Beginning
Muchi ini yawi tami
24 Wan Yeshu yajki tik ne teupan, wan ne mumachtianimet ajsiket kilwitiliat ne gajgalantzin kal inawak ne teupan. 2 Yaja kinhilwij:
—Ankitat muchi ini? Kia nimetzinhilwia: nikan inte mukawas nian se tet ijpak seuk ne inte yawit kitamutat talchi.
3 Yaja mutalij pak ne Olivajtepet, wan ajsiket ne mumachtianimet ka ikwaj inat:
—Shitechilwi keman yawi panu muchi uni wan ken yawi muishmati ka tiajsi wan yawia tami muchi?
4 Wan Yeshu kinhilwij:
—Shiktalikan cuidadoj ma inte metzinshijshikukan, 5 ika miak walasket tik nutukay inat: "Naja ne Mawaltijtuk", wan miak yawit mushijshikuat. 6 Anyawit takakit ka musumat nujme ne talmet; maka shimajmawikan, ika melka nemi pal muchiwa, inteuk tamis muchi. 7 Ika yawit musumat itzalan ne tejtechan wan itzalan ne talmet, yawit mayanat wan nujme yawi ulini. 8 Yaja kwak pewas wey takukulis kenha ken kwak yawia puni se. 9 Kwakuni yawit metzintemakat, yawi sujsul uij wan yawit metzinmiktiat wan muchi ne tejtechan yawit metzinhishijiat ipanpa nutukay, 10 wan kwakuni miak yawit mutekukujmatit, wan sejse kintemakasket sejse, 11 wan yawit kisat miak tashijshikuani wan kinshijshikusket miak, 12 wan ipanpa muchi tay yawi muchiwa tay inte nemiskia pal muchiwa, miak yawit seseyat inyulu. 13 Ká ne kiselia muchi hasta ma tami, yaja yawi mupalewia, 14 wan tanajnawatilisket ini yeknawatilis ipal ne tatekimakalis nujme ne taltikpak pal kimatit muchi ne tejtechan. Wan kwakuni yawi tami.
15 Yajika kwak ankitat ken nujme muwilewa sujsul, ken inak ne taketzani Daniel ejkatuk tik ne ipal ne Teut (ká amatachia ma kimati tay uni kineki ina), 16 kwakuni, ne nemit tik Yudaya ma chulukan ka tepet; 17 ne nemi pak itzunpan ne ikal ma inte kutemu kalijtik pal kalkwi tatka; 18 wan ne nemi tik ne kojtan ma inte mukwepa ka ichan pal kalkwi ikwajkwach! 19 Tik uni tujtunal, pobrejchichin ne wejweyijti wan ne tachichit! 20 Shiktajtanikan ne Teut ma inte nemi pal anchuluat tik ne shupan nian tik ne sewilis.
21 Ika yawi sea uij: kwak tamik ne Teut kichiwa muchi hasta ashan inte keman muitztuk tatka kenha. 22 Asu inte mukutunaskiat uni tujtunal, inte mupalewiskia iweyka nian se; wan semaya mukutunasket inpanpa ne muishpejpentiwit.
23 Kwakuni asu aka metzinhilwia: "Shikita, uni nemi ne Mawaltijtuk!" o "Nikan nemi!" maka shikmatikan ka ijkia, 24 ika muketzasket sejse inat ka yejemet ne Mawaltijtuk wan tashijshikuat, wan kichiwasket muchi tay welit pal mumati ka ijkia pal kiane nusan ne muishpejpentiwit mushijshikuat. 25 Naja nimetzinhilwijtuka! 26 Yajika tel, asu metzinhilwiat: "Uni nemi tik ne kojtan!", maka shumet ka né. Asu inat: "Nikansan kalijtik!", shikmatikan ka inte tejkia. 27 Kenha ken takipini witz ka né wan muita nujme ne ilwikak, ijkiunisan muchiwas kwak ajsi witz ne Itelpuch ne Takat. 28 Kan nemi ne mikini, unisan musentepewa ne kwawti.
29 Kwak tamit uni tujtunal sujsul uij, yawi kunyuakisa ne tunal, wan tea yawi tajtawia ne metzti, wan yawit kuwetzit ne sitalmet, wan ka ikajku yawit mutzejtzeluat ne itajtajpal, 30 wan kwakuni muitas tik ne ilwikak se pal muishmati ne Itelpuch ne Takat, wan kwakuni muchi ne takamet ipal ne taltikpak yawit mutechtiat wan tachiasket witz ne Itelpuch ne Takat ijpak mijmishti ka ikajku wan weli wey wan tzitzinaka. 31 Wan yaja yawi kintuktia ne itajtanawatiani, wan mutzutzunas se wey trompetaj, wan ne kinhishpejpentiwit walasket nujme ne taltikpak wan musentepewasket itech yaja.
32 Shimumachtikan tay techmachtia ne casoj pal ini kwawit: kwak ne imajtzal nemiuk selek wan pewat takatit ijiswayu, ankimatit ka witzaya ne shupan. 33 Kenhaya, kwak ankitat ka muchi tay ninatuk muchiwa, shikmatikan ka uni witzaya, nemia tik ne tenkal. 34 Kia nimetzinhilwia: inte yasnekit itan tal ne takamet pal ashan hasta ma muchiwa muchi uni. 35 Ne ilwikak wan ne tal panusket, wan ini tay nina inte yawi panu!
36 Inte kimati aka keman yawi ajsi uni tunal wan horaj: nian ne tanawatianimet ka ikajku, nian ne Itelpuch, semaya ne Teteku kimati, 37 ika kenha ken tik ne tujtunal pal Noa, ijkiuni muchiwas kwak ajsi ne Itelpuch ne Teut. 38 Kenha ken nemiket tik uni tujtunal kwak inteuk ajsik ne tepeat — takwat wan atit, munamiktiat wan tanamiktiat hasta kalakik Noa tik ne takukal, 39 wan te mumatket hasta walaj ne tepeat ne kinwikak muchi — ijkiunisan tel walas ne Itelpuch ne Takat. 40 Kwakuni, ume yawit nemit tik ne mil, wan ne se kiwikat wan ne seuk kiajkawat; 41 ume yawit tisit tik ne metat, wan ne se muwika wan ne se muajkawa.
42 Yajika shikishpelwikan ika inte ankimatit katiawel ne tunal kwak witz ne Anmuteku. 43 Shikmatikan ini: ka asu kimatiskia ne itekuyu ne kal ne horaj keman techtekit witzet, mutaliskia kipachiwia wan te muajkawaskia mukaltapana. 44 Neka anmejemet nusan shimuekchiwakan, ika ijtik ne horaj kwak inte anmumatit yawi witz ne Itelpuch ne Takat.
Ne yek tekitini
45 [Wan inak:]
Ká tel yek tekitini? Yaja ká kimati tay ne muneki muchiwa. Ne tajtzin kitalia yajane ijpak muchi ne kaltekitinimet ma kinmaka intakwal kwak muneki. 46 Suertej kipia uni tekitini asu ne itekuyu kiajsi kichiwa ijkiuni kwak walmukwepa. 47 Kia nimetzinhilwia ka asu ijkiuni, yawi kitalia tatuktia tik muchi tay ipal. 48 Wan asu uni tekitini inte yek wan asu ina tik iyulu: "Nutekuyu ishtuna witz" 49 wan pewa kinchajchalua ne ikunpawan wan takwa wan ati wan mutawantia, 50 ne itekuyu yawi witz kwak inte tejchia ika inte kimati tay horaj witz, 51 wan kikujkutunas wan kituktis iwan ne tensasalmet. Ikuni yawi chuka wan tzalani itajtan!
Majtakti siwapil
25 [Wan inak:]
—Kwakuni ne tatekimakalis ipal ne ilwikak yawi ken majtakti siwapil ne kikwijket intajtawil wan kisket kinamikit ne munamiktia. 2 Makwil pal yejemet tzujtzuntet, wan makwil tamatit. 3 Ne tzujtzuntet melka kiwikaket ujukut pal kitawilua ne ujti inte kiwikaket tumakka. 4 Ne tamatit kiwikaket tumakka pal kitaliliat ne ujukut. 5 Kwak ne munti ishtuna witz, muchi kuchket. 6 Ka tajkuyua pejki tzajtzi se:
"Uni witz ne munti! Shumet shiknamikikan!"
7 Kwakuni isaket muchi ne siwapipil wan pejket kiekchiwat ne intajtawil. 8 Ne tzujtzuntet kinhilwijket ne sekit:
"Shitechmakakan chiupi anmutumakka; ne tutajtawil yawit sewit."
9 Ne sejseuk nankilijket, inat:
"Inte, ka asu inte, inte techajsi. Mas yek shumet shikuakan intech ne kinamakat."
10 Kwak yejemet yawit takuat, walaja ne munti, wan ne siwapipil ne muekchijtiwit kalakket iwan kalijtik kan yawi munamiktia, wan mutzak ne tenkal. 11 Tipan nusan witzet ne siwapipil ne mukawtiwit, inat:
"Tajtzin, Tajtzin! Shitechtapuili!"
12 Yaja nankilij, inak:
"Kia nimetzinhilwia ka inte nimetzinhishmati!"
13 Yajika shikishpelwikan ika inte ankimatit nian ne tunal nian ne horaj.
Majtakti dolar
14 [Wan inak:]
—Ika kenha ken se takat ne yawi wejka, wan kinnutzki itejtekitini wan kinhajkawilij ne ipalwan pal tajpiat, 15 kimakak makwil dolar ne se, ume ne seuk, wan se dolar ne ukseuk, sejse ken welituya, wan yajki. 16 Ne kipiatuya makwil dolar kiski nemanha iwan ne tumin wan kikwij pal kiana uk makwil dolar. 17 Ne kipiatuya ume kichijki kenha wan nusan kianki uk ume. 18 Ne kipiatuya se dolar yajki kichiwa se shaput tik ne tal wan kitalpachuj ne itumin ne itekuyu. 19 Kwak panuket miak tunal ne intekuyu mukwepa witz wan mutalia kichiwa tajtapualis inwan, 20 wan ajsik ne kipiatuya ne makwil dolar, wan kalwika uk makwil dolar, wan ina:
"Tajtzin, tinechmakak makwil dolar wan shikita, uk makwil dolar nikanki."
21 Ne itekuyu kilwij:
"Yek takat, tikchijki tay yek. Iwan chiupi, tikchijki tay yek; ashan niaw nimetztalia tiktekimaka miak. Shiwi, shipajpaki iwan ne mutekuyu!"
22 Nusan ne kipiatuya ume dolar ajsik wan inak:
"Tajtzin, tinechmakak ume dolar wan shikita, uk ume dolar nikanki."
23 Ne itekuyu kilwij:
Yek takat, tikchijki tay yek. Iwan chiupi, tikchijki yek; ashan niaw nimetztalia tiktekimaka miak. Shiwi, shipajpaki iwan ne mutekuyu!"
24 Nusan ne kipishki se dolar ajsik wan inak:
"Tajtzin, nikmatiaya ka taja titakat takwawak, titapishka kan ne inte titatukak wan titatepewa kan ne inte titasentaluj, 25 wan nimajmawki, yajika niajki nikinaya ne mudolar tik ne tal. Nikan tikpia tay mupal."
26 Ne itekuyu nankilij, kilwij:
"Taja titatziwi, takapala! Asu tikmati ka naja nitapishka kan ne inte nitatukak wan nitatepewa kan ne inte nitasentaluj, 27 taika tel inte tikintakwiltij nutumin ne tuminpianimet, wan kwak niwalaj nalkwijtuskia tay nupal iwan ne talilijtuk. 28 Shikishtilikan uni dolar wan shikmakakan ne kipia majtakti. 29 Ika kinmakasket wan kintepewilisket ká ne kipiat; wan ká ne inte kipia, kishtilisket hasta tay ne kipia; 30 wan ini tekitini te tatka ipatiw shikishtikan wan shikajkawakan tatenpan kan kunyua. Ikuni yawi chuka wan tzalani itajtan."
Kwak muchi yawit muchiwat juzgar
31 [Wan inak:]
—Kwak yawi witz ne Itelpuch ne Takat tzitzinaka wan muchi ne tanawatianimet iwan, kwakuni nemis muetztuk pak ikuijpal tzitzinaka, 32 wan iishpan mutepewasket muchi ne tejtechan, wan yaja takupewas intzalan kenha ken se tajpia takwalmet takupewa intzalan ne ichkamet wan ne cabrajmet, 33 wan kintalis ne ichkamet ka iyekkan, ne cabrajmet ka seuk ladoj. 34 Kwakuni ne tatekimaka kinhilwis ne nemit ka iyekkan:
"Nuteku metzintasujta: shiwikikan wan shikpiakan ne tatekimakalis ne muekchijtuk anmupal kwak pejki ne taltikpak, 35 ika nimayanki wan annechtakwaltijket, niamikik wan annechmakaket at, niejkuni katka wan annechkalaktijket ka anmuchan, 36 ninemituya petznaj wan annechtakentijket, nikukushki wan annechtajpishket, ninemik tzaktuk wan anhajsiket nechitat."
37 Kwakuni nankilisket ne yejyek, inat:
"Tajtzin, keman timetzitaket timayana wan timetztakwaltijket, o tiamiki wan timetzmakaket at? 38 Keman timetzitaket tiejkuni wan timetzkalaktijket ka tuchan, o tipetznaj wan timetztakentijket? 39 Keman timetzitaket tikukuya o tinentuk tzaktuk wan tiajsiket timetzitat?"
40 Wan ne tatekimaka yawi nankilia:
"Kia nimetzinhilwia: kwak ankichiwat ijkiuni ipal se pal nukniwan, melka ne mas chikitik, ankichiwat ka numaku."
41 Kwakuni kinnutzas nusan ne nemit ka seuk ladoj:
"Tetekia anmuwan! Shinechajkawakan wan shumet tik ne tit senpa tata ne muekchijtuk ipal ne Tamintuk wan ne itajtanawatiani, 42 ika nimayanki wan te annechtakwaltijket, niamikik wan te annechmakaket at, 43 niejkuni wan te annechkalaktijket ka anmuchan, ninemituya petznaj wan te annechtakentijket, nikukushki wan ninemik tzaktuk wan te anhajsiket."
44 Kwakuni yejemet nusan nankilisket inat:
"Tajtzin, tejemet keman timetzitaket timayana o tiamiki o tiejkuni o tipetznaj o tikukuya o tzaktuk wan te timetzpalewijket?"
45 Kwakuni kinhilwis:
"Kia nimetzinhilwia: kwak inte ankichiwat ijkiuni ipal se melka ne mas chikitik, nusan inte ankichiwat nuwan."
46 Wan yejemet yasnekit kan senpa kinhajwat wan ne yejyek yasnekit kan senpa yujyultuk.
Ne Bibliaj Tik Nawat · © 2008, 2012 Jan Morrow