Beginning
Yojan tanutza wan kinmaka ulyuj miak
1 Nikan pewa ne yeknawatilis ipal Yeshu ne Mawaltijtuk, ne itelpuch ne Teut, 2 ken nemi tawawasujtuk tik ne iamaw ne taketzani Ishaya kan ina:
Naja niktuktia nutanawatiani muishpan pal kiekchiwa mupal ne ujti.
3 Se tzajtzi tik ne kojtan:
"Shiujpetawakan ipal Tutajwan,
shikmelawakan kan taksa witz!"
4 Nemik Yojan ne teulyujmaka tik ne kojtan tanajnawatia teulyujmakalis ipal yulpatalis ma mutapupulwi tay titateyekchijtiwit, 5 wan ajsit katka ne takamet wan siwatket pal Yudaya wan muchi ne Yerushalemchanejket, wan yaja kinmaka katka ulyuj tik ne apan Yarden, wan yejemet kiyulkwitiat katka tay kichiwket teyek. 6 Ne Yojan mutzakwa katka iwan iujmiu camelloj tik iteputzta wan se cinchoj ipal kwetashti tik itajku, wan kikwa katka chajchapulin wan kojtannekti, 7 wan kwak tanajnawatia, ina katka:
—Witz nuipan ukseuk mas tajpaltik que naja, naja te nitatka pal nimupatachua niksutuma nian ne iishmekayu ne ikak! 8 Naja nimetzinmakak ulyuj tik at, yajane yawi metzinmaka ulyuj tik ne Ijiutzin.
9 Tik uni tujtunal Yeshu kiski Nazaret, tik Galilaya, wan ajsik mumaka ulyuj tik ne apan itech Yojan. 10 Wan nemanha, kwak nemituya kisa tik ne at, kitak tapui ne ilwikak wan ijpak waltemu ne Ijiutzin ken se wilut 11 wan mukakik ka ikajku:
—Taja tinutelpuch yektasujtatuk, taja nimetzita yek.
12 Wan nemanha ne Ijiutzin kituktij Yeshu ka kojtan, 13 wan nemik unpual tunal tik ne kojtan wan ne Tenewani kiejekuj, wan nemik itzalan tekwanimet; wan ne tanawatianimet kitekipanuat.
Pewa itekiw Yeshu
14 Kwak kitzakket Yojan, Yeshu yajki Galilaya tanajnawatia ne yeknawatilis ipal ne Teut 15 wan ina:
—Yekawki ne horaj, wan ne itatekimakalis ne Teut nemia nikansan! Shimuyulpatakan, wan shikmatikan ne yeknawatilis!
16 Keman pashalua nemi iten ne weyat pal Galilaya, kitak Shimon wan Andreas ne iikaw matamimat, ika mijmichitzkianimet, 17 wan ne Yeshu kinhilwij:
—Nikan nuipan naja! Niaw nikchiwa ma shimukwepakan takaitzkianimet!
18 Wan kiajkawket ne majmatat wan senyajket iwan. 19 Wan yajki ukchiupi, wan kitak Yakob ikunew Zabday, wan Yojan ne iikaw, kwak yejemet nusan nemituyat ijtik ne inbarcoj kipikit inmajmataw. 20 Wan kinnutzki, wan kiajkawket Zabday, ne inteku, tik ne barcoj wan ne tekitinimet, wan yajket iwan.
Tik ne kalsennemit pal Kaparnajum
21 Wan yawit ka se techan itukay Kaparnajum, wan nemanha, ne tunal ipal sewilis kwak yaja kalaki tik ne kalsennemit tamachtia, 22 muchi ishpuyawit katka iwan ne itamachtilis ika yaja tamachtia katka ken se tatuktia, te ken kichiwat katka ne tajkwiluanimet. 23 Nemanha nemik tik ne kalsennemit se takat kipia se nawal teyek, wan pejki tzajtzi, 24 ina:
—Tay tikneki tuwan, Yeshu pal Nazaret? Tiwalaj titechpulua? Nikmati ká taja: taja tiipal ne Teut!
25 Wan Yeshu kiajwak wan inak:
—Shitakaktuk wan shalkisa!
26 Wan ne nawal teyek kijtzilikaltij ne takat wan tzajtzik wey, wan kiski. 27 Wan muchi ishpuyawket, mutajtaniliat:
—Tay ini yankwik tamachtilis? Kipia tatuktilis hasta weli kituktia nawalmet teyek, wan yejemet kitakamatit...
28 Wan mupatawki uni chachalaka nujme Galilaya.
Tanajnawatia wan tapajtia nujme Galilaya
29 Wan nemanha kwak kisket tik ne kalsennemit, kalakket inchan Shimon wan Andreas inwan Yakob wan Yojan. 30 Ne inan ne isiwaw Shimon nemituya wetztuk, kipiatuya tutunkayu wan kilwijket ka yaja kukuya. 31 Wan ajsik, kikwij ne imey wan kiketzki, wan ne tutunkayu kiajkaw wan ne siwat mutalij kintakwaltia.
32 Kwak tayuakik wan kalak ne tunal, kalinwikaket muchi ká inte nemituyat yek wan ne nawalpiat, 33 wan musenputzujket muchi ne techanchanejket tik ne tenkal, 34 wan yaja kipajtij miak kipiatuyat ankakeski inkukulisyu, wan kishtij nawalmet teyek, wan te kinhajkaw taketzat ne nawalmet ika yejemet kishmatit katka ká yaja.
35 Wan peyna ka tapuyawa yaja muketzki wan kiski isel ka kojtan wan nemik ikuni kinujnutza ne Teut, 36 wan Shimon wan ne ikunpawan yajket iipan 37 wan kiajsiket wan kilwiat ka muchi kitejtemuat, 38 wan yaja kinhilwia:
—Tiawit ukse ujti ka sejseuk techan pal nitanajnawatia nusan ikuni, ika yajika niwalaj.
39 Wan tanajnawatij yajki nujme Galilaya tik ne kajkalsennemit wan kishtij yajki nawalmet teyek.
40 Wan se shinpia mutajtawelia witz wan mutankwaketza wan kilwia:
—Su tikneki weli tinechpajtia!
41 Wan kikukuj iyulu Yeshu wan kimelawki ne imey wan kimatukak wan ina:
—Nikneki. Shimupajti.
42 Wan yajki ne ishinyu nemanha, wan mupajtija. 43 Wan kilwij: "Shiawa!" Wan kiajwak 44 wan ina:
—Shikita, maka shikilwi aka tatka! Semaya shu-shikilwitili ne palej wan shiktakuli tay tatuktij Moshe ika timupupujtuk ma kitakan.
45 Yajuni kiski wan pejki kinnajnawatia miak tay panutuk, yajika Yeshu tea welituya kalaki tik ne techan tik itachialis muchi, sute tik ne kojtan panuk, wan pejket witzet nujme kitemuat.
Yeshu tetapupulwia wan tapajtia
2 Mukwepki Kaparnajum, wan takakket miak ka nemi ichan 2 wan musentepewket ka né hasta tea weli kalaki nian aka tik ne tenkal, wan yaja kinnawatij ne palabraj. 3 Wan nawi takat kisajsakat witzet se kukuya ijpak se tapech ka te welituya mijkwani, 4 wan te welituyat kipanultiat ika né nemituyat mijmiak. Yajika kitapujket ne itzunpan ne kal wan kitemultijket ne tapech ijtik ne kuyuntuk iwan ne kukuyani. 5 Kwak kitak ne Yeshu intayulmatilis, kilwij ne kukuya:
—Nupipil, mutapupulwia tay titateyekchiwki.
6 Ikuni nemituyat muejmuetztuk sejse tajkwiluani ne inat tik inyujyulu: 7 "Ken kukujtaketza yajini ijkiuni! Ká weli kitapupulwia tay titateyekchiwtiwit? Semaya se: ne Teut!" 8 Wan ne Yeshu kimatki ka yejemet inat nemit uni tik inyujyulu wan kinhilwij:
—Tay uni anhinat ijtik anmuyujyulu? 9 Katiawel mas uij? Ma nikilwi: "mutapupulwia tay titateyekchiwki" o ma nikilwi: "shimuketza, shikana mutapech wan shinejnemi"? 10 Pal ankimatit ka ne Itelpuch ne Takat weli kitapupulwia ne tateyekchiwtuk ijpak ne tal, kilwia ne kukuyani: 11 Nimetzilwia: shimuketza, shikana ne mutapech wan shu ka muchan!
12 Wan muketzki nemanha wan kianki ne itapech wan yajki, wan ishpuyajket muchi wan inat ka ne Teut wey, wan inat:
—Te keman tikitaket tatka ijkiuni!
Ichan Lewi
13 Yaja kiski ukseujti pashalua iten ne at, wan muchi ajsiket itech wan kinmachtij. 14 Wan kwak panuk, kitak Lewi ikunew Halpay tik ne tasentepewayan, wan kilwia:
—Shiwi nuwan.
Wan muketzki wan yajki iwan.
15 Wan seujti mutalij takwa tik ne ikal, wan miak tumintepewani wan tateyekchiwat musentalijket takwat iwan Yeshu wan imujmumachtiani, ika yejemet mijmiak wan yawit katka nujme iwan. 16 Wan kwak ne tajkwiluanimet ipal ne Parishayujmet kitaket takwa inawak ne tateyekchiwat wan ne tumintepewanimet, kilwijket ne mumachtianimet:
—Taika takwa wan ati inawak ne tumintepewanimet wan tateyekchiwanimet?
17 Wan Yeshu kinkakik wan kinhilwij:
—Ne kipiat yek inweyka te munekit tapajtiani, sema munekit ne kukuyat. Inte niwalaj nikinnutza ne kichiwat tay yek asunte ne tateyekchiwat.
18 Ne inmujmumachtiani pal Yojan wan ne Parishayujmet kisejseliat katka mayan; wan walajket kitajtaniliat:
—Taika kisejseliat mayan ne inmujmumachtiani Yojan wan ne Parishayujmet, wan ne mumujmumachtiani inte?
19 Wan Yeshu kinhilwij:
—Ne ikunpalejwan welit kisejseliat mayan kwak ne yawi munamiktia nemiuk intech? 20 Walasket ne tujtunal kwak yajkia ne munti wan kisejselisket mayan tik uni tunal.
21 Te aka kitzuma se takutun kwachti yankwik ijpak ikwajkwach palikman, asu te, ne talilijtuk kishtiliskia ne palikman wan ne tzayantuk mutzayana ukchiupi.
22 Wan te aka kitalia kushushaj yankwik ijtik tajtaijtik palikman pal kwetashti, asu te, ne kushushaj kikelunaskia ne tajtaijtik wan puliwit ne kushushaj wan ne tajtaijtik. Kushushaj yankwik ijtik tajtaijtik yankwik!
Ne sewilis
23 Wan seujti tik ne sewilis yaja nejnenki itzalan ne mijmil, wan ne mumachtianimet tapejpenket yajket, 24 wan ne Parishayujmet kilwijket:
—Shikita, ken ka kichiwat tik ne sejsewilis tay te nemi pal tikchiwat?
25 Wan yaja kinhilwij:
—Niakeman anhamaitaket tay kichiwki Dawid kwak yaja munekik wan yaja wan ne ikunpawan mayanat, 26 wan kalak tik ne ikal ne Teut, kwak Abyatar weypalej, wan kikwaj ne tajtamal ishpanujtuk ne semaya ne palejmet welit kikwat, wan kinmakak ne nemituyat iwan nusan?
27 Wan inak:
—Ne sewilis muchiwki inpal takamet, intesu ne takamet ipal ne sewilis. 28 Yajika ne Itelpuch ne Takat nusan itekuyu ne sewilis.
Welit titapajtiat tik ne sewilis?
3 Wan kalak ijtik ne kalsennemit ukseujti wan nemik ka ikuni se takat kipia se imey kuwaktuk, 2 wan kipachiwiat pal kitat su yawi tapajtia ne tunal ipal sewilis pal kitenewat. 3 Wan kilwia ne takat kipiatuya se imey tzitzintik:
—Shu-shimuketza tatajku.
4 Wan kinhilwia:
—Nemi pal tikchiwat tay yek o tay teyek tik ne sewilis? Yek ma tikpalewikan se almaj o ma tikmiktikan?
Wan mukawket tzijtzitzikatuk. 5 Tajtachiak wan kwalanik, wan kikukuj iyulu ika sujsul tajtakwawak ne inyujyulu. Kilwia ne takat:
—Shikmelawa ne mumey!
Wan kimelawki, wan ne imey walmupajtij. 6 Wan ne Parishayujmet kisket wan yajket sentajtaketzat iwan ne tepewa pal Herodes pal kitat tay welit kichiwat pal kipuluat.
Iten ne weyat pal Galilaya
7 Wan Yeshu wan ne mumachtianimet yajket ka senkak. Ajsiket iten ne weyat, wan kisket miak tik Galilaya pal yawit iwan, wan nusan tik Yudaya, 8 wan Yerushalem, wan Edom, wan sentapal ne apan Yarden, wan inawak Tzor wan Tzidon: walajket sujsul miak ká takaktiwit tay kichiwa wan ajsiket. 9 Wan kinhilwij ne mumachtianimet ma kiekchiwilikan se barcojtzin pal ne miaktal te kishtupewat; 10 ika yaja kinpajtij miak, wan yajika muchi ká kipiat se ikukulisyu waltzinkisat katka pal kimatukat. 11 Wan kwak kitat ne nawalmet teyek, wetzit katka talchi wan tzajtzit "Taja ti Itelpuch ne Teut". 12 Wan kinhajajwak ma te kineshtikan.
Ne majtakti-ume
13 Wan yaja kalaki tik ne tepet wan kalinnutza ká yaja kinnekituya, wan yejemet walajsiket. 14 Wan kintukaytij majtakti-ume pal nakat iwan wan pal kintuktia nujme tanajnawatiat 15 wan pal yejemet welit kinhishtiat nawalmet.
16 Wan ini ká kintukaytij:
ne Shimon, ne kinutzki Pedro;
17 wan Yakob ikunew Zabday
wan Yojan ne iikaw Yakob
(ká ne kintalilij itzuntukay "Boanerges" kineki ina "ikukunew ne tikwini");
18 wan Andreas
wan Pilipo
wan Bar-Tolmay
wan Matay
wan Tomas
wan Yakob ikunew Halpay
wan Tadayo
wan Shimon pal Kanan
19 wan Yuda Ishkaryot, ne temakak.
Yeshu wan Bal-Zebul
20 Wan mukwepki ichan. Wan musentepewa ne miaktal ukseujti, wan nian welit takwat, 21 wan takakket ne ikunpawan wan kisket kalkwit, ika inat ka yaja ishpuyawik.
22 Wan ne tajkwiluanimet ne walajtiwit tik Yerushalem inat katka ka yaja kipia Bal-Zebul, wan ka kikwi ne tatuktiani pal ne nawalmet pal kinhishtia nawalmet. 23 Wan yaja kinnutzki wan kinhilwij cajcasoj, ina:
—Ken weliskia ne Tenewani kishtia ne Tenewani? 24 Asu se techan mutajkutijtuk, te weli naka ejkatuk uni techan! 25 Wan asu se kal mutajkutijtuk, te welis naka ejkatuk uni kal! 26 Wan asu ne Tenewani musuntuk isel wan mutajkutijtuk, te weli naka ejkatuk, wan tami!
27 Te aka weli kalaki tik ne ikal se hombron kitzkia ipalwan, su te kilpia uni hombron achtu, wan kwakuni yawi techteki.
28 Kia nimetzinhilwia ka muchi tay kichiwat wan kukujtaketzat ne ipilawan ne takamet weli mutapupulwia; 29 asu aka kukujtaketza iwan ne Ijiutzin, uni te yawi mutapupulwia wan yawit inat ka tateyekchiwki pal senpa.
30 Ika inat katka ka yaja kipiatuya se nawal teyek.
Ne inan wan ne iikawan Yeshu
31 Wan ajsit ne inan wan ne iikawan, wan yejemet nemituyat tatenpan wan tatuktijket kilwiat. 32 Wan muchi ne miaktal nemituya inawak, wan kilwijket:
—Né tatenpan ne munan wan muikawan wan mueltiwan metztemuat.
33 Wan kinhilwij:
—Ká ne nunan wan ne nuikawan?
34 Wan kinhitak muchi ne muejmuetztuk inakastan wan inak:
—Nikansan nemit ne nunan wan ne nuikawan! 35 Ika ká ne kichiwa tay kineki ne Teut, yajuni nuikaw, wan nueltiw, wan nunan!
Ne Bibliaj Tik Nawat · © 2008, 2012 Jan Morrow