Old/New Testament

²⁵ Donn kjeem fael Follkj toop no am, en hee dreid sikj eromm, en saed to an:

²⁶ "Wan irjentwaea no mie kjemt en haust nich sien Foda en siene Mutta en siene Fru en siene Kjinje en siene Breeda en Sestre, en uk sien eajnet Laewe, dan kaun hee nich mien Jinja senne.

²⁷ Waea nich sien Kriets opp sikj nemt en mie nofoljt, kaun nich mien Jinja senne.

²⁸ Dan waea fonn ju dee en Turm buhe wel, sat sikj nich eascht dol en raeakjent ut woo fael daut koste woat, auf hee jenuach haft daut foadich tomoake.

²⁹ Sest wan hee daen Grunt jelajcht haft, en dan nich foadich moake kaun, woare dee, dee daut seene, am spotte,

³⁰ en saje: 'Dis Maun funk aun to buhe oba kunnet nich foadich moake.

³¹ Oda woon Kjeenich, wan hee wel jaeajen en aundra Kjeenich kjrieje, sat sikj nich eascht dol en aewalajcht sikj daut auf hee met tean dusent jaeajen janem kjrieje kaun dee met tweentich dusent kjemt.

³² Aundasch, wan dee aundra noch en langet Enj auf es, schekjt hee Faeatraeda en felangt daut waut Fraed brinje wudd.

³³ Jrod so, waeaemma fonn ju nich aules aufsajcht waut hee haft, kaun nich mien Jinje senne.

³⁴ Doaromm, Sollt es goot, oba wan daut Sollt nutsloos es, met waut saulet dan jeschmak kjriehe?

³⁵ Daut es nich to brucke oppem Launt, uk nich fa daem Mesthupe, daut woat rut jeschmaete. Waea Uare haft tom heare, daem lot heare.