Old/New Testament

17 Donn saed hee to siene Jinje: "Daut es onmaejlich daut beleidjunje nich kome woare; oba wee daem derch waem dee kome.

² Daut wudd fa soonem baeta senne daut en Maelsteen rom sien Hauls jehunge wort en am em Maea enenn jeschmaete wort, dan daut hee eenem fonn dise kjleene beleidje sull.

³ Seet ju faea: wan dien Brooda jaeajen die sindicht, dan doo am strenj femone; en wan hee die aufprachat, dan fejef am.

⁴ En wan hee saewen mol emm Dach jaejen die sindicht, en saewen mol trig kjemt en sajcht: 'Mie deit daut leet', dan saust du am fejaewe."

⁵ En dee Apostel saed tom Herr: "Herr, jef onns meeha Gloowe."

⁶ De Herr saed: "Wan jie Gloowe haude so aus en Sampkuarn, dan wudd jie to dis Mulbaeaboom saje: 'Riet die erut en plaunt die em Maea, en dee wudd junt jehuarsaum senne..

⁷ Oba waea fonn ju dee en Sklow haft dee pleaje deit, en Fee heede deit, wan hee fonne Stap enenn kjemt, wudd dan to am saje: 'Komm fuats en sat die dol,'

⁸ en wudd nich leewe saje: 'Moak mie waut to aete, en binj die daut Schalduak omm en deen mie bott ekj je-aete en je-drunke ha, en no daem kaust du aete en drinkje?

⁹ Dankt hee daen Sklow wiel hee deit waut am jebode es?

¹⁰ Aulso uk jie, wan jie aules jedone ha waut junt befoole es, dan sajcht: 'Wie sent nutsloose Sklowe, wie ha bloos daut jedone waut wie schuldich weare to done."

¹¹ Nu pasead daut aus hee oppem Wajch wea no Jerusalem, daut hee med derch Samaria en Galilaea jinkj.

¹² Aus hee enn en jewesset Darp kjeem, bejaeajende am tean utsautsje Mana, dee wiet auf stunnde,

¹³ en schreaje lud en saede: "Jesus, Meista, erboarm die aewa onns."

¹⁴ Aus hee an sach, saed hee to an: "Got en lot dee Priesta junt seene." Nu pasead daut aus see jinje daut see jeheelt weare."

¹⁵ Oba eena fonn an, aus hee sach daut hee jeheelt wea, kjeem trig en feharlicht Gott met ne lude Stem,

¹⁶ en foll opp sien Jesecht fer Jesus siene Feet, en dankt am, en hee wea en Samarieta.

¹⁷ Jesus auntwuad en saed: "Weare doa nich Tean dee jeheelt weare? Wua sent oba dee Naeajen?

¹⁸ Sent doa kjeene jefunge dee trig kjeeme Gott de Ea to jaewe buta dis Framda?"

¹⁹ En hee saed to am: "Sto opp en go, dien Gloowe haft die jeheelt."