Chronological
Ne weykapatalis
17 Wan kwak panuket chikwasen tunal, Yeshu kinwika Pedro wan Yakob wan Yojan iikaw wan tejkuket pak se kojtik tepet ka inkwaj, 2 wan muweykapatak tik intachialis wan tatawij ne iishkalyu ken ne tunal. Ne ikwajkwach istakisket ken ne tawil. 3 Wan né kisket inhishpan Moshe wan Eliya tajtaketzat iwan. 4 Pedro kilwij Yeshu:
—Tajtzin, yek ma tinemikan ka nikan. Su tikneki, nikchiwas yey tawipanti: se mupal, wan se ipal Moshe, wan se ipal Eliya.
5 Kwak yaja taketzayuk se mishti tajtawilua kinkimiluj wan mukakik tik ne mishti se ina:
—Yajini nutelpuch yektasujtatuk, yajini nikita yek. Shikakikan tay ina!
6 Wan kwak ne mumachtianimet kikakket mutamutaket talchi iwan mawi. 7 Wan Yeshu ajsik wan kinmatukak wan inak:
—Shimuketzakan, maka shimajmawikan.
8 Kwak ajkutachishket, inte kitaket aka, semaya Yeshu isel. 9 Wan kwak temut yawit katani, Yeshu kintuktij ina:
—Maka shikilwikan aka tay ankitztiwit hasta muyulkwi ne Itelpuch ne Takat.
10 Wan kitajtanilijket:
—Taika inat ne tajkwiluanimet ka Eliya nemi pal witz achtu?
11 Yaja inak:
—Kiane, Eliya yawi witz kiektalia muchi. 12 Nimetzinhilwia ka Eliya walaja wan te kishmatket, wan kichijket iwan tay kielewijket. Ijkiuni nemit pal kichiwat ka taekua ne Itelpuch ne Takat nusan.
13 Kwakuni ne mumachtianimet kimatket ka kinekituya ina Yojan ne teulyujmaka.
Kipajtia se mijmiki
14 Wan kwak ajsiket kan nemituyat muchi, se takat ajsik itech mutankwaketza 15 wan ina:
—Tajtzin, shikpalewi nupiltzin, ika mijmiki wan sujsul kukuya, wan seujseujti wetzi tik ne tit, wan seujseujti tik ne at. 16 Wan nalwikak itech mumujmumachtiani wan te weliket kipajtiat.
17 Yeshu inak:
—Ay, ashan inte kanaj tayulmatilis, muchi kwejkwelnaj! Hasta keman nemi pal ninaka anmutzalan nimetzinselia? Shalwika tel.
18 Wan Yeshu kiajwak ne nawal wan kiski itech, wan ne piltzin mupajtij tipan. 19 Kwakuni ajsiket itech ka ikwaj ne mumachtianimet wan inaket:
—Taika tejemet inte tiweliket?
20 Yaja kinhilwia:
—Ika inte antayulmatit. Kia nimetzinhilwia ka asu antayulmatiskiat se chiupichin, ankilwiskiat uni tepet: "Shu ikuni!" wan yaskia, wan te tatka uij anmupal. (21) .
Yeshu inak tay yawi panu
22 Kwak musenputzuat tik Galilaya, Yeshu kinhilwij:
—Yawit temakat ne Itelpuch ne Takat ijtik inmejmey takamet, 23 wan yawit kimiktiat, wan kwak panut yey tunal yawi muyulkwi.
Wan sujsul mutechtijket.
Ne pejpesoj ipal ne teupan
24 Kwak mukwepket Kaparnajum, ne kianat ne pejpesoj pal ne teupan ajsiket itech Pedro wan kitajtanilijket:
—Ne anmutamachtiani inte kitashtawia ne pesoj?
25 Ina:
—Kitashtawia.
Wan kwak yaja ajsik inchan, Yeshu taketzki achtu, ina:
—Tay tina taja, Shimon: ká itech kikwit tumin ne tatuktianimet pal ne tal, intech inkukunew o ne sejseuk?
26 Inak:
—Intech ne sejseuk.
Wan Yeshu kilwij:
—Yek tel, ne inkukunew inte nemit pal tashtawiat. 27 Melka uni, pal ma inte kwalanikan tuwan, shu itech ne at, shiktamuta se kutishi wan shikwi ne achtu michin tikitzkia wan shiktapu ne iten wan tiaw tikajsi se coraj. Shikwi wan shikinmaka nupanpa wan mupanpa!
9 Wan kinhilwij:
—Kia nimetzinhilwia ka ankakeski pal ne nikan nemit inte yawit mikit achtu ma kitakan ne itatekimakalis ne Teut walajtuk iwan itajpal.
Ne weykapatalis
2 Wan kwak panuket chikwasen tunal, Yeshu kinwika Pedro wan Yakob wan Yojan, wan tejkuket ijpak se kojtik tepet ka insel, wan muweykapatak ishpan yejemet, 3 wan ne ikwajkwach pejket tajtawiat wan istakisket ken te tatka weli istakisa ijtik ne taltikpak. 4 Nusan kiski inhishpan Eliya wan Moshe, wan tajtaketzket iwan Yeshu. 5 Wan ne Pedro kilwij Yeshu:
—Tajtzin, yek ma tinemikan nikan, tikchiwakan yey tawipanti, se mupal, se ipal Moshe wan se ipal Eliya.
6 Ika te kimati tay ina, ika sujsul majmawket. 7 Wan muchiwki se mishti wan ne mishti kinkimilua, wan ijtik ne mishti mukakik:
—Ini nutelpuch yektasujtatuk, shikakikan!
8 Wan kwak tajtachiaket te nemituya aka; sema Yeshu kitaket inwan. 9 Wan kwak temuket yajket katani, kintuktij ma te kineshtilikan aka tay kitztiwit sute hasta kwak ne Itelpuch ne Takat miktuk wan muyulkwijtuk. 10 Wan te taneshtijket; wan mutajtanilijket ken ka ina ka yawi muyulkwi, 11 wan kitajtanilijket:
—Taika inat ne tajkwiluanimet ka Eliya nemi pal witz achtu?
12 Yaja kinhilwij:
—Kiane, Eliya yawi witz achtu kiektalia muchi, wan ken nemi tawawasujtuk, ne Itelpuch ne Takat nemi pal taekua wey wan yawit inat ka te tatka ipatiw, 13 melka uni, naja nimetzinhilwia ka Eliya walajtuka, wan kichiwket iwan tay kielewijket, ijkiunisan ken nemi tawawasujtuk.
Kipajtia se mijmiki
14 Wan kwak ajsiket itech ne mumachtianimet, kitaket sujsul miak innawak wan tajkwiluanimet tajtanit. 15 Wan nemanha, muchi kitaket ne Yeshu wan ishpuyawket wan kisket mutaluat pal kitajpaluat. 16 Wan yaja kinhilwij:
—Tay ankintajtaniliat?
17 Wan se pal ne miaktal kilwij:
—Tamachtiani, nalwikak nikan nupiltzin ne kipia se nawal te weli taketza, 18 wan kwak kipewia, kikeluna wan yaja pupusuka wan tzalanit itajtan wan kuwaki. Wan nikinhilwij ne mumujmumachtiani ma tachiakan su kishtiliat wan te weliket.
19 Wan yaja kinhilwia:
—Ay, ashan inte kanaj tayulmatilis! Hasta keman nemi pal ninaka anmutzalan nimetzinselia? Shalwika tel.
20 Wan kiwikaket wan kwak kitak kijtzilikaltij ne nawal nemanha wan wetzki talchi muishmimilua wan pupusuka. 21 Wan kitajtanilij ne iteku:
—Keski kichiwa ka nemi ijkiuni?
wan ne iteku inak:
—Pejki kwak kunetzin katka, 22 wan seujseujti hasta kitamutak tik tit, wan nusan tik at, pal kipulua. Su tiweli, shiktasujta, shitechpalewi!
23 Ne Yeshu kilwij:
—Ken ka "su tiweli"? Muchi ká tayulmati weli!
24 Nemanha tzajtzik ne iteku ne piltzin, ina:
—Naja nitayulmati! Tay inte nitayulmati shitapalewi!
25 Kwak ne Yeshu kitak ka miak ajsit mutaluat, kiajwak ne nawal teyek, kilwia:
—Iijiu te weli taketza wan te weli takaki, naja nimetztuktia ma shalkisa itech wan ma intea shimukwepa tikalaki itech!
26 Wan tzajtzik wan sujsul ijtzilikak wan walkiski; wan nakak ken miktuk, wan inaket muchi ka miktuk. 27 Ne Yeshu kikwij ne imey wan kiketzki, wan yaja muyulkwij. 28 Wan kwak kalak ka ichan, ne mumachtianimet kitajtanilijket ka ikwaj:
—Taika tejemet te tiweliket?
29 Wan kinhilwij:
—Kwak ken ini, semaya weli tikchiwat ma walkisa iwan teutajtanilis.
Yeshu inak tay yawi panu
30 Kisket wan yajket pashaluat ijtik Galilaya, wan te kinekituya ma aka kimati, 31 ika yaja kinmachtia ne mumachtianimet wan kinhilwia ka temakat ne Itelpuch ne Takat ijtik inmejmey takamet wan yawit kimiktiat, wan kwak tamit kimiktiat wan panut yey tunal yawi muyulkwi.
32 Yejemet te kimatit katka tay kineki ina wan te kitajtanilijket ika majmawit.
Ká ne achtu?
33 Wan ajsiket Kaparnajum, wan kwak nemituya ka ichan kintajtanilij:
—Tay annemituyat tajtaketzat tik ne ujti?
34 Yejemet te inaket tatka ika tik ne ujti tajtaketzket yajket pal kimatit katiawel pal yejemet ne mas wey. 35 Wan yaja mutalij wan kinnutzki ne majtakti-ume wan kinhilwia:
—Asu se kineki muchiwa achtu, yaja yawi ne tipan pal muchi wan ne tekitini pal muchi.
36 Wan kikwij se kunetzin wan kitalij tatajku wan kinapaluj, wan kinhilwij:
37 —Ká ne kikwi se pal ne kukunetzitzin ken ini tik nutukay naja nechkwi, wan ká ne nechkwi inte naja nechkwi sute ne nechtuktijtuk.
Ká inte techtejtenewa tuwan nemi
38 Yojan kilwij:
—Tamachtiani, tikitztiwit ajaka nawalkishtia tik mutukay, wan te tikajkawket ika yaja te yawi tuwan.
39 Yeshu inak:
—Shikajkawakan yajuni, ika inte aka kichiwa tay wey tik nutukay yawi weli nechijilwia. 40 Ika ká inte techtejtenewa tuwan nemi. 41 Ká metzinmaka chiupi at pal atit tik nutukay ika anmejemet anhipal ne Mawaltijtuk, kia nimetzinhilwia ka yawia kipia ne ipatiw.
Sejseuk tay kinhilwij
42 [Nusan inak:]
Wan ká ne kitekukujmati se pal ini chijchikitik ká tayulmatit, mas yek ma mupilu se burrojmetat itech ikechkuyu wan ma kitamimakan ijtik ne weyat.
43 Wan su metztekukujmati ne mumey, shimumakutuna! Mas yek ma shiyultuk makutu wan te ma shu ne miktanshaput, tik ne tit te keman sewi, iwan ne ume mumey. (44) . 45 Wan su metztekukujmati ne mukshi, shimukshikutuna! Mas yek ma shiyultuk ikshikutu wan te ma metztamutakan iwan ne ume mukshi ka miktanshaput. (46) . 47 Wan su metztekukujmati ne muish, shikishti ne muish! Mas yek ma shikalaki tik ne itatekimakalis ne Teut ishpupuyut wan te ma metztamutakan iwan ne ujume muish ka miktanshaput, 48 né kan ne ijkwich inte miki wan ne tit inte musewia.
49 Ika muchi yawi muistawia iwan tit.
50 Melka yek ne istat, asu ne istat asesekisa, taiwan anyawit kikwepat ajwiak?
Shikpiakan ijtik anmejemet istat, wan shinejmachnemikan sejse wan sejse.
Ne weykapatalis
28 Wan tipan kwak panuket achka chikwey tunal, kinwikak Pedro wan Yojan wan Yakob iwan wan tejkuk ka tepet kinujnutza ne Teut. 29 Wan kwak nemituya tanujnutza, ne itachishka ne ishkalyu muchijki tekenha wan kawanit ne ikwajkwach, 30 wan né nemiket ume takat tajtaketzat iwan. Yejemet Moshe wan Eliya, 31 wan muitat kan yaja tzitzinaka wan pejket tajtaketza ipanpa ken yawi tami tik Yerushalem. 32 Pedro wan ne sejseuk kuchisnekit, wan kwak walisat kitaket ken tzitzinaka wan ne ume takat inawak, 33 wan kwak yejemet kiajkawket, Pedro kilwij Yeshu:
—Tamachtiani, yek ma tinemikan ka nikan, tikchiwakan yey tawipanti, se mupal, se ipal Moshe wan se ipal Eliya.
Wan te kimati tay ina. 34 Kwak yaja taketzayuk muchijki se mishti. Kinkimilua wan kwak kalakket ijtik ne mishti majmawket. 35 Ijtik ne mishti mukakik se ina:
—Ini nutelpuch ishpejpentuk. Yaja shikakikan!
36 Wan kwak tami mukaki uni, Yeshu muajsik isel. Wan yejemet inte taketzket wan te kilwijket aka tatka tay kitztuyat tik uni tujtunal.
Kipajtia se mijmiki
37 Ne ukse tunal kwak temuket, se wey miaktal kinamikket. 38 Wan né tzajtzik se takat ipal ne miaktal ina:
—Tamachtiani, nimetztajtani ma shikita ne nutelpuch ne isel nikpia; 39 shikita, se nawal kitzkia wan pewa tzajtzi, wan ijtzilika wan pupusuka; inte kineki kinaktia wan kiajkawa keluntuk. 40 Nikintajtan ne mumujmumachtiani ma kishtilikan wan te weliket.
41 Yeshu inak:
—Ay, ashan inte kanaj tayulmatilis, muchi kwejkwelnaj! Hasta keman nemi pal ninaka anmutzalan nimetzinselia? Shalwika nikan ne mukunew.
42 Kwak witz ne piltzin, ne nawal kikelun wan kijtzilitzki. Ne Yeshu kiajwak ne iijiu inteyek wan kipajtij ne piltzin wan temakak iwan ne iteku.
Ina tay yawi panu wan pewa ne ujti hasta Yerushalem
43 Muchi ishpuyajket ipanpa keski weli ne Teut wan muchi tay kichiwa. Yaja kilwij ne mumachtianimet:
44 —Shinechkakikan yek: yawit temakat ne Itelpuch ne Takat tik inmejmey takamet.
45 Yejemet inte kimatit katka tay kineki ina wan nemituya minashtuk pal te tachiat, wan te kitajtanilijket tay kineki ina ika majmawit.
46 Pejket tajtaketzat ijtik yejemet katiawel ne mas wey. 47 Yeshu kimati katka tay inat nemit tik inyujyulu wan kalkwij se kunetzin wan kitalij inawak 48 wan kinhilwij:
—Ká kikwi ini kunetzin tik nutukay, naja nechkwi. Wan ká nechkwi kikwi ne nechtuktijtuk. Ika ne mas chikitik ijtik muchi anmejemet, yaja ne wey.
49 Yojan nankilij, inak:
—Tamachtiani, tikitztiwit ajaka nawalkishtia tik mutukay, wan te tikajkawket ika inte senyawi tuwan.
50 Yeshu kilwij:
—Shikajkawakan yajane ika ká inte metzinhijilwia anmuwan nemi.
51 Walajket ne tujtunal pal muajkukia, wan inak ka yasneki Yerushalem. 52 Wan kintuktij sejse ka iishpan wan ajsiket ne tal ipal Shamarea pal kiekchiwat muchi, 53 wan te kikwijket ika yaja yawi Yerushalem. 54 Ne mumachtianimet Yakob wan Yojan, kwak kitaket, inaket:
—Tajtzin, taja tikneki ma taltemultikan tit pal ne ajku wan ma tikinwilewakan?
55 Yaja muishkwepki wan kinhajwak, 56 wan yajket ka ukse techan.
57 Wan kwak yajket tik ne ujti, ajaka kilwij:
—Niasneki muwan kanka tiaw.
58 Wan Yeshu kilwij:
—Ne tepetzkwinti kipia ne ishapu wan ne tutut n' itapajsul;
ne Itelpuch ne Takat inte kipia kan musewiskia itzuntekun!
59 Kilwij seuk:
—Shiwi nuwan!
Yajane inak:
—Tajtzin, shinechajkawa achtu ma niaw niktalpachua ne nuteku.
60 Yaja kilwij:
—Ne mikinimet ma kintalpachukan ne inmijmikini; shu shitanajnawati ne itatekimakalis ne Teut.
61 Seuk nusan inak:
—Niasneki muwan, Tajtzin; ma niaw nuchan achtu nikinhilwia ka niawa.
62 Yeshu kilwij:
—Ká pejki talichkwa wan tachia ka iteputz inte nemi yek ipal ne itatekimakalis ne Teut!
Ne Bibliaj Tik Nawat · © 2008, 2012 Jan Morrow