Beginning
Tay inak ipanpa ne munamiktijtiwit wan muajkawat
10 Wan muketzki wan kiski, wan yawi nepa Yudaya wan iten ne apan Yarden, wan ken achtu, miak yawit katka iwan, wan yaja kinmachtia ken senpa. 2 Wan sejse Parishayuj ajsiket wan kitajtanilijket su nemi yek ma kiajkawa isiwaw se, pal kiejekuat. 3 Yaja kinhilwij:
—Tay metzintuktia Moshe?
4 Yejemet inaket:
—Moshe inak ka weli mutawawasua se amat ina ka muajkawtiwit wan weli kiajkawa.
5 Ne Yeshu kinhilwij:
—Metzinmakak uni tatuktilis ika anmejemet yujyultakwaknaj. 6 Kwak ne Teut pejki kichiwa muchi, kinchiwki takat wan siwat; 7 neka ne takat kiajkawas iteku wan ne inan 8 wan ne ujume mukwepasket sanse innakayu; ijkiuni intea ume asunte se. 9 Yajika, tay ne kisenputzuj ne Teut, ma inte kikupewa takat.
10 Wan kwak mukweptiwita ichan, ne mumachtianimet kitajtanilijket tay kinekituya ina, 11 wan kinhilwia:
—Ká ne kiajkawa isiwaw wan munamiktia iwan ukse siwat, kiawiltia, 12 wan asu ne siwat kiajkawa ishulejyu wan munamiktia iwan seuk, mawiltia.
Ne shujshulut
13 Wan kalinwikaket kukunetzitzin itech pal kinmatuka. Ne mumachtianimet kinhajwaket. 14 Kwak ne Yeshu kitak kwalanik wan kinhilwij:
—Shikajkawakan walajsit ne kukunetzitzin, maka shikinhajwakan; ika ne itatekimakalis ne Teut yawi pal sejse kiane. 15 Kia nimetzinhilwia: ká te kikwi ne itatekimakalis ne Teut ken se kunetzin inte kalakis.
16 Wan kinnapaluj, wan kitalij ijimey inhijpak wan kinteuchiwki.
Uij ma kalaki se kipia wey tik ne itatekimakalis ne Teut!
17 Wan kwak pejki nejnemi tik ne ujti, ajsik mutalua se itech mutankwaketza wan kitajtanilij:
—Yek tamachtiani, tay weli nikchiwa pal niyultuk senpa?
18 Yeshu kilwij:
—Taika tinechnutza yek? Inte kanaj yejyek asunte sema se wan yaja ne Teut. 19 Tikmatiaya tay nemi tuktijtuk: maka shitamikti; maka shimawilti; maka shitechteki; maka shina ka ukse kichiwki tay inte muchiwki; maka shitashijshiku; shikintakamati muteku wan munan.
20 Yajuni kilwij:
—Tamachtiani, nikishpelwija muchi uni senpa.
21 Ne Yeshu kitak wan kitasujtak, wan kilwij:
—Kinekiuk se: shu-shiknamaka muchi tay tikpia wan shikinmaka ne munekit, wan tikpias muchalchiw tik ne ilwikak, wan shiwi nikan nuipan.
22 Yajuni yajki tristej ipanpa tay inak, ika tetekia wejwey ne ipalwan. 23 Yeshu tajtachiak wan kinhilwia ne mumachtianimet:
—Ne kipiat wey, uij ma kalakikan ijtik ne itatekimakalis ne Teut!
24 Ishpuyawit ne mumachtianimet ipanpa tay inak. Ne Yeshu kinhilwia senpa:
—Kia nupilawan, sea uij ma kalakikan tik ne itatekimakalis ne Teut! 25 Uij ma kalaki se camelloj ijtik ne kuyuntuk ipal se agujajchin, mas uij ma kalaki se kipia wey ijtik ne itatekimakalis ne Teut!
26 Yejemet sujsul ishpuyawit, wan muilwiat:
—Wan ká weli mupalewia?
27 Ne Yeshu kinhitak wan ina:
—Ne takamet te welit, ne Teut kia ika ne Teut weli muchi.
28 Ne Pedro pejki taketza, kilwia:
—Tejemet nikan muchi tikajkawket wan tiwalajtiwit muwan.
29 Inak ne Yeshu:
—Naja kia nimetzinhilwia: muchi ká ne kiajkawtuk ikal wan iikawan wan ieltiwan wan inan wan iteku wan ipilawan wan itajtal nupanpa wan ipanpa ne yeknawatilis 30 yawia kipia, asu kiajkaw sé, sentzunti kal wan iikawan wan ieltiwan wan inajnan wan ipilawan wan tajtal, melka yawit kiejekuat; wan tik ne tay witz yawi yultuk senpa. 31 Miak ká ajachtu yawit tijtipan, wan tijtipan ajachtu.
Tay yawi muchiwa tik Yerushalem
32 Tejkuket yajket ka Yerushalem wan ne Yeshu yawi katka inhishpan, wan ishpuyawit wan ne yawit iwan majmawit. Wan yaja kinnutzki ne majtakti-ume senpa wan pejki kinhilwia tay yawi panu:
33 —Nikan titejkut ka Yerushalem, wan yawit temakat ne Itelpuch ne Takat iwan ne weypalejmet wan ne tajkwiluanimet, wan tatuktisket ma miki, wan kintemakasket iwan ne tejtechan, 34 wan yawit ajkawetzkat, yawit tachijchat ijpak, yawit kiwitekit wan yawit kimiktiat, wan kwak panutiwit yey tunal yawi muyulkwi.
Ne ipilawan Zabday
35 Wan ajsit Yakob wan Yojan ne ipilawan Zabday kilwiat:
—Tamachtiani, timetztajtanit ma shitechchiwili se.
36 Wan kinhilwij:
—Tay ankinekit ma nikchiwa?
37 Yejemet kilwijket:
—Ma mutali ne se tejemet ka mumayekkan wan ne seuk ka ukse ladoj muejmuetztuk kan tiaw titzitzinaka.
38 Ne Yeshu kinhilwij:
—Inte ankimatit tay antajtanit! Tay anhinat, ka welit anhatit tik ne atiluni kan niaw niati naja wan welit anmumakat ne ulyuj ne niaw nimumaka?
39 Yejemet kilwijket:
—Tiwelit.
Wan Yeshu kinhilwij:
—Melka anhatisket tik ne atiluni kan niati wan ne ulyuj ne naja nimumaka anmumakasket, 40 inte niweli nimetzinhilwia ma shimutalikan né, asunte semaya ká ipal muajshitilijtuk.
41 Wan kwak ne majtakti takakket, pejket mukwalantiat iwan Yakob wan Yojan, 42 wan ne Yeshu kalinnutzki wan kinhilwia:
—Ankimatit ka ne mumatit ka tatuktiat tik sejse techan muchiwat tajtzitzinmet wan ne weymet kipiat tatuktilis ijpak muchi. 43 Inte yawi ijkiuni ijtik anmejemet: ká anmutzalan kielewiskia muchiwa wey, yawi tekiti anmupal, 44 wan ká muchiwaskia ne achtu, muchiwas anmutekitini, 45 ika nusan ne Itelpuch ne Takat inte walaj pal tatekimaka asunte pal kintekipanua sejseuk wan pal temaka ne ialmaj pal kiane welit mumakishtiat muchi.
Kipajtij ume pupuyut tik Yerijo
46 Wan ajsiket Yerijo, wan kwak kisat yawit tik Yerijo yaja wan ne mumachtianimet wan se wey miaktal, se pupuyut itukay Bar-Timay (ne ikunew Timay) nemituya tajtani muetztuk itech ne ujti; 47 wan kwak takakik ka yaja Yeshu pal Nazaret, pejki tzajtzi, ina:
—Ikunew Dawid, Yeshu, shinechpalewi!
48 Wan melka miak kiajwat ma takaktu, yaja tzajtzi mas:
—Ikunew Dawid, shinechpalewi!
49 Wan Yeshu muketzki wan inak:
—Shalnutzakan yajuni!
Wan kinutzat ne pupuyut, kilwiat:
—Yek nemi, shimuketza, yaja metznutza.
50 Kikutaminki talchi ne ikwenyu wan ijisiwki muketza wan yajki itech Yeshu, 51 wan Yeshu taketzki iwan ne pupuyut, inak:
—Tay tikneki ma nikchiwa mupal?
Wan ne pupuyut kilwij:
—Nutamachtiani, ma nitachia!
52 Wan Yeshu kilwij:
—Shiawa. Ne mutayulmatilis metzpalewtuk.
Wan tachishki nemanha wan yajki iwan tik ne ujti.
Kalaki tik Yerushalem
11 Wan kwak tzinkisket Yerushalem wan ajsiket Bet-Page wan Bet-Anya inakastan ne Olivajtepet, yaja kintuktia ume pal ne mumachtianimet 2 wan kinhilwia:
—Shumet uni techan nemi anmumelawka, wan kwak tamit anhajsit né anyawit ankiajsit se burrojchin ilpituk ne inteuk mutalij aka ijpak: shiksutumakan wan shalwikakan. 3 Wan su aka metzintajtanilia taika ankichiwat ijkiuni, shinakan:
"Ne itekuyu muneki, nemanha yawi kikwepa."
4 Wan yajket wan kiajsiket se burrojchin ilpituk itech se tentzakka né kan munamikit ne ujujti, wan kisutumat. 5 Wan nemituyat sejse ka né wan kinhilwijket:
—Tay ankichiwat? Taika ankisutumat ne burrojchin?
6 Yejemet kinhilwijket ijkiunisan ken inatuya ne Yeshu, wan kinhajkawket, 7 wan kalwikaket ne burrojchin kanka nemituya Yeshu, wan kitaliat inkwajkwach ijpak wan kitalijket ne Yeshu muetztuk ijpak. 8 Wan miak kichayawket ne inkwajkwach pak ne ujti, wan sejseuk kitekaket ijiswat ne kikutuntiwit tik ne kojtan, 9 wan ne yawit iishpan wan iipan tzajtziket yajket:
—Hosha-na! Teutasujtatuk ne witz tik itukay Tutajwan! 10 Teutasujtatuk ne tatekimakalis witz ipal ne tuteku Dawid! Hosha-na tik ne wejwejkapan!
11 Wan kalak tik Yerushalem. Yajki ne teupan, wan tajtachiak nujme. Kwak teutaka, kiski wan yajki Bet-Anya iwan ne majtakti-ume.
Ne kwawit inte tamaka itakil
12 Ne ukse tunal kwak kisat tik Bet-Anya, mayanki. 13 Né wejka kitak se kuyu amat tentuk wan ijiswat, wan ajsik itech kita su kipia itakil, wan kwak ajsik te kiajsik tatka, semaya ijiswat, ika te nemituya ne metzti pal kipia itakil, 14 wan yaja kilwij:
—Ma aka intea keman kikwa ne mutakil!
Wan ne mumachtianimet kikakket.
Ajsik ne teupan
15 Wan ajsit Yerushalem, wan Yeshu ajsik ne teupan wan pejki kishtia ne tanamakanimet wan ne takuanimet nemituyat itech ne teupan wan kishtapachuj ne mejmesaj pal ne tuminpatanimet wan ne kujkuijpal pal ne kinamakat wijwilut; 16 wan te kiajkawa katka ma aka kisajsaka nian se taijtik tik ne teupan. 17 Wan yaja tamachtia katka wan kinhilwia katka:
—Anka inte ankimatit ka nemi tajkwilujtuk: "Ne nukal munutzas se kal ipal teutajtanilis ipal muchi ne tejtechan"? Ankichiwtiwit ka mukweptuk se ustut pal techtekinimet!
18 Wan takakket ne weypalejmet wan ne tajkwiluanimet, wan pejket tatejtemuat ken kipuluskiat. Yejemet majmawit ika muchi ishpuyawit katka iwan ne itamachtilis. 19 Wan kwak kalaki ne tunal, kisat tik ne weytechan.
Ne kwawit inte tamaka itakil (senpa)
20 Wan kwak panut ka peyna, kitaket ne kuyu amat wan muchi nemituya kuwaktuk, hasta ne inejnelwayu, 21 wan ne Pedro kielnamik wan kilwij:
—Tajtzin, shikita ne kuyu amat tikchiwki maldictar! Kuwaktuka!
22 Wan ne Yeshu kinhilwij:
—Shikyulmatikan ne Teut! 23 Naja kia nimetzinhilwia: asu se kilwiskia uni tepet: "Shimuketza wan shimutamuta tik ne wey at!" wan asu kimati tik iyulu ka ne tay ina yawi muchiwa, yawi muchiwa. 24 Yajika nimetzinhilwia: muchi tay ankitajtanit kwak ankinujnutzat ne Teut, shitayulmatikan ka ankikwijketa wan ankipiasket. 25 Wan kwak anteutajtanit, asu aka metzchiwilij se tay teyek shikelkawaya, pal kiane ne anmuteku ne nemi ajku nusan yawi kitapupulwia muchi tay ankichiwtiwit tay teyek. (26) .
Ká kituktia Yeshu?
27 Wan ajsit Yerushalem senpa wan kwak yaja nejnemi itech ne teupan, itech ajsit ne weypalejmet wan ne tajkwiluanimet wan ne noymet, 28 wan kilwiat:
—Katiawel ne tatuktilis pal tiweli tikchiwa muchi uni, wan ká metzmakak pal taja tiweli tikchiwa?
29 Ne Yeshu kinhilwij:
—Naja nikpia se pal nimetzintajtanilia: shinechilwikan ini wan niaw nimetzinhilwia katiawel ne tatuktilis pal niweli nikchiwa. 30 Ne teulyujmakalis ipal Yojan walkiski ka ilwikak o itech takamet? Shinechilwikan!
31 Wan inat tik inyujyulu:
"Asu tejemet tinat ka ilwikak, yawi ina: taika tel inte ankiyulmatket? 32 Asu tinat itech takamet..."
Majmawit ika muchi ne miaktal kimatit ka tejkia ka Yojan se taketzani pal ne Teut. 33 Wan yejemet kilwijket Yeshu:
—Te tikmatit.
Wan Yeshu kinhilwia:
—Naja nusan inte nimetzinhilwia katiawel ne tatuktilis pal nikchiwa tay nikchiwa!
Ne Bibliaj Tik Nawat · © 2008, 2012 Jan Morrow