Beginning

4  Li nacuaj xyebal e̱re aˈan aˈin: nak toj caˈchˈin, li ta̱e̱chani̱nk re li jun cablal chanchan junak mo̱s. Ma̱cˈaˈ naru naxchˈeˈ xban nak ma̱jiˈ natzˈakloc xchihab usta aˈan laj e̱chal re chixjunil. ² Toj cuan rubel xcuanquil li na‑iloc re ut li nataklan re toj ta̱tzˈaklok ru lix chihab joˈ quixye lix yucuaˈ. ³ Joˈcan ajcuiˈ la̱o. Junxil chanchano cocˈal. Cocuan rubel xcuanquil li najter naˈleb nak toj ma̱jiˈ nakanau bar cuan li ya̱l. ⁴ Abanan nak quicuulac xkˈehil, li Dios quixtakla li Ralal chi yoˈla̱c saˈ ruchichˈochˈ riqˈuin jun li ixk. Ut quicuan ajcuiˈ rubel xcuanquil li najter chakˈrab. ⁵ Li Dios quixtakla li Ralal re nak aˈan ta̱colok reheb li cuanqueb rubel xcuanquil li chakˈrab. Quixba̱nu aˈin re nak la̱o naru to‑oc chokˈ ralal xcˈajol. ⁶ Re xcˈutbal chiku nak la̱o chic ralal xcˈajol, li Dios quixtakla li Santil Musikˈej re nak ta̱cua̱nk kiqˈuin. Ut xban nak cuan li Santil Musikˈej kiqˈuin, joˈcan nak naru nakaye re li Dios, “at inYucuaˈ.” ⁷ Joˈcan ut anakcuan ma̱cuaˈex chic lokˈbil mo̱s. La̱ex ban chic ralal li Dios. Ut xban nak la̱ex chic ralal li Dios, te̱re̱chani ajcuiˈ li yechiˈinbil reheb li ralal xcˈajol xban nak joˈcan quiraj li Dios.

Laj Pablo yo̱ chi cˈoxlac chirixeb laj pa̱banel li cuanqueb Galacia

⁸ Nak toj ma̱jiˈ nequepa̱b chak li Dios, quelokˈoniheb li ma̱cuaˈeb tzˈakal dios ut quexcˈanjelac chak chiruheb. ⁹ Anakcuan ac xexpa̱ban ut rehex chic li Dios. ¿Cˈaˈut nak te̱raj cuiˈchic sukˈi̱c chi cˈanjelac saˈ le̱ najteril naˈleb li ma̱cˈaˈ na‑oc cuiˈ? Ut ¿cˈaˈut nak te̱raj cuiˈchic xqˈuebal e̱rib rubel xcuanquil li najter chakˈrab? ¹⁰ La̱ex yo̱quex cuiˈchic chixba̱nunquil le̱ najteril naˈleb nak nequeninkˈei eb li cutan, li po ut li chihab ut li cˈaˈak chic re ru chi ninkˈehil. ¹¹ Nachal incˈaˈux e̱ban. Ma̱re yal ma̱cˈaˈ rajbal nak xincˈanjelac saˈ e̱ya̱nk. ¹² Ex inherma̱n, usta la̱in aj judío, xcuisi cuib rubel xcuanquil li chakˈrab. Nintzˈa̱ma che̱ru nak te̱ba̱nu joˈ xinba̱nu la̱in. Me̱qˈue chic e̱rib rubel xcuanquil li chakˈrab. La̱ex ma̱cˈaˈ junak raylal xeba̱nu cue. ¹³ La̱ex nequenau nak xban nak quinyajer, quincana Galacia. Joˈcan nak quiru quinye resil li evangelio e̱re xbe̱n cua. ¹⁴ La̱in ninnau nak chˈaˈaj raj chokˈ e̱re cuilbal saˈ lin yajel. Abanan incˈaˈ xine̱tzˈekta̱na ut incˈaˈ xicˈ quine̱ril. Xine̱ril ban joˈ junak x‑ángel li Dios ut xine̱cˈul joˈ nak xecˈul raj li Jesucristo. ¹⁵ ¿Bar cuan lix sahil saˈ le̱ chˈo̱l querecˈa nak quincuan e̱riqˈuin junxil? Li Dios naxnau nak cui ta quiru xba̱nunquil, querisi raj xnakˈ le̱ ru ut queqˈue raj cue. ¹⁶ ¿Ma xicˈ chic niquine̱ril anakcuan yal xban nak xinye e̱re li xya̱lal chi joˈcanan? ¹⁷ Chanchan kˈaxal nequera eb laj balakˈ. Abanan ma̱cuaˈ usilal li teˈraj e̱riqˈuin. E̱balakˈinquil ban li teˈraj. Eb aˈan teˈraj nak te̱risi e̱rib cuiqˈuin re nak eb aˈan chic li te̱ta̱ke. ¹⁸ Us cui teˈraj e̱tenkˈanquil cui chi anchal xchˈo̱leb teˈxba̱nu. Abanan tento teˈxba̱nu chi junelic ut ma̱cuaˈ caˈaj cuiˈ nak cuanquin e̱riqˈuin. ¹⁹ Ex inherma̱n, chanchanex incocˈal nak nequexcuil. Cˈajoˈ nak nayotˈeˈ inchˈo̱l saˈ e̱cˈabaˈ la̱ex. Chanchan li raylal li naxcˈul li ixk li cua̱nc re xcˈulaˈal. Cˈajoˈ narahoˈ inchˈo̱l nak toj ma̱jiˈ nequekˈaxtesi e̱rib chi tzˈakal rubel rok rukˈ li Cristo. ²⁰ Nacuaj ta ac cuanquin e̱riqˈuin anakcuan re nak tinnau chanru tina̱tinak e̱riqˈuin. Cˈajoˈ incˈaˈux che̱rix xban nak incˈaˈ ninnau chanru cuanquex.

Lix Agar ut lix Sara

²¹ La̱ex li toj te̱raj cua̱nc rubel xcuanquil li najter chakˈrab, ¿cˈaˈut nak incˈaˈ nequeqˈue retal li cˈaˈru naxye? ²² Tzˈi̱banbil retalil nak laj Abraham quicuan cuib li ralal, jun riqˈuin li lokˈbil mo̱s ut li jun chic riqˈuin li tzˈakal rixakil. ²³ Ut li ralal laj Abraham li quicuan riqˈuin li lokˈbil mo̱s, aˈan moco yechiˈinbil ta xban li Dios. Quiyoˈla joˈ nequeˈyoˈla chixjunileb saˈ ruchichˈochˈ. Abanan li ralal li quiyoˈla riqˈuin li tzˈakal rixakil, aˈan quiyoˈla xban nak yechiˈinbil reheb xban li Dios. ²⁴ Cuan xya̱lal nak quixcˈul chi joˈcaˈin laj Abraham. Aˈan aˈin lix ya̱lal: Li cuib chi ixk, aˈaneb retalil li cuib chi contrato li quixba̱nu li Dios riqˈuineb laj Abraham ut laj Moisés. Lix Agar, li lokˈbil mo̱s, aˈan retalil li contrato quixba̱nu li Dios saˈ li tzu̱l Sinaí. Ut li toj cuanqueb rubel xcuanquil li najter chakˈrab chanchaneb li lokˈbil mo̱s joˈ li ralal xcˈajol lix Agar. ²⁵ Lix Agar, aˈan retalil li tzu̱l Sinaí li cuan Arabia. Aˈan ajcuiˈ retalil li tenamit Jerusalén. Ut eb laj Jerusalén chanchaneb li lokˈbil mo̱s nak cuanqueb, xban nak toj cuanqueb rubel xcuanquil li najter chakˈrab. ²⁶ Abanan lix Sara, aˈan retalil li Jerusalén li cuan saˈ choxa. Ut la̱o ralal xcˈajol aˈan. ²⁷ Joˈcaˈin tzˈi̱banbil saˈ li Santil Hu:

²⁸ Ex inherma̱n, la̱o joˈ laj Isaac. La̱o chic ralal xcˈajol li Dios xban li cˈaˈru quiyechiˈi̱c re laj Abraham xban li Dios. ²⁹ Najter li alalbej li quiyoˈla riqˈuin li mo̱s, aˈan quirahobtesin re li alalbej li quiyoˈla xban xcuanquil li Santil Musikˈej. Ut chalen anakcuan joˈcan ajcuiˈ nacˈulman. ³⁰ Aban, ¿cˈaˈru naxye saˈ li Santil Hu? Naxye chi joˈcaˈin: Isi li lokˈbil mo̱s rochben lix yum xban nak li alalbej aˈan incˈaˈ naru natzˈak lix jun cablal li yucuaˈbej. Aˈ ban li alalbej li quiyoˈla riqˈuin li tzˈakal ixakilbej, aˈan li ta̱e̱chani̱nk re. ³¹ Joˈcan ut, ex inherma̱n, la̱o ma̱cuaˈo ralal xcˈajol li lokˈbil mo̱s. La̱o ban ralal xcˈajol li tzˈakal ixakilbej.

Me̱qˈue chic e̱rib rubel xcuanquil li najter naˈleb

5  Ma̱cuaˈo chic joˈ li lokˈbil mo̱s xban nak moco cuanco ta chic rubel xcuanquil li najter chakˈrab. Libre ban chic cuanco xban nak li Cristo quicoloc ke chiru xcuanquil li najter chakˈrab. Chexcua̱nk ut chi cau e̱chˈo̱l saˈ le̱ pa̱ba̱l ut me̱qˈue chic e̱rib rubel xcuanquil li chakˈrab. ² La̱in laj Pablo. Qˈuehomak retal li yo̱quin chixyebal e̱re. Cui toj nequecˈul li circuncisión re nak ta̱ti̱cobresi̱k e̱chˈo̱l, aˈan naraj naxye nak ma̱cˈaˈ na‑oc cuiˈ che̱ru li Cristo. ³ Jun sut chic ninchˈolob li xya̱lal che̱ru. Li ani naxcˈul li circuncisión re nak ta̱ti̱cobresi̱k xchˈo̱l, tento nak tixba̱nu chixjunil li naxye saˈ li najter chakˈrab. ⁴ La̱ex li nequeraj xti̱cobresinquil e̱chˈo̱l chiru li Dios riqˈuin xba̱nunquil li naxye saˈ li chakˈrab, nequerisi e̱rib riqˈuin li Cristo ut nequerisi ajcuiˈ e̱rib riqˈuin li rusilal li Dios. ⁵ Abanan la̱o yo̱co chiroybeninquil lix ti̱cobresinquil kachˈo̱l chiru li Dios riqˈuin xpa̱banquil li Cristo xban nak joˈcan quicˈutbesi̱c chiku xban li Santil Musikˈej. ⁶ Cui la̱o reho chic li Jesucristo, ma̱cˈaˈ naxye cui takacˈul li circuncisión malaj ut incˈaˈ. Li kˈaxal tento xba̱nunquil, aˈan xpa̱banquil li Jesucristo. Ut cui ya̱l nak nakapa̱b li Cristo, ta̱cˈutu̱nk li kapa̱ba̱l xban nak nocorahoc. ⁷ Us nak quetiquib chak pa̱ba̱nc junxil. ¿Ani xtacchiˈin e̱re nak incˈaˈ chic yo̱quex chixpa̱banquil li ya̱l? ⁸ Li tacchiˈ aˈan incˈaˈ nachal riqˈuin li Dios li quisicˈoc e̱ru. ⁹ Usta yal caˈchˈin li levadura li nachˈamobresin naqˈueman, aˈan naxchˈamobresi chixjunil li kˈem. ¹⁰ La̱in cau inchˈo̱l saˈ xcˈabaˈ li Ka̱cuaˈ Jesucristo nak la̱ex moco jalan ta le̱ cˈaˈux chiru lin cˈaˈux la̱in. Li ani yo̱ chi poˈoc ru le̱ pa̱ba̱l tixcˈul xtojbal xma̱c aˈ yal ani. ¹¹ Cui ta toj yo̱quin chixjulticanquil nak tento xcˈulbal li circuncisión incˈaˈ raj chic tineˈxrahobtesi. Cui ta toj yo̱quin chixba̱nunquil aˈan, yo̱quin raj risinquil xcuanquil xcamic li Cristo chiru li cruz ut incˈaˈ raj chic teˈjoskˈok saˈ inbe̱n. ¹² Li ani yo̱queb chi poˈoc ru le̱ pa̱ba̱l ut yo̱queb chixyebal nak tento xcˈulbal li circuncisión, us raj cui teˈxcˈul eb aˈan ut teˈxset raj ribeb chi junaj cua re nak teˈxcanab chˈiˈchˈiˈi̱nc saˈ e̱ya̱nk. ¹³ Ex inherma̱n, la̱ex sicˈbil e̱ru re nak libre chic cua̱nkex. Abanan moco xban ta nak libre chic cuanquex nak tex‑oc chixba̱nunquil li naxrahi ru le̱ chˈo̱l. Chera ban e̱rib ut chetenkˈa e̱rib chi ribil e̱rib. ¹⁴ Chixjunil li chakˈrab natauman ru riqˈuin xba̱nunquil li jun aˈin: Chara la̱ cuas a̱cui̱tzˈin joˈ nak nacara a̱cuib la̱at. ¹⁵ Ut cui yo̱quex chixjoskˈinquil e̱rib ut yo̱quex chixrahobtesinquil e̱rib, chexcˈoxlak caˈchˈinak. Ma̱re anchal te̱poˈ ru le̱ pa̱ba̱l chi ribil e̱rib.

Chikacanabak kib rubel xcuanquil li Santil Musikˈej

¹⁶ Li nacuaj xyebal e̱re, aˈan aˈin: Checanabak e̱rib rubel xcuanquil li Santil Musikˈej re nak aˈan ta̱beresi̱nk e̱re. Cui te̱ba̱nu aˈan, incˈaˈ chic te̱ba̱nu li incˈaˈ us li nequerahi ru xba̱nunquil. ¹⁷ Li cˈaˈru incˈaˈ us li nakarahi ru xba̱nunquil kajunes, aˈan xicˈ na‑ileˈ xban li Santil Musikˈej. Ut li cˈaˈru us li naxrahi chokˈ ke li Santil Musikˈej, aˈan incˈaˈ naxcˈam rib riqˈuin li nakaj xba̱nunquil kajunes. Xicˈ nequeˈril rib chi ribil rib ut xban aˈan incˈaˈ nakaba̱nu li us li nakaj raj xba̱nunquil. ¹⁸ Ut cui la̱ex beresinbilex xban li Santil Musikˈej, moco cuanquex ta chic rubel xcuanquil li najter chakˈrab. ¹⁹ Cutan saken cˈaˈru li incˈaˈ us li naka‑rahi ru xba̱nunquil kajunes. Aˈan eb aˈin: muxuc caxa̱r, coˈbe̱tac yumbe̱tac, ut li xuta̱nalil naˈleb, ²⁰ lokˈoni̱nc yi̱banbil dios, tu̱lac, xi̱qˈuil u̱chi̱nc, pletic, cakali̱nc, joskˈi̱nc, yoˈoba̱nc ra xi̱cˈ, cuechˈij ib, poˈoc ru pa̱ba̱l, ²¹ socue̱nc, camsi̱nc ras ri̱tzˈin, cala̱c, num cuaˈac num ucˈac, ut cˈaˈak chic re ru joˈ eb aˈin. Yo̱quin cuiˈchic xyebal e̱re aˈin, usta ac inyehom ajcuiˈ e̱re, nak li nequeˈba̱nun re li cˈaˈak re ru aˈin incˈaˈ teˈre̱chani lix nimajcual cuanquilal li Dios. ²² Abanan li cˈaˈru naxqˈue li Santil Musikˈej saˈ li kayuˈam, aˈan li rahoc, sahil chˈo̱lejil, tuktu̱quil usilal, cuyuc, cha̱bilal, usilal, ti̱quil chˈo̱lej, ²³ tu̱lanil ut cuyuc ib. Ma̱cˈaˈ junak chakˈrab naxye nak incˈaˈ us xba̱nunquil aˈin. ²⁴ Li ani re chic li Jesucristo, chanchan nak quiqˈueheˈ chiru cruz lix najter naˈleb xban nak ac xcanab xba̱nunquil chi junaj cua li najter naˈleb li quixrahi ru xba̱nunquil junxil. ²⁵ Cui acˈ chic li kayuˈam qˈuebil ke xban li Santil Musikˈej, chikacanabak kib rubel xcuanquil re nak aˈan chic ta̱beresi̱nk ke. ²⁶ Mikaba̱nu kib nak kˈaxal nim kacuanquil ut incˈaˈ chic chikajoskˈi kib ut incˈaˈ chic chikacakali kib.

Chikatenkˈa kib chi kibil kib chixnumsinquil li chˈaˈajquilal

6  Ex inherma̱n, ma̱re cuan junak e̱rech aj pa̱banelil ta̱oc cuiˈchic chi ma̱cobc. La̱ex li cuanquex chic rubel xcuanquil li Santil Musikˈej te̱tenkˈa saˈ tu̱lanil re nak ta̱cacuu̱k xchˈo̱l saˈ xpa̱ba̱l. Ut cheqˈuehak retal chi us le̱ yuˈam re nak la̱ex incˈaˈ tex‑a̱le̱k. ² Chetenkˈahak e̱rib chi ribil e̱rib chixnumsinquil li chˈaˈajquilal nachal saˈ e̱be̱n. Chi joˈcan yo̱kex chixba̱nunquil li cˈaˈru taklanbilex cuiˈ xban li Jesucristo. ³ Li ani naxcˈoxla nak nim xcuanquil xjunes rib, li jun aˈan yo̱ chixbalakˈinquil rib xjunes. ⁴ Li junju̱nk chixqˈuehak retal li cˈaˈru naxba̱nu. Cui us li naxba̱nu, chisahokˈ xchˈo̱l riqˈuin li cˈaˈru naxba̱nu ut incˈaˈ ta̱cˈoxlak chirix li naxba̱nu li jun chic. ⁵ Tenebanbil saˈ xbe̱n li junju̱nk rilbal chanru lix yuˈam. ⁶ Li ani yo̱ chixtzolbal li ra̱tin li Dios, tento ajcuiˈ nak tixtenkˈa li ani yo̱ chi tzoloc re. ⁷ Me̱balakˈi e̱rib. Li Dios incˈaˈ naru xbalakˈinquil. Li cˈaˈru narau li junju̱nk, aˈan ajcuiˈ li tixkˈol. ⁸ Joˈcan ajcuiˈ saˈ li kayuˈam. Li ani naxba̱nu li incˈaˈ us li naxrahi ru xba̱nunquil xjunes rib, li jun aˈan ta̱sachk. Abanan li ani naxba̱nu li cˈaˈru naraj li Santil Musikˈej, li jun aˈan ta̱cua̱nk xyuˈam chi junelic. ⁹ Joˈcan nak mextitzˈ chixba̱nunquil li us. Cui incˈaˈ nachˈinan kachˈo̱l nak ta̱cuulak xkˈehil la̱o take̱chani li kakˈajca̱munquil. ¹⁰ Joˈcan ut chikaba̱nuhak usilal reheb chixjunileb li kas ki̱tzˈin nak toj naru xba̱nunquil, ut kˈaxal cuiˈchic takaba̱nu reheb li kech aj pa̱banelil.

Laj Pablo naxqˈue xcuanquil xcamic li Cristo chiru li cruz

¹¹ Anakcuan riqˈuin cuukˈ yo̱quin chi tzˈi̱bac e̱riqˈuin. Ilomak xni̱nkal li letra li yo̱quin chixtzˈi̱banquil re nak te̱nau nak la̱in xintzˈi̱ban re. ¹² Eb li nequeˈraj xminbal e̱ru xcˈulbal li circuncisión yo̱queb chixba̱nunquil aˈan re xnimobresinquil ribeb. Yo̱queb chixba̱nunquil aˈan xban nak incˈaˈ nequeˈraj teˈrahobtesi̱k saˈ xcˈabaˈ xcamic li Jesucristo chiru li cruz. ¹³ Ma̱ jun reheb li nequeˈcˈuluc re li circuncisión nequeˈxba̱nu ta chi tzˈakal li naxye saˈ li najter chakˈrab. Abanan eb aˈan teˈraj nak la̱ex te̱cˈul li circuncisión ut nequeˈxmin e̱ru chixcˈulbal. Cui te̱ba̱nu li cˈaˈru nequeˈxye, teˈxnimobresi ribeb xban nak teˈxcˈoxla nak cuan xcuanquileb saˈ e̱be̱n. ¹⁴ Aˈut la̱in ma̱ jokˈe tinnimobresi cuib injunes. Li cˈaˈru ninnimobresi xcuanquil la̱in, aˈan lix camic li Ka̱cuaˈ Jesucristo chiru li cruz. Saˈ xcˈabaˈ lix camic li Cristo, camenak chic lix naˈleb li ruchichˈochˈ chicuu, ut chanchan nak camenakin la̱in chiru li ruchichˈochˈ. ¹⁵ Usta takacˈul li circuncisión, usta incˈaˈ, ma̱cˈaˈ chic na‑oc cuiˈ chiku xban nak reho chic li Jesucristo. Li kˈaxal lokˈ aˈan li acˈ yuˈam li naxqˈue ke li Dios. ¹⁶ Aˈ taxak li tuktu̱quilal ut li uxta̱na̱nc u chicua̱nk e̱riqˈuin la̱ex li nequexpa̱ban re li xya̱lal li yo̱quin chixyebal. La̱ex li tzˈakal ralal xcˈajol li Dios. ¹⁷ Ut chirix chixjunil aˈin ma̱ ani ta chic chichˈiˈchˈiˈi̱nk cue xban nak cuan retalil chicuix li rahobtesi̱c li quincˈul saˈ xcˈabaˈ li Ka̱cuaˈ Jesús. ¹⁸ Ex inherma̱n, aˈ taxak li rusilal li Ka̱cuaˈ Jesucristo chicua̱nk e̱riqˈuin che̱junilex. Joˈcan taxak.