Old/New Testament

9 He roopt siene Twalw toop en jeef an Krauft en Follmacht aewa aule beese Jeista, en uk Kranke to heele.

² En hee schekjt an rut daut Gottesrikj to praedje en dee Kranke to heele;

³ En saed to an: "Naemt nusscht met fa june reis, nich en Gonstock, nich ne Tausch, nich Broot oda Selwa, uk nich twee Waniks fa en jiedrem.

⁴ En wuaemma jie enn en Hus enenn gone, doa blieft, en fonn doa got wieda.

⁵ Waeaemma junt nich oppnemt, wan jie fonn dee Staut wajch gone, scheddat junt de Stoff fonne Fett fa en Zeichness jaejen an."

⁶ En see jinje derch aul dee Darpa en praedjde, en heelde aulewaeje.

⁷ Nu haud Heroodes dee Harscha jeheat fonn aules waut doa pasead, en wea em fawunndre doaewa wiels walkje saede daut Jehaun wea fom Doot oppjestone;

⁸ En walkje saede daut Elias wea aewadael jekome; aundre saede daut en jewesse fonn dee oole Profeete wea oppjestone.

⁹ Oba Heroodes saed: "Jehaun ha ekj daen Kop aufhake lote, oba waea es dit fonn daem ekj sowaut hea?" En hee felangd am to seene.

¹⁰ Aus dee Apostel trig kjeeme fetalde dee am waut see jedone haude. En hee neem an en feleet em jeheeme no dee Staut Betseeda.

¹¹ Oba aus daut Follkj daut enn wort, jinje dee am hinjaraun; en hee neem an opp en raed to an fonn Gott sien Rikj, en waemet faeld, heeld hee.

¹² Oba daut wort jaejen Owent, en dee Twalw kjeeme no am en saede: "Schekj daut Follkj wajch daut see kjenne no dee Darpa en Foarms runt omm gone en ne Staed finje tom bliewe, en waut to aete, dan wie sent hia enne Wiltnes."

¹³ Oba hee saed to an: "Jaeft jie an to aete." See saede oba: "Wie ha hia nich meeha aus fief Broot en twee Fesch, buta daut wie sulle gone en kjeepe aete fa aul dise Mensche."

¹⁴ Dan doa weare onnjefaea fief Dusent Maun. Hee saed to siene Jinje: "Moakt an sikj dol sate en Gruppe fonn feftich."

¹⁵ En see deede daut, en muake daen sikj aule dol sate.

¹⁶ Hee neem dee fief Broot en dee twee Fesch en kjikjt nom Himel en saejend daut, en bruak daut twei en jeef dee Jinje daut fer dee Mensche faeatosate.

¹⁷ En dee aute, en worde aule saut, en hoowe dee Brocke opp dee aewajeblaewe weare, en kjriege twalf Kjarw foll.