Old/New Testament

21 Aus hee oppkjikjt, sach hee woo dee Rikje aeare Gow em Tempelkaus ennen laede.

² En hee sach ne oame Waetfru twee Koppasch doa enenn laje.

³ Donn saed hee: "Enn Woarheit saj ekj ju; dise oame Waetfru haft meeha enenn jelajcht aus aull dee aundre;

⁴ dan aul dee aundre laede aeare Gow enenn fonn aea aewafluss, oba dise Fru ut aeare Oamoot haft aea gaunset Laewe enenn jelajcht."

⁵ Aus eenje fonn daem Tempel raede, woo dee met straume Steene en Gow jetseat wea, saed hee:

⁶ "Dise dinje dee jie hia seene, de Tiet woat kome daut nich een Steen oppem aundre bliewe woat, dee woare aule doljeschamete woare."

⁷ See fruage am en saede: "Leara, waneeha woat daut senne, en waut woat daut Teakjen senne wan daut bottem paseare es?"

⁸ En hee saed: "Pausst opp daut jie nich fefeat woare, dan fael woare en mien Nome kome en saje: 'Ekj sie Christus!' en 'De Tiet es hia!' Got daen nich hinjaraun.

⁹ En wan jie fonn Kjrich en Opprua heare, aengst ju nich. Dise Dinje motte aule eascht paseare, oba daut Enj es noch nich fuats."

¹⁰ Donn saed hee to an: "Eene Natsjoon woat jaeajen ne aundre Natsjoon oppstone; en een Kjeenichrikj jaeajen en aundret Kjeenichrikj;

¹¹ en doa woare jewaultje Eadbaebe senne fonn eene Staed no ne aundre Staed; en woat Pestilens en Hungaschnoot senne, en Schrakj, en fom Himel woare groote Teakjens kome.

¹² Oba eeha daut aules paseat woare see Henj opp ju laje en woare junt fefollje, en woare ju fere Sienagooge feare en enn Jefenknesse stoppe, en jie woare wajch jeleit woare fer Harscha en Kjeenije om mien Nome haulwe.

¹³ Oba fa junt woat daut so eromm kome dautet en Zeichnes es.

¹⁴ Naemt daut dan to Hoate daut jie ju nich ferhaea faeanaeme woo jie ju feauntwuate woare,

¹⁵ dan ekj woa ju Wead en Weisheit jaewe, so daut aul dee, dee jaeajen ju sent, nich woare kjenne jaeajenaun stone oda festriede.

¹⁶ Jie woare fonn Elre en Breeda en Frintschofft en Frind ferode woare, en walkje fonn ju woare see doot moake;

¹⁷ en jie woare fonn aule Mensche jehaust woare omm mien Nome haulwe.

¹⁸ Oba opp kjeen wajch woat een Hoa fonn jun Kopp ommkome.

¹⁹ Enn jun Staunthauft woa jie june Seele behoole.