Beginning

Li Hu li Quixtzˈi̱ba li San Pablo re laj Tito

Laj Pablo naxqˈue xsahil xchˈo̱l laj Tito

1  La̱in laj Pablo. Yo̱quin chi tzˈi̱bac a̱cuiqˈuin, at Tito. Nincˈanjelac chiru li Dios ut la̱in x‑apóstol li Jesucristo. Xakabanbilin xban li Jesucristo re xtenkˈanquileb li sicˈbileb ru xban li Dios re nak tzˈakalak re ru lix pa̱ba̱leb. Ut xakabanbilin re xtenkˈanquileb re nak teˈxtau ru chi tzˈakal li xya̱lal li colba‑ib ut ta̱ti̱cobresi̱k lix chˈo̱leb. ² Ninchˈolob li xya̱lal aˈin chiruheb re nak teˈpa̱ba̱nk ut teˈxyoˈoni li junelic yuˈam. Najter kˈe cutan li Dios quixyechiˈi chak li junelic yuˈam. Li Dios incˈaˈ naticˈtiˈic. ³ Nak quicuulac xkˈehil li Dios laj Colol ke quixcˈutbesi li xya̱lal li colba‑ib chiku. Tenebanbil saˈ inbe̱n xban li Dios xchˈolobanquil xya̱lal li colba‑ib yalak bar. ⁴ Yo̱quin chi tzˈi̱bac a̱cuiqˈuin, at Tito. La̱at chanchanat tzˈakal cualal saˈ xcˈabaˈ li kapa̱ba̱l. Chicua̱nk taxak a̱cuiqˈuin li usilal ut li tuktu̱quilal li naxqˈue li Dios li kaYucuaˈ ut li naxqˈue li Jesucristo laj Colol ke.

Li cˈanjel tenebanbil saˈ xbe̱n laj Tito

⁵ Xatincanab aran saˈ li tenamit Creta re nak ta̱cˈu̱b ru li cˈaˈru toj yi̱ba̱c naraj ut re nak ta̱xakabeb li teˈcˈamok be chiruheb laj pa̱banel saˈ li junju̱nk chi tenamit. Joˈ xinye a̱cue, joˈcan ta̱ba̱nu. ⁶ Ti̱cak xchˈo̱l li ani ta̱xakab re nak ma̱cˈaˈ ta̱yehekˈ chirixeb. Junak ajcuiˈ li rixakil ut aj pa̱banelakeb li ralal xcˈajol. Cha̱bilakeb xnaˈleb ut teˈabi̱nk chiruheb lix naˈ xyucuaˈ. ⁷ Li ani nacˈamoc be chiruheb laj pa̱banel, li jun aˈan aj cˈanjel chiru li Dios. Joˈcan nak tento nak ti̱cak xchˈo̱l re nak ma̱ ani ta̱a̱tinak chirix. Moco kˈetkˈetak ta ut moco chˈinpoˈak ta, chi moco ta̱cala̱k, chi moco ta̱pletik. Ut ma̱cuaˈak aj rahol ru biomal, chi moco tixsicˈ xtumin riqˈuin balakˈic. ⁸ Junak aj cˈanjel chiru li Dios naxcˈuleb li rulaˈ chi sa saˈ xchˈo̱l ut nasahoˈ ajcuiˈ saˈ xchˈo̱l riqˈuineb li nequeˈba̱nun re li us. Laj cˈanjel chiru li Dios toj naxcˈoxla chi us li cˈaˈru naxba̱nu ut junelic cua̱nk saˈ usilal riqˈuineb li ras ri̱tzˈin. Ti̱c xchˈo̱l ut naxcuy xnumsinquil li raylal ut li a̱le̱c. ⁹ Incˈaˈ nachˈinan xchˈo̱l saˈ lix pa̱ba̱l. Naxpa̱b ban chi anchal xchˈo̱l li xya̱lal li quicˈuteˈ chiru re nak tixnau xchˈolobanquil li xya̱lal chiruheb li rech aj pa̱banelil ut tixnau xqˈuebal xnaˈlebeb li nequeˈcuechˈin re li cˈaˈru naxye. ¹⁰ Chaqˈuehak retal ani ta̱xakab chokˈ aj cˈamol be xban nak nabaleb li incˈaˈ nequeˈxtau xya̱lal. Nequeˈa̱tinac chi ma̱cˈaˈ rajbal ut nequeˈxbalakˈi li tenamit. Kˈaxal cuiˈchic nabaleb joˈcaneb xnaˈleb saˈ xya̱nkeb li kech aj pa̱banelil aj judío. ¹¹ Eb aˈan tento xkˈusbaleb re nak teˈxcanab li balakˈi̱nc. Yo̱queb xpoˈbal xchˈo̱leb li ju̱nk cabal riqˈuin xcˈutbal li moco ya̱l ta. Riqˈuin balakˈi̱nc nequeˈxtau lix tumineb. ¹² Eb laj Creta queˈxqˈue jun li cui̱nk aj kˈe chokˈ xprofeteb. Li cui̱nk aˈan quixye chi joˈcaˈin chirixeb li rech tenamitil: laj Creta junes ticˈtiˈic nequeˈxba̱nu. Chanchaneb li joskˈ aj xul. Eb aˈan aj num cuaˈineleb ut incˈaˈ nequeˈraj trabajic, chan. ¹³ Ut ya̱l ajcuiˈ li quixye. Joˈcan nak cau chakˈuseb re nak teˈcacuu̱k xchˈo̱leb saˈ lix pa̱ba̱leb. ¹⁴ Chakˈuseb re nak incˈaˈ teˈxpa̱b li ticˈtiˈ li nequeˈxyoˈob laj judío chi moco cheˈxpa̱b lix chakˈrabeb li cui̱nk li nequeˈtzˈekta̱nan re li tzˈakal ya̱l. ¹⁵ Li ti̱queb xchˈo̱l, chixjunil li cˈaˈak re ru cha̱bil chiruheb xban nak nequeˈxsicˈ li cˈaˈru cha̱bil. Aˈut eb li incˈaˈ ti̱queb xchˈo̱l, ma̱cˈaˈ cˈaˈru us chiruheb xban nak numtajenak xyibal ru lix naˈlebeb ut incˈaˈ us lix cˈaˈuxeb. ¹⁶ Nequeˈxye nak nequeˈxpa̱b li Dios, aban riqˈuin li cˈaˈru nequeˈxba̱nu nacˈutun nak moco ya̱l ta. Aj kˈetoleb ra̱tin li Dios ut kˈaxal yibru lix naˈlebeb. Incˈaˈ useb. Ma̱cˈaˈ junak cha̱bil cˈanjel ta̱ru̱k teˈxba̱nu.

Laj Tito tenebanbil saˈ xbe̱n xqˈuebal xnaˈleb laj pa̱banel

2  Abanan li cˈaˈru ta̱chˈolob chiruheb laj pa̱banel, chaqˈuehak retal re nak aˈan tzˈakal lix ya̱lal li ta̱chˈolob chiruheb. ² Chaqˈueheb xnaˈleb li che̱quel cui̱nk re nak incˈaˈ teˈcala̱k ut cha̱bilakeb xnaˈleb. Toj cheˈxcˈoxla chi us li cˈaˈru teˈxba̱nu ut cheˈpa̱ba̱nk chi anchaleb xchˈo̱l. Chixjunil li teˈxba̱nu, cheˈxba̱nuhak xban nak nequeˈxra li ras ri̱tzˈin ut cheˈxcuyak li raylal. ³ Ut chaqˈueheb ajcuiˈ xnaˈlebeb li che̱quel ixk. Chicˈutu̱nk lix lokˈaleb riqˈuin lix ti̱quilal xchˈo̱leb. Incˈaˈ teˈxyoˈob a̱tin chirixeb li ras ri̱tzˈin ut incˈaˈ teˈcala̱k. Aˈanakeb ban chic aj cˈamol be saˈ li ti̱quilal. ⁴ Riqˈuin lix cha̱bilal li che̱quel ixk teˈxcˈut chiruheb li ixakilbej li toj sa̱jeb nak teˈxra lix be̱lom joˈ ajcuiˈ lix cocˈaleb. ⁵ Teˈxcˈut chiruheb nak cha̱bilakeb xnaˈleb, ti̱cakeb lix chˈo̱leb ut teˈril lix jun cablal chi us. Cha̱bilakeb ut cheˈpa̱ba̱nk chiru lix be̱lomeb. Cheˈcua̱nk saˈ xya̱lal re nak incˈaˈ ta̱sachma̱nk xcuanquil li colba‑ib qˈuebil ke xban li Dios. ⁶ Ut chaqˈueheb ajcuiˈ xnaˈlebeb li sa̱j cui̱nk re nak teˈxcˈoxla chi us li cˈaˈru teˈxba̱nu re nak teˈcua̱nk saˈ ti̱quilal. ⁷ Ut riqˈuin chixjunil li cˈaˈak re ru ta̱ba̱nu, la̱at tatcˈamok be chiruheb saˈ ti̱quilal. Chi anchalak a̱chˈo̱l ut cha̱bilak la̱ yuˈam nak ta̱cˈut li xya̱lal chiruheb. ⁸ Ut nak tat‑a̱tinak, tzˈakal re ru li cˈaˈru ta̱ye re nak ma̱ ani ta̱cuechˈi̱nk rix li cˈaˈru ta̱ye. Chi joˈcan teˈxuta̱na̱k li xicˈ nequeˈiloc ke ut ma̱cˈaˈ cˈaˈ re ru naru teˈxye chikix la̱o aj pa̱banel. ⁹ Chaqˈueheb ajcuiˈ xnaˈlebeb li mo̱s re nak cheˈabi̱nk chiruheb lix patroneb. Incˈaˈ teˈsume̱nk. Cheˈxba̱nuhak ban li cˈaˈru ta̱yehekˈ reheb re nak sahakeb saˈ xchˈo̱l lix patrón riqˈuineb. ¹⁰ Incˈaˈ cheˈrelkˈa li cˈaˈru reheb lix patroneb. Cheˈxba̱nuhak ban lix cˈanjel chi cha̱bil ut chi anchalakeb xchˈo̱l re nak ta̱qˈuehekˈ xlokˈal li resilal li Dios li kaColonel riqˈuin chixjunil li teˈxba̱nu. ¹¹ Li Dios quixcˈutbesi lix nimal ruxta̱n re xcolbaleb chixjunileb li cuanqueb jun sut rubel choxa. ¹² Lix nimal ruxta̱n li Dios naxcˈut chiku nak li Dios naraj nak takacanab xba̱nunquil li ma̱usilal. Chikacanab xba̱nunquil li incˈaˈ us li naxrahi ru li kachˈo̱l. Saˈ xya̱lal ban chikanumsihak li cutan saˈ li ruchichˈochˈ aˈin. Tocua̱nk saˈ ti̱quilal riqˈuineb li kas ki̱tzˈin ut chikaba̱nuhak taxak li naraj li Dios. ¹³ Joˈcan taxak yo̱ko nak yo̱ko chiroybeninquil li lokˈlaj cutan nak tol‑e̱lk cuiˈchic li Jesucristo li nakayoˈoni. Saˈ li cutan aˈan ta̱cˈutbesi̱k chiku lix lokˈal li kanimajcual Dios, li Jesucristo laj Colol ke. ¹⁴ Aˈan quixkˈaxtesi rib chi ca̱mc saˈ kacˈabaˈ la̱o re nak tocolekˈ chiru li ma̱usilal. Quixba̱nu aˈan re xti̱cobresinquil li kachˈo̱l ut re nak chikaqˈuehak kachˈo̱l chixba̱nunquil li us. ¹⁵ Chixjunil li naˈleb aˈin li yo̱quin xtzˈi̱ban‑quil a̱cuiqˈuin, aˈan li ta̱chˈolob chiruheb. Chaqˈueheb xnaˈleb ut chakˈuseb cui incˈaˈ us yo̱queb xban nak tenebanbil saˈ a̱be̱n xban li Dios xba̱nunquil. Ut ma̱ ani chitzˈekta̱na̱nk a̱cue.

Li cˈaˈru us teˈxba̱nu laj pa̱banel

3  Chajultica ajcuiˈ chiruheb nak cheˈpa̱ba̱nk chiru li acuabej. Ut cheˈpa̱ba̱nk ajcuiˈ chiruheb chixjunileb li cuanqueb saˈ xcuanquil. Ut se̱bak xchˈo̱leb chixba̱nunquil li cha̱bil cˈanjel. ² Ut chaye ajcuiˈ reheb nak incˈaˈ teˈxyoˈob a̱tin chirixeb li ras ri̱tzˈin ut incˈaˈ teˈcuechˈi̱nk. Kˈunakeb ban xchˈo̱l ut cha̱bilakeb. Ut cheˈcua̱nk saˈ usilal riqˈuineb chixjunileb li ras ri̱tzˈin. ³ La̱o junxil incˈaˈ us li kanaˈleb nak xocuan chak. Xkakˈet ra̱tin li Dios ut incˈaˈ xo‑abin chiruheb li cuanqueb xcuanquil. Xkaqˈue kib chi balakˈi̱c. Xkaba̱nu chak li ma̱usilal li naxrahi ru li kachˈo̱l. Xkanumsi li cutan xba̱nunquil li ma̱usilal. Xocakalin ut xicˈ nakil kib chi kibil kib. ⁴ Abanan quicuulac xkˈehil nak li Dios laj Colol ke quixcˈutbesi chiku li rusilal ut li ruxta̱n. ⁵ Li Dios xoxcol ut xorisi saˈ li kanajter naˈleb. Ma̱cuaˈ xban kayehom kaba̱nuhom chi moco xban lix ti̱quilal li kachˈo̱l. Yal xban lix nimal ruxta̱n li Dios nak coxcol. Cuybil sachbil chic li kama̱c ut acˈobresinbil chic li kayuˈam xban li Santil Musikˈej. ⁶ Xban nak li Jesucristo quicam re kacolbal, numtajenak li kosobtesinquil xban li Dios nak quixqˈue chak li Santil Musikˈej chi cua̱nc kiqˈuin. ⁷ Joˈcaˈin quixba̱nu re nak ta̱ti̱cokˈ li kachˈo̱l xban xnimal rusilal li Dios ut take̱chani li junelic yuˈam li yo̱co chiroybeninquil. ⁸ Li a̱tin aˈin li xinye a̱cue, aˈan li tzˈakal ya̱l. La̱in nacuaj nak ta̱chˈolob li xya̱lal aˈin chiruheb li ac xeˈxpa̱b li Dios re nak teˈxqˈue xchˈo̱l chi cˈanjelac saˈ cha̱bilal. Li xya̱lal aˈin kˈaxal cha̱bil ut ta̱cˈanjelak chiruheb chixjunileb. ⁹ Ma̱tzˈil rix li cˈaˈak re ru chi a̱tinul li ma̱cˈaˈ rajbal ut ma̱cuechˈi rix lix xeˈ xto̱nal li junju̱nk. Ut ma̱cuechˈi rix li chakˈrab li quiqˈueheˈ re laj Moisés. Ma̱cˈaˈ aj e xba̱nunquil aˈan xban nak li cuechˈi̱nc ma̱cˈaˈ na‑oc cuiˈ. ¹⁰ Ut cui junak cui̱nk aj poˈol chˈo̱lej yo̱ chi tacchiˈi̱nc saˈ xya̱nkeb laj pa̱banel, ta̱qˈue xnaˈleb jun sut malaj cuib sut ut cui incˈaˈ na‑abin cha̱cuu, incˈaˈ chic texcua̱nk saˈ comonil riqˈuin. ¹¹ Nanauman nak li jun aˈan ac xpoˈ xchˈo̱l ut nama̱cob xban nak naraj tixpoˈ xchˈo̱leb laj pa̱banel. Aˈan raylal naxcˈam chak saˈ xbe̱n xjunes rib.

Laj Tito quiyeheˈ re cˈaˈru tixba̱nu

¹² Tintakla a̱cuiqˈuin laj Artemas malaj ut laj Tíquico. Nak ta̱cuulak a̱cuiqˈuin, tatxic chi junpa̱t Nicópolis. Aran toxina̱tau xban nak nincˈoxla nak us tinnumsi li habalkˈe aran. ¹³ Chaqˈue a̱chˈo̱l chixtenkˈanquileb nak teˈe̱lk aran laj Apolos joˈ ajcuiˈ laj Zenas laj naˈol chakˈrab. Chatenkˈaheb nak teˈxic re nak cua̱nk cˈaˈru reheb ut ma̱cˈaˈ chipaltok reheb. ¹⁴ Eb li kech aj pa̱banelil tento nak teˈxtzol rib xba̱nunquil li usilal ut teˈxtzol ajcuiˈ xtenkˈanquileb li tenkˈa̱c teˈraj re nak incˈaˈ ta̱cana̱k chi ma̱cˈaˈ rajbal lix pa̱ba̱leb.

Xqˈuebal xsahil xchˈo̱leb laj pa̱banel

¹⁵ Chixjunileb li cuanqueb cuochben nequeˈxtakla xsahil a̱chˈo̱l. Ut chaqˈue ajcuiˈ xsahileb xchˈo̱l li kech aj pa̱banelil. Nakara kib chi kibil kib xban nak junaj li kapa̱ba̱l. Aˈ taxak li rusilal li Dios chicua̱nk e̱riqˈuin che̱junilex. Joˈcan taxak.

Li Hu li Quixtzˈi̱ba li San Pablo re laj Filemón

Xqˈuebal xsahileb xchˈo̱l

¹ La̱in laj Pablo. Cuanquin chi pre̱xil saˈ xcˈabaˈ li Jesucristo. Cuochben li kaherma̱n Timoteo yo̱quin chixtzˈi̱banquil li hu aˈin, at Filemón. La̱at kech aj cˈanjelil chiru li Cristo ut raro̱cat kaban. ² Li hu aˈin re ajcuiˈ lix Apia, li kech aj pa̱banelil ut reheb ajcuiˈ laj pa̱banel li nequeˈxchˈutub rib saˈ la̱ cuochoch chixlokˈoninquil li Dios, ut re ajcuiˈ laj Arquipo li kech aj pa̱banelil. Aˈan li qui‑ochbenin chak ke saˈ li cˈanjel chixyebal resil li colba‑ib. ³ Chicua̱nk taxak e̱riqˈuin li usilal ut li tuktu̱quilal li naxqˈue chak ke li Dios li kaYucuaˈ ut li naxqˈue li Ka̱cuaˈ Jesucristo.

Tzˈakal re ru lix pa̱ba̱l laj Filemón

⁴ Junelic ninbantioxi chiru lin Dios nak nintijoc cha̱cuix. ⁵ Ninbantioxi chiru li Dios nak nacuabi resil nak nacapa̱b chi tzˈakal li Jesucristo ut ninbantioxi chiru nak nacaraheb chixjunileb laj pa̱banel. ⁶ Ut nintzˈa̱ma ajcuiˈ chiru li Dios nak tatxtenkˈa re nak ta̱cˈutu̱nk chanru la̱ pa̱ba̱l. Ut nak teˈril li rusilal li Jesucristo cuan a̱cuiqˈuin, teˈqˈui̱k saˈ xpa̱ba̱leb. ⁷ At inherma̱n, cˈajoˈ nak nasahoˈ ut nacˈojla inchˈo̱l nak xcuabi resil chanru nak nacaraheb laj pa̱banel ut nacaqˈue xcacuilal xchˈo̱leb.

Laj Pablo quixtzˈa̱ma chiru laj Filemón nak tixcuy xma̱c laj Onésimo

⁸ Anakcuan nacuaj xtzˈa̱manquil jun usilal cha̱cuu. La̱in la̱ herma̱n saˈ xcˈabaˈ li Cristo ut cuan incuanquil chixyebal a̱cue cˈaˈru ta̱ba̱nu. ⁹ Abanan incˈaˈ tinmin a̱cuu chixba̱nunquil. Tintzˈa̱ma ban li usilal cha̱cuu xban nak nakara kib. La̱in ac xinti̱x ut cuanquin chi pre̱xil saˈ xcˈabaˈ li Cristo. ¹⁰ Li usilal nintzˈa̱ma cha̱cuu, aˈan chirix laj Onésimo. Chanchan li cualal chicuu nak cuan xban nak chicuu quixpa̱b li Jesucristo nak cuanquin chi pre̱xil. ¹¹ Junxil laj Onésimo incˈaˈ quicˈanjelac chi us cha̱cuu. Abanan anakcuan cha̱bil aj cˈanjel chic cha̱cuu la̱at ut chicuu ajcuiˈ la̱in. ¹² Tintakla cuiˈchic a̱cuiqˈuin ut nak ta̱cˈul aˈan, chanchan ajcuiˈ nak tina̱cˈul la̱in. ¹³ La̱in xcuaj raj nak xcana ta cuiqˈuin. Naru raj ta̱cˈanjelak chicuu chokˈ a̱cuu̱chil la̱at nak cuanquin chi pre̱xil xban xyebal resil li colba‑ib. ¹⁴ Abanan incˈaˈ nacuaj xminbal a̱cuu chixba̱nunquil li usilal aˈin. Nacuaj ban nak ta̱ba̱nu aˈan chi anchal a̱chˈo̱l. Joˈcan nak ma̱cˈaˈ xinba̱nu chi incˈaˈ ta ta̱nau la̱at. ¹⁵ Cuan xya̱lal nak qui‑el jarubak cutan a̱cuiqˈuin. Ma̱re lix ya̱lal aˈan nak quijala lix yuˈam ut anakcuan ta̱cua̱nk a̱cuiqˈuin chi junelic. ¹⁶ Anakcuan ma̱cuaˈ chic joˈ lokˈbil mo̱s nak ta̱cua̱nk a̱cuiqˈuin. Anakcuan kˈaxal lokˈ chic chiru junak mo̱s xban nak anakcuan a̱herma̱n chic saˈ xcˈabaˈ li Jesucristo. Raro inban la̱in, ut la̱at kˈaxal cuiˈchic nak ta̱ra xban nak a̱mo̱s ut a̱herma̱n ajcuiˈ saˈ xcˈabaˈ li Ka̱cuaˈ. ¹⁷ La̱at nacanau nak la̱in a̱cuech aj cˈanjelil. Joˈcan nak chacˈulak laj Onésimo joˈ nak niquina̱cˈul la̱in. ¹⁸ Ut cui cuan junak xma̱c cha̱cuu, chaqˈuehak saˈ inbe̱n la̱in. Ut cui cuan xcˈas a̱cuiqˈuin, la̱in tintoj lix cˈas cha̱cuu. ¹⁹ La̱in laj Pablo. Ut riqˈuin cuukˈ yo̱quin chixtzˈi̱banquil li a̱tin aˈin. La̱in tintojok re cha̱cuu. Ut la̱in naru raj tinye a̱cue nak kˈaxal cuiˈchic cuan la̱ cˈas chicuu. La̱at cuan la̱ yuˈam chi junelic xban nak la̱in xinchˈolob xya̱lal cha̱cuu. ²⁰ Joˈcan ut herma̱n, ba̱nu li usilal aˈin saˈ xcˈabaˈ li Ka̱cuaˈ. Ut li usilal nintzˈa̱ma cha̱cuu, aˈan nak ta̱cˈul laj Onésimo saˈ xya̱lal. Chacˈojob taxak inchˈo̱l xban nak la̱o aj pa̱banel ut kacomon kib saˈ xcˈabaˈ li Jesucristo. ²¹ Nintzˈi̱bac a̱cuiqˈuin xban nak ninnau chi ya̱l nak ta̱ba̱nu li usilal cue. Ut ninnau ajcuiˈ nak li ta̱ba̱nu, aˈan kˈaxal cuiˈchic nabal chiru li nintzˈa̱ma cha̱cuu. ²² Ut nintzˈa̱ma ajcuiˈ cha̱cuu nak ta̱cauresi li cuochochnal. Yo̱quin chixyoˈoninquil nak tinxic cuiˈchic e̱riqˈuin joˈ yo̱quex chixtzˈa̱manquil chiru li Dios.

Eb laj pa̱banel nequeˈxtakla xsahil xchˈo̱l laj Filemón

²³ Laj Epafras cuochben chi pre̱xil saˈ xcˈabaˈ li Jesucristo. Aˈan naxtakla ajcuiˈ xsahil a̱chˈo̱l. ²⁴ Ut nequeˈxtakla ajcuiˈ xsahil a̱chˈo̱l laj Marcos, laj Aristarco, laj Demas ut laj Lucas. Cuochbeneb aˈan nak yo̱co chi cˈanjelac chiru li Jesucristo. ²⁵ Aˈ taxak li rusilal li Ka̱cuaˈ Jesucristo chicua̱nk e̱riqˈuin. Joˈcan taxak.