Old/New Testament

7 Aus hee aul dee Wead jesajcht haud enn dee Mensche aea jehea, kjeem hee no Kapernaum.

² En doa wea en Offitsia sien Sklow daen hee fael raeakjend, dee wea Krank, bottem stoawe.

³ Aus hee fonn Jesus head, schekjt hee dee judsche Aeltesta no am, en prachad am opp Earnst auf hee wudd kome en heele sien Sklow.

⁴ Aus dee no Jesus kjeeme, prachada dee am opp Earnst, en saede: "Dee esset weat daut du daut sust doone;

⁵ Dan hee haft ne Leew fa onns Folkj, en hee haft onns ne Sienagoog jebut".

⁶ En Jesus jinkj met an met. En aus see nu nich wiet fonn daem sien Hus weare, schekjt dee Offitsia siene Frind am to saje: "Herr, bemeaj die nich: dan ekj sie daut nich weat daut du susst unja mien Dak kome;

⁷ doaromm raeakjend ekj mie selfst uk nich weat jenuach no die to kome; oba saj en Wuat, en lot mien Deena jeheelt woare.

⁸ Dan ekj sie uk en Maun dee unja Follmacht sie, ekj ha Soldote unja mie, en ekj saj to eenem, 'Go' en hee jeit; en to mien Sklow: 'Doo dit', en hee deitet."

⁹ Aus Jesus daut head, wunndad hee sikj aewa daem, en dreid sikj eromm en saed to dee Mensche dee am nofoljde: "Ekj saj junt, ekj ha enn Iesrael nich soon Gloowe jeseene."

¹⁰ En dee doa jeschekjt weare jinje trig nom Hus, en funje daem Sklow jesunt.

¹¹ De naeakjste Dach kjeem Jesus enn ne Staut enenn, Nain jenant; en siene Jinje weare met am, uk en groot deel Mensche.

¹² En aus see dicht bie dee Stautspuat kjeeme, wort doa en junja, doodje Maun erut jedroacht, de eenstje Saen fonn siene Mutta, en see wea ne Waetfru; en en groot deel Mensche ute Staut weare met aea.

¹³ Aus de Herr aea sach, haud hee Metliet met aea en saed to aea: "Hiel nich".

¹⁴ En jinkj no daut Soakj en laed siene Haunt doa nopp, en dee daut Soakj druage hilde stel; en hee saed: "Junja Maun, ekj saj die, sto opp!".

¹⁵ en dee doa wea doot jewast recht sikj opp, en funk aun to raede, en hee jeef am no siene Mutta.

¹⁶ En ne groote Angst kjeem aewa an aule; en see feharlichte Gott, en saede: "En groote Profeet es mank onns oppjestone"; en: "Gott haft sien Follkj besocht!"

¹⁷ En dit Jehea spreed sikj en gauns Judaea en Ommjaeajent.

¹⁸ En Jehaun siene Jinja brochte am Norecht fonn aul dise Dinje.

¹⁹ Hee roopt twee fonn siene Jinja en schekjt daen no daem Herr, tom froage: "Best du dee, dee kome sull, oda lua wie no sest waem?"

²⁰ Aus dee Mana no am kjeeme, saede see: "Johaun dee Deepa haft onns no die jeschekjt tom froage: "Best du dee, dee kome sull, oda lua wie no sest waem?"

²¹ To dee Tiet heeld hee fael fonn aeare Krankheite en Ploage, en beese Jeista; en seenende Uage to de Blinje.

²² Donn auntwuud Jesus en saed to an: "Wan jie trig gone, dan sajcht Jehaun waut jie jeseene en jeheat ha: de Blinje kjenne seene; de Lome gone; dee met Utsauts woare rein jemoakt; de Doowe heare; de Doodje woare oppjewakjt; en dee Oame woat daut Evanjeelium jepraedicht;

²³ en seelich es dee, dee nich Aunstoos nemt aun mie."

²⁴ Aus Jehaun siene Jinje wajch jinje, funk hee aun fonn Jehaun to raede to de Mensche: "Waut jinj jie enne Wiltness enenn to seene? En Schelprua daut dee Wint sheddat?

²⁵ Oda waut jinj jie rut to seene? eena dee enn weakje Kleeda jekjleet wea? Kjikjt! dee enn weakje Kleede jekljleet sent, en dee rikjlich laewe sent enn kjeenichs Paulauste.

²⁶ Oba waut jinj jie rut to seene? en Profeet? Yo, ekj saj ju, en meeha aus en Profeet.

²⁷ Dan dit es dee fonn waemet jeschraewe steit: 'Kjikj, ekj woa mien Enjel feropp schekje fer dien Jesecht, dee woat dien Wajch fer die reed moake'.

²⁸ Ekj saj ju, fonn dee dee fonn en Frumensch jebuare sent, es noch kjeena jewast dee jrata es jewast; doch dee, dee em Gottesrikj daut jeringste es, es jrata aus hee."

²⁹ En aul dee Mensche, uk dee Takskollakjta, aus dee Jesus heade, jeewe Gott rajcht, see haude sikj deepe lote met Jehaun siene Taufe.

³⁰ Oba dee Farisaea en Schreftjeleade fe-achte Gott sien Rot fa sikj selfst, en leete sikj nich fonn am deepe.