Beginning
Sejseuk tay kinhilwij
18 Kwakuni ne mumachtianimet yajket kitajtaniliat Yeshu:
—Katiawel ne mas wey ijtik ne tatekimakalis ipal ne ilwikak?
2 Wan kalnutzki se kunetzin wan kitalij tatajku, 3 wan inak:
—Kia nimetzinhilwia, asu inte anmuishkwepat wan anmuchiwat ken ne kukunetzitzin, inte anyawit kalakit ijtik ne tatekimakalis ipal ne ilwikak. 4 Yajika, ká ne mutemultia ken ini kunetzin, yajane ne achtu ijtik ne tatekimakalis ipal ne ilwikak, 5 wan ká ne kikwi se kunetzin ken yajini tik nutukay, najasan nechkwi.
6 Ká ne kitekukujmati se pal ini chijchikitik nechyulmatit, mas yek ma mupilu se burrojmetat itech ikechkuyu wan ma atuki tik ne miktan at.
7 Ay! pobrej taltikpak ipanpa ne tajtatzunchaluas. Senpa nemisket tajtatzunchaluas; saman ne takat ká kalwika ne tatzunchaluas, ay pobrej!
8 Asu ne mumey o ne mukshi metztekukujmati, shikutuna wan shiktamima wejka. Mas yek ma shiyultuk makutu o metzkelu wan te ma metztamutakan wan ume mumey wan ume mukshi tik ne tit pal senpa! 9 Wan asu se muish metztekukujmati, shikwiwita wan shiktamima wejka. Mas yek ma shiyultuk ishpupuyut wan te ma shikpia ume muish wan ma metztamutakan ka miktanshaput kan tata.
10 Shikitakan ma inte shikijilwikan nian se pal ini chijchikitik, ika nimetzinhilwia ka ne tanawatianimet ne kinpalewiat ka ikajku kitat nemit ne ishkalyu ne Nuteku pal ne ilwikak. (11) . 12 Tay anhinat: su se takat kipia sentzunti ichkat wan se yejemet kipulua ne ujti, yaja yawi kinhajkawa ne sejseuk tik ne tepet pal yawi kitemua ne se pulijtuk, o inte? 13 Wan asu kiajsi, kia nimetzinhilwia ka pajpakiskia mas ipanpa yajuni que inpanpa ne nawpual-kashtul-nawi ne inte pulijtiwit. 14 Ijkiuni tel, Anmuteku ka ikajku inte kielewia ma wilewi nian sechin pal ini chijchikitik.
15 Asu se muiknew metztateyekchiwilia, shu shikajajwa musel ijtik taja wan yaja. Su metzkaki, timukwepa tikpia muiknew. 16 Su inte kineki metzkaki, shikwika se o ume tukniwan pal kiane, su ume o yey inat, ma naka ijkiunisan. 17 Asu nusan inte kinkaki, shu-shikilwi ne sennemit. Asu inte takaki kenhayuk, ma kenha ken se pal tepal techan wan kenha ken ne tumintepewani. 18 Kia nimetzinhilwia: muchi tay ankilpiat pak ne tal ilpituk nemis tik ne ilwikak, wan muchi tay ankisutumat pak ne tal sutuntuk nemis tik ne ilwikak. 19 Senpa nimetzinhilwia ka su mutajtani se pal mumati, wan su ume anmejemet annankiliat kenha, inpal ne Nuteku ka ikajku kichiwas ken annankilijket, 20 ika nujme kan ume o yey musentepejtiwit tik nutukay, uni ninemi intzalan.
Ne tekitini ne inte tetapupulwia
21 Kwakuni ajsik Pedro wan kilwij:
—Tajtzin, hasta keski wipta weli ma nechchiwili nuiknew tay te yek wan ma niktapupulwi kenhayuk? Anka chikume?
22 Ne Yeshu kilwia:
—Inte nimetzilwia chikume wipta, asunte chikume wan chikume wan uk chikume wipta!
23 Yajika nina ka ne tatekimakalis ipal ne ilwikak ken se tatuktiani ká kinekik kichiwa ne tapualis pal kita keski kiwikiliat ne itejtekitini. 24 Pejki, wan kalwikaket se tawikilia sujsul. 25 Yaja inte kipiatuya pal kitashtawia, yajika ne itekuyu tatuktij ma kinnamakakan yaja wan ne isiwaw wan ne ipilawan wan muchi tay ipal, wan ma kitashtawikan. 26 Ne tekitini mutamutak talchi mutankwaketza wan kilwij ne tatuktiani:
"Nimetztajtani, semaya shitejchia achi wan niaw nimetztashtawia muchi."
27 Ne itekuyu kitasujtak, yajika kichulultij wan kielkaw muchi ne ijaranaj. 28 Wan kwak kiski yajuni, kinamik se ikunpa ká kiwikilia katka ankakeski pesojchin, wan pejki kikechpachua, ina:
"Shinechtashtawi tay ne tinechwikilia!"
29 Ne ikunpa mutamutak talchi mutajtawelia, ina:
"Nimetztajtani, semaya shitejchia achi wan niaw nimetztashtawia muchi."
30 Inte kinekik tejchia; kitentzak hasta ma kikwepili ne ijaranaj. 31 Kwakuni ne ikunpawan kitaket tay panutuk wan sea mukwalantijket, wan ajsiket itech ne intekuyu kinawatiat muchi tay panutuk. 32 Kwakuni ne tajtzin kalnutzki ne tekitini wan kiajwa, ina:
"Tay ini tikchijtuk? Naja nikelkaw muchi ne mujaranaj ika taja tinechtajtan. 33 Taja nusan nemi pal tikpalewia mukunpa, kenha ken nimetzpalewij!"
34 Sujsul kwalanik ne itekuyu, wan tatuktij ma kilpikan tik ne tatzakwiluyan hasta ma kikwepa muchi ijaranaj.
35 Ijkiuni ne Nuteku ipal ne ilwikak nusan yawi metzinchiwilia su inte antetapupulwiat ijtik ne anmuyujyulu tay ne anmukniwan kichijtiwit anmuwan.
Tay inak ipanpa ne munamiktijtiwit ne muajkawat
19 Wan kwak Yeshu tamik taketza, kiajkaw Galilaya wan yajki ne tajtal nepa Yudaya iten ne apan Yarden, 2 wan miak yajket iipan, wan kinpajtij ka ikuni. 3 Wan sejse Parishayuj ajsiket kiejekuat wan kitajtanilijket asu nemi yek ma kiajkawa se isiwaw. 4 Yaja nankilij, inak:
—Inte ankimatit ka ká ne kinketzki kwak pejki muchi, kinchijki takat wan siwat?
5 Wan inak:
—Neka ne takat kiajkawas iteku wan ne inan wan musalua itech isiwaw, wan ne ujume mukwepasket sesan innakayu, 6 ijkiuni yejemet intea ujume asunte se. Yajika, tay ne kisenputzuj ne Teut, ma inte kikupewa takat.
7 Kilwiat:
—Asu ijkiuni, Moshe taika tatuktij ma tamaka se amat ina ka muajkawtiwit, wan ma kiajkawa?
8 Kilwia:
—Ika anmejemet yujyultakwaknaj, wan yajika Moshe metzinhajkaw ankiajkawat anmusiwawan. Kwak pejki muchi, inte ijkiuni. 9 Nimetzinhilwia ka ká ne kiajkawa isiwaw wan te ika isiwaw tatzinhejenchij, mawiltia asu munamiktia iwan ukse siwat.
10 Ne mumachtianimet kilwiat:
—Asu ijkiuni nemi itzalan se takat wan isiwaw, mas yek ma inte munamikti!
11 Yaja kinhilwij:
—Inte muchi welit ini asunte semaya ankakeski, 12 ika sejse inte munamiktiat ika nesket tik iijti ne innan ijkiuni, wan sejse inte munamiktiat ika ne tajtakamet kichijket ijkiuni, wan sejseuk inte munamiktiat ika yejemet muchiwat ijkiuni insel ipanpa ne tatekimakalis ipal ne ilwikak. Ma weli ká weli.
Ne shujshulut
13 Kwakuni kalinwikaket kukunetzitzin pal ma kitali ijimey inhijpak wan ma kinujnutza ne Teut. Ne mumachtianimet kinhajwaket. 14 Ne Yeshu inak:
—Maka shikinhajwakan wan shikajkawakan walajsit ne kukunetzitzin, ika ne tatekimakalis ipal ne ilwikak nemi ipal sejse ken yejemet.
15 Wan kintalilij ijimey wan yajket.
Uij ma kalaki se kipia wey tik ne itatekimakalis ne Teut!
16 Wan né ajsik se inak:
—Tamachtiani, tay niweli nikchiwa tay yek pal ma niyultuk senpa?
17 Yaja kilwij:
—Taika tinechtajtani tay ne yek? Sema nemi se yek. Asu tikneki tiyultuk senpa, shiktajpia tay nemi tuktijtuk.
18 Kilwia:
—Katiawel?
Yeshu inak:
—Maka shitamikti; maka shimawilti; maka shitechteki; maka shina ka ukse kichijki tay inte kichijki; 19 shikintakamati muteku wan munan, wan shiktasujta muiknew ken timutasujta.
20 Ne pipil kilwia:
—Nikishpelwija muchi uni. Tay kinekiuk?
21 Ne Yeshu kilwij:
—Asu tikneki titami timuchiwa yek, shu-shiknamaka muchi ne mupalwan wan shikinmaka ne munekit, wan tikpias muchalchiw tik ne ilwikak, wan shiwi nikan nuipan.
22 Kwak ne pipil kikakik, yajki tristej ika sujsul wejwey ne ipalwan. 23 Yeshu kinhilwij ne mumachtianimet:
—Kia nimetzinhilwia ka ipal se kipia wey tumin uij ma kalaki ijtik ne tatekimakalis ipal ne ilwikak. 24 Nimetzinhilwia senpa: achtu yawi kalaki se camelloj ijtik ne kuyuntuk ipal se agujajchin, wan mas uij ma kalaki se kipia wey tumin ijtik ne itatekimakalis ne Teut!
25 Kwak ne mumachtianimet kikakket, ishpuyawit sea inat:
—Asu ijkiuni, ká weli mupalewia?
26 Ne Yeshu kinhitak wan ina:
—Ne takamet inte welit; ne Teut weli muchi.
27 Kwakuni Pedro nankilij, inak:
—Tejemet muchi tikajkawtiwit wan nikan tiwalajtiwit muwan. Tay tiawit tikpiat?
28 Yeshu kinhilwij:
—Kia nimetzinhilwia ka anmejemet ká walajtiwit nuipan, tik ne tunal pal muyulkwepat muchi kwak ne Itelpuch ne Takat yawi mutalia ijpak ikuijpal tzitzinaka, nusan anyawit mutaliat ijpak majtakti-ume kuijpal pal ankintuktiat ne majtakti-ume tribuj pal Israel. 29 Wan muchi ká ne kiajkawtuk ikajkal, iikawan, ieltiwan, iteku, inan, ikukunew o imijmil ka imaku nutukay asu kiajkaw sé yawi kikwi sentzunti wan yawi yultuk senpa. 30 Miak ká ajachtu katka yasnekit tijtipan, wan ne tijtipan ajachtu.
Ne Bibliaj Tik Nawat · © 2008, 2012 Jan Morrow