, जुद्ध मँ टूट पड़ा।
    सारथियो, तेज हाँका।
वीर फउजियो, अगवा बढ़।
    वूस अउर पूत क फउजियो, आपन ढालन ल्या।
    लूदीया क फउजियो, आपन धनुस सँभारा।

¹⁰ “किन्तु उ दिन, हमार सुआमी सर्वसक्तीमान यहोवा बिजयी होइ।
    उ समइ उ ओन लोगन क सजा देइ जेनका सजा मिलत ह।
यहोवा क दुस्मन उ सजा पइहीं जउन ओनका मिलइ क अहइ।
    तरवार तब काटी जब तलक उ गोंठिल नाहीं होइ जात।
तरवार तब तलक मारी जब तलक एकर खून क पियास बुझ नाहीं जात।
    इ होइ, काहेकि इ सबइ हमार सुआमी सर्वसक्तीमान यहोवा बरे बलि भेंट होत ह।
    उ बलि मिस्र क फउज अहइ जउन परात नदी क किनारे उत्तरी पहँटा मँ अहइ।

¹¹ “मिस्र, गिलाद क जा अउर कछू दवाइयन लिआवा।
    तू अनेक दवाइयन बनउब्या, किन्तु उ सबइ सहायक नाहीं होइहीं।
    तू तन्दुरूस्त नाहीं होब्या।
¹² रास्ट्र तोहार सर्मनाक हार लखब्या।
    तोहार रोउब समूचइ पृथ्वी पइ सुना जाइ।
एक ‘वीर सिपाही’ दूसर ‘सिपाही’ पइ टूट पड़ी
    अउर दुइनउँ ‘वीर’ फउजी साथ भहरइहीं।”

²⁰ “मिस्र एक सुन्नर गइया जइसा अहइ।
    किन्तु ओका पीड़ित करइ क उत्तर स एक गोमक्खी आवति अहइ।
²¹ मिस्र क फउज मँ भाड़े क फउजी मोटके बछवन जइसा अहइँ।
    उ सबइ सबहिं मुड़िके पराइ खड़ा होइहीं।
    उ पचे हमला क खिलाफ मजबूती स खड़ा नाहीं रहिहीं।
ओनकर बर्बादी क समइ आवत अहइ।
    उ पचे हाली ही सजा पइहीं।
²² मिस्र साँप क जइसा फुँफकार क आवाज करत ह
    अउ आगे बढ़त ह।
दुस्मन निचके स निचके आवत जात अहइ
    अउर मिस्री फउज पराइ क जतन करति अहइ।
दुस्मन मिस्र क खिलाफ कुल्हाड़ियन क संग आइ,
    उ सबइ लकड़हारन क तरह अहइ।”

²³ यहोवा इ सबइ कहत ह,
    “दुस्मन मिस्र क बन क काट गिराइ।
बन मँ असंख्य बृच्छ अहइँ,
    किन्तु उ सबइ काट डावा जइहीं।
दुस्मन क सिपाही टिड्डी दल स भी जियादा अहइँ।
    उ पचे एतेन जियादा फउजी अहइँ कि ओनका कउनो गन नाहीं सकत।
²⁴ मिस्र लज्जित होइ
    उत्तर क दुस्मन ओका पराजित करी।”

⁶ “ओ! यहोवा क तरवार, तू रूकिउ नाहीं
    तू कब तलक मार करति रहबिउ?
आपन म्यान मँ लउटि जा,
    रूका, सान्त ह्वा।
⁷ किन्तु यहोवा क तरवार कइसे बिस्राम लेइ?
    यहोवा एका आदेस दिहस ह।
यहोवा एका इ आदेस दिहस ह
    कि इ अस्कलोन नगर अउर समुद्र तट पइ हमला करइँ।”

⁷ “तू आपन बनाई चिजियन अउर आपन धन पइ बिस्सास करत अहा।
    एह बरे तू बन्दी बनाई लीन्ह जाब्या।
कमोस देवता कैदी बनावा जाइ
    अउर ओकर याजक अउर पदाधिकारी ओकरे संग जइहीं।
⁸ बिध्वंसक हर एक नगर क खिलाफ आइ,
    कउनो नगर नाहीं बची।
घाटी बर्बाद होइ।
    उच्च मैदान नस्ट होइ।
यहोवा इ कहेस ह,
    एह बरे इ होइ।
⁹ मोआब क खेतन मँ नमक फइलावा।
    देस सूना रेगिस्तान बनी।
मोआब क नगर खाली होइहीं।
    ओनमाँ कउनो भी मनई न रही।
¹⁰ जदि मनई उ नाहीं करत जेका यहोवा कहत ह
    जदि उ आपन तरवार क उपयोग ओन लोगन क मारइ बरे नाहीं करत, तउ उ मनई क बुरा होइ।

¹¹ मोआब क कबहुँ बिपत्ति स पाला नाहीं पड़ी।
    मोआब सान्त होइ बरे छोड़ी गइ दाखरस सा बाटइ।
मोआब एक गगरी स दूसर गगरी मँ डाला नाहीं गवा।
    उ कबहुँ कैदी नाहीं बनावा गवा।
एह बरे ओकर सुआद पहिले क नाई अहइ
    अउर ओकर गन्ध बदली नाहीं अहइ।”
¹² यहोवा इ सब कहत ह,
“किन्तु मइँ लोगन क हाली ही
    तोहका तोहरी गगरी स ढालइ पठउब।
उ सबइ लोग मोआब क गगरी क छूँछ कइ देइहीं
    अउर तब उ पचे ओन गगरियन क चकनाचूर कइ देइहीं।”

¹⁸ “दीबोन मँ रहइवाले लोगो
    आपन प्रतिस्ठा क जगह स बाहेर निकरा।
धूरि मँ जमीन पइ बइठा।
    काहेकि मोआब क बिध्वंसक आवत अहइ
अउर उ तोहरे मजबूत नगरन क नस्ट कइ देइ।

¹⁹ “अरोएर क बसइया लोगो,
    सड़क क सहारे खड़ा ह्वा अउर सावधानी स रहा।
मनई क परात लखा,
    मेहरारू क परात लखा,
    ओनसे पूछा क भवा ह

²⁰ “मोआब बर्बाद होइ अउर लज्जा स गड़ि जाइ।
    मोआब रोइ अउर रोइ।
अनोर्न नदी पइ घोसित करा
    कि मोआब नस्ट होइ गवा।
²¹ ऊँच मैदान क लोग सजा पाइ चुके होलोन,
    यहसा अउर मेपात नगरन क निआव होइ चुका।
²² दीबोन, नबो
    अउर बेतदिबलातैम,
²³ किर्य्यातैम, बेतगामूल
    अउर बेतमोन।
²⁴ करिय्योत बोस्रा
    अउ मोआब क निचके
अउ दूर क सबहिं नगरन क संग
    निआउ होइ चुका।
²⁵ मोआब क ताकत काट दीन्ह गइ,
    मोआब क बाँहन टूट गइ।”
यहोवा इ सब कहेस।

²⁶ “मोआब समझे रहा उ यहोवा स भी जियादा महान अहइ।
    एह बरे मोआब क सख्त पागल जइसा सजा द्या।
    मोआब गिरी अउ आपन उलटी मँ चारिहुँ कइँती लउटी।
लोग मोआब क मजाक उड़इहीं।

²⁷ “मोआब तू आपन इस्राएल क मजाक उड़ाए रह्या।
    इस्राएल चोरन क गिरोह क जरिये धरा गवा।
हर दाई तू इस्राएल क बारे मँ कहत रह्या।
    तू आपन मूँड़ हिलावत रह्या अइसा अभिनय करत रह्या माना तू इस्राएल स स्रेस्ठ अहा।
²⁸ मोआब क लोगो, आपन नगरन क तजा।
    जा अउर पहाड़ियन पइ रहा,
उ कबूतर क तरह रहा
    जउन आपन झोंझ गुफा क मुँहे पइ बनवत ह।”

²⁹ “हम मोआब क गर्व क सुनि चुका अही,
    उ बहोत घमण्डी रहा।
उ समुझे रहा कि उ बहोत बड़ा अहइ।
    उ हमेसा आपन मुँह मियाँ मिटठू बनत रहा।
    उ बहोत जियादा घमण्डी रहा।”

³⁰ यहोवा कहत ह, “मइँ जानत हउँ कि मोआब हाली ही कोहाइ जात ह अउर आपन तारीफ क गीत गावत ह।
    मुला ओकर सेखी झूठ अहइँ।
    उ जउन करइ क कहत ह, कइ नाहीं सकत।
³¹ एह बरे मइँ मोआब बरे रोवत हउँ।
    मइँ मोआब मँ हर एक बरे रोवत हउँ।
    मइँ कीर्हेरेस क लोगन बरे रोवत हउँ।
³² मइँ सिबमा क लोगन बरे याजेर स लोगन स जियादा रोवत हउँ।
    सिबमा पुराने जमाना मँ तोहार अंगूर क बेलन
सागर तलक याजेर जेतनी दूर तलक फइली रहिन।
    मुला बिध्वंसक तोहार फल अउर अंगूर लइ लिहन।
³³ मोआब क बिसाल अंगूर क बगियन स सुख अउर आनन्द बिदा होइ गएन।
    मइँ दाखरस निकारइ वाली जगहन स दाखरस क बहब रोक दिहे हउँ।
अब दाखरस बनावइ बरे अंगूरन पइ चलइवालन क नाच-गाना नाहीं रहि गवा अहइँ।
    खुसी क सोर गुल सबहिं खतम होइ गवा अहइ।

⁴³ यहोवा इ सब कहत ह:
    “मोआब क लोगो, भय गहिर गड़हन अउर जाल तोहरी प्रतीच्छा मँ अहइँ।
⁴⁴ लोग डेरइहीं अउर भाग खड़ा होइहीं,
    अउर उ पचे गड़हन मँ गिरिहीं।
जदि कउनो गहिर गड़हा स निकरी
    तउ उ जाल मँ फँसी।
मइँ मोआब पइ सजा क बरिस लिआउब।”
    यहोवा इ सब कहेस।

⁴⁵ “ताकतवर दुस्मन स लोग भाग चला अहइँ।
    उ पचे सुरच्छा बरे हेसबोन नगर मँ परातेन।
किन्तु हुआँ सुरच्छा नाहीं रही।
    सिहोन (हेसबोन) क नगर मोआबियन क बिरुद्ध होइ गवा
अउर उ मोआब क प्रमुखन क नस्ट करइ लाग।
    इ ओन घमण्डी लोगन क नस्ट करइ लाग।
⁴⁶ मोआब इ तोहरे बरे, बहोत बुरा होइ।
    कमोस क लोग नस्ट कीन्ह जात अहइँ।
तोहार पूत अउ बिटियन बन्दी
    अउ कैदी क रूप मँ लइ जावा जात अहइँ।
⁴⁷ मोआब क लोग कैदी क रूप मँ दूर पहोंचावा जइहीं।
    किन्तु आवइवाले दिनन मँ मइँ मोआब क लोगन क वापस लिआउब।”
    इ सँदेसा यहोवा क अहइ।