Beginning
1 Ne amat kan ina ken pejki Yeshu, Mawaltijtuk, itelpuch Dawid itelpuch Abraham:
2 Abraham kipishki Itzak,
Itzak kipishki Yakob,
Yakob kipishki Yuda wan ne iikawan.
3 Yuda kipishki Peretz wan Zera itech Tamar.
Peretz kipishki Hetzron,
Hetzron kipishki Ram,
4 Ram kipishki Aminadab,
Aminadab kipishki Najshon,
Najshon kipishki Salmon,
5 Salmon kipishki Boaz itech Rajab.
Boaz kipishki Obed itech Rut.
Obed kipishki Yeshay,
6 Yeshay kipishki Dawid ne tatuktiani.
Dawid kipishki Shalomo itech Uriya.
7 Shalomo kipishki Rejab-Am,
Rejab-Am kipishki Abiya,
Abiya kipishki Asa,
8 Asa kipishki Yoshapat,
Yoshapat kipishki Yoram,
Yoram kipishki Uziya,
9 Uziya kipishki Yotam,
Yotam kipishki Ajaz,
Ajaz kipishki Jezekiya,
10 Jezekiya kipishki Manashe,
Manashe kipishki Amotz,
Amotz kipishki Yoshiya.
11 Yoshiya kipishki Yekonya wan ne iikawan tik ne tujtunal kwak yajket wejka ka Babelonia.
12 Kwak ajsitiwit Babelonia Yekonya kipishki Shaltiel,
Shaltiel kipishki Zerubabel,
13 Zerubabel kipishki Abihud,
Abihud kipishki Elyakim,
Elyakim kipishki Azor,
14 Azor kipishki Tzadok,
Tzadok kipishki Akim,
Akim kipishki Elihud,
15 Elihud kipishki El-Azar,
El-Azar kipishki Matan,
Matan kipishki Yakob.
16 Yakob kipishki Yosep, ishulejyu Maryam, ne itech mupunij Yeshu ne muilwia ne Mawaltijtuk.
17 Yajika, muchi ne inoywan ne pewat iwan Abraham wan hasta Dawid, majtakti-nawi tapunilis; wan ne inoywan pewat iwan Dawid wan hasta kwak yajket wejka ka Babelonia, majtakti-nawi; wan ne inoywan pewat kwak yajket Babelonia wan hasta ne Mawaltijtuk, majtakti-nawi.
Nesik Yeshu
18 Ijkini panuk ka nesik Yeshu ne Mawaltijtuk. Maryam ne inan yawi katka munamiktia iwan Yosep. Wan kwak yejemet inteuk munamiktijtiwit, weykiski iwan ne Ijiutzin. 19 Yosep ishulejyu katka se senpa kichiwa tay yek. Inte kinekituya ma tajtaketzakan ipanpa. Yajika kinekituya kiajkawa isiwaw ma yawi minaya. 20 Kwak nemituya yultaketza muchi uni, kitemikik wan né kitak se tanawatiani ipal ne Teut, ina:
—Yosep itelpuch Dawid, maka shu-shimajmawi, tiweli timunamiktia iwan Maryam musiwaw, ika ipal ne Ijiutzin ne takati ijtik yaja. 21 Kipunis se piltzin wan tiktalilis itukay Yeshu, ika yajasan yawi kipalewia ne itechan melka tateyekchijtiwit.
22 Muchijtuk muchi ini pal ma yekawi ne tay inak Tutajwan itech ne taketzani, ken ina katka:
23 "Né ne siwapil kipias wey iijti wan kipunis itelpuch,
wan kinutzasket itukay Imanuel."
Imanuel kineki ina tik Nawat: "Tuwan nemi ne Teut".
24 Ne Yosep tamik kuchi wan isak, wan kichijki ken kituktij ne tanawatiani pal Tutajwan wan munamiktij iwan isiwaw, 25 wan te senkuchki iwan hasta punik itelpuch. Wan kitukaytij Yeshu.
Ne tamatinimet ipal taneskan
2 Kwak Yeshu nesik tik Bet-Lejem, Yudaya, tik ne tujtunal pal ne tatuktiani Herodes, né ajsiket ka Yerushalem tamatinimet pal taneskan 2 inat:
—Kan nemi ne tatuktiani pal ne Yudayujmet ne ashan nestuk? Ika tikitaket kisa ne isital wan tiwalajket timutankwaketzat.
3 Kwak ne tatuktiani Herodes takakik, mukakasuj, wan muchi Yerushalem kenhaya, 4 wan kinsentepew muchi ne weypalejmet wan tajkwiluanimet pal ne chinamit wan kintajtanilij kan nesiskia ne Mawaltijtuk, 5 wan kilwijket ka tik Bet-Lejem tik Yudaya, ika ijkini tajkwilujket ne taketzanimet:
6 "Wan taja Bet-Lejem, tal pal Yuda,
inte tichikitik itzalan tatuktianit pal Yuda,
ika mutech walkisas se tatuktiani
yawi kitajpia nutechan Israel."
7 Kwakuni Herodes kinnutzki ichtaka ne tamatinimet wan kintajtanilij keman muitak ne sital, 8 wan kintuktij ka Bet-Lejem wan inak:
—Shumet shiktajtanikan ken ijtuk iwan ne kunetzin, wan kwak ankiajsitiwit shinechilwikan pal naja nusan weli niaw nimutankwaketza.
9 Kikakket ne tatuktiani wan yajket, wan né ne sital ne kitztuyat ka taneskan yajki yajki inhishpan hasta nakak ijpak kan nemituya ne kunetzin, 10 wan kwak kitaket ne sital pakiket sujsul. 11 Wan kalakket tik ne kal wan kitaket ne kunetzin iwan Maryam inan, wan mutamutaket talchi wan mutankwaketzket wan kitakulijket teukwit wan kupal wan pajti.
12 Wan tik se temikilis kinnawatilijket ma inte mukwepakan itech Herodes. Yajika panuket tik ukse ujti wan yajket ka intechan.
Herodes kinmiktij muchi ne shujshulut
13 Kwak yajtiwita, Yosep kitemikik wan né kitak se tanawatiani ipal Tutajwan ina:
—Shikisa wan shikwika ne kunetzin wan ne inan muwan wan shichulu ka Egipto wan shinaka ka ikuni hasta ma nimetzilwi, ika Herodes kineki kishtemua ne kunetzin pal kiwilewa.
14 Kiski ka tayua wan kinwikak ne kunetzin wan ne inan iwan wan yajki ka Egipto, 15 wan ikuni nakaket hasta mikik Herodes, pal kiane welik yektia tay inatuk Tutajwan itech ne itaketzani kwak ina:
"Niknutzki nutelpuch ma kisa tik Egipto."
16 Kwakuni Herodes kwak kitak ka ne tamatinimet kipakilijket, sujsul kwalanik wan tatuktij ma kinmiktikan muchi ne pipiltzitzin tik Bet-Lejem wan tik muchi ne tal ka nepa kipiatuyat hasta ume shiwit tik ne tunal kwak yaja kintajtanilijtuya ne tamatinimet. 17 Kwakuni yekawik tay inatuk ne taketzani Yeremiya, ina:
18 "Tik Rama mukakik se chuka, ijiumiki:
uni Rajel chuka inpanpa ipilawan
wan te mukawa ika yejemet intea kanaj."
19 Kwak mikik Herodes, Yosep kitemikik tik Egipto wan né kitak se tanawatiani ipal Tutajwan 20 ina:
—Shikisa wan shikwika ne kunetzin wan ne inan muwan wan shimukwepa ne tal pal Israel, ika miktiwit ne kishtemuat katka ne kunetzin pal kimiktiat.
21 Wan yaja kiski wan kiwikak ne kunetzin wan ne inan iwan wan yajki ne tal ipal Israel. 22 Kwak takakik ka Arkelaos nemi tatuktia tik Yudaya tik ne ipuestoj Herodes iteku, inte kinekik yawi ka né ika majmawi, wan kilwijket tik se temikilis ma yawi wejka wan ajsik ne taltakutun ipal Galilaya. 23 Wan yajki wan nemik tik se techan itukay Nazaret, pal kiane yekawi tay inatuk itech ne taketzanimet, ka yaja "munutzas Nazarayuj".
Yojan tanutza wan kinmaka ulyuj miak
3 Tik uni tujtunal ajsik Yojan ne teulyujmaka tanajnawatia tik ne kojtan pal Yudaya, 2 ina:
—Shimuyulpatakan ika ne tatekimakalis ipal ne ilwikak nemia nikansan!
3 Ika yajini ne ká kinekik ina Ishaya, ne taketzani, kwak ina katka:
"Se tzajtzi tik ne kojtan:
Shiujpetawakan ipal Tutajwan,
shikmelawakan kan taksa witz!"
4 Ini Yojan kipiatuya ikwajkwach pal iujmiu camelloj wan se cinchoj ipal kwetashti tik itajku, wan ne itakwal chajchapulin wan kojtannekti. 5 Kwakuni ajsit itech tukniwan pal Yerushalem wan muchi Yudaya wan muchi ne talmet inawak ne Yarden, 6 wan yaja kinmaka katka ulyuj tik ne apan wan yejemet kiyulkwitiat tay kichijtiwit inteyek.
7 Kan kitak ka walajsitiwit miak pal ne Parishayujmet wan Tzadukayujmet ma kinmaka ulyuj, kinhilwij:
—Kuatal! Ká metzinhilwitilij ma shichulukan iishpan ne kwalan witz? 8 Shumet shitamakakan anmutakil yek ipal yulpatalis! 9 Wan maka shumet shimuilwikan: "Su tejemet tiipilawan Abraham!" ika naja nimetzinhilwia ka ne Teut weli kichiwa ma muskalikan tepilawan ipal Abraham hasta tik uni tejtet! 10 Nemia ne tepusti itech inelwayu ne kwajkwawit, wan muchi ne kwajkwawit inte tamakat yejyek intakil mutzinewat wan mutamutiliat ne tit! 11 Naja sema nimetzinmaka ne ulyuj ipal yulpatalis iwan at; nuipan witz seuk mas tajpaltik que naja, naja inte nitatka nian pal niksajsaka ne ikak! Yajane metzinmakas ulyuj tik ne Ijiutzin wan tik tit! 12 Tatzejtzelus wan kipupus muchi ne tawial; ne yek kitepewas ijtik ishajkal wan ne tajsul kitatis tik tit inte keman sewi.
13 Kwakuni ne Yeshu kisa Galilaya wan ajsi ne Yarden kan nemituya Yojan ma kimaka ulyuj. 14 Ne Yojan inte kinekituya, ina:
—Su naja nimuneki ma shinechmaka ulyuj! Ken ka tiajsi nutech?
15 Ne Yeshu kilwij:
—Ashan ma muchiwa kiane, ika nemi pal yekawi muchi tay yek.
Kwakuni kiajkaw. 16 Kwak ne Yeshu tamik mumaka ulyuj, kiski tik ne at wan tejkuk, wan mutapuj ne ilwikak wan né kitak waltemu ne Ijiutzin ijpak ken su yaja se wilut, 17 wan ka ikajku mukakik ina:
—Ini nutelpuch yektasujtatuk, yajini ne nikita yek.
Ne Tamintuk kiejekua Yeshu
4 Kwakuni ne Ijiutzin kiwikak ne Yeshu ka kojtan pal ma pewa kiejekua ne Tamintuk, 2 wan kwak kichijtuka unpual tunal wan unpual tayua kiselia mayan, 3 ne taejekuani ajsik wan kilwij:
—Asu tiitelpuch ne Teut, shina ma mukwepakan uni tejtet tajtamal!
4 Yaja inak:
—Nemi tajkwilujtuk: "Inte iwan ne tamal isel mutekipanus ne takat, asunte iwan muchi tay kisa itech iten Teut."
5 Kwakuni ne Tamintuk kiwikak tik ne techan ipal ne Teut wan kitalij itzunpan ne teupan, 6 wan kilwia:
—Asu tiitelpuch ne Teut, shimutamuta katani, ika nemi tajkwilujtuk:
"Ne itajtanawatiani mutech kintuktis,
wan tik inmejmey metzanasket ma inte kitajtasa tet ne mukshi."
7 Ne Yeshu kilwij:
—Senpa nemi tajkwilujtuk:
"Inte tikejekus ne mutajtzin ne Teut."
8 Senpa ne Tamintuk kitejkultij ijpak tepet sea kojtik wan kilwitilia muchi ne wejwey techan ipal ne taltikpak 9 wan kilwij:
—Muchi ini nimetzmakas asu timutankwaketza talchi nuishpan.
10 Kwakuni ne Yeshu kilwia:
—Shiawa tenewani, ika nemi tajkwilujtuk: "Timutankwaketzas iishpan mutajtzin ne Teut wan semaya ipal titekitis."
11 Kwakuni ne Tamintuk kiajkawa. Wan né ajsiket tanawatianimet kitajpiat.
Yeshu pewa itekiw
12 Kwak takakik ka kitzakket Yojan, yajki tik Galilaya. 13 Wan kiajkaw Nazaret wan ajsik tik Kaparnajum, itech ne weyat, nepa ne tajtal pal Zebulun wan Naptalim, wan né nemik 14 ma yekawi tay inak Ishaya ne taketzani, ina:
15 "Tal pal Zebulun wan tal pal Naptalim
inawak ne at sentapal Yarden,
Galilaya pal ne tejtechan;
16 tukniwan ne kunyuanemit wey tawil kitaket,
wan tanesket ne muejmuetztuk tik iekawyu mikilis."
17 Tipan ne Yeshu pejki tanajnawatia wan ina:
—Shimuyulpatakan ika ne tatekimakalis ipal ne ilwikak nemia nikansan!
18 Kwak nejnemi né itech ne weyat pal Galilaya kinhitak se takat iwan ne iikaw. Yejemet Shimon ne muilwia Pedro wan Andreas. Kitamutat nemit majmatat ika yejemet michitzkianimet, 19 wan yaja kinhilwia:
—Nikan nuipan naja! Niaw nimetzinkwepa tajtakaitzkianimet!
20 Yejemet kiajkawket ne majmatat nemanha wan senyajket iwan. 21 Wan yajki chiupiuk wan uksenpa kinhitak ume takat ne se iikaw ne seuk, Yakob ikunew Zabday wan Yojan ne iikaw, ijtik ne barcoj iwan Zabday inteku. Kipikit nemit inmajmataw, wan yaja kinnutzki. 22 Yejemet kiajkawket ne barcoj nemanha, kiajkawket ne inteku ka né wan yajket iwan.
23 Wan ijkiuni yajki pashalua ijtik muchi Galilaya tamachtia tik ne kajkalsennemit wan tanajnawatia ne yeknawatilis ipal ne tatekimakalis wan kipajtia muchi ne inkujkukulisyu ne tukniwan. 24 Wan pejket takakit nujme Siria wan kalinwikaket muchi ne kukuyat kipiat ankakeski ikukulisyu wan ne tajseliat, nusan ne kipiat najnawal teyek wan ne mijmikit wan ne inte welituyat mijkwanit, wan kinpajtij. 25 Wan kisket wejwey miaktal tik Galilaya wan ne Majtaktitechan wan Yerushalem wan Yudaya wan sentapal ne Yarden, wan senyajket iwan.
Ne Bibliaj Tik Nawat · © 2008, 2012 Jan Morrow