Beginning
Ne siwatket senyajket iwan Yeshu
8 Ukse tunal Yeshu kiski wan panuk ijtik tejtechan wey wan chikitik tanajnawatia wan kiwika ne yeknawatilis ipal ne itatekimakalis ne Teut, wan iwan yajket ne majtakti-ume 2 wan ankakeski siwat ne mupajtijtiwit kwak kipishket nawalmet teyek wan kujkukulis. Se itukay Maryam pal Magdala, itech kistuyat chikume nawal; 3 wan Yojana ne isiwaw Kuza ne ikalpiani Herodes; wan Shoshana, wan miak sejseuk, ká kintekipanuat katka iwan tay kipiatuyat.
Ne tatuka
4 Musentepewat itech Yeshu miak walkisat ijtik muchi ne tejtechan wan yaja kinhilwij ini casoj:
5 —Se takat kiski tatuka, wan kwak tatukak yajki, wetzki se chiupi itech ne ujti wan taksaket ijpak wan ajsiket tujtutut wan kikwajket. 6 Wan ukse chiupi wetzki ijpak ne tesual wan kwak pejki takati wajwakik ika ne tal inte ajwituk. 7 Nusan ukse chiupi wetzki tik itajku ne wijwitzti, wan ne witzti sentakatki iwan wan kimalachuj. 8 Wan se chiupi wetzki ijpak ne tal yek, wan takatki wan tamakak ne itakil wan kan achtu nemituya se, muchijket sentzunti.
Kwak tamik ina ijkini, inak:
—Ká kipia takakilis pal weli takaki, ma takaki!
9 Ne mumachtianimet kitajtaniliat katka tay kineki ina ini casoj. 10 Yaja inak:
—Anmejemet welit kimatit ne ijichtaka pal ne itatekimakalis ne Teut. Ne sekit sema wan cajcasoj, pal kiane melka kitat ma inte kitakan, wan melka takakit ma inte kimatikan tay kineki ina tay takakit. 11 Yek, ini tay kineki ina ne casoj: tay ne mutuka, yaja ne ipalabraj ne Teut. 12 Ne wetztuk itech ne ujti, yaja kineki ina ne takaktiwit wan witz neman ne Tamintuk wan kishtia ne palabraj tik ne inyulu ma inte yawit tayulmatit wan mupalewiat. 13 Ne wetztuk ijpak ne tesual, yaja ne takaktiwit wan pakit kikwit ne palabraj, wan inte kipiat inelwayu, wan tayulmatit achtu, wan kwak muejekuat muajkawat. 14 Ne wetztuk tik itajku ne wijwitzti, yaja ne takaktiwit wan mukakasuat ipanpa muchi intekiw pal mujmusta wan ipanpa ne tumin wan ipanpa muchi tay kielewiat, wan mumalachuat wan te tamit tamakat intajtakil. 15 Ne wetzki ijpak ne tal yek, yaja ne kikaktiwit yek ijtik inyulu ne palabraj wan kianat yek wan tamit tamakaket intakil.
16 Te aka kitimaka tawil wan kitzakwa iwan se taijtik nian kitalia itan tapech, asunte ijtik se tawilkal kitalia pal ne kalakit ichan tachiat. 17 Ika te tatka nemi tzaktuk asu inte nemi pal muita, nian minashtuk, asu inte nemi pal muishmati wan muilwitia. 18 Shikitakan tel ken antakakit, ika kimakasket ká ne kipiaya, wan ká ne inte kipia kishtilisket nusan tay ne kimati ka kipiatuya.
19 Ejkuk ne inan iwan ne iikawan, wan te welituyat ajsit itech ipanpa ne wey miaktal. 20 Sejse kilwijket:
—Ne munan wan ne muikawan né nemit; kinekit metzitat.
21 Yaja nankilij wan kinhilwij:
—Ini ne nunan wan ne nuikawan, ne takakit wan kichiwat ne ipalabraj ne Teut!
Ne tapayawi
22 Tik se pal uni tujtunal yaja kalak tik se barcoj wan ne mumachtianimet nemituyat iwan, wan kinhilwij:
—Tipanukan sentapal ne weyat.
Wan ajkewket. 23 Yaja kukuchki, wan yawit tik ne barcoj wan ne ejekat pejki kishpitza, waltemuk ne tapayawi ijpak ne at, ne barcoj pejki temi iwan at, wan sajsaytit. 24 Ajsiket kishatiat, wan inat:
—Tutekuyu, tutekuyu! Tipuliwit!!
Isak, wan kiajwak ne ejekat wan ne tapayawi; mukawket wan nejmachnemit. 25 Kwakuni kinhilwij:
—Kan nemi ne anmutayulmatilis?
Mumutijket wan ishpuyawket. Muilwiat:
—Ká ini ne kituktia hasta ne ejekat wan ne at wan yejemet kitakamatit!
Yeshu tapajtia tik Gerasa
26 Wan ajsiket ne tal itukay Gerasa imelawka Galilaya. 27 Kwak kiski tik ne barcoj wan temuk pak tal, kinamik se takat ipal ne techan ne kipia nawalmet, ne intea mutzakwa katka wan te mukawa tik se kal asunte naka tik ne panteon. 28 Kwak kitak Yeshu pejki tzajtzi wan mutamutak talchi iishpan wan kitzajtzalij:
—Tay tikneki nuwan, Yeshu Itelpuch ne Wejkapan Teut? Nimetztajtani ma inte shinechchiwili tay nechkukua!
29 ika kilwij ne iijiu inteyek ma kisa itech ne takat. Yejyewa ika kitzkia katka ne takat, kitepusilpiat katka, wan yaja kitapana katka ne ijilpika, wan ne nawal kishtupewa wan kiwika katka tik ne kojtan. 30 Yeshu kitajtanilij:
—Ken mutukay?
Yaja inak:
—Tzunti!
ika ne nawalmet ne kalaktiwit ijtik yaja mijmiak, 31 wan pejket mutajtaweliat ma inte kintukti ka miktan.
32 Nemituya ka ikuni se wey kuyantal mutakwaltia tik ne tepet, wan mutajtawelijket ma kinhajkawa kalakit tik ne inwejweyka, wan yaja kinhajkaw. 33 Kisket ne nawalmet itech ne takat wan kalakket itech ne kuyantal, wan muchi ne kujkuyamet kisket mutaluat hasta muustutaminket wan wetzket tik ne at wan atukiket. 34 Kwak ne tajpianimet kitaket tay panutuk, chulujket wan yajket ka techan wan ka kojtan inat muchi. 35 Walajket kitat tay panutuk wan ajsiket itech Yeshu wan kiajsiket ne takat itech kistuyat ne nawalmet muetztuk itech ijikshi Yeshu kwajkwachtakentijtuk wan kipiatuya yek itzuntekun, wan yejemet majmawket. 36 Ne kitztuyat kinhilwijket ken yektiak ne kipishtuya nawalmet, 37 wan muchi ne nepa chanejket pal ne tajtal inawak Gerasa kitajtanket ma yawi ka senkak ika kipiatuyat mawi. Yaja kalak tik ne barcoj wan mukwepki. 38 Ne takat itech kistuyat ne nawalmet mutajtawelij ma kiajkawa ma naka iwan, wan Yeshu kilwij ma yawi, ina:
39 —Shimukwepa muchan wan shitaneshtili muchi tay metzchiwilij ne Teut.
Wan yajki nujme ne techan tanajnawatia muchi tay kichiwilij Yeshu.
Ne isiwapil Yair wan se siwat eskisa
40 Kwak Yeshu walmukwepki, ne miaktal kiski kinamiki ika muchi nemituyat kichiat, 41 wan né ajsik se takat itukay Yair, se pal ne tatuktiat ijtik ne Sennemit, wan yaja mutamutak itech ne ijikshi Yeshu wan mutajtawelij ma ajsi tik ne ikal, 42 ika kipiatuya se isiwapil, sema yaja kipiatuya, kipia majtakti-ume shiwit wan yawi miki.
Kwak yaja yawi tik ne ujti, kimalachua katka ne miaktal. 43 Wan se siwat, ne kipiatuya majtakti-ume shiwit ka eskisa wan te aka welik kipajtia melka kinmakatuya ne tapajtianimet muchi tay kipia, 44 ajsik ka iteputz wan kimatukak ne iten ne ikwajkwach, wan tea eskiski. 45 Wan Yeshu inak:
—Ká ne nechmatukak?
Muchi inaket "naja inte", wan Pedro inak:
—Tamachtiani, metzmalachua wan metzishtupewa ne miaktal.
46 Yeshu inak:
—Nechmatukak ajaka, ika nikmatki kisa nutech nutajpal.
47 Ne siwat kitak ka inte weli chulua wan kiski ijtzilika wan mutamutak talchi iishpan, wan tik intakakilis muchi yaja inak taika kimatukak, wan ken mupajtij. 48 Yeshu kilwij:
—Siwapil, ne mutayulmatilis metzpalewijtuk. Shiawa, shinemi yek.
49 Kwak yaja taketzayuk walejku ajaka ipal ne ikal ne sennemituktiani ina:
—Musiwapil miktuka. Makaya shikakasu ne tamachtiani.
50 Kwak ne Yeshu kikakik nankilij:
—Maka shimajmawi, sema shitayulmati wan yawi yektia.
51 Kwak ajsik ne kal inte kiajkaw ma kalaki aka iwan, semaya Pedro wan Yojan wan Yakob wan ne iteku ne kunet wan ne inan. 52 Muchi chukat nemit ipanpa. Yaja inak:
—Makaya shichukakan, ika inte mikik, semaya kuchi.
53 Yejemet ajkawetzkat ika kimatit ka miktuk. 54 Yaja kipachuj ne imey ne siwapil wan kitzajtzalij:
—Nukunew, shisa!
55 Wan mukwepki ne iijiu ne siwapil, wan muketzki nemanhachin, wan tatuktij ma kimakakan takwal. 56 Ne itejteku ne siwapil ishpuyawket. Yaja kinhilwij ma inte kilwikan aka tay panutuk.
Ne majtakti-ume titanijtuk
9 Yeshu kalinnutzki ne majtakti-ume. Kinmakak intajpal wan tatuktilis ijpak muchi ne nawalmet wan pal kipajtiat ne kukuyat, 2 wan kintitanij tanajnawatiat ne itatekimakalis ne Teut wan tapajtiat, 3 wan kinhilwij:
—Maka shikwikakan tatka tik ne ujti: nian anmutupil, nian anmutanaj, nian tamal, nian tumin, nian ume anmuwipil maka shikpiakan. 4 Kwak ankalakit tik se kal, shinakakan senpa ka né hasta anyawit. 5 Wan asu inte kinekit metzinkwit, kwak ankisat tik uni techan shiktzejtzelukan ne tejti tik anmujmukshi pal ankikinakat.
6 Yejemet pejket pashaluat tik muchi ne tejtechan tayeknawatiat wan tapajtiat nujme.
Yojan wan Herodes
7 Herodes ne takutuntuktiani takakik muchi tay panu katka wan ishpuyawik ika sejse inat katka ka yaja ne Yojan muyulkweptuk; 8 sejseuk ka Eliya walmuneshtijtuk; sejseuk ka yaja se pal ne taketzanimet pal ikman muketztuk. 9 Herodes inak:
—Najasan nikechkutun Yojan! Wan ashan ká ini?
Wan pejki tatejtemua pal kinamiki.
Yeshu kitakwaltia ne miaktal
10 Wan kwak walmukwepket ne tijtitanijtuk, kineshtilijket muchi tay kichijtiwit, wan yaja kinwikak insel wan mijkwan ka se techan itukay Bet-Tzaida. 11 Ne miaktal kimatket wan yajket iipan. Inak ka nemi yek wan pejki taketza ipanpa ne itatekimakalis ne Teut, wan kinpajtij ne munekit mupajtiat.
12 Pejki teutaki wan ajsiket ne majtakti-ume kilwiat:
—Shikajkawa ma yawit, ma ajsikan ne tejtechan wan kajkal unisan pal kiajsit kan welit panut ne tayua wan takwal, ika nikan inte nemi tatka.
13 Yaja kinhilwij:
—Shikintakwaltikan anmejemetsan!
Yejemet inaket:
—Semaya tikpiat makwil tamal wan ume michintzin! Tiawit tikuat takwal pal muchi ini tukniwan?
14 Wan nemituyat achka cinco mil ka né. Kinhilwij:
—Shikchiwakan ma musentalikan tik tejtepewa pal unpual-majtakti, unpual-majtakti.
15 Wan kiane kichijket hasta mutalijket muchi. 16 Kikwij ne makwil tamal wan ne ume michin wan ajkutachishki ka ilwikak, wan kiteuchij ne takwal, wan kipitzakuj wan kinmajmakak ne mumachtianimet pal kintaliliat muchi. 17 Wan muchi takwajket wan ishwiket, wan kianket ne pujpusul ijtik majtakti-ume chikiwit.
Ká naja?
18 Se tunal kwak nemituya isel kinujnutza ne Teut, nemituyat ne mumachtianimet iwan, wan yaja kintajtanilij:
—Ken inat ká naja?
19 Inaket:
—Yojan ne teulyujmaka; sejseuk inat ka ti Eliya; wan sejse, ka taja se pal ne taketzanimet pal ikman walmuketztuk.
20 Yeshu kinhilwij:
—Anmejemet tay anhinat: ká naja?
Inak Pedro:
—Ne Mawaltijtuk ipal ne Teut.
21 Yaja kintuktij ma inte kilwikan aka ini, 22 wan inak:
—Ne Itelpuch ne Takat yawi taekua sujsul wan yawit kitejtenewat ne noymet wan weypalejmet wan tajkwiluanimet, yawit kimiktiat wan kwak panut yey tunal yawi muyulkwi.
Asu aka kineki yawi iipan Yeshu...
23 Kinhilwij muchi:
—Asu aka kineki witz nuipan, ma kinakti muchi tay ipal wan ma kiana ne icruz mujmusta wan ma yawi nuipan.
24 Ika ká tajpiaskia ne ialmaj yawi kipulua, wan ká kipuluskia ne ialmaj ka numaku, yajane yawi kiana.
25 Ika ken weli techpalewia, melka muchi ne taltikpak tupal, asu tiwilewit wan tipuliwit?
26 Ika ká ishpinawa nupanpa wan ipanpa ne nupajpalabraj, ipanpa yawi ishpinawa ne Itelpuch ne Takat kwak tzitzinaka witz ka imaku yaja wan ne Teteku wan ne itajtanawatiani ne Teut.
27 Ijkia nimetzinhilwia, ankakeski pal ne nikan nemit inte yawit mikit achtu ma kitakan ne itatekimakalis ne Teut.
Ne weykapatalis
28 Wan tipan kwak panuket achka chikwey tunal, kinwikak Pedro wan Yojan wan Yakob iwan wan tejkuk ka tepet kinujnutza ne Teut. 29 Wan kwak nemituya tanujnutza, ne itachishka ne ishkalyu muchijki tekenha wan kawanit ne ikwajkwach, 30 wan né nemiket ume takat tajtaketzat iwan. Yejemet Moshe wan Eliya, 31 wan muitat kan yaja tzitzinaka wan pejket tajtaketza ipanpa ken yawi tami tik Yerushalem. 32 Pedro wan ne sejseuk kuchisnekit, wan kwak walisat kitaket ken tzitzinaka wan ne ume takat inawak, 33 wan kwak yejemet kiajkawket, Pedro kilwij Yeshu:
—Tamachtiani, yek ma tinemikan ka nikan, tikchiwakan yey tawipanti, se mupal, se ipal Moshe wan se ipal Eliya.
Wan te kimati tay ina. 34 Kwak yaja taketzayuk muchijki se mishti. Kinkimilua wan kwak kalakket ijtik ne mishti majmawket. 35 Ijtik ne mishti mukakik se ina:
—Ini nutelpuch ishpejpentuk. Yaja shikakikan!
36 Wan kwak tami mukaki uni, Yeshu muajsik isel. Wan yejemet inte taketzket wan te kilwijket aka tatka tay kitztuyat tik uni tujtunal.
Kipajtia se mijmiki
37 Ne ukse tunal kwak temuket, se wey miaktal kinamikket. 38 Wan né tzajtzik se takat ipal ne miaktal ina:
—Tamachtiani, nimetztajtani ma shikita ne nutelpuch ne isel nikpia; 39 shikita, se nawal kitzkia wan pewa tzajtzi, wan ijtzilika wan pupusuka; inte kineki kinaktia wan kiajkawa keluntuk. 40 Nikintajtan ne mumujmumachtiani ma kishtilikan wan te weliket.
41 Yeshu inak:
—Ay, ashan inte kanaj tayulmatilis, muchi kwejkwelnaj! Hasta keman nemi pal ninaka anmutzalan nimetzinselia? Shalwika nikan ne mukunew.
42 Kwak witz ne piltzin, ne nawal kikelun wan kijtzilitzki. Ne Yeshu kiajwak ne iijiu inteyek wan kipajtij ne piltzin wan temakak iwan ne iteku.
Ina tay yawi panu wan pewa ne ujti hasta Yerushalem
43 Muchi ishpuyajket ipanpa keski weli ne Teut wan muchi tay kichiwa. Yaja kilwij ne mumachtianimet:
44 —Shinechkakikan yek: yawit temakat ne Itelpuch ne Takat tik inmejmey takamet.
45 Yejemet inte kimatit katka tay kineki ina wan nemituya minashtuk pal te tachiat, wan te kitajtanilijket tay kineki ina ika majmawit.
46 Pejket tajtaketzat ijtik yejemet katiawel ne mas wey. 47 Yeshu kimati katka tay inat nemit tik inyujyulu wan kalkwij se kunetzin wan kitalij inawak 48 wan kinhilwij:
—Ká kikwi ini kunetzin tik nutukay, naja nechkwi. Wan ká nechkwi kikwi ne nechtuktijtuk. Ika ne mas chikitik ijtik muchi anmejemet, yaja ne wey.
49 Yojan nankilij, inak:
—Tamachtiani, tikitztiwit ajaka nawalkishtia tik mutukay, wan te tikajkawket ika inte senyawi tuwan.
50 Yeshu kilwij:
—Shikajkawakan yajane ika ká inte metzinhijilwia anmuwan nemi.
51 Walajket ne tujtunal pal muajkukia, wan inak ka yasneki Yerushalem. 52 Wan kintuktij sejse ka iishpan wan ajsiket ne tal ipal Shamarea pal kiekchiwat muchi, 53 wan te kikwijket ika yaja yawi Yerushalem. 54 Ne mumachtianimet Yakob wan Yojan, kwak kitaket, inaket:
—Tajtzin, taja tikneki ma taltemultikan tit pal ne ajku wan ma tikinwilewakan?
55 Yaja muishkwepki wan kinhajwak, 56 wan yajket ka ukse techan.
57 Wan kwak yajket tik ne ujti, ajaka kilwij:
—Niasneki muwan kanka tiaw.
58 Wan Yeshu kilwij:
—Ne tepetzkwinti kipia ne ishapu wan ne tutut n' itapajsul;
ne Itelpuch ne Takat inte kipia kan musewiskia itzuntekun!
59 Kilwij seuk:
—Shiwi nuwan!
Yajane inak:
—Tajtzin, shinechajkawa achtu ma niaw niktalpachua ne nuteku.
60 Yaja kilwij:
—Ne mikinimet ma kintalpachukan ne inmijmikini; shu shitanajnawati ne itatekimakalis ne Teut.
61 Seuk nusan inak:
—Niasneki muwan, Tajtzin; ma niaw nuchan achtu nikinhilwia ka niawa.
62 Yeshu kilwij:
—Ká pejki talichkwa wan tachia ka iteputz inte nemi yek ipal ne itatekimakalis ne Teut!
Ne Bibliaj Tik Nawat · © 2008, 2012 Jan Morrow