Beginning
Tetapupulwilis wan tayulmatilis
17 Kinhilwij ne mumachtianimet:
—Walasket tajtatzunchaluas. Ká ne kalinwikas, ay pobrej! 2 Mas yek ma mupilu se metat itech ikechkuyu wan ma kitajkalikan tik ne weyat que asu kitekukujmati se pal ini chijchikitik! 3 Cuidadoj!
Asu ne muiknew kichiwa tay teyek, shikajajwa. Wan asu muyulpata, shiktapupulwi. 4 Wan asu muchi ne tujtunal metzchiwilia tay teyek chikume wipta, wan chikume wipta muishkwepa metzita wan metzilwia "Nimuyulpata", tiaw tiktapupulwia.
5 Wan ne tijtitanijtuk kilwijket ne Tajtzin:
—Shitechtalili chiupiuk tayulmatilis!
6 Ne Tajtzin inak:
—Asu antayulmatiskiat se chiupichin, ankilwiskiat ini kuyu amat: "Shimuwiwita wan shimupatkawi ijtik ne weyat!" wan metzintakamatiskia.
7 Katiawel anmutzalan kipia se tekitini ne talichkwa ush ne kitakwaltia takwalmet tik ne kojtan wan kwak mukwepa witz anyawit ankilwiat: "Shimutali, shitakwa"? 8 Mas yek anyawit kilwiat: "Shu shikmana nutakwal wan shiktali mukwajkwach wan shinechtalili wan kwak nitami nitakwa wan niati, shitakwa wan shiati." 9 Inte ankilwiat ne tekitini panpadiush ika tikchijki tay nimetztuktijtuk. 10 Kiane tel nusan kwak ankichijketa muchi tay nemi tuktijtuk, shinakan: "Titejtekitinimet, wan tay tikchijtiwit inte tatka, sema tikchijket tay muneki."
Se shinpiani pal Shamarea
11 Wan kwak yaja yawi katka ka Yerushalem wan panu ijtik Shamarea wan Galilaya, 12 ajsik tik se techan wan kinamikket majtakti takat kipiat shinyu, ká nakaket wejka 13 wan tzajtziket inat:
—Yeshu, tajtzin, shitechpalewi!
14 Wan kwak yaja kinhitak kinhilwij:
—Shumet itech ne palejmet ma metzinhitakan.
Wan kwak yajket tik ne ujti mupajtijket. 15 Se yejemet, kwak kitak ka mupajtija, muishkwepki wan tzajtzik ka ne Teut wey, 16 wan mutamutak talchi itech ijikshi wan inak panpadiush. Wan yajini se ipal Shamarea. 17 Yeshu nankilij wan inak:
—Anka inte mupajtijket ne majtakti? Ne sejseuk kan nemit? 18 Sema se muishkwepki ina ka wey ne Teut, wan yaja ipal tepal techan!
19 Wan kilwij:
—Shimuketza, shiawa, ne mutayulmatilis metzpalewijtuk.
Ken yawi witz ne itatekimakalis ne Teut
20 Kwak ne Parishayujmet kitajtanilijket keman yawi witz ne itatekimakalis ne Teut, nankilij wan kinhilwij:
—Inte witz ne itatekimakalis ne Teut ishpelwijtuk, 21 nian yawit inat: "nikan" ush "uni nemi!" ika ne itatekimakalis ne Teut né nemi ijtik anmejemet.
22 Kinhilwij ne mumachtianimet:
—Walasket tujtunal kwak ankielewisket ankitat se pal ne tujtunal ipal ne Itelpuch ne Takat, wan te ankitasket, 23 wan metzinhilwisket: "Uni nemi!" wan "Nikan nemi!" Maka shikisakan nian shumet iipan. 24 Ika kenha ken kwak takipini wan tatawia nujme ka ikajku, tik ne tunal ipal ne Itelpuch ne Takat yawi kiane. 25 Achtu, yaja nemi pal kiekua wey wan yawit kitejtenewat.
26 Wan ijkiunisan ken tik ne tujtunal ipal Noa yawi panu tik ne tujtunal ipal ne Itelpuch ne Takat. 27 Takwat, atit, tanamiktiat wan munamiktiat hasta ne tunal kwak kalak Noa ijtik ne takukal; wan walaj ne tepeat wan kiwilej muchi.
28 Nusan ken tik ne tujtunal ipal Lot: takwat, atit, takuat, tanamakat, tatukat, kiketzat kajkal. 29 Tik ne tunal kwak kiski Lot tik Sodom ne ilwikak kishinij tit wan azufrej wan kiwilej muchi.
30 Yawi kenhaya tik ne tunal kwak ne Itelpuch ne Takat yawi muneshtia. 31 Tik uni tunal, ká nemi pak itzunpan ne ikal wan ne ipalwan kalijtik, ma inte kutemu pal kalkwi; wan ká nemi tik ne kojtan ma inte mukwepa ka iipan; 32 shikelnamikikan ne isiwaw Lot!
33 Ká kinekiskia tajpia ne ialmaj yawi kipulua, wan ká kipuluskia yaja yawi yultuk. 34 Nimetzinhilwia ka tik uni tayua nemisket ume ijpak se tapech: ne se muwikas wan ne seuk muajkawas; 35 Nemisket ume siwat tisit ijpak se metat: ne se muwikas wan ne seuk muajkawas.
36-37 Wan nankilijket, kilwiat:
—Kan, Tajtzin?
Yaja kinhilwij:
—Kan ne nemi ne mikini, ikuni ne kwajkwawti nusan musenputzusket...
Se juez wan se siwat
18 Kinhilwia se casoj pal tikitat ka senpa nemi pal tiknujnutzat ne Teut wan ma inte tikutiakan, 2 ina:
—Tik se techan nemik se juez ká inte majmawi iishpan ne Teut wan te ishpinawa iishpan takat. 3 Nemik se lamajtzin tik uni techan ká intea kipia ishulejyu, wan ajsi itech ne juez wan inak:
"Shinechtzunkwi, kinekit nechtenewat."
4 wan ne juez inte kinekituya. Panuk se tiempoj wan kwakuni inak tik iyulu:
"Melka inte nimajmawi iishpan ne Teut nian nishpinawa iishpan takat, 5 ika nechkakasua ini lamaj niaw niktzunkwi pal kiane mukawa witz nechkakasua!"
6 Wan inak ne Tajtzin:
—Shikakikan tay ina hasta ne juez ne inte yek! 7 Ne Teut ken inte yawi kintzunkwi ne ijishpejpentuk ká kitzajtzaliat mujmusta, melka ishtuna? 8 Nimetzinhilwia ka yawi kintzunkwi talul. Sema shinakan: ne Itelpuch ne Takat, kwak witz, yawi kiajsi ne tayulmatilis ijpak ne tal?
Ne Parishayuj wan ne tumintepewani
9 Nusan kinhilwij ini casoj sejse ká inat ka yejemet yejyek wan ka ne sejseuk te tatka inpatiw:
10 —Ume takat yajket ka teupan: ne se se Parishayuj wan ne seuk se tumintepewani. 11 Ne Parishayuj mutalij kinutza ne Teut ijkini:
"Teut, panpadiush ka naja inte nikenha ken ne sejseuk ká techtekit, kichiwat tay te yek, mawiltiat, wan kenhat ken ini tumintepewani; 12 naja inte nitakwa tik ume tunal muchi ne sejsemanaj wan nikmaka ne teupan se takutun pal muchi tay nikpia."
13 Ne tumintepewani mutalij wejka wan nian kinekik ajkutachia, semaya kitasa katka ne ielpan wan ina katka:
"Teut, shinechtapupulwi, ika naja nitateyekchijtuk."
14 Nimetzinhilwia, kwak yajini mukwepki ichan nemia yek iwan ne Teut, wan ne seuk inte. Ika ká ne isel muajkukia, yawi mutemultia, wan ká ne isel mutemultia, yawi muajkukia.
Yeshu wan ne shujshulut
15 Nusan kalinwikaket ne shujshulut ma kinmatuka. Kwak ne mumachtianimet kitaket, kinhajajwaket. 16 Ne Yeshu kinhilwij ne shujshulut ma waltzinkisakan, wan ina:
—Ma ajsikan nutech ne kukunetzitzin wan maka shikinhilwikan ma inte; ika ne itatekimakalis ne Teut ipal ká ne ken yejemet. 17 Kia nimetzinhilwia, ká ne inte kikwi ne itatekimakalis ne Teut ken se kunetzin inte yawi kalaki kalijtik!
Uij ma kalaki se kipia wey tik ne itatekimakalis ne Teut!
18 Wan se tatekimaka kitajtanilij:
—Yek tamachtiani, tay weli nikchiwa pal niyultuk senpa?
19 Yeshu kilwij:
—Taika tina ka niyek? Inte kanaj aka yek, sema ne Teut. 20 Tikmatiaya tay nemi tuktijtuk: maka shimawilti; maka shitamikti; maka shitechteki; maka shina ka muchijki tay inte muchijki; shiktakamati muteku wan ne munan.
21 Inak:
—Muchi uni nikishpelwijtuk senpa.
22 Kwak ne Yeshu kikakik, kilwij:
—Kinekiuk se: muchi tay tikpia shiknamaka wan shikinmaka ne munekit, wan taja tikpias chalchiwit tik ne ilwikak, wan shiwi nikan nuwan.
23 Ne seuk kikakik tay inak wan kikukuj iyulu ika kipiatuya wey tumin. 24 Kwak Yeshu kitak ken kikukuj iyulu, inak:
—Sea uij ma kalakikan ijtik ne itatekimakalis ne Teut ne kipiat wey. 25 Achtu yawi kalaki se camelloj ijtik ne kuyuntuk ipal se agujajchin, wan mas uij ma kalaki se kipia wey ijtik ne itatekimakalis ne Teut!
26 Ne kikakit inaket:
—Su ijkiuni, ká weli mupalewia?
27 Inak yaja:
—Tay ne takamet inte welit, ne Teut weli!
28 Pedro inak:
—Tejemet tikajkawtiwit ne tupalwan wan nikan tiwalajtiwit muwan.
29 Yaja kinhilwij:
—Naja nimetzinhilwia ka muchi ká kiajkaw ne ikal, isiwaw, iikawan, itejteku ush ipilawan ipanpa ne itatekimakalis ne Teut 30 yawi kikwi sujsul mas kwak ajsi ne horaj wan tik ne tujtunal witzet yawi yultuk senpa.
Tay yawi muchiwa tik Yerushalem
31 Kinwikak ne majtakti-ume iwan wan kinhilwij:
—Nikan titejkut ka Yerushalem, wan yawia muchiwa iwan ne Itelpuch ne Takat muchi tay mutajkwilujtuk itech imejmey ne taketzanimet: 32 yawit temakat iwan ne tejtechan, wan kipakilisket wan kijilwisket wan tachijchasket ijpak, 33 wan kwak tamit kiwitekit san kimiktisket, wan kwak panutiwit yey tunal yawi muketza.
34 Wan yejemet inte tatka kimatket tay takakket: minaya tay kinekik ina wan yejemet inte weliket.
Kipajtij se pupuyut tik Yerijo
35 Kwak yaja tzinkisa yawi tik Yerijo, nemituya tajtani se pupuyut muetztuk itech ne ujti. 36 Kwak takakik ka panut miak pak ne ujti, kitajtan tay uni. 37 Kilwijket ka witz Yeshu ne Nazarayuj, 38 wan yaja pejki tzajtzi ina:
—Yeshu ikunew Dawid, shinechpalewi!
39 Wan ne nejnemit ajachtu pejket kiajwat, ma mukawa, pero yaja tzajtzi katka mas:
—Yeshu ikunew Dawid, shinechpalewi!
40 Ne Yeshu muketzki wan tatuktij ma kalwikakan. Kwak waltzinkiski kitajtanilij:
41 —Tay tikneki ma nikchiwa mupal?
Inak:
—Ma nitachia, Tajtzin.
42 Wan Yeshu kilwij:
—Shitachia! Ne mutayulmatilis metzpalewijtuk.
43 Wan tachishki nemanhachin wan yajki iwan wan ina ka ne Teut weli wey, wan muchi ne techan kwak kitaket inaket ka wey ne Teut.
Ne Bibliaj Tik Nawat · © 2008, 2012 Jan Morrow