Beginning

⁴ “Nandyagadde okukuddamu
    ne mikwano gyo egyo gy’oli nagyo.
^5 (B)Tunula eri eggulu olabe;
    tunuulira ebire, ebiri waggulu ennyo okukusinga.
^6 (C)Singa oyonoona ekyo kimukwatako kitya?
    Ebyonoono byo bwe byeyongera, ekyo kimukolako ki?
^7 (D)Bw’oba omutuukirivu, kiki ky’oba omuwadde,
    oba kiki ky’aba afunye okuva mu ngalo zo?
⁸ Okwonoona kwo kukosa muntu nga ggwe,
    era n’obutuukirivu bwo bukwata ku baana b’abantu.
^9 (E)Abantu bakaaba olw’okunyigirizibwa okw’amaanyi,
    balaajaanira ab’omukono ogw’amaanyi.
^10 (F)Naye tewali n’omu agamba nti, Aluwa Mukama Omutonzi wange
    atuwa ennyimba ekiro,
^11 (G)atuyigiriza ebingi okusinga ensolo ez’omu nsiko,
    era n’atufuula bagezi okusinga ebinyonyi eby’omu nsiko?
^12 (H)Newaakubadde nga bakaaba, tayinza kuwulira
    n’addamu kukaaba kw’abasajja ab’amalala abakozi b’ebibi.
^13 (I)Ddala ddala Katonda tawuliriza kukoowoola kwabwe okwo okutaliimu;
    Ayinzabyonna takufaako.
^14 (J)Kale kiba kitya
    bw’ogamba nti tomulaba,
era nti, Omusango gwo guli mu maaso ge
    era oteekwa okumulindirira;
¹⁵ oba nti, ne bw’asunguwala tabonereza
    era tafaayo nnyo ku butali butuukirivu.
^16 (K)Kale nno Yobu ayasamya akamwa ke okwogera ebitaliimu;
    obutamanya bumwogeza ebigambo olukunkumuli.”

^5 (N)“Laba, Katonda wa buyinza, tanyooma bantu;
    w’amaanyi, anywerera ku bigendererwa bye.
^6 (O)Talamya bakozi ba bibi,
    era awa ababonyaabonyezebwa ebibasaanira.
^7 (P)Taggya maaso ge ku batuukirivu,
    abatuuza ku ntebe ey’obwakabaka
    n’abagulumiza emirembe n’emirembe.
^8 (Q)Naye abantu bwe baba basibiddwa enjegere
    nga banywezeddwa n’emiguwa egy’okulumwa
^9 (R)n’abategeeza ensobi zaabwe, n’okwonoona kwabwe,
    nti, beewaggudde,
^10 (S)aggula amatu gaabwe bawulirize okunenyezebwa
    n’abalagira beenenye ekibi kyabwe.
^11 (T)Bwe bamugondera ne bamuweereza,
    ennaku zaabwe zonna balizimala mu kwesiima,
    era n’emyaka gyabwe mu kusanyuka.
^12 (U)Naye bwe batamugondera,
    baalizikirizibwa n’ekitala,
    bafe nga tebalina magezi.

^13 (V)“Ab’emitima egitatya Katonda baba n’obukyayi.
    Ne bw’abasiba, tebamukaabirira abasumulule.
^14 (W)Bafiira mu buvubuka bwabwe
    era obulamu bwabwe buzikiririra mu basajja abenzi.
¹⁵ Anunula anyigirizibwa mu kubonaabona kwe,
    n’aggula okutu kwe mu kujoogebwa kwe.

^16 (X)“Akusendasenda okukuggya mu kamwa k’okubonaabona,
    akuteeke mu kifo ekigazi ekitaliimu kuziyizibwa,
    omanye emirembe gy’emeeza yo ejjudde emmere ennungi.
^17 (Y)Naye kaakano weetisse omugugu ogw’okusalirwa omusango abakozi b’ebibi gwe basaanira;
    okusalirwa omusango n’obwenkanya byakunyweza.
^18 (Z)Weegendereze oleme kukkiriza kusendebwasendebwa;
    obunene bw’enguzi buleme okukukyamya.
¹⁹ Obugagga bwo
    oba okufuba kwo kwonna
    binaakuyamba okukuggya mu buyinike?
^20 (AA)Teweegomba budde bwa kiro
    olyoke owalule abantu okuva mu bifo byabwe.
^21 (AB)Weegendereze oleme kukola bitali bya butuukirivu,
    by’osinga okwagala okukira okubonyaabonyezebwa.

^22 (AC)“Laba Katonda yagulumira mu maanyi ge;
    ani ayigiriza nga ye?
^23 (AD)Ani eyali amukubidde amakubo,
    oba okumugamba nti, ‘Ky’okoze si kituufu?’
^24 (AE)Jjukira ng’oteekwa okugulumizanga emirimu gye,
    abantu gye bayimba mu nnyimba.
²⁵ Abantu bonna baagiraba,
    omuntu agirengerera wala.
^26 (AF)Laba, Katonda agulumizibwe! Assukiridde okutegeera kwaffe;
    obungi bw’emyaka gye tebunoonyezeka.

^27 (AG)“Kubanga akuŋŋaanya amatondo g’amazzi,
    agafuuka enkuba etonnya mu bugga;
^28 (AH)ebire bivaamu amazzi gaabyo,
    enkuba n’ekuba abantu.
^29 (AI)Ani ayinza okutegeera engeri gy’asaasaanyamu ebire,
    okubwatuka okuva ku kituuti kye?
³⁰ Laba, asaasaanya okumyansa kw’eggulu,
    era n’abikka obuziba bw’ennyanja.
^31 (AJ)Eyo y’engeri gy’afugamu amawanga,
    n’agawa emmere mu bungi.
^32 (AK)Emikono gye agijjuza eraddu,
    n’agiragira ekube ebifo bye yeerondeddemu.
³³ Okubwatuka kwayo kulangirira kibuyaga ajja,
    n’ente ne zirangirira okujja kwayo.”
37 “Kino kikankanya omutima gwange,
    ne gubuuka okuva mu kifo kyagwo.
^2 (AL)Wuliriza okubwatuka kw’eddoboozi lye,
    n’okuwuluguma okuva mu kamwa ke.
³ Asumulula eggulu ne limyansa wansi w’eggulu wonna,
    n’aliragira ligende ku nkomerero y’ensi.
⁴ Kino oluggwa, okuwuluguma kw’eddoboozi lye kwe kuddako,
    abwatuka n’eddoboozi lye ery’omwanguka,
era eddoboozi lye bwe liwulirwa,
    tewabaawo kisigala nga bwe kibadde.
^5 (AM)Eddoboozi lya Katonda libwatuka mu ngeri ey’ekitalo;
    akola ebintu ebikulu ebisukka okutegeera kwaffe.
^6 (AN)Agamba omuzira nti, ‘Ggwa ku nsi,’
    ate eri enkuba etonnya nti, ‘Ttonnya nnyo.’
^7 (AO)Emirimu gya buli muntu giyimirira,
    buli omu n’alyoka amanya amaanyi ga Katonda.
^8 (AP)Ensolo ne ziryoka zessogga empuku zaazo,
    ne zigenda zeekukuma.
⁹ Omuyaga ne gulyoka guva mu nnyumba yaagwo,
    n’obunnyogovu ne buva mu mpewo ekuŋŋunta.
^10 (AQ)Omuzira ne guva mu mukka gwa Katonda
    n’amazzi amangi ne gekwata kitole.
^11 (AR)Ebire abijjuza amatondo g’amazzi,
    n’asaasaanya okumyansa kw’eggulu.
^12 (AS)Byetooloolatooloola nga y’abiragira,
    ne bituukiriza byonna by’abiragira,
    ku nsi yonna okubeera abantu.
^13 (AT)Bwe kuba kubonereza, oba okufukirira ensi
    oba okulaga okwagala kwe, atonnyesa enkuba.

¹⁴ “Wuliriza kino Yobu;
    sooka oyimirire olowooze ku bikolwa bya Katonda eby’ettendo.
¹⁵ Omanyi Katonda engeri gy’alagiramu ebire,
    n’aleetera eggulu okumyansa?
^16 (AU)Omanyi engeri ebire gye bituulamu mu bbanga,
amakula g’emirimu gy’oyo eyatuukirira mu kumanya?
¹⁷ Ggwe alina ebyambalo ebibuguma,
    ensi bw’eba ng’ekkakkanyizibbwa embuyaga ez’obukiikaddyo,
^18 (AV)oyinza okumwegattako ne mubamba eggulu,
    eryaguma ne libeera ng’endabirwamu ensanuuse?

¹⁹ “Tubuulire kye tunaamugamba;
    tetusobola kuwoza nsonga zaffe gy’ali olw’ekizikiza kye tulimu.
²⁰ Asaanidde okubuulirwa kye njagala okwogera?
    Eriyo omuntu yenna ayinza okusaba okumalibwawo?
²¹ Kaakano tewali n’omu ayinza kutunula mu njuba,
    olw’engeri gy’eyakamu ku ggulu,
    ng’empewo emaze okuyita, n’eyelula ebire.
²² Mu bukiikakkono evaayo zaabu;
    Katonda ajja mu kitiibwa eky’amaanyi.
^23 (AW)Ayinzabyonna tatuukikako era agulumidde mu maanyi,
    mu bwenkanya bwe era ne butuukirivu bwe, tawaliriza muntu yenna.
^24 (AX)Noolwekyo abantu bamutya,
    takitwala ng’ekikulu olw’abo abeerowooza okuba abagezi mu mitima gyabwe.”