Beginning
Yeshu kipajtia se pushawtuk
14 Wan se tunal ipal sewilis kwak yajki takwa ichan se wey pal ne Parishayujmet, nemituyat kipachiwiat. 2 Wan né nemik se takat pushawtuk 3 wan ne Yeshu kinhilwij ne tajtulmatit wan Parishayujmet, ina:
—Welit titapajtiat tik ne sewilis ush inte?
4 Yejemet tentatziwket, wan kikwij ne takat wan kipajtij, wan kiajkaw yawi. 5 Wan kinhilwij:
—Ká anmejemet kipia se ikunew ush se wakash wetztuk tik ustut wan inte yawi kalishtia talul tik se tunal ipal sewilis?
6 Wan te weliket inat tatka pal nankilia.
Ken nemi pal tikchiwat tik se yualu
7 Pejki kinhilwia ne ajsitiwit tik ne yualu se casoj. Yaja kitak ken yejemet pejket kishpejpenat ne ajachtu mutalijka, wan kinhilwia:
8 —Kwak ajaka metzilwia ma shiajsi tik se yualu kan munamiktia se, maka shimutali tik ne achtu mutalijka, ika inte tikmati asu kilwijket ma wiki se mas wey que taja, 9 wan yawi witz ne walmetznutztuk wan kalnutztuk metzilwia: "Shikmaka ini ma mutali", wan kwakuni tiaw tikpia ne tipan mutalijka wan tiaw tishpinawa. 10 Mas yek kwak walmetznutzat wan tiajsi, shimutali kan nemit ne tijtipan pal kiane kwak witz ne walmetznutztuk, yawi metzilwia: "Nuiknew, shitejku wan shimutali ka né!". Kwakuni yawit metzitat yek muchi ne sentakwat. 11 Ika ká ne isel muajkukia, yawi mutemultia, wan ká ne isel mutemultia, yawi muajkukia.
12 Nusan kilwij ne kalnutztuk:
—Kwak tikchiwa se wey yualu, maka shalinnutza ne mukunpawan nian ne mukniwan nian ne mumiakwan nian ne muchantakawan ne kipiat wey tumin, ká nusan welit walmetznutzat ka inchan pal metztashtawiat; 13 mas yek kwak tikchiwa se yualu shalinnutza ne munekit, ne pijpilishnaj, ne metzkelumet, ne pupuyumet... 14 wan yawi yek mupal ika inte welit metztashtawiat, ika asu ijkiuni yawit metztashtawiat kwak muketzat ne yejyek.
Ne wey yualu
15 Se pal ne muejmuetztuk kikakik ini wan kilwij:
—Suertej kipia ne takwas tik ne itatekimakalis ne Teut!
16 Yaja kilwij:
—Se takat kichijki se wey yualu wan kalnutzki miak, 17 wan kwak ajsik ne horaj, kituktij ne itekitini ma kinhilwi muchi ne kalinnutztuk:
"Shiwikan!"
18 Wan sejse wan sejseuk muchi pejket inat ka kichiwat sentir pero inte welit ajsit. Ne se kilwij:
"Nikujtuk se tal wan nimuneki niaw nikita, inte niweli niwitz."
19 Wan seuk inak:
"Nikujtuk makwil parejaj turuj wan niaw nikinhejekua, inte niweli."
20 Wan ukseuk inak:
"Nitami nimunamiktia, yajika inte niweli."
21 Wan ne tekitini mukwepki ichan wan kilwij ne itajtzin. Kwakuni ne kaltekuyu kwalanik sujsul wan kilwij ne itekitini:
"Shikisa talul wan shu tatajku ne techan, wan ne munekit wan ne pijpilishnaj wan ne pupuyumet wan ne metzkelumet, shalinkalakti muchi ka nikan!"
22 Wan ne tekitini inak:
"Tajtzin, muchijtuk tay tiktuktij, wan teuk nemi tentuk."
23 Wan ne tajtzin kilwij ne tekitini:
"Shikisa wan shinejnemi ijpak ne ujujti wan ijtik ne kujkulal, wan shikchiwa ma kalakikan muchi pal ma mutema ne nukal, 24 ika nimetzinhilwia ka nian se pal ne takamet wan siwatket ne nalinnutztuk yawit kiejekuat ne nutakwal!"
Pal timuchiwa numumachtiani...
25 Sennejnemit katka sujsul miak iwan, wan muishkwepki wan kinhilwij:
26 —Asu aka nutech witz wan te kishijia ne iteku wan ne inan wan ne isiwaw wan ne ipilawan wan ne iikawan wan ne ieltiwan wan hasta ne ialmaj, inte weli muchiwa numumachtiani. 27 Ká inte kiwika ne icruz isel wan witz nuipan inte weli muchiwa numumachtiani. 28 Ika katiawel pal anmejemet asu kineki kiketza se tepekal inte mutalia achtu tasenpua keski tumin muneki pal kita asu kipia pal kitamia, 29 pal kiane, kwak tamik kitalia ne tetzilnaj wan te weli kitamia, ma inte kipakilikan muchi ne tajtachiat 30 inat:
"Yajini pejki kiketza wan te welik yekawi!"
31 Wan katiawel ne tatuktiani, asu kisa musuma iwan seuk tatuktiani, inte mutalia achtu tanawatia asu yaja iwan diez mil takat weli kinamiki ne seuk ká kisa kisuma iwan veinte mil, 32 wan asu inte, kwak yajane nemiuk wejka kintuktia itech noymet kitajtanit nejmachnemilis? 33 Kienej tel, muchi itzalan anmejemet ká inte kiajkawat muchi tay inpal, inte welit muchiwat numumachtiani.
34 Yajika, yek nemi ne istat, wan asu ne istat intea ajwiak ken tiawit tikajshitiat? 35 Intea yek nian pal tal nian pal kwitat, semaya pal ma kitamutakan tik ne tajsul. Ká kipia takakilis pal weli takaki, ma takaki!
Ne ichkat pulijtuk
15 Waltzinkisat katka muchi ne tumintepewanimet wan tateyekchiwat kikakit Yeshu, 2 wan kikinakat ne Parishayujmet wan ne tajkwiluanimet. Inat katka:
—Yajini nejnemi iwan tateyekchiwat wan sentakwa inwan!
3 Yaja kinhilwij ini casoj; ina:
4 —Katiawel anmutzalan, asu kipia sentzunti ichkat wan puliwik se, inte kinaktia ne ichkatal tik ne kojtan wan yawi kitejtemua ne pulijtuk hasta ma kiajsi? 5 Wan kwak kiajsik, paki kikechtanua ne ichkat 6 wan kwak ajsi ichan kalinnutza ne ikunpawan wan ne ichantakawan wan kinhilwia:
"Tiyulpakikan, ka nikajsik ne ichkat nikpulujtuya!"
7 Nimetzinhilwia ka ijkiuni yawit yulpakit tik ne ilwikak ipanpa se tateyekchiwa ká muyulpata, mas que ipanpa nawpual-kashtul-nawi ká kichiwat tay yek wan te munekit muyulpatat!
Ne dolar pulijtuk
8 [Nusan inak:]
Wan asu se siwat kipia majtakti dolar wan puliwi se, kitimaka se tawil wan tuchpana nujme ne kal wan kitemua kitemua hasta ma kiajsi, 9 wan kwak kiajsi, kalinnutza ne ikniwan wan ne ibechiwan, wan ina:
"Tiyulpakikan, ka nikajsik ne tumin nikpulujtuya!"?
10 Ijkiuni, nimetzinhilwia, yawit yulpakit kan nemit ne itajtanawatiani ne Teut ipanpa sechin tateyekchiwa ká muyulpata!
Ne casoj ipal ne takapiltzin pulijtuk
11 Kwakuni inak:
—Se takat kipiatuya ume itelpuch, 12 wan ne mas chikitik kilwij ne iteku:
"Nuteku, shinechmaka ne takutun ipal mupalwan."
Kimajmakak sejse itakutun ipal tay kipiatuya. 13 Wan kwak panutiwit chiupi tunal kisentepew muchi wan yajki ne chinpe ka se tal sujsul wejka wan ikuni kisentaluj muchi ipalwan kichiwa muchi tay kineki. 14 Kwak kitzunpulujtuk muchi, né walaj se mayan hombron wan yajane pejki muneki, 15 wan yajki wan musaluj itech se nepa chanej wan yajuni kituktij ka itajtal kitakwaltia ne ikujkuyan. 16 Wan kielewiskia kitema ne iijti iwan ne tutumuch ne kikwa ne kujkuyamet, wan te aka kimaka tatka. 17 Pejki yultaketza wan inak:
"Keski takat tekitit ipal nuteku, wan kipiat intamal, wan nikan nikselia mayan! 18 Niasneki ichan nuteku wan niaw nikilwia: Nuteku, nikchijki tay teyek ipal ne ajku wan muishpan. 19 Intea weli nimunutza mukunew. Semaya shinechchiwa ken se mutakaw."
20 Wan ajkewki wan ajsik ichan iteku. Kwak ajsi yawi, kitak ne iteku wan kikukuj iyulu, wan yajki mutalua kinapalua wan kitennamiki. 21 Ne telpuch kilwij:
"Nuteku, nikchijki tay teyek ipal ne ajku wan muishpan. Intea weli nimunutza mukunew."
22 Ne iteku kintuktij ne itejtekitini kienej, inak:
"Shimunelwikan, shikishtikan ne yek wipil wan shiktalilikan, shikishtukilikan ne imapipil se anilloj wan shiktalikan kakti tik ne ijikshi. 23 Wan shalwikakan ne wakashkunet tumawak; shikmiktikan pal titakwat wan ma titatwat, 24 ika ini nukunew miktuya, wan muyulkwijtuk! Pulijtuya, wan muajsituk!"
Wan pejket tatwat.
25 Ne achtu telpuch nemituya tik ne kojtan, wan kwak ajsik walaj, tzinkiski ne kal wan takakik ken tatzutzunat wan mijtutiat, 26 wan kinutzki se tekitini wan kitajtanilij tay uni. 27 Yaja kilwij:
"Walajtuk ne muikaw, wan muteku kimiktijtuk ne wakashkunet tumawak ika ajsik wan nemi yek."
28 Kwakuni kwalanik wan te kinekituya kalaki. Kiski ne iteku wan mutajtawelij iwan. 29 Yajuni nankilij wan kilwij ne iteku:
"Ashan miak shiwit nitekiti mupal wan te keman nikchijki tatka asunte muchi tay tinechtuktij; wan inte keman tinechmakak nian se cabrojchin pal nitatwa iwan nukujkunpawan! 30 Kwak walajtuk yajuni ne kitzunpuluj ne mupalwan iwan siwapalamet, tikmiktij ne wakashkunet tumawak ipal."
31 Yaja kilwij:
"Pipil, taja senpa tinemi nuwan wan muchi tay nupal mupal nemi. 32 Nemi pal titatwat wan tipajpakit ika uni muikaw miktuya wan yultuka, wan nemituya pulujtuk wan muajsituk!"
Ne kalpiani inteyek
16 Nusan kinhilwia katka ne mumachtianimet:
—Nemik se takat kipiatuya wey tumin wan kipiatuya se kalpiani. Wan kitenejket yajuni iishpan, inaket ka ne kalpiani kitzunpulua katka ne ipalwan. 2 Wan kinutzki wan kilwij:
"Tay ini nikaki ka tikchijtuk? Shinechkwepili ne tasenpualis ipal ne mukalpialis ika intea tiweli titajpia ne nukal."
3 Ne kalpiani inak tik iyulu:
"Tay niaw nikchiwa? Ika ne nutekuyu nechishtilia ne nutekiw: inte niweli nitawawana; pal nitajtani, nishpinawa... 4 Nikmati tay niaw nikchiwa, pal kwak nikajkawa ne kalpialis ma nechkwikan tik inkajkal!"
5 Wan sejse ika kalinnutzki ne takwinimet, wan kitajtanilij ne achtu:
"Keski tikwikilia ne nutekuyu?"
6 Inak yaja:
"Sentzunti wajkal tumakka."
Inak ne takat:
"Shikpia ne muamaw; ashkan shimutali wan shitajkwilu unpual-majtakti."
7 Tipan kilwij seuk:
"Taja keski tikwikilia?"
Inak yajuni:
"Sentzunti almun sinti."
Kilwia:
"Shikpia ne muamaw wan shitajkwilu: nawpual."
8 Wan ne itekuyu inak ka yek tay ne kalpiani teyek kichijki ika kipishki tamatilis, ika ne takamet ipal ini taltikpak tamatit mas ipanpa tay ipal ashan que ne ikukunew ne tawil. 9 Wan nimetzinhilwia ma shimuchiwakan iajamigojwan ne tuminpiani teyek pal kiane kwak inte ankanaj ma metzinkwikan tik ne tajtawipanti pal senpa.
10 Ká ne kichiwa tay yek tik ne tay chikitik nusan tik ne tay wey kichiwa tay yek, wan ká ne kichiwa tay inte yek tik ne tay chikitik nusan tik ne tay wey kichiwa tay inte yek. 11 Yajika, asu inte ankichijket tay yek iwan ne tuminpiani ne inte yek, ká yawi metzinhajkawa antajpiat ne tay tejkia? 12 Wan asu inte ankichijket tay yek iwan tay tepal, ká yawi metzinmaka tay anmupal?
13 Se kaltekitini inte weli tekiti ipal ume itekuyu, ika kishijias ne se wan kitasujtas ne seuk, wan asu inte, kitajpias ne se wan kijilwis ne seuk. Inte welit antekitit ipal ne Teut wan ipal ne tumin.
14 Ne Parishayujmet kikakit katka muchi ini. Yejemet kitasujtat ne tumin wan ajkawetzkat katka, 15 wan yaja kinhilwij:
—Anmejemet anmusel kinhilwiat ne takamet ka anmejemet yejyek. Ne Teut kishmati ne anmuyujyulu, ika nusan tay ne pal takamet tetekia wey, ijyak tik itachialis ne Teut.
16 Ne tajtuli wan ne taketzanimet ajsit hasta Yojan, kwakuni pewa muyeknawatia ne itatekimakalis ne Teut wan muchi kinekit kalakit kalijtik. 17 Mas uij ma wetzi nian se letraj ipal ne tajtuli que ma tamikan ne ilwikak wan ne tal.
18 Su aka kiajkawa isiwaw wan munamiktia iwan seki, mawiltia. Wan ká munamiktia iwan se siwat muajkawtuk iwan ishulejyu, mawiltia.
Lazar wan ne takat kipia wey
19 [Wan inak:]
—Nemik se takat kipiatuya wey tumin ká kipiatuya ikwajkwach yektzin wan tatwa katka mujmusta. 20 Wan se inte kipia tatka, itukay Lazar, mutamutatuk pelechnaj itech itenkal, 21 ne kielewiskia mutakwaltia su weli iwan tay ne wetzi talchi kan takwa katka ne kipiatuya wey, wan hasta ne pejpelumet ajsit kishpaluat ne ichijchiraj.
22 Muchijki ka mikik ne inte kipiatuya tatka wan ajsiket ne tanawatianimet wan kiwikaket itech ielpan Abraham. Nusan ne kipiatuya wey tumin mikik, wan mutalpachuj, 23 wan tik ne miktanshaput, kwak tajselia nemi, ajkutachishki wan né wejka kita Abraham iwan Lazar itech ielpan, 24 wan yaja tzajtzalij, inak:
"Abraham nuteku, shinechpalewi wan shiktukti Lazar ma wiki wan ma kituka ne itzunmapipil ijtik ne sesek at wan ma kiajwili ne nunenepil ika nechkukua ini tit!"
25 Abraham inak:
"Pipil, shikelnamiki ka taja tikpishki muchi tay yek kwak tiyultuk wan Lazar kipishki tay inte yek. Ashan ka nikan, yaja ma tajtani, taja ma shitajseli. 26 Nusan, itzalan tejemet wan anmejemet muchijki se wey ustut, ken ne nikan nemit ne kinekiskiat panut hasta kan annemit inte welit, nian welit panut ka nikan ne nemit ka ikuni."
27 Kwakuni inak:
"Asu ijkiuni, nimetztajtani, nuteku, ma shiktukti ma yawi ichan nuteku, 28 ika naja nikpia makwil nuikaw, pal kinnawatia ma te wikikan yejemet ka nikan tajseliat nusan."
29 Ina Abraham:
"Kipiata Moshe wan ne taketzanimet. Ma kinkakikan."
30 Yaja inak:
"Inte, nuteku Abraham; melka uni, asu yasneki ajaka pal ne miktiwit intech, san muyulpatasket."
31 Kwakuni kilwij:
"Asu inte kinkakit Moshe wan ne taketzanimet, melka muketzaskia ajaka pal ne miktiwit nusan inte tayulmatisket."
Ne Bibliaj Tik Nawat · © 2008, 2012 Jan Morrow