Beginning

Li Resil li Colba‑ib li Quixtzˈi̱ba li San Marcos

Laj Juan laj Cubsihom Haˈ quixye resil lix cˈulunic li Jesucristo

1  Joˈcaˈin nak quiticla chak resilal li colba‑ib saˈ xcˈabaˈ li Jesucristo li Ralal li Dios. ² Li profeta Isaías quixtzˈi̱ba li a̱tin li quixye li Dios re li Ralal:

⁴ Joˈcan nak co̱ laj Juan laj Cubsihom Haˈ saˈ li chaki chˈochˈ ut yo̱ chi cubsi̱nc haˈ ut yo̱ chixchˈolobanquil lix ya̱lal chiruheb ut quixye: ―Canabomak li ma̱cobc. Chi yotˈekˈ e̱chˈo̱l ut chejal e̱cˈaˈux ut checˈul li cubi haˈ ut li Dios tixcuy tixsach le̱ ma̱c, chan. ⁵ Nabaleb laj Judea ut nabaleb ajcuiˈ laj Jerusalén queˈcuulac cuan cuiˈ laj Juan chirabinquil li cˈaˈru yo̱ chixyebal. Queˈxxo̱to xma̱c chiru li Dios ut laj Juan quixcubsi xhaˈeb saˈ li nimaˈ Jordán. ⁶ Li rakˈ narocsi laj Juan, aˈan yi̱banbil riqˈuin rix li xul camello ut lix cˈa̱mal xsaˈ, aˈan tzˈu̱m. Ut aj sa̱cˈ naxtzaca riqˈuin xyaˈal sak cˈau. ⁷ Naxjultica li ra̱tin li Dios reheb li tenamit ut naxye: ―Cha̱lc re jun chic li kˈaxal nim xcuanquil chicuu la̱in. Xban nak kˈaxal nim xcuanquil, moco incˈulub ta nak tincˈutzub cuib re xhitbal xcˈa̱mal lix xa̱b. ⁸ La̱in xincubsi e̱haˈ riqˈuin haˈ. Aban aˈan tixqˈue e̱re li Santil Musikˈej, chan.

Nak quixcˈul li cubi haˈ li Jesucristo

⁹ Saˈ eb li cutan aˈan li Jesús qui‑el chak Nazaret xcue̱nt Galilea. Quicuulac riqˈuin laj Juan ut laj Juan quixcubsi xhaˈ aran saˈ li nimaˈ Jordán. ¹⁰ Ut nak qui‑el chak li Jesús saˈ li haˈ, quiril nak quiteli li choxa, ut li Santil Musikˈej quicube chak saˈ xbe̱n li Jesús. Chanchan jun li paloma nak yo̱ chak chi cubec. ¹¹ Ut qui‑abi̱c xya̱b xcux li Dios toj saˈ choxa. Quixye chi joˈcaˈin: ―La̱at li cualal kˈaxal raro̱cat inban. Nasahoˈ inchˈo̱l a̱cuiqˈuin, chan li Dios.

Nak quiyaleˈ ra̱lenquil li Jesús xban laj Tza

¹² Ut chirix aˈin, li Jesús qui‑ecˈasi̱c lix chˈo̱l xban li Santil Musikˈej re nak ta̱xic saˈ li chaki chˈochˈ bar ma̱cˈaˈ cuiˈ cristian. ¹³ Caˈcˈa̱l cutan quicuan chak xjunes saˈ li naˈajej aˈan saˈ xya̱nkeb li joskˈ aj xul. Ut chiru li caˈcˈa̱l cutan aˈan, li Jesús quiyaleˈ ra̱lenquil xban laj tza, aban incˈaˈ quixqˈue rib chi a̱le̱c. Ut eb lix ángel li Dios queˈcuulac chi cˈanjelac chiru. ¹⁴ Ac cuan laj Juan laj Cubsihom Haˈ saˈ tzˈalam nak co̱ li Jesús Galilea ut yo̱ chixjulticanquil resil li colba‑ib li naxqˈue li Dios. ¹⁵ Li Jesús quixye: ―Xcuulac xkˈehil lix nimajcual xcuanquilal li Dios. Chiyotˈekˈ e̱chˈo̱l chejal e̱cˈaˈux ut pa̱bomak li Santil Evangelio, chan li Jesús.

Li Jesús quixbokeb ca̱hib aj car re nak teˈxic chirix

¹⁶ Ut nak coxnumekˈ li Jesús chire li palau cuan Galilea quixtau laj Simón rochben laj Andrés li ri̱tzˈin. Yo̱queb chixqˈuebal lix yoy saˈ li palau xban nak aˈaneb aj chapol car. ¹⁷ Li Jesús quixye reheb, ―Chine̱ta̱ke. Ma̱cuaˈ chic caribc te̱ba̱nu. E̱ras e̱ri̱tzˈin ban chic te̱sicˈ re teˈpa̱ba̱nk, chan reheb. ¹⁸ Ut saˈ junpa̱t queˈxcanab lix yoy ut queˈxta̱ke li Jesús. ¹⁹ Junpa̱t chic quibe̱c li Jesús nak coxtauheb li ralal laj Zebedeo. Laj Jacobo ut laj Juan xcˈabaˈeb. Cuanqueb saˈ lix jucub. Yo̱queb chixxitinquil lix yoy. ²⁰ Li Jesús quixbokeb ut queˈxcanab laj Zebedeo lix yucuaˈeb saˈ li jucub rochbeneb lix mo̱s. Ut queˈxta̱ke li Jesús.

Li Jesús quirisi li ma̱us aj musikˈej

²¹ Queˈcuulac saˈ li tenamit Capernaum. Saˈ li hiloba̱l cutan, qui‑oc li Jesús saˈ li cab li nequeˈxchˈutub cuiˈ ribeb laj judío. Ut qui‑oc chixchˈolobanquil xya̱lal chiruheb li tenamit. ²² Nequeˈsach xchˈo̱leb li tenamit chirabinquil li cˈaˈru naxye li Jesús xban nak quixcˈut xya̱lal chiruheb chi cuan xcuanquil ut moco joˈ ta queˈxba̱nu laj tzˈi̱b li nequeˈcˈutuc lix chakˈrab li Dios. ²³ Saˈ li cab chˈutchˈu̱queb cuiˈ cuan jun li cui̱nk cuan ma̱us aj musikˈej riqˈuin. ²⁴ Li cui̱nk aˈan quixjap re ut quixye: ―¿Cˈaˈru ta̱cuaj kiqˈuin, at Jesús aj Nazaret? ¿Ma chikasachbal xatchal? Ninnau anihat la̱at. La̱at lix Santil Alal li Dios, chan. ²⁵ Li Jesús quixkˈus li ma̱us aj musikˈej ut quixye re: ―Matchokin. Elen riqˈuin li cui̱nk aˈin, chan. ²⁶ Ut li ma̱us aj musikˈej quixchˈikle chi cau li cui̱nk. Quixjap re chi cau ut qui‑el riqˈuin li cui̱nk. ²⁷ Quilajeˈsach xchˈo̱l chixjunileb li tenamit ut queˈxye chiribileb rib: ―¿Cˈaˈru xya̱lal aˈin? ¿Cˈaˈru li acˈ tijleb aˈin? Li cui̱nk aˈin cuan xcuanquil saˈ xbe̱neb li ma̱us aj musikˈej ut li cˈaˈru naxye, nequeˈxpa̱b.― ²⁸ Saˈ junpa̱t queˈrabi resil saˈ chixjunileb li tenamit xcue̱nt Galilea cˈaˈru quixba̱nu li Jesús.

Li Jesús quixqˈuirtesi lix naˈ li rixakil laj Simón Pedro

²⁹ Nak queˈel saˈ li cab li nequeˈxchˈutub cuiˈ ribeb laj judío, li Jesús rochbeneb laj Jacobo ut laj Juan queˈco̱eb saˈ rochoch laj Simón ut laj Andrés. ³⁰ Nak queˈcuulac, ticto queˈxye re li Jesús nak nim xyajel lix naˈ li rixakil laj Simón. Yocyo ut yo̱ xtik. ³¹ Tojoˈnak li Jesús quijiloc riqˈuin li yaj. Quixchap li rukˈ ut quixcuaclesi. Saˈ junpa̱t quinumeˈ lix tik ut qui‑oc chi cˈanjelac chiruheb. ³² Saˈ li ecuu aˈan nak ac x‑oc li sakˈe, queˈcˈameˈ chak riqˈuin li Jesús nabaleb li yaj. Ut queˈcˈameˈ ajcuiˈ chak li cuan ma̱us aj musikˈej riqˈuineb. ³³ Ut li qˈuila tenamit queˈchal ut queˈxchˈutub ribeb chire li cab cuan cuiˈ li Jesús. ³⁴ Nabaleb li yaj queˈqˈuirtesi̱c xban li Jesús. Jalan jala̱nk xyajeleb li junju̱nk. Ut li Jesús quirisiheb nabal chi ma̱us aj musikˈej riqˈuineb. Li Jesús incˈaˈ quixcanabeb chi a̱tinac li ma̱us aj musikˈej xban nak eb aˈan queˈxnau nak aˈan li Cristo.

Li Jesús quixye resil li colba‑ib aran Galilea

³⁵ Cuulajak chic nak toj ma̱jiˈ na‑iqˈueˈ li cutan, li Jesús quicuacli ut qui‑el saˈ li tenamit. Ut co̱ xjunes chi tijoc saˈ jun li naˈajej bar ma̱cˈaˈ cuiˈ cristian. ³⁶ Aˈut laj Simón joˈqueb ajcuiˈ li rochben queˈco̱eb chixsicˈbal li Jesús. ³⁷ Nak coxeˈxtau queˈxye re, ―Nabal li tenamit yo̱queb chi sicˈoc a̱cue, chanqueb. ³⁸ Aban li Jesús quichakˈoc ut quixye reheb: ―Tento nak toxic saˈ eb li naˈajej li cuanqueb chi nachˈ re nak toxinchˈolob ajcuiˈ chak resil li colba‑ib reheb xban nak aˈan aj e nak xinchal, chan. ³⁹ Joˈcan nak li Jesús quicuulac saˈ eb li naˈajej cuan xcue̱nt Galilea. Yo̱ chixjulticanquil li xya̱lal chiruheb saˈ li cab li nequeˈxchˈutub cuiˈ ribeb laj judío, ut quirisi li ma̱us aj musikˈej riqˈuineb nabal chi cristian.

Li Jesús quixqˈuirtesi jun li cui̱nk saklep rix

⁴⁰ Saˈ jun li cutan jun li cui̱nk saklep rix quicuulac riqˈuin li Jesús. Quixcuikˈib rib chiru ut quixtzˈa̱ma xtenkˈanquil. Quixye re: ―La̱in ninnau nak la̱at naru tina̱qˈuirtesi, chan. ⁴¹ Li Jesús quiril xtokˈoba̱l ru li cui̱nk, li saklep rix. Quixyeˈ li rukˈ ut quixchˈeˈ li cui̱nk. Quixye: ―Nacuaj a̱qˈuirtesinquil. Anakcuan tatinqˈuirtesi, chan. ⁴² Ut saˈ junpa̱t qui‑el li saklep chirix ut quiqˈuira. Ma̱cˈaˈ chic xyajel quicana. ⁴³ Li Jesús quixchakˈrabi chi us ut quixye re: ⁴⁴ ―Abi li tinye a̱cue. Ma̱ ani aj e ta̱serakˈi li xacˈul. Ti̱c tatxic riqˈuin laj tij re nak aˈan ta̱ril nak xatqˈuira. Ut ta̱mayeja junak li xul joˈ naxye saˈ lix chakˈrab laj Moisés. Chaba̱nu aˈan chokˈ retalil chiruheb li tenamit nak xatqˈuira, chan. ⁴⁵ Co̱ li cui̱nk ut quilajxserakˈi reheb chixjunil chanru nak quiqˈuira. Riqˈuin aˈan incˈaˈ chic naxqˈue rib na‑oc li Jesús saˈ eb li tenamit xban nak li qˈuila tenamit yo̱queb chixsicˈbal li Jesús. Quicana ban saˈ jun li naˈajej bar ma̱cˈaˈ cuiˈ nabal li cristian ut aran quilajeˈcuulac riqˈuin li nequeˈchal chak yalak bar.

Li Jesús quixqˈuirtesi jun li cui̱nk yaj ut sic

2  Nak ac xnumeˈ cuib oxib cutan chic, li Jesús co̱ cuiˈchic saˈ li tenamit Capernaum. Ut queˈrabi resil nak li Jesús cuan saˈ li tenamit saˈ jun li cab bar nahilan cuiˈ. ² Saˈ junpa̱t queˈxchˈutub rib li cristian saˈ li cab cuan cuiˈ li Jesús. Ut xban xqˈuial li tenamit, ma̱ ani chic naru na‑oc chire li cab xban nak ma̱cˈaˈ chic li naˈajej. Ut li Jesús yo̱ chixchˈolobanquil li xya̱lal chiruheb. ³ Nak yo̱ chi a̱tinac li Jesús, ca̱hibeb li cui̱nk queˈxcˈam chak chi pakpo jun li cui̱nk sic. Incˈaˈ nabe̱c. ⁴ Abanan xban li qˈuila tenamit, incˈaˈ naru teˈrocsi li yaj cuan cuiˈ li Jesús. Joˈcan nak queˈtakeˈ saˈ xbe̱n li cab ut queˈxte caˈchˈin xbe̱n li cab ut aran queˈxcubsi li yaj yocyo chiru lix cuariba̱l ut coxcana̱c chiru li Jesús. ⁵ Li Jesús quixqˈue retal nak eb li cui̱nk aˈan queˈxpa̱b nak naru tixqˈuirtesi li yaj. Joˈcan nak quixye re li yaj: ―At cui̱nk, cuybil sachbil chic la̱ ma̱c, chan. ⁶ Ut chunchu̱queb ajcuiˈ aran laj tzˈi̱b li nequeˈcˈutuc xchakˈrab li Dios. Yo̱queb chi cˈoxlac. ⁷ Ut queˈxye saˈ xchˈo̱leb: ―¿Cˈaˈut nak naa̱tinac chi joˈcan li cui̱nk aˈin? ¿Ma aˈin ta biˈ li Dios? Ma̱ ani naru nacuyuc nasachoc ma̱c. Caˈaj cuiˈ li Dios naru nacuyuc nasachoc ma̱c, chanqueb. ⁸ Ticto quixnau li Jesús cˈaˈru yo̱queb chixcˈoxlanquil. Quixye reheb: ―¿Cˈaˈut nak nequecˈoxla chi joˈcan? ⁹ ¿Bar cuan li us tinye re li yaj re nak ta̱cˈutu̱nk che̱ru nak cuan incuanquil? ¿Ma tinye re, “Cuybil sachbil la̱ ma̱c”, malaj ut tinye re, “Cuaclin, ayu, ut cˈam la̱ cuariba̱l”? ¹⁰ La̱in tincˈut che̱ru nak la̱in li Cristo li Cˈajolbej, ut cuan incuanquil saˈ ruchichˈochˈ chixcuybal xsachbal li ma̱c, chan reheb. ¹¹ Tojoˈnak li Jesús quixye re li cui̱nk: ―At cui̱nk, la̱in tinye a̱cue, cuaclin, cˈam la̱ cuariba̱l ut ayu saˈ la̱ cuochoch, chan. ¹² Ut li cui̱nk sic nak quicuan ac ta̱cuacli̱k. Quixchap lix cuariba̱l ut ac ta̱e̱lk chiruheb chixjunil li tenamit. Ut riqˈuin aˈin chixjunileb queˈsach xchˈo̱l. Queˈxqˈue xlokˈal li Dios ut queˈxye: ―Ma̱ jun cua kilom aˈin, chanqueb.

Li Jesús quixbok laj Leví re nak ta̱xic chirix

¹³ Ut nak ac xqˈuirtesi li cui̱nk sic, li Jesús co̱ chire li palau Galilea. Nabaleb li tenamit queˈcuulac riqˈuin ut li Jesús qui‑oc chixtzolbaleb. ¹⁴ Nak yo̱ chi numecˈ aran, li Jesús quiril laj Leví li ralal laj Alfeo. Laj Leví cˈojcˈo saˈ xnaˈaj ut yo̱ chi titzˈoc toj. Li Jesús quixye re: ―China̱ta̱ke.― Tojoˈnak laj Leví quicuacli ut quixta̱ke li Jesús. ¹⁵ Ut chirix aˈan li Jesús co̱ saˈ li rochoch laj Leví chi cuaˈac. Nabaleb laj titzˈol toj ut nabaleb ajcuiˈ laj ma̱c cuanqueb saˈ li me̱x bar cuan cuiˈ li Jesús rochbeneb lix tzolom. Nabaleb xban nak nabal queˈta̱ken re li Jesús. ¹⁶ Ut eb laj tzˈi̱b ut eb laj fariseo queˈril nak cuan li Jesús saˈ me̱x rochbeneb laj titzˈol toj joˈqueb ajcuiˈ laj ma̱c. Ut queˈxye reheb lix tzolom li Jesús: ―¿Cˈaˈut nak laj tzolol e̱re nacuaˈac saˈ xya̱nkeb laj titzˈol toj ut saˈ xya̱nkeb laj ma̱c? chanqueb. ¹⁷ Li Jesús quirabi li queˈxpatzˈ ut quixye reheb: ―Li cauheb ma̱cˈaˈ na‑oc cuiˈ aj banonel reheb. Aban li yajeb, aˈaneb li nequeˈraj banecˈ. Joˈcan nak la̱in incˈaˈ xinchal chixsicˈbaleb li ti̱queb xchˈo̱l. Xinchal ban chixsicˈbaleb laj ma̱c, chan li Jesús.

Li Jesús quixchˈolob xya̱lal li ayunic

¹⁸ Saˈ eb li cutan aˈan eb lix tzolom laj Juan laj Cubsihom Haˈ ut eb laj fariseo nequeˈxba̱nu x‑ayu̱n. Li tenamit queˈcuulac riqˈuin li Jesús ut queˈxye re: ―Eb lix tzolom laj Juan nequeˈxba̱nu x‑ayu̱n joˈqueb ajcuiˈ laj fariseo. ¿Cˈaˈut nak incˈaˈ nequeˈxba̱nu x‑ayu̱n eb la̱ tzolom? chanqueb re. ¹⁹ Tojoˈnak quichakˈoc li Jesús ut quixye reheb, ―La̱in joˈ jun be̱lomej nak cuanquin. ¿Ma naru teˈayunik li nequeˈxic riqˈuin sumla̱c nak cuan li be̱lomej riqˈuineb? Nak toj cuan li be̱lomej riqˈuineb, incˈaˈ naru nequeˈxba̱nu x‑ayu̱n. ²⁰ Ut joˈcan ajcuiˈ lin tzolom. Ta̱cuulak xkˈehil nak tin‑isi̱k saˈ xya̱nkeb. Toj saˈ li cutan aˈan teˈxba̱nu x‑ayu̱n, chan reheb.

Li jaljo̱quil ru a̱tin chirix li acˈ yuˈam

²¹ Ma̱ ani naxxi̱ti junak kˈel tˈicr riqˈuin acˈ tˈicr. Cui ut naxxi̱ti riqˈuin acˈ tˈicr, nak tixpuchˈ ta̱cˈosk li acˈ tˈicr ut tixnimobresi xpejelal li kˈel tˈicr. ²² Ut ma̱ ani naqˈuehoc acˈ vino saˈ li kˈel bo̱ls tzˈu̱m. Cui tixqˈue li acˈ vino saˈ li kˈel bo̱ls tzˈu̱m, ta̱puqˈuekˈ li kˈel tzˈu̱m, ta̱hoyekˈ li vino, ut ta̱osokˈ ajcuiˈ li bo̱ls tzˈu̱m. Li acˈ vino saˈ li acˈ bo̱ls tzˈu̱m naqˈueman, chan li Jesús.

Li Jesús quixchˈolob xya̱lal chirix li hiloba̱l cutan

²³ Saˈ jun li hiloba̱l cutan li Jesús rochbeneb lix tzolom yo̱queb chi numecˈ bar cuiˈ aubil li acui̱mk trigo xcˈabaˈ. Eb lix tzolom queˈxchˈot ru li trigo nak yo̱queb chi numecˈ xban nak teˈtzˈoca̱k. ²⁴ Tojoˈnak eb laj fariseo queˈxye re li Jesús: ―Il cˈaˈru yo̱queb la̱ tzolom. ¿Cˈaˈut nak nequeˈxba̱nu li cˈanjel moco uxc ta naraj saˈ li hiloba̱l cutan? chanqueb. ²⁵ Li Jesús quichakˈoc ut quixye reheb: ―¿Ma incˈaˈ ta biˈ xeril saˈ li Santil Hu cˈaˈru quixba̱nu laj David nak aˈan ut li rochben teˈtzˈoca̱k? ²⁶ Nak quicuan laj Abiatar chokˈ xyucuaˈileb aj tij, laj David qui‑oc saˈ li rochoch li Dios. Cuan aran li mayejanbil caxlan cua. Juneseb laj tij naru nequeˈxcuaˈ li caxlan cua aˈan. Abanan laj David quixcuaˈ li caxlan cua li quiqˈueheˈ re xban laj tij ut quixqˈue ajcuiˈ reheb li rochben xban nak teˈtzˈoca̱k, chan. ²⁷ Ut quixye ajcuiˈ reheb: ―Aˈ li cui̱nk ut li ixk aˈaneb li kˈaxal lokˈ chiru li hiloba̱l cutan. Toj ma̱cˈaˈ li hiloba̱l cutan nak ac queˈyoˈobtesi̱c chak ut li hiloba̱l cutan quiqˈueheˈ re xtenkˈanquileb li cui̱nk ut li ixk. ²⁸ Joˈcan nak la̱in li Cˈajolbej cuan incuanquil chixyebal cˈaˈru ta̱uxma̱nk saˈ li hiloba̱l cutan, chan li Jesús reheb.

Li Jesús quixqˈuirtesi li cui̱nk sic jun li rukˈ

3  Ut li Jesús co̱ cuiˈchic saˈ li cab li nequeˈxchˈutub cuiˈ ribeb laj judío. Ut aran cuan jun li cui̱nk sic jun li rukˈ. ² Eb laj fariseo yo̱queb chixsicˈbal chanru nak teˈxjit li Jesús. Joˈcan nak yo̱queb chirilbal ma tixqˈuirtesi tana li cui̱nk aˈin saˈ li hiloba̱l cutan. ³ Li Jesús quixye re li cui̱nk li sic rukˈ: ―Numen chak arin chi ubej, chan re. ⁴ Tojoˈnak li Jesús quixpatzˈ reheb laj fariseo: ―¿Cˈaˈru us xba̱nunquil saˈ li hiloba̱l cutan? ¿Ma naru xba̱nunquil li us malaj ut li incˈaˈ us? ¿Ma us xcolbal xyuˈam junak malaj ut xsachbal? chan cuiˈchic reheb. Ut eb aˈan mem queˈcana. Incˈaˈ chic queˈxtau cˈaˈru queˈxye. ⁵ Quijoskˈoˈ li Jesús saˈ xbe̱neb, abanan quiril cuiˈchic xtokˈoba̱l ruheb xban nak incˈaˈ queˈraj xtaubal xya̱lal. Ut li Jesús quixye re li cui̱nk li sic rukˈ: ―Yeˈ la̱ cuukˈ, chan. Ut li cui̱nk quixyeˈ li rukˈ ut saˈ junpa̱t quiqˈuira. ⁶ Tojoˈnak eb laj fariseo queˈel riqˈuin li Jesús. Queˈco̱eb riqˈuineb li nequeˈoquen chirix laj Herodes. Ut queˈoc xcˈu̱banquil chanru nak teˈxcamsi li Jesús.

Li qˈuila tenamit queˈco̱eb chire li palau chixsicˈbal li Jesús

⁷ Ut chirix aˈan li Jesús co̱ chire li palau Galilea rochbeneb lix tzolom. Ut li qˈuila tenamit queˈxta̱ke li Jesús. Queˈchal chak Galilea joˈ ajcuiˈ Judea. ⁸ Nak queˈrabi resil li xni̱nkal usilal yo̱ chixba̱nunquil li Jesús, quilajeˈchal chirilbal. Cuan li queˈchal chak Jerusalén ut Idumea. Ut cuan ajcuiˈ queˈchal chak jun pacˈal li nimaˈ Jordán. Ut queˈchal ajcuiˈ chak Tiro ut Sidón chirilbal li Jesús. ⁹ Joˈcan nak li Jesús quixye reheb lix tzolom nak teˈxcauresi junak li jucub. Ac cua̱nk aran re ta̱cua̱nk chi saˈ re nak incˈaˈ ta̱natˈekˈ xbaneb li qˈuila tenamit. ¹⁰ Xban nak nabal ac xqˈuirtesi, joˈcan nak li qˈuila tenamit yo̱queb chixtiquisinquil ribeb. Teˈraj teˈxchˈeˈ li Jesús re nak teˈqˈuira̱k. ¹¹ Li cuan ma̱us aj musikˈej riqˈuineb, nak queˈril li Jesús, queˈxcuikˈib rib chiru ut queˈxjap re chixyebal: ―La̱at li Ralal li Dios, chanqueb re. ¹² Ut li Jesús quixkˈuseb li ma̱us aj musikˈej ut quixye reheb nak incˈaˈ teˈxye resil nak aˈan Ralal li Dios.

Li Jesús quixsiqˈueb ru lix tzolom cablaju

¹³ Tojoˈnak li Jesús quitakeˈ chiru tzu̱l. Quixbokeb li ani quiraj ut eb aˈan co̱eb chirix. ¹⁴ Ut li Jesús quixsiqˈueb ru li cablaju chi cui̱nk re nak teˈcua̱nk riqˈuin ut re nak tixtaklaheb chixjulticanquil li ra̱tin li Dios. ¹⁵ Ut quixqˈueheb xcuanquil chixqˈuirtesinquileb li yaj ut chirisinquil li ma̱us aj musikˈej. ¹⁶ Aˈaneb aˈin li cablaju li quixxakabeb li Jesús: laj Simón li quixqˈue aj Pedro chokˈ xcˈabaˈ, ¹⁷ ut laj Jacobo ut laj Juan. Lix yucuaˈeb aˈan, aˈan laj Zebedeo. Aj Boanerges quiqˈueheˈ chokˈ xcˈabaˈeb xban li Jesús. Li cˈabaˈej aˈan naraj naxye “Ralaleb li Ca̱k”. ¹⁸ Quixxakabeb ajcuiˈ laj Andrés, laj Felipe, laj Bartolomé, laj Mateo, laj Tomás, laj Jacobo li ralal laj Alfeo, laj Tadeo ut laj Simón. Aˈan xcomoneb laj Canaán. ¹⁹ Ut quixsicˈ ajcuiˈ ru laj Judas Iscariote li quikˈaxtesin re li Jesús saˈ rukˈeb li xicˈ nequeˈiloc re.

Ma̱cˈaˈ chic xcuybal xma̱c li namajecuan re li Santil Musikˈej

²⁰ Ut nak ac xsiqˈueb ru lix tzolom li Jesús co̱ saˈ jun li cab rochbeneb lix tzolom. Ut queˈtubla cuiˈchic li qˈuila tenamit; riqˈuin aˈan moco naxqˈue ta chic rib nacuaˈac li Jesús chi moco eb lix tzolom. ²¹ Ut nak queˈrabi resil li cˈaˈru yo̱ chixba̱nunquil li Jesús, eb li rechˈalal queˈchal chixcˈambal. Queˈxye nak moco tuktu ta chic xnaˈleb li Jesús. ²² Ut eb laj tzˈi̱b li queˈchal chak Jerusalén yo̱queb chixyebal: ―Laj Tza cuan riqˈuin li Jesús ut saˈ xcˈabaˈ laj Tza narisiheb li ma̱us aj musikˈej, chanqueb. ²³ Ut li Jesús quixbokeb ut quixpatzˈ reheb: ―¿Chanru nak laj Tza ta̱risi li rech aj tzahil?― Ut quixye ajcuiˈ li jaljo̱quil ru a̱tin aˈin: ²⁴ ―Cui cuan jun te̱pak chi tenamit xicˈ teˈril rib chi ribileb rib, li jun te̱p chi tenamit aˈan tixsach xcuanquil xjunes rib. ²⁵ Ut cui cuan ta jun cabalak xicˈ teˈril rib chi ribileb rib saˈ rochocheb, li jun cabal aˈan teˈxsach xcuanquil lix jun cablal. ²⁶ Joˈcan ajcuiˈ laj Tza cui teˈxpleti rib chi ribileb rib, aˈan tixsach xcuanquil xjunes rib. ²⁷ Ma̱ ani naru ta̱oc saˈ rochoch junak cui̱nk cau rib chixmakˈbal li cˈaˈru cuan re, cui incˈaˈ ta xbe̱n cua tixbacˈ li cui̱nk cau rib, tojoˈnak ta̱oc chixcˈambal li cˈaˈru cuan re. ²⁸ Relic chi ya̱l ninye e̱re nak ta̱cuyma̱nk ta̱sachma̱nk lix ma̱queb li cristian ut ta̱cuyma̱nk ajcuiˈ li majecua̱nc nequeˈxba̱nu. ²⁹ Abanan li ta̱majecua̱nk re li Santil Musikˈej, incˈaˈ ta̱cuyekˈ ta̱sachekˈ xma̱c. Cua̱nk ban saˈ xbe̱n chi junelic lix tojbal rix li ma̱c aˈan.― ³⁰ Li Jesús quixye aˈin xban nak yo̱queb chixyebal nak cuan ma̱us aj musikˈej riqˈuin.

Lix naˈ ut eb li ri̱tzˈin li Jesús

³¹ Quicuulac aran lix naˈ li Jesús ut queˈcuulac ajcuiˈ li ri̱tzˈin. Queˈcana chirix cab ut queˈxtakla xbokbal li Jesús. ³² Ut nabaleb li tenamit cˈojcˈo̱queb chixcˈatk li Jesús. Queˈxye re: ―Ka̱cuaˈ, xcˈulun la̱ naˈ rochbeneb la̱ cui̱tzˈin. Cuanqueb chirix cab. Yo̱queb cha̱sicˈbal, chanqueb. ³³ Li Jesús quichakˈoc ut quixye reheb: ―¿Ani ta biˈ lin naˈ? Ut, ¿ani ta biˈ li cui̱tzˈin nak nequecˈoxla la̱ex?― ³⁴ Quirileb li cˈojcˈo̱queb chixcˈatk ut quixye: ―Aˈineb lin naˈ ut aˈineb li cui̱tzˈin. ³⁵ Xban nak li ani naba̱nun re li naraj li Dios, aˈan li cui̱tzˈin, aˈan li cuanab, ut aˈan lin naˈ, chan.