Beginning

Li Hu Apocalipsis li Quixtzˈi̱ba li San Juan

Li quicˈutbesi̱c chiru laj Juan xban li Jesucristo

1  Li tzˈi̱banbil saˈ li hu aˈin quicˈutbesi̱c chiru li Jesucristo xban li Dios. Quixcˈutbesi chiru li Jesucristo re nak aˈan chic ta̱cˈutbesi̱nk re chiruheb laj pa̱banel li cˈaˈru ta̱cˈulma̱nk chi se̱b. Joˈcan nak li Jesucristo quixtakla lix ángel chixcˈutbesinquil aˈin chiru laj Juan laj cˈanjel chiru. ² Ut aˈan quixye resil chixjunil li quicˈutbesi̱c chiru. Aˈan aˈin li quixye li Dios joˈ quicˈutbesi̱c chiru laj Juan xban li Jesucristo. ³ Us xak re li ani naril xsaˈ li hu aˈin ut naxqˈue retal li cˈaˈru naxye. Us xak re li ani naxba̱nu li cˈaˈru tzˈi̱banbil chi saˈ xban nak relic chi ya̱l nak yo̱ chi cuulac xkˈehil nak ta̱cˈulma̱nk li cˈaˈru naxye.

Laj Juan quixtakla xsahil xchˈo̱leb li cuukub chˈu̱taleb chi aj pa̱banel aran Asia

⁴ La̱in laj Juan. Yo̱quin chi tzˈi̱bac e̱riqˈuin la̱ex li cuukub chˈu̱talex chi aj pa̱banel li cuanquex aran Asia. Aˈ taxak li usilal ut li tuktu̱quilal chi cua̱nk e̱riqˈuin li naxqˈue li Dios li ac cuan chak saˈ xticlajic, li cuan anakcuan, ut li cua̱nk chi junelic, ut li naxqˈue li Santil Musikˈej li cuan cuiˈ lix lokˈlaj cˈojariba̱l li Ka̱cuaˈ. ⁵ Aˈ taxak li usilal ut li tuktu̱quilal chicua̱nk e̱riqˈuin li naxqˈue li Jesucristo li ti̱c xchˈo̱l chixyebal li ya̱l. Li Jesucristo aˈan li xbe̱n li quicuacli chi yoˈyo saˈ xya̱nkeb li camenak. Aˈan li kˈaxal nim xcuanquil saˈ xbe̱neb chixjunileb li cuanqueb xcuanquil saˈ ruchichˈochˈ. Aˈan quirahoc ke ut aˈan qui‑isin re li kama̱c nak quihoyeˈ lix quiqˈuel nak quicam saˈ kacˈabaˈ. ⁶ Aˈan naqˈuehoc kacuanquil re tocˈanjelak chokˈ aj tij chiru li Acuabej Dios. Lokˈoninbil taxak li Jesucristo. Nimanbilak taxak ru ut aˈan taxak chicua̱nk xcuanquil saˈ xbe̱n chixjunil chi junelic kˈe cutan. Joˈcan taxak. ⁷ Qˈuehomak retal. Aˈan ta̱cha̱lk chak saˈ li chok ut chixjunileb teˈilok re. Teˈril ajcuiˈ eb li queˈcamsin re. Chixjunileb li cuanqueb saˈ ruchichˈochˈ teˈyotˈekˈ xchˈo̱l ut teˈya̱bak xban li raylal li teˈxcˈul. Joˈcan taxak chicˈulma̱nk. ⁸ Quixye li Ka̱cuaˈ Dios: ―La̱in quinyoˈobtesin re chixjunil ut la̱in tinsachok re chixjunil. La̱in li Alfa ut li Omega. Ut kˈaxal nim incuanquil, chan li nimajcual Dios.

Nak quicˈutbesi̱c li Cristo chiru laj Juan saˈ visión

⁹ La̱in laj Juan, le̱ rech aj pa̱banelil. La̱in xintzˈakon ajcuiˈ riqˈuin xcuybal li raylal saˈ xcˈabaˈ li Jesucristo e̱rochben la̱ex li sicˈbil e̱ru xban li Ka̱cuaˈ. La̱in cuanquin arin saˈ li naˈajej Patmos li sutsu riqˈuin haˈ xban nak xinchˈolob xya̱lal li ra̱tin li Dios ut xinye resil li Jesucristo. ¹⁰ Saˈ li cutan nak nakachˈutub kib chixlokˈoninquil li Ka̱cuaˈ, riqˈuin xcuanquil li Santil Musikˈej, li Dios quixcˈutbesi jun li visión chicuu. Quicuabi jun xya̱b cux chicuix. Chanchan xya̱b jun li trompeta yo̱ chi ecˈa̱nc. ¹¹ Quixye cue: ―Li cˈaˈru tincˈutbesi cha̱cuu ta̱tzˈi̱ba saˈ jun li botbil hu ut ta̱takla riqˈuineb li cuukub chˈu̱taleb laj pa̱banel li cuanqueb saˈ xcue̱nt Asia. Takla riqˈuineb li cuanqueb Efeso, Esmirna, ut Pérgamo. Ut ta̱takla ajcuiˈ riqˈuineb li cuanqueb Tiatira, Sardis, Filadelfia ut Laodicea, chan. ¹² Ut nak quin‑iloc chicuix chirilbal ani yo̱ chi a̱tina̱nc cue, quicuil cuukub li candelero cuan xxamlel yi̱banbil riqˈuin oro. ¹³ Ut saˈ xya̱nkeb li candelero xakxo li Cˈajolbej. Chanchan na‑iloc jun cui̱nk nak quicuil. Toj chi rok nacuulac xnimal rok li rakˈ. Cuan jun cˈa̱mal saˈ yi̱banbil riqˈuin oro chire xchˈo̱l. ¹⁴ Li rismal xjolom sak sak joˈ xsakal li nokˈ lana. Chanchan xsakal li nieve. Ut lix nakˈ ru nalemtzˈun chanchan xam. ¹⁵ Li rok nalemtzˈun chanchan li cha̱bil chˈi̱chˈ bronce ut cakjorin chanchan li kˈan chˈi̱chˈ nak cuan saˈ xam. Nak naa̱tinac chanchan xya̱b lix cau ok li palau. ¹⁶ Saˈ lix nim ukˈ chapcho cuukub li chahim. Ut saˈ re cuan jun li chˈi̱chˈ caˈ pacˈal xkˈesnal. Cˈajoˈ nalemtzˈun li ru. Chanchan nak nalemtzˈun li sakˈe. ¹⁷ Nak quicuil ru quintˈaneˈ chi rok. Chanchan camenak quincana. Ut aˈan quixqˈue lix nim ukˈ saˈ inbe̱n ut quixye cue: ―Matxucuac. La̱in li ac cuanquin chak saˈ xticlajic li ruchichˈochˈ ut cua̱nkin chi junelic kˈe cutan. ¹⁸ La̱in yoˈyo̱quin. La̱in quincam, abanan yoˈyo̱quin chic chi junelic kˈe cutan. La̱in cuan incuanquil saˈ xbe̱n li ca̱mc. Ut la̱in ajcuiˈ yal cue saˈ xbe̱n li naˈajej li nequeˈxic cuiˈ li camenak. ¹⁹ Tzˈi̱ba retalil li cˈaˈru yo̱cat chirilbal xban nak aˈan retalil li yo̱ chi cˈulma̱nc anakcuan ut li ta̱cˈulma̱nk mokon. ²⁰ Lix ya̱lal li cuukub chi chahim li xacuil saˈ lin nim ukˈ, aˈan li retalileb li cuukub lix takl li Dios li nequeˈiloc reheb li cuukub chˈu̱tal chi aj pa̱banel. Ut lix ya̱lal li cuukub chi candelero, aˈan retalileb li cuukub chˈu̱tal chi aj pa̱banel.

Aˈin li esilal li quixtakla riqˈuineb laj pa̱banel li cuanqueb Efeso

2  Tzˈi̱ban riqˈuin lix takl li Dios li na‑iloc reheb li jun chˈu̱tal chi aj pa̱banel li cuanqueb Efeso ut ta̱ye re chi joˈcaˈin: ―Li cuan cuukub chi chahim saˈ xnim ukˈ, li yo̱ chi be̱c saˈ xya̱nkeb li cuukub chi candelero yo̱ chixyebal e̱re chi joˈcaˈin: ² La̱in ninnau chixjunil li nequeba̱nu. Ninnau nak cau nequexcˈanjelac ut ninnau ajcuiˈ nak incˈaˈ nachˈinan e̱chˈo̱l. Ninnau nak xicˈ nequeril li nequeˈxba̱nu ma̱usilal. Xeqˈue retal li ani xeˈxqˈue ribeb chokˈ apóstol ut ma̱cuaˈeb. Ut xenau nak aj balakˈeb ut aj ticˈtiˈeb. ³ Ninnau nak nabal li raylal xecˈul saˈ incˈabaˈ la̱in. Abanan nequecuy xnumsinquil. Ut incˈaˈ xchˈinan e̱chˈo̱l. Ninnau nak cau nequexcˈanjelac yal xban inra̱bal la̱in. ⁴ Abanan cuan jun e̱paltil chicuu. La̱ex incˈaˈ chic niquine̱ra joˈ nak xine̱ra chak junxil. ⁵ Cheqˈuehak retal cˈaˈru xexpaltoˈ cuiˈ. Chijulticokˈ e̱re chanru nak xine̱ra chak junxil. Yotˈomak e̱chˈo̱l ut jalomak e̱cˈaˈux ut chine̱rahak cuiˈchic joˈ nak xine̱ra chak junxil. Cui incˈaˈ ta̱yotˈekˈ e̱chˈo̱l ut te̱jal e̱cˈaˈux, la̱in tincuisi le̱ candelero saˈ xnaˈaj chi junpa̱t. ⁶ Abanan cuan jun li us nequeba̱nu. La̱ex xicˈ nequeril li ma̱usilal li nequeˈxba̱nu li nequeˈta̱ken re li cui̱nk laj Nicolás. Joˈcan ajcuiˈ la̱in. Xicˈ nacuil li ma̱usilal li nequeˈxba̱nu eb aˈan. ⁷ Cui te̱raj xtaubal ru li xya̱lal, cheqˈuehak retal li naxye li Santil Musikˈej reheb laj pa̱banel. Li ani tixcuy xnumsinquil chixjunil li raylal aˈin ut incˈaˈ nachˈinan xchˈo̱l saˈ lix pa̱ba̱l, la̱in tinqˈue lix yuˈam chi junelic. Ut aˈan ta̱cua̱nk riqˈuin li Dios chi junelic saˈ lix santil naˈaj, chan li Cˈajolbej reheb laj Efeso.

Li esilal li quixtakla riqˈuineb laj pa̱banel li cuanqueb Esmirna

⁸ Ut quixye cuiˈchic cue: ―Tzˈi̱ban riqˈuin lix takl li Dios, li na‑iloc reheb li jun chˈu̱tal chi aj pa̱banel li cuanqueb Esmirna. Ut ta̱ye re: Li ac cuan chak saˈ xticlajic ut cua̱nk ajcuiˈ toj saˈ rosoˈjic, li quicam ut quicuacli cuiˈchic chi yoˈyo saˈ xya̱nkeb li camenak, naxye e̱re chi joˈcaˈin: ⁹ La̱in ninnau chanru cuanquex. Ninnau chixjunil li raylal nequecˈul. Ninnau nak nebaˈex. Abanan cuan e̱biomal riqˈuin li Dios. Ninnau nak nequexmajecua̱c xbaneb li nequeˈxye nak tzˈakaleb aj judío, abanan incˈaˈ nequeˈcˈanjelac chiru li Dios. Aj cˈanjeleb ban chiru laj tza. ¹⁰ Mexxucuac xban li raylal li ta̱cha̱lk saˈ e̱be̱n. Cuanqueb saˈ e̱ya̱nk li teˈqˈuehekˈ saˈ tzˈalam xbaneb laj cˈanjel chiru laj tza re xyalbal rix le̱ pa̱ba̱l. Te̱cˈul raylal, abanan incˈaˈ najt te̱cˈul. Michˈinan e̱chˈo̱l. Cauhak ban e̱chˈo̱l toj chirix le̱ camic ut la̱in tinqˈue e̱re le̱ kˈajca̱munquil. Chanchan nak tinqˈue le̱ corona nak tinqˈue le̱ yuˈam chi junelic. ¹¹ Cui te̱raj xtaubal ru li xya̱lal, cheqˈuehak retal li naxye li Santil Musikˈej reheb laj pa̱banel. Li ani tixcuy xnumsinquil chixjunil li raylal aˈin ut incˈaˈ nachˈinan xchˈo̱l saˈ lix pa̱ba̱l, li jun aˈan incˈaˈ tixcˈul lix cab xcamic. Incˈaˈ ta̱xic saˈ xbalba, chan li Cˈajolbej reheb laj Esmirna.

Li esilal li quixtakla riqˈuineb laj pa̱banel li cuanqueb Pérgamo

¹² Ut quixye cuiˈchic cue: ―Tzˈi̱ban riqˈuin lix takl li Dios li na‑iloc reheb laj pa̱banel li cuanqueb Pérgamo ut ta̱ye re: Li cuan xchˈi̱chˈ caˈ pacˈal xkˈesnal naxye e̱re chi joˈcaˈin: ¹³ La̱in ninnau chanru nak cuanquex. La̱in ninnau nak cuan xcuanquil laj tza saˈ li tenamit li cuanquex cuiˈ. Abanan la̱ex toj yo̱quex chinlokˈoninquil. Incˈaˈ xecanab inpa̱banquil usta quicamsi̱c laj Antipas xban nak quixye cuesilal aran saˈ le̱ tenamit li cuan rubel xcuanquil laj tza. ¹⁴ Abanan cuan cˈaˈak re ru yo̱quex chixba̱nunquil incˈaˈ us xban nak cuanqueb saˈ e̱ya̱nk li toj yo̱queb chixqˈuebal xcuanquil lix tijleb laj Balaam li quicˈutuc chiru laj Balac chanru nak tixqˈueheb chi ma̱cobc laj Israel. Quixye reheb nak ta̱ru̱k teˈxtzaca li tzacae̱mk li mayejanbil chiru li jalanil dios. Ut quixtacchiˈiheb re nak teˈyumbe̱tak ut teˈcoˈbe̱tak. ¹⁵ Ut cuanqueb ajcuiˈ saˈ e̱ya̱nk li toj nequeˈxqˈue xcuanquil lix tijleb laj Nicolás. La̱in xicˈ nacuil li ma̱usilal li nequeˈxba̱nu eb aˈan. ¹⁶ Joˈcan nak isihomakeb saˈ e̱ya̱nk li incˈaˈ useb xnaˈleb. Cui incˈaˈ nequerisiheb, la̱in tinxic chi junpa̱t e̱riqˈuin ut tinpletik riqˈuineb. Chanchan nak tincamsiheb riqˈuin kˈesnal chˈi̱chˈ nak tinsach ruheb riqˈuin li cua̱tin. ¹⁷ Cui te̱raj xtaubal ru li xya̱lal, cheqˈuehak retal li naxye li Santil Musikˈej reheb laj pa̱banel. Li ani tixcuy xnumsinquil chixjunil li raylal aˈin ut incˈaˈ nachˈinan xchˈo̱l saˈ lix pa̱ba̱l, la̱in tinqˈue li choxahil cua li incˈaˈ na‑ilman ru chixtzaca. Ut tinqˈue ajcuiˈ jun li saki pec re ut tzˈi̱banbilak chiru jun li acˈ cˈabaˈej. Ma̱ ani ta̱naˈok re li cˈabaˈej. Caˈaj cuiˈ li ani li ta̱cˈuluk re, chan li Cˈajolbej reheb laj Pérgamo.

Li esilal li quixtakla riqˈuineb laj pa̱banel li cuanqueb Tiatira

¹⁸ Ut quixye ajcuiˈ cue: ―Tzˈi̱ban riqˈuin lix takl li Dios li na‑iloc reheb li jun chˈu̱tal chi aj pa̱banel li cuanqueb Tiatira ut ta̱ye re: Li Cˈajolbej, li nalemtzˈun xnakˈ ru chanchan xam ut li rok chanchan li cha̱bil chˈi̱chˈ bronce li nalemtzˈun, naxye e̱re chi joˈcaˈin: ¹⁹ La̱in ninnau chanru nak cuanquex. Ninnau nak nequexrahoc ut nequexpa̱ban. Ninnau nak cau nequexcˈanjelac chicuu ut nabal li raylal nequecuy. La̱in ninnau nak kˈaxal cuiˈchic cau yo̱quex chi cˈanjelac chiru li xeba̱nu junxil. ²⁰ Abanan incˈaˈ nacuulac chicuu nak nequecˈam e̱rib saˈ usilal riqˈuin li ixk li yibru xnaˈleb li chanchan lix naˈleb lix Jezabel. Li ixk aˈan naxqˈue rib chokˈ xprofeta li Dios, abanan moco ya̱l ta. Yo̱ ban chixbalakˈinquileb laj cˈanjel chicuu. Riqˈuin li naxba̱nu yo̱ chixcˈambaleb xbe chi yumbe̱tac ut chi coˈbe̱tac. Ut yo̱ ajcuiˈ chixcˈambaleb xbe chixtzacanquil li tzacae̱mk mayejanbil chiru li jalanil Dios. ²¹ La̱in xcuaj raj nak tixyotˈ xchˈo̱l ut tixjal xcˈaˈux ut xcuoybeni re tixba̱nu. Abanan incˈaˈ naraj xcanabanquil li ma̱usilal. ²² Aˈut anakcuan la̱in tinqˈue junak yajel saˈ xbe̱n re nak ta̱tˈanekˈ saˈ chˈa̱t. Ut eb li nequeˈxba̱nu ma̱usilal riqˈuin teˈxcˈul ajcuiˈ li raylal cui incˈaˈ nequeˈyotˈeˈ xchˈo̱l ut cui incˈaˈ nequeˈxcanab xba̱nunquil li ma̱usilal li naxba̱nu aˈan. ²³ Ut tinkˈaxtesiheb chi ca̱mc li nequeˈta̱ken re. Ut riqˈuin aˈin teˈxqˈue retal chixjunileb laj pa̱banel nak la̱in ninnau cˈaˈru nanumeˈ saˈ xchˈo̱leb li junju̱nk. La̱in ninnau cˈaˈru nequecˈoxla. Ut la̱in tinqˈue e̱kˈajca̱munquil che̱ju̱nkal aˈ yal chanru le̱ yehom e̱ba̱nuhom. ²⁴ Ma̱cˈaˈ tinye e̱re re e̱kˈusbal la̱ex aj Tiatira li joˈ qˈuialex incˈaˈ xetzol e̱rib riqˈuin li tijleb li nequeˈxchˈolob eb aˈan, xban nak aˈan xma̱us aj naˈleb laj tza. ²⁵ Caˈaj cuiˈ tinye e̱re aˈin: Cacuubresihomak e̱chˈo̱l saˈ le̱ pa̱ba̱l toj ta̱cuulak xkˈehil nak tincuulak e̱riqˈuin. ²⁶ Li ani naxcuy xnumsinquil chixjunil li raylal aˈin ut incˈaˈ nachˈinan xchˈo̱l saˈ lix pa̱ba̱l ut tixba̱nu li cˈaˈru nacuaj toj saˈ rosoˈjic, la̱in tinqˈue xcuanquil chi takla̱nc saˈ xbe̱neb li tenamit. ²⁷ Eb aˈan teˈtakla̱nk saˈ xbe̱neb li tenamit chi cau. Chanchan nak teˈxtaklaheb riqˈuin jun li xukˈ chˈi̱chˈ. Ut ta̱sachekˈ xcuanquileb li teˈtakla̱nk cuiˈ. Chanchan nak najoreˈ junak chˈochˈ ucˈal. La̱in tinqˈue lix cuanquileb joˈ li cuanquil li quixqˈue cue lin Yucuaˈ. ²⁸ Ut la̱in tinqˈue ajcuiˈ reheb lix lokˈaleb, chanchan xchˈinaˈusal li cak chahim. ²⁹ Cui te̱raj xtaubal ru li xya̱lal, cheqˈuehak retal li naxye li Santil Musikˈej reheb laj pa̱banel, chan li Cˈajolbej reheb laj pa̱banel li cuanqueb Tiatira.

Li esilal li quixtakla riqˈuineb laj pa̱banel li cuanqueb Sardis

3  Ut li Cˈajolbej quixye cuiˈchic cue: ―Tzˈi̱ban riqˈuin lix takl li Dios li na‑iloc reheb li jun chˈu̱tal chi aj pa̱banel li cuanqueb Sardis ut ta̱ye re: Li cuan li Santil Musikˈej riqˈuin ut li cuan li cuukub chi chahim saˈ rukˈ naxye e̱re chi joˈcaˈin: La̱in ninnau chanru nak cuanquex. Eb li tenamit nequeˈxye nak la̱ex tzˈakal aj pa̱banelex. Abanan moco ya̱l ta. La̱in ninnau nak incˈaˈ nequexpa̱ban chi tzˈakal. Chanchan camenakex. ² Qˈuehomak retal chanru nak cuanquex. La̱ex incˈaˈ tzˈakal re ru le̱ yuˈam chiru li Ka̱cuaˈ Dios. Joˈcan nak qˈuehomak e̱chˈo̱l chi pa̱ba̱nc chi tzˈakal ut michˈinan chic e̱chˈo̱l. ³ Chijulticokˈ e̱re li xya̱lal li querabi chak junxil. Chiyotˈekˈ e̱chˈo̱l ut jalomak e̱cˈaˈux. Cacuubresihomak e̱chˈo̱l saˈ le̱ pa̱ba̱l. Cui incˈaˈ te̱ba̱nu aˈan, la̱in tincuulak e̱riqˈuin chi ma̱cˈaˈ saˈ e̱chˈo̱l joˈ naxba̱nu laj e̱lkˈ ut tinrakok a̱tin saˈ e̱be̱n. ⁴ La̱in ninnau nak aran Sardis toj cuanqueb cuib oxib saˈ e̱ya̱nk li ti̱c xchˈo̱leb. Incˈaˈ xeˈxtzˈajni ribeb riqˈuin xba̱nunquil li ma̱usilal. La̱in tinye reheb nak xcˈulubeb cua̱nc cuiqˈuin chi tikto̱queb riqˈuin saki akˈej xban nak ti̱c xchˈo̱leb. ⁵ Li ani tixcuy xnumsinquil chixjunil li raylal aˈin ut incˈaˈ nachˈinan xchˈo̱l saˈ lix pa̱ba̱l, aˈan ta̱tikiba̱k riqˈuin saki akˈej. Ut la̱in incˈaˈ tinsach lix cˈabaˈ saˈ li hu tzˈi̱banbil cuiˈ xcˈabaˈeb li cuanqueb xyuˈam chi junelic. Ut chiru lin Yucuaˈ ut chiruheb ajcuiˈ lix ángel, la̱in tinye nak aˈan cualal incˈajol. ⁶ Cui te̱raj xtaubal ru lix ya̱lal, cheqˈuehak retal li naxye li Santil Musikˈej reheb laj pa̱banel. Joˈcaˈin quixye li Cˈajolbej reheb laj pa̱banel li cuanqueb Sardis.

Li esilal li quixtakla riqˈuineb laj pa̱banel li cuanqueb Filadelfia

⁷ Ut li Cˈajolbej quixye cuiˈchic cue: ―Tzˈi̱ban riqˈuin lix takl li Dios li na‑iloc reheb li jun chˈu̱tal chi aj pa̱banel li cuanqueb Filadelfia, ut ta̱ye re: Li ti̱c xchˈo̱l ut li tzˈakal Dios, aˈan cuan xcuanquilal joˈ li cuanquil li quiqˈueheˈ re laj David junxil. Li oqueba̱l li tixte aˈan, ma̱ ani naru ta̱tzˈapok re; ut li oqueba̱l li tixtzˈap aˈan, ma̱ ani naru ta̱tehok re. ⁸ Aˈan yo̱ chixyebal e̱re chi joˈcaˈin: La̱in ninnau chanru nak cuanquex. La̱in xinte li oqueba̱l che̱ru ut ma̱ ani naru ta̱tzˈapok re. Ninnau nak incˈaˈ cau e̱rib. Abanan incˈaˈ xine̱tzˈekta̱na. Junelic ban nequeba̱nu li cˈaˈru ninye. ⁹ Cuanqueb li nequeˈxba̱nu li cˈaˈru naraj laj tza. Nequeˈxye nak tzˈakaleb aj judío, abanan incˈaˈ nequeˈcˈanjelac chiru li Dios. Yal ticˈtiˈ nequeˈxye. La̱in tincanabeb toj retal teˈxcuikˈib ribeb che̱ru re nak teˈxqˈue retal nak la̱in ninrahoc e̱re. ¹⁰ La̱ex xecuy xba̱nunquil li xinye e̱re ut incˈaˈ xchˈinan e̱chˈo̱l saˈ le̱ pa̱ba̱l. Joˈcan nak la̱in tincolok e̱re saˈ xkˈehil nak ta̱cha̱lk li raylal saˈ xbe̱neb chixjunileb li cuanqueb saˈ ruchichˈochˈ. ¹¹ La̱in chi se̱b tincha̱lk. Tincuulak e̱riqˈuin. Joˈcan nak cauhak taxak e̱chˈo̱l saˈ le̱ pa̱ba̱l ut me̱canab inpa̱banquil re nak te̱cˈul le̱ kˈajca̱munquil li tinqˈue ut re ajcuiˈ nak incˈaˈ ta̱qˈuehekˈ re jalan. ¹² Li ani tixcuy xnumsinquil li raylal ut incˈaˈ ta̱chˈina̱nk xchˈo̱l saˈ lix pa̱ba̱l, tinqˈue xlokˈal ut ma̱ ani ta̱ru̱k ta̱isi̱nk re saˈ lix naˈaj li ta̱qˈuehekˈ re xban lin Yucuaˈ. Chanchanak li okech li nacu̱tun re lix templo li Dios, li incˈaˈ na‑ecˈan saˈ xnaˈaj. Aˈan ta̱cua̱nk riqˈuin lin Yucuaˈ chi junelic saˈ li Acˈ Jerusalén li tixqˈue lin Yucuaˈ cuan saˈ choxa. Acˈ chic lix cˈabaˈ tinqˈue. Ut chixjunileb teˈxnau nak aˈan ralal xcˈajol lin Yucuaˈ. Ut tinqˈue ajcuiˈ re lin cˈabaˈ la̱in. ¹³ Cui te̱raj xtaubal ru li xya̱lal, cherabihak li naxye li Santil Musikˈej reheb laj pa̱banel. Joˈcaˈin quixye li Cˈajolbej reheb laj pa̱banel li cuanqueb Filadelfia.

Li esilal li quixtakla riqˈuineb laj pa̱banel li cuanqueb Laodicea

¹⁴ Ut li Cˈajolbej quixye cuiˈchic cue: ―Tzˈi̱ban riqˈuin lix takl li Dios li na‑iloc reheb li jun chˈu̱tal chi aj pa̱banel li cuanqueb Laodicea ut ta̱ye re: Li ani naxcˈabaˈin “Amén”, li junelic ti̱c xchˈo̱l chixyebal li ya̱l, li ac cuan chak nak quiyi̱ba̱c chak li ruchichˈochˈ ut chixjunil li cˈaˈak re ru cuan, naxye e̱re chi joˈcaˈin: ¹⁵ La̱in ninnau chanru nak cuanquex. La̱ex incˈaˈ yo̱quex chinpa̱banquil chi anchal e̱chˈo̱l, chi moco yo̱quex chintzˈekta̱nanquil. Us raj nak tine̱pa̱b chi anchal e̱chˈo̱l malaj ut tine̱tzˈekta̱na raj chi junaj cua. Abanan la̱ex chanchanex li haˈ moco tik ta, chi moco que. Yal lulu ban. ¹⁶ Xban nak xcab rix e̱chˈo̱l nak yo̱quex chinpa̱banquil, la̱in texintzˈekta̱na. Chanchan texinxaˈcua nak texintzˈekta̱na. ¹⁷ La̱ex nequeye nak biomex ut cuan chixjunil li cˈaˈru e̱re. Ma̱cˈaˈ napaltoˈ ke chanquex. Abanan incˈaˈ nequeqˈue retal nak kˈaxal ra cuanquex. Chanchan nebaˈex ut mutzˈex. Chanchan tˈustˈuquex xban nak incˈaˈ niquine̱pa̱b. Kˈaxal tokˈoba̱l e̱ru. ¹⁸ Joˈcan nak ninye e̱re: Lokˈomak e̱‑oro cuiqˈuin li ac numsinbil saˈ xam ut isinbil xtzˈajnil. Lokˈomak le̱ saki tˈicr cuiqˈuin re te̱tikib e̱rib ut incˈaˈ te̱cˈut e̱xuta̱n nak tˈustˈu̱quex. Lokˈomak xbanol li xnakˈ e̱ru cuiqˈuin re nak tex‑ilok. ¹⁹ Li ani nequebinra, nintijeb ut ninkˈuseb. Joˈcan nak ninye e̱re nak jalomak e̱cˈaˈux ut qˈuehomak e̱chˈo̱l chinpa̱banquil. ²⁰ Chanchan nak cuanquin chire li oqueba̱l nak yo̱quin che̱bokbal. Li ani ta̱abi̱nk re li cua̱tin ut tinixpa̱b, la̱in tincua̱nk riqˈuin ut tocua̱nk chi sum a̱tin. ²¹ Li ani tixcuy xnumsinquil li raylal ut incˈaˈ ta̱chˈina̱nk xchˈo̱l, la̱in tinqˈue chi cˈojla̱c chincˈatk saˈ lin cˈojariba̱l joˈ nak cˈojcˈo̱quin chixcˈatk lin Yucuaˈ saˈ lix cˈojariba̱l xban nak xincuy xnumsinquil li raylal. ²² Cui te̱raj xtaubal ru li xya̱lal, cheqˈuehak retal li naxye li Santil Musikˈej reheb laj pa̱banel, chan li Cˈajolbej reheb laj pa̱banel li cuanqueb Laodicea.