Beginning
Ne tatuka
13 Uni tunal Yeshu kiski tik ne kal wan yajki mutalia itech ne at, 2 wan mutepewket miak inawak. Yajika yaja kalak tik se barcoj wan mutalij, wan muchi ne takamet wan siwatket nakaket kikakit iten ne at, 3 wan pejki taketza wan kinhilwia ini casoj:
—Se takat kiski tatuka, 4 wan kwak nemituya tatuka wetzki se chiupi itech ne ujti, wan ajsiket tujtutut wan kikwajket. 5 Ukchiupi wetzki ijpak tejtet kan nemituya sujsul chiupi tal, wan waltakatki nemanha ika inte kanaj wey tal; 6 wan kwak kiski ne tunal, kalatatak wan wajwakik nemanha ika inteuk kipia inelwayu. 7 Ukse chiupi wetzki itzalan wijwitzti, wan ne wijwitzti weyaket wan kimalachujket. 8 Ukse chiupi wetzki ijpak ne tal yek wan tamakak itakil, wan sejse tamakak sentzunti, sejse yeshpual wan sejse senpual-majtakti. 9 Ká kipia takakilis, ma takaki!
10 Wan ajsiket ne mumachtianimet wan kilwijket:
—Taika tikinhilwia cajcasoj ijkiuni?
11 Yaja kinhilwij:
—Anmejemet welit kimatit ne ichtaka pal ne tatekimakalis ipal ne ilwikak. Yejemet inte welit. 12 Ika kimakasket ká ne kipiaya wan mutalilis; wan kishtilisket ká ne inte kipia tay ne kipiatuya. 13 Yajika nikinhilwia cajcasoj, ma kitakan wan ma inte tachiakan, wan ma takakikan wan ma inte kimatikan tay takakit, 14 wan kiane yekawi tay taketzki Ishaya, kwak ina:
"Antakakisket wan te ankimatisket tay antakakit, wan ankitasket wan te antachiasket, 15 ika ne iyulu ini techan mukwepki etek, tzukultik ne itakakilis wan muishtzak pal te tachia ne ijish nian takaki ne itakakilis nian tamati ne iyulu, nian muishkwepa ma nikpajti."
16 Kipiat suertej ne anmujmuish ika tachiat, wan ne anmunajnakas ika takakit. 17 Kia nimetzinhilwia ka miak taketzani wan yejyek takamet kielewijket kitat tay ankitat wan te kitztiwit, wan kinekituyat kikakit tay ankikakit wan te kikaktiwit.
18 Ashan shinechkakikan wan niaw nimetzinhilwia tay kineki ina ne casoj pal ne tatuka. 19 Muchi ká takaki ne palabraj ipal ne tatekimakalis wan te kimati, witz ne inteyek wan kishtia tay mutukatuk ijtik iyulu: ini ne mutukak itech ne ujti. 20 Ne tay mutukak ijpak tejtet, uni ne paki takaki ne palabraj wan kikwi nemanha, 21 wan te kipia nelwat, wan sema naka chiujchiupi tunal; kwak yaja muejekua wan mukwepa uij ipanpa ne palabraj, te ishtuna mutekukujmati. 22 Ne mutukak itzalan ne wijwitzti, uni ká ne melka takaki ne palabraj, kikakasua ne taltikpak, kishijshikua ne tumin, wan kimalachua muchi wan yajika yaja inte tamaka itakil. 23 Ne mutukak ijpak yek tal, uni ne takaki ne palabraj wan kimati, wan yaja tamaka itakil, sejse sentzunti, sejse yeshpual wan sejse senpual-majtakti.
Sejseuk casoj
24 Kinhilwij ukse casoj, ina:
—Ne tatekimakalis ipal ne ilwikak ken se kitukak imil yek. 25 Kwak kuchit ne takamet, ajsik se kineki kijtakua wan kitukak jaral itzalan ne tatuk, wan yajki. 26 Kwak takatki ne sakat wan kipishki itakil, kwakuni walmuneshtij nusan ne jaral. 27 Ajsiket ne takamet kan nemituya ne kaltekuyu wan kilwijket:
"Tajtzin, anka inte tiktukak yek ne mumil. Asu inte, kanka witz ne jaral?"
28 Yaja kinhilwij:
"Uni kichijki se kineki nechijtakua."
Ne takamet kilwijket:
"Tikneki ma tiu-tikululuat?"
29 Yaja inak:
"Inte, ika asu ashan ankiululuat ne jaral welit ankiwiwitat nusan ne tatuk. 30 Shikajkawakan senweyat ne ujume hasta tiawit titapishkat, wan tik ne tapishkal niaw nikinhilwia ne tapishkat: Shikululukan achtu ne jaral, shikilpikan tik tajtapikti wan shiktatikan, wan ne tatuk shiktepewakan ijtik nushajkal."
31 Kinhilwij ukse casoj:
—Ne tatekimakalis ipal ne ilwikak ken se iish culantroj ne kikwij se takat wan kitukak tik ne imil. 32 Melka tejkia ka yaja ne mas chikitik pal muchi ne ijish, kwak weya sujsul weytia wan muchiwa se kwawit wan ajsit ne tujtutut mutaliat tik imajmajtzal.
33 Kinhilwij ukseuk casoj:
—Ne tatekimakalis ipal ne ilwikak ken ne shukutishti, ne kikwij se siwat wan kishtukilij yey almun tishti hasta shukukiski muchi.
34 Muchi uni Yeshu kinhilwij ne mijmiaktal wan pal kinhilwia kikwij cajcasoj, wan inte kinnutza katka sute iwan cajcasoj, 35 ma yekawi tay inak ne taketzani, ina:
"Niktapus ne nuten pal nina cajcasoj,
nikutzajtzis tay ne ikman ichtaka."
36 Kwakuni kilwij ne miaktal ma yawi wan kalak ka ichan, wan ne mumachtianimet ajsiket inat:
—Shitechneshtili tay kineki ina ne casoj ipal ne jaral tik ne mil!
37 Yaja inak:
—Ne tatuka yek, yaja ne Itelpuch ne Takat. 38 Ne mil ne taltikpak. Ne yek tatuk, yejemet ne ikukunew ne tatekimakalis. Ne jaral, ne ikukunew ne inteyek. 39 Ne kineki kijtakua ne tatuk, ne Tamintuk. Ne tapishkal, yaja kwak yawia tami muchi. Ne tapishkat, ne tanawatianimet. 40 Yajika tel, kenha ken mululua ne jaral wan mutatia tik tit, ijkiuni yawi muchiwa kwak yawia tami muchi: 41 ne Itelpuch ne Takat yawi kintuktia ne tanawatianimet wan yawit kishtiat tik ne tal muchi ne tajtatzunchaluas wan yejemet ká kichiwat ma inte muchiwa tay nemi tuktijtuk, 42 wan yawit kintamutat kan tata. Ikuni yawit chukat, yawit tzalanit intajtan! 43 Kwakuni ne kichiwat tay yek yawit tzitzinakat ken ne tunal tik ne itatekimakalis ne Inteku. Ká kipia takakilis ma takaki!
44 Ne tatekimakalis ipal ne ilwikak ken se chalchiwit ishtukatuk tik se mil, ne kiajsik se, wan kinashki, wan yawi iwan pakilis kinamaka muchi tay ipal wan kikua uni mil.
45 Ne tatekimakalis ipal ne ilwikak nusan ken se tanamakani kitejtemua kujkusti ishyektzin, 46 ne kiajsik se kusti sujsul wey ipatiw wan yajki kinamaka muchi ipalwan wan kikujki yajane.
47 Senpa ne tatekimakalis ipal ne ilwikak ken se wey matat ne mutamutak tik ne weyat wan kinsentepej wejwey wan chijchikitik michin, 48 wan kwak nemik tentuk kishtijket tik ne at, wan mutalijket kinhululuat ne yejyek wan kinhanket ijtik se baldej, wan ne inte tatka inpatiw kintamutaket. 49 Wan ijkiuni yawi muchiwa kwak yawia tami muchi: ne tanawatianimet yawit kisat takupewat itzalan ne inte yejyek wan ne yejyek 50 pal kintamutat ne inte yejyek kan tata. Ikuni yawit chukat, yawit tzalanit intajtan.
51 Ankimatket muchi ini tay antakaktiwit?
Kilwiat:
—Tikmatket.
52 Kinhilwij:
—Yajika, ne tajkwiluani ne muchiwa se mumachtiani ipal ne tatekimakalis ipal ne ilwikak ken se kaltekuyu ká kishtia ijtik ichalchiw ne yankwik wan ne palikman.
Tay panuk kwak ajsik itechan
53 Wan kwak Yeshu tamik ina ini cajcasoj, yajki. 54 Wan kwak ajsik itechan tamachtij tik ne sennemit pal tukniwan, ken ishpuyawiket wan inaket:
—Kanka walajtuk ne itamatilis wan itajpal? 55 Su yajini ne ikunew ne carpinteroj! Ne inan ne itukay Maryam wan ne iikawan yejemet Yakob wan Yosep wan Shimon wan Yuda! 56 Muchi ne ieltiwan nemit itzalan tejemet! Kanka kishtijtuk muchi uni tel?
57 Wan mutekukujmatket. Yeshu kinhilwij:
—Nujme kitat yek se taketzani, semaya tik itechan se wan ichan se inte muita yek!
58 Wan te kichijki wey itajpal ka ikuni, ika yejemet inte kipiatuyat tayulmatilis.
Ne imikilis Yojan ne teulyujmaka
14 Ikuka ne takutuntuktiani Herodes takakik tay inat katka ipanpa Yeshu, 2 wan kinhilwij ne itajtakawan:
—Yajini Yojan ne teulyujmaka muyulkweptuk, yajika weli kichiwa tay sujsul wey.
3 Ika Herodes kitzkijtuya Yojan wan kilpijtuya wan kiwikatuya tzaktuk ipanpa Herodia ne isiwaw Pilipo, ne iikaw, 4 ika ne Yojan kilwijtuya Herodes:
—Te nemi yek ma shikpia uni siwat.
5 Wan melka kinekituya kimiktia majmawki, ika muchi inat katka ka yajuni se taketzani. 6 Wan tik ne iilwiw Herodes, ne isiwapil Herodia mijtutij iishpan tik ne ikal tatajku muchi, wan ne Herodes kielewia katka, 7 yajika inak tik itakakilis muchi ka kimakaskia ne siwapil tay ne kitajtaniskia. 8 Wan yaja, ika ne inan kilwij, inak:
—Shinechmaka tel pak se kashit nikansan ne itzuntekun Yojan ne teulyujmaka!
9 Wan melka ne tatuktiani inte kinekituya, tatuktij ma kitakulikan ipanpa tay ne inatuya tik intakakilis ne sentakwat 10 wan ma mukechkutuna Yojan tik ne tatzakwiluyan, 11 wan kalwikaket ne itzuntekun pak se kashit wan kimakaket ne siwapil wan yaja kiwikak itech ne inan. 12 Wan ne imujmumachtiani ajsiket kalkwit ne mikini wan kitalpachujket, wan yajket kilwiat Yeshu.
Yeshu kitakwaltia se miaktal
13 Kwak takakik Yeshu, yajki ka senkak ijtik se barcoj ka ikwaj kanka inte kanaj tatka. Wan ne miaktal takakik wan kisket tik ne tejtechan wan yajket yajket ikshipan iipan. 14 Wan yaja kiski wan kitak se wey miaktal, wan kikukuj iyulu inpanpa wan kinpajtij ne kukuyat. 15 Kwak tayuakik, ne mumachtianimet ajsiket itech inat:
—Nikan inte nemi tatka, wan teutaka. Shikinhajkawa yawit kikuat takwal tik ne tejtechan.
16 Ne Yeshu kinhilwij:
—Inte muneki. San shikintakwaltikan anmejemet!
17 Yejemet inat:
—Nikan sema tikpiat makwil tamal wan ume michin.
18 Yaja inak:
—Shalwikakan.
19 Wan kintuktij ma mutalikan muchi ijpak ne sakatal, wan kikwij ne makwil tamal wan ne ume michin, wan ajkutachishki wan kinteuchij; wan kipitzakuj ne tajtamal wan kinmakak ne mumachtianimet, wan ne mumachtianimet kinmajmakaket, 20 wan takwajket wan ishwiket muchi. Wan kianket ne pusul mutepejtuk wan kitenket majtakti-ume chikiwit. 21 Nemituyat cinco mil takat wan nusan miak siwat wan kunet.
Yeshu nejnemi ijpak at
22 Wan nemanha yaja kinkalaktij ne mumachtianimet tik se barcoj wan yejemet yawit ka sentapal wan yaja nakak isel itech ne miaktal. 23 Nemanha kinhajkaw yawit muchi wan tejkuk pak se tepet ka ikwaj kinujnutza ne Teut. Tayuakik wan nemik isel. 24 Ne barcoj nemituya wejka ne tal, wan ne at sujsul kumunik ika ne ejekat tapitza nemi iishpan. 25 Kwak tanesik, yaja nejnenki ijpak ne at wan ajsik kan nemituyat. 26 Kwak ne mumachtianimet kitaket nejnemi ijpak at mukakasujket, inat:
—Uni witz tukujkul!
Tzajtziket iwan mawi. 27 Nemanha ne Yeshu taketzki, ina:
—Maka shiyulkakasiwikan! Naja ne! Maka shimajmawikan!
28 Ne Pedro inak:
—Tajtzin, asu taja ne, shinechtukti ma niajsi mutech ijpak ne at!
29 Yaja inak:
—Shiwi!
Pedro temuk katani wan nejnenki ijpak ne at hasta kan nemituya Yeshu. 30 Kwak yaja kitak ne ejekat majmawki wan pejki atuki wan tzajtzik, ina:
—Tajtzin, shinechpalewi!
31 Nemanha Yeshu kimelajki ne imey wan kitzkij, wan kilwia:
—Intesu tikpia tayulmatilis! Taika tipejki timuishmutia?
32 Wan kwak tamik tejku ijpak ne barcoj mukawki ne ejekat. 33 Ne sejseuk tik ne barcoj pejket mutankwaketzat, inat:
—Tejkia ka taja ti Itelpuch ne Teut.
Tapajtia tik Genesaret
34 Wan panuket sentapal wan ajsiket ne tal itukay Genesaret, 35 wan kwak ne techanchanejket kimatket ká yaja tatuktijket inat nujme uni tal. Wan kalwikaket muchi ne kukuyat, 36 wan kitajtanket su welit kichijchimit ne iten ne ikwajkwach, wan mupajtijket muchi ká kichijchinket.
Ne Bibliaj Tik Nawat · © 2008, 2012 Jan Morrow