Beginning
Ne sewilis
6 Se tunal ipal sewilis, yaja nejnenki itzalan ne mijmil. Ne mumachtianimet kipejpenket yajket ejelut wan tauyat iwan ne inmejmey wan takwat. 2 Ankakeski pal ne Parishayujmet kilwijket:
—Ken ka ne sejsewilis ankichiwat tay te nemi pal tikchiwat?
3 Wan Yeshu inak:
—Ankimatit— inak —tay kichijki Dawid kwak yaja wan ne ikunpawan mayanat? 4 Kalak tik ne ikal ne Teut, kitzkij ne tajtamal ishpanujtuk wan kikwaj, wan kinmakak ne nemituyat iwan, tay ne sema ne palejmet welit kikwat.
5 Wan inak:
—Ne Itelpuch Ne Takat itekuyu ne sewilis.
Welit titapajtiat tik ne sewilis?
6 Ukse sewilis, yaja yajki tik ne kalsennemit tamachtia wan ikuni nemik se takat, wan se imey, ne imayekkan, nemituya tzitzintik. 7 Ne tajkwiluanimet wan ne Parishayujmet kipachiwiat pal kitat asu tapajtia tik ne sewilis pal kiajsit ken kitenewaskiat. 8 Yeshu kimatki tay inat tik inyulu; kilwij ne takat kipia tzitzintik ne imey:
—Shimuketza wan shimutali tatajku.
Wan muketzki wan nakak ejkatuk. 9 Yeshu kinhilwij ne sejseuk:
—Nimetzintajtanilia se: nemi pal tikchiwat tay yek ush tay inteyek tik ne sewilis? Yek ma tikpalewikan se almaj o ma tikpulukan?
10 Wan tajtachishki; kwak tamik kinhita muchi, kilwij ne takat:
—Shikmelawa ne mumey.
Kichijki kiuni, wan walmupajtij ne imey. 11 Mikit iwan kwalan wan ne se kilwia ne seuk:
—Tay tiawit tikchiwat iwan yajini?
Yeshu kishpejpena majtakti-ume titanijtuk
12 Tik uni tujtunal yaja kiski kinujnutza ne Teut tik ne tepet wan panuk muchi ne tayua tik teutajtanilis. 13 Wan kwak tanesik kinnutzki ne mumachtianimet wan kishpejpen majtakti-ume pal yejemet, ká nusan kintukaytij ne tijtitanijtuk:
14 Shimon ne kinutzki nusan Pedro
wan Andreas ne iikaw,
wan Yakob,
wan Yojan,
wan Pilipo,
wan Bar-Tolmay,
15 wan Matay,
wan Tomas,
wan Yakob ikunew Halpay
wan Shimon ne munutza Zelotes,
16 Yuda ikunew Yakob,
wan Yuda Ishkaryot ne muchijki Temakani.
17 Wan waltemuk inwan wan walnakak tik se kan petztik iwan miak imumachtiani wan miak pal ne techan walejkutiwit tik muchi Yudaya wan Yerushalem wan iten ne alamal nepa Tzor wan Tzidon, 18 ne walajket kikakit wan mupajtiat ne inkujkukulisyu, wan mupajtiat ne mukakasuat iwan inhijiu teyek. 19 Wan muchi kitejtemuat pal kimatukat ika walkisa ne itajpal itech iweyka wan kinpajtia muchi.
Pewa tanawatia
20 Yaja ajkutachishki wan kinhitak ne mumachtianimet wan taketzki ijkini:
—Suertej kipiat ne munekit, ika anmupal ne itatekimakalis ne Teut.
21 Suertej ne mayanat ashkan, ika san anhishwisket.
Suertej ne chukat ashkan, ika san anwetzkasket.
22 Suertej ankipiat kwak metzinhishijiat ne takamet wan kwak walmetzinkupewat wan metzinhijilwiat wan inat ka anmutukay inte tatka ka imaku ne Itelpuch ne Takat. 23 Shitzijtzikwinikan iwan pakilis tik uni tunal, ka ne anmupatiw yawi wey né tik ne ilwikak, ika anmutejteku kenhaya kinchiwiliat katka ne taketzanimet.
24 Sema, ay anmejemet ne kipiat wey,
ika ankipiata ne anmupatiw!
25 Ay anmejemet ne ishwitiwit, ika san anmayanasket!
Ay ne wetzkat ashkan, ika san anmutechtisket wan anchukasket!
26 Ay kwak taketzat yek anmupanpa muchi ne takamet, ika anmutejteku kiane kinchiwiliat katka ne tashijshikuanimet.
Shikintasujtakan ne metzinhishijiat
27 Wan anmejemet ká annechkakit, ini tay nimetzinhilwia:
Shiktasujtakan ne kinekit metzinhijtakuat,
shikchiwilikan yek ne metzinhishijiat,
28 shikteuchiwakan ne metzintenewat,
shiktajtanikan ne Teut ka inmaku ne metzinhijilwiat.
29 Ne metztasa pak ne se mukamak shiktalili ne seuk,
wan ne kitzkia ne mutaken shikajkawili nusan ne muwipil asu kineki.
30 Shikinmaka muchi ká metztajtanit, wan tay ne kikwi tay mupal maka shiktajtanili.
31 Wan ijkiunisan ken ankielewiat ma metzinchiwilikan, shikchiwakan kenha.
32 Wan asu ankintasujtat ká ne metzintasujtat, tay ipatiw?
ika ne tateyekchiwat nusan kintasujtat ká kintasujtat yejemet.
33 Wan asu ankinpalewiat ká ne metzinpalewiat, tay ipatiw?
ika ne tateyekchiwat nusan kichiwat kenha.
34 Wan asu antanewiltiat semaya kwak ankimatit ka anyawit kikwit, tay ipatiw?
Ne tateyekchiwat ijkiasan kintakwiltiat tateyekchiwat ma kinkwepilikan kenha.
35 Shikintasujtakan mas yek ne kinekit metzinhijtakuat,
wan shikinpalewikan,
wan shitanewiltikan melka inte ankimatit ka anyawit kikwit tatka,
wan ne anmupatiw yawi wey wan anmuchiwasket ipilawan ne Wejkapan, ika yajane kinchiwilia tay yek ne tateyekchiwat.
36 Shitaeknelikan ijkiunisan ken ne Anmuteku nusan taeknelia.
37 Maka shiktenewakan aka ipanpa tay kichijtuk
wan te aka yawi metzintenewa;
maka shinakan ka aka inte yek
wan te aka yawi ina inte anyejyek;
shitachulultikan wan metzinchulultisket.
38 Shitamakakan wan san ankikwisket:
tatamachiwasket yek, tapachusket wan tatzejtzelusket,
tatepewasket hasta kitemat anmukwey;
ika taiwan antatamachiwat tatamachiwasket anmupal.
Sejse taketza
39 Nusan kinhilwij ini:
—Se pupuyut weli kilwitilia ne ujti seuk pupuyut? Inte yawit ustuwetzit ne ujume?
40 Se mumachtiani inte nemi ijpak ne tamachtiani; kwak tami, san muchiwas ken itamachtiani.
41 Ken ka tikita ne sakatzin tik ne iish ne muiknew? Wan ne taketzal nemi tik ne muish anka inte tikita? 42 Ken tiweli tikilwia ne muiknew: "Nuikaw, shinechajkawa nikishtia ne sakatzin ijtik muish", kwak inte tikita uni taketzal ijtik ne muish?! Tensasal! Shikishti achtu ne taketzal tik ne muish, wan kwakuni tiaw titachia yek pal weli tikishtia ne sakatzin nemi tik ne iish ne muiknew.
43 Ika se yek kwawit inte tamaka itakil teyek, nian se kwawit teyek tamaka itakil yek. 44 Yajika sejse kwawit muishmati ipanpa ne itakil, ika itech ne witzkilit inte tikululuat tzatzaput, nian tikanat shujshukut itech ne witztumat.
45 Ne yek takat kishtia tik ne chalchiwit yek pal ne iyulu tay yek, wan ne inteyek kishtia tik ne inteyek ne inteyek; ika ken nemi tik tuyulu, ijkiuni taketza ne tuten.
46 Yajika, ken ka annechnutzat: "Tajtzin! Tajtzin!" wan te ankichiwat tay nina?
47 Ká ne ajsi nutech wan kikaki ne nupajpalabraj wan kichiwa, niaw nimetzinhilwitilia ken yaja. 48 Yaja kenha ken se takat ne kiketza se kal wan pejki tawawana wan kichijki se wey shaput wan kitukak ne tetzilnaj ijtik ne tesual; ajsik ne tepeat wan kichaluj uni kal, wan te welik kitzejtzelua ika ne kal nemituya yek mutzintijtuk.
49 Ká ne nechkaki wan te kichiwa tatka, yaja ken se takat ne kiketzki se kal ijpak ne tal, wan te kichijki tetzilnaj, wan kwakuni wetzki wan kipitzki wan kitajkal wan puliwik muchi.
Ne sentzuntuktiani wan ne itekitini kukuya
7 Kwak tamik ina muchi tik itakakilis ne chinamit, yajki Kaparnajum. 2 Se tekitini ipal se sentzuntuktiani kukushki wan yawi miki wan ne itekuyu kinekituya sujsul. 3 Kwak takakik ipanpa Yeshu, kintuktij sejse chulet Yudayuj itech pal kitajtanit ma wiki kipajtia ne tekitini. 4 Kwak yejemet ajsiket itech Yeshu, mutajtawelijket talul; inat katka ma kichiwa ini, ika:
5 —Yaja— inat —kitasujta ne tutechan wan kiketzki ne tukalsennemit.
6 Yeshu yajki inwan. Kwak tea nemituya wejka ne ikal yajuni, ne sentzuntuktiani kintuktij sejse iamigoj senpa kilwiat:
—Tajtzin, maka shimukakasu, ika naja inte nitatka pal tikalaki ijtik ne nukal. 7 Neka inte niknekik nikisa nimetznamiki; sema shina se mupalabraj wan ma mupajti nutekitini. 8 Ika naja nusan nitakat tuktijtuk, wan nikpia ka nuitan tasumanimet, wan naja nikilwia ne se:
"Shu!"
wan yaja yawi, ne seuk:
"Shiwi!"
wan yaja witz, wan ne nutekitini:
"Shikchiwa!"
wan yaja kichiwa.
9 Yeshu kikakik wan ishpuyawik; muishkwepki wan kinhilwij muchi ne senyawit iwan:
—Nimetzinhilwia ka tayulmatilis ken ini inte nikajsik nian tik Israel!
10 Wan kwak ne mutuktijtiwit mukwepket tik ne kal, ne tekitini tea kukushki.
Se mikini tik Nain
11 Tik ukse tunal yajki se techan itukay Nain, wan iwan nejnemi katka ne mumachtianimet wan se wey miaktal. 12 Tzinkiski itech ne itentzakka ne techan wan kinnamik sejse kisajsakat se mikini. Ne miktuk ne itakakunew se lamajtzin semaya kipiatuya uni piltzin, wan miktuya ne ishulejyu, wan iwan nejnemit miak ipal ne techan. 13 Wan kikukuj iyulu ne Tajtzin kwak kitak wan kilwij ne siwat:
—Maka shichuka.
14 Ajsik itech ne mikini wan kimatukak ne itapech. Ne tawikanimet muketzket wan yaja inak:
—Pipil, nimetzilwia ma shisaya!
15 Mukechketzki ne miktuk wan pejki taketza, wan Yeshu kiajkaw iwan ne inan. 16 Muchi mumutijket, wan pejket inat ka wey ne Teut, wan inat: "Ijtik tejemet muskalij se wey taketzani!" wan "Tachishki ne Teut wan kipalewij n' itechan!" 17 Wan kiski ne tenewalis nujme Yudaya wan tik muchi ne tajtal inawak.
Yojan kitajtanilia Yeshu ká yaja
18 Wan ne imujmumachtiani Yojan kilwijket muchi ini, wan ne Yojan kalinnutzki ume pal ne imujmumachtiani 19 wan kintuktij itech ne Tajtzin kitajtaniliat:
"Taja ne yawi witz, ush tinemit pal tikchiat seuk?"
20 Kwak ajsiket ne takamet, inaket:
—Yojan ne teulyujmaka techtitanij timetztajtaniliat su taja ne yawi witz ush nemi pal tikchiat ukseuk.
21 Ikuka, kinpajtij miak kipiat kujkukulis wan kwijkwikwilis wan inhijiu teyek; nusan kichijki ka tachiat miak pupuyut, 22 wan nankilij:
—Shumet shikilwikan Yojan tay ne ankitztiwit wan antakaktiwit: pupuyumet tachiat, metzkelumet nejnemit, ne kipiat shinyu mupajtiat wan ne inte takakit katka takakit, ne miktiwit muketzat, ne munekit muyeknawatiat. 23 Suertej kipia ká inte mutekukujmati ka numaku.
24 Kwak yajket, Yeshu pejki kinhilwia muchi ipanpa Yojan:
—Tay anwalajket antachiat tik ne kojtan: se uatzin tzejtzelujtuk tik ne ejekat? 25 Tay anwalajket ankitat: se takat yamanik takentijtuk? Ne kipiat inkwajkwach ijishyektzin nepa muajsit kan nemit ne tatuktianimet! 26 Taika anwalajket: pal ankitat se taketzani? Nimetzinhilwia ka kia! Wan mas que taketzani. 27 Ipanpa yajuni ne muijkwilujtuk:
"Né niktuktia muishpan nutanawatiani ma metzajshitili ne ujti."
28 Nimetzinhilwia: itzalan muchi ne sijsiwapunijtuk Yojan ne sea wey, pero ne mas chikitik tik ne itatekimakalis ne Teut mas wey que yaja.
29 Wan muchi ne kikakket, ne tumintepewanimet nusan, inaket ka yek ne Teut wan mumakaket ne ulyuj ipal Yojan; 30 semaya ne Parishayujmet wan ne tajtulmatit inte kichijket tay kinekituya ne Teut, wan te mumakaket ulyuj itech.
31 Yeshu inak:
—Ken ne tukniwan pal ini tujtunal? Ken ninaskia? 32 Kenhat ken ne kukunetzitzin mawiltiat tik ne tiankis wan mutzajtzaliat, inat:
"Titatzutzunket anmupal, wan te anmijtutijket! Timutechtijket, wan te anchukaket!"
33 Ika walajtuk Yojan ne teulyujmaka: inte takwa katka, nian ati katka, wan anhinat:
"Kipia se nawal!"
34 Walajtuk ne Itelpuch ne Takat, takwa wan ati, wan anhinat:
"Yajane takwani, tawanani, wan musentalia iwan tumintepewanimet wan tateyekchiwat!"
35 Muilwitia ka yek ne tamatilis ipanpa muchi ne ikukunew!
Ne siwat kikshipakak Yeshu
36 Se pal ne Parishayujmet kilwij ma wiki takwa iwan; yajki ichan ne Parishayuj wan mutalij takwa. 37 Wan tik ne techan nemik se siwat tateyekchiwa, wan ken kimatki ka Yeshu yawi takwa ichan ne Parishayuj, kalkwij se botellaj iwan ushit 38 wan mutalij ka ipan itech ne ijikshi wan chukak, wan pejki kikshipaka iwan ne iishayu wan kimatilua ne ijikshi iwan ne itzunkal wan kitejtennamik ne ijikshi wan kimajmawaltij iwan ne ushit. 39 Ne Parishayuj ne kalnutzki Yeshu ka ichan tachishki, wan inak tik iyulu:
—Yajini, asu tejkia ka yaja se taketzani, kishmatiskia tay wan ken uni siwat ne kichijchimi, wan ka yaja se tateyekchiwa.
40 Wan ne Yeshu nankilij, kilwij:
—Shimon, nikpia se pal nimetzilwia.
Inak ne seuk:
—Shina, tamachtiani.
41 —Se takwiltiani kinpiatuya ume takwini: ne se kiwikilia makwil tzunti tumin, ne seuk unpual-majtakti. 42 Kwak nian ne se nian ne seuk kipiatuyat pal kitashtawiat, yaja inak ka nemi yek, ma inte kikwepilikan tay kinhajkawilijtuk. Shina, katiawel ipal ne ujume kitasujta mas ne takat?
43 Shimon inak:
—ina ka ne kiwikilia wey tumin.
Wan Yeshu kilwij:
—Yek tina.
44 Muishkwepki kita ne siwat wan kilwij Shimon:
—Tikita ini siwat? Nikalak tik mukal: nian se chiupi at pal nikpaka nujnukshi inte tinechmakak; yajini nechikshipakak iwan ne iishayu wan kimatiluj nujnukshi iwan itzunkal. 45 Taja inte tinechtennamik; yajini pejki kitennamik nujnukshi kwak niajsik wan nechtennamiki kenhayuk. 46 Taja inte tinechtzunmawaltij iwan tumakka; yajini nechikshimawaltij iwan ushit. 47 Yajika nimetzilwia: mutapupulwijtiwit muchi tay tateyekchijki ika nechtasujtak wey. Ká ne mutapupulwia chiupi, tatasujta chiupi.
48 Kilwij ne siwat:
—Mutapupulwijtuk tay titateyekchijki!
49 Wan ne musentalijtiwit pejket inat tik inyujyulu:
—Ká ini pal kitapupulwia ne tateyekchijtuk?
50 Yaja kilwij ne siwat:
—Ne mutayulmatilis metzpalewijtuk. Shiawa wan shinemi yek!
Ne Bibliaj Tik Nawat · © 2008, 2012 Jan Morrow