Old/New Testament

²⁷ Donn kjeeme walkje fonn dee Sadutsaea dee festriede daut de Doodes oppstone woare, en fruage am:

²⁸ "Leara, Mooses schreef onns daut wan en Maun sien Brooda storf en hee kjeene Kjinje haud, daut hee sien Brooda siene Fru dan friehe sull en doaderch Soot to Welt brinje fa sien Brooda.

²⁹ Nu weare doa saewen Breeda, en dee easchta neem ne Fru en storf oone Kjinje to ha,

³⁰ en dee tweeda,

³¹ en dee dreda neeme aea, en soo bott aule saewen aea haude to Fru jehaut, oba hinjaleete kjeene Kjinje.

³² Tolatst storf dee Fru.

³³ Wan nu dee Doodes oppstone, waems Fru woat see senne? Dan aule saewen haude aea to Fru."

³⁴ Jesus saed to an: "De Kjinje fonn dise Welt friehe en befriehe sikj;

³⁵ oba dee doa weat jefunge woare fom Doot opptostone, en enn dee aundre Welt to senne, friehe nich en befriehe sikj nich,

³⁶ en kjenne uk nich meeha stoawe, dan dee sent soo aus dee Enjel, en sent Gott siene Kjinje wiel see fom Doot sent opppjestone.

³⁷ Oba daut dee Doodes oppstone, sogoa Mooses saed aus hee bie daut brenendet Bossch wea, en nand daem Herr Obraum sien Gott, en Iesak sien Gott, en Joakopp sien Gott.

³⁸ Aulsoo Gott es nich de Doodje aea Gott, oba aul dee laewendje aeare; dan enn am laew wie aule."

³⁹ Donn auntwuade walkje fonn dee Schreftjeleade en saede: "Leara, du hast rajcht jesajcht."

⁴⁰ Fonn don aun woagd sikj kjeene am irjent waut meeha to froage.

⁴¹ En hee saed to an: "Woo kjemt daut, daut see saje daut Christus Doft sien Saen es?

⁴² Dan Doft sajcht selfst enn dee Pslame: 'De Herr saed to mien Herr; set bie mie to miene rajchte Haunt

⁴³ bott ekj diene Fiend die to ne Footbenk moak.'

⁴⁴ Aulsoo Doft nant am 'Herr', woo kaun hee dan sien Saen senne?"

⁴⁵ Donn saed hee to siene Jinje so daut aulet Follkj daut head:

⁴⁶ "Pausst opp fa dee Schrefjeleade dee jearen romgone met lange Rakj, en wele jejreest senne enne Moakjte, en wele jearen de baste sette ha enne Sienagooge, en de baste Ruebenkj bie de Faste,

⁴⁷ dee de Waetfruehes aeare Hiesa oppfraete, en met Heichle lange Jebaede moake; dee woare doafaea en jratret Jerecht erfoare.