Beginning

Li Xcab Hu li Quixtzˈi̱ba li San Pablo reheb laj Corinto

Xqˈuebal xsahileb xchˈo̱l

1  La̱in laj Pablo. Sicˈbil cuu xban li Dios chokˈ x‑apóstol li Jesucristo xban nak joˈcan quiraj li Dios. Cuochben laj Timoteo li kech aj pa̱banelil. Yo̱quin chixtzˈi̱banquil li hu aˈin e̱riqˈuin la̱ex aj pa̱banel li cuanquex saˈ li tenamit Corinto ut reheb ajcuiˈ chixjunileb laj pa̱banel li cuanqueb saˈ chixjunil li naˈajej Acaya. ² Chicua̱nk taxak e̱riqˈuin li usilal ut li tuktu̱quilal li nachal chak riqˈuin li Dios li kaYucuaˈ ut riqˈuin li Ka̱cuaˈ Jesucristo.

Laj Pablo nabantioxin chiru li Dios

³ Lokˈoninbil taxak li Dios lix Yucuaˈ li Ka̱cuaˈ Jesucristo. Li Dios, aˈan li kaYucuaˈ ut junelic naruxta̱na ku ut naxcˈojob kachˈo̱l. ⁴ Naxcˈojob kachˈo̱l saˈ chixjunil li karaylal re nak ta̱ru̱k takacˈojob xchˈo̱leb li cuanqueb saˈ raylal. Joˈ nak naxcˈojob kachˈo̱l li Dios la̱o, joˈcan ajcuiˈ nak takacˈojob xchˈo̱leb li cuanqueb saˈ raylal. ⁵ Joˈ nak nocotzˈakon riqˈuin li qˈuila raylal li quixcˈul li Cristo, joˈcan ajcuiˈ nak nacˈojoba̱c kachˈo̱l xban li Cristo, re nak naru takacˈojob xchˈo̱leb li kech aj pa̱banelil. ⁶ La̱o nocorahobtesi̱c re nak la̱ex texcolekˈ ut ta̱cˈojoba̱k e̱chˈo̱l. Naxcˈojob kachˈo̱l li Dios re nak la̱o takacˈojob e̱chˈo̱l la̱ex nak yo̱quex chixcuybal xnumsinquil li raylal joˈ li nakacuy la̱o. ⁷ La̱o nakanau nak cau e̱chˈo̱l saˈ le̱ pa̱ba̱l. Nakanau nak te̱cˈul li raylal joˈ yo̱co chixcˈulbal la̱o. Abanan nakanau ajcuiˈ nak ta̱cˈojoba̱k e̱chˈo̱l nak yo̱kex chixcˈulbal li raylal joˈ nak nacˈojoba̱c kachˈo̱l la̱o. ⁸ Ex inherma̱n, nacuaj nak te̱nau joˈ qˈuial li raylal xkacˈul saˈ li naˈajej Asia. Kˈaxal ra xkacˈul chak ut xkacˈoxla nak incˈaˈ chic takacuy xnumsinquil. La̱o xkacˈoxla nak incˈaˈ chic toeˈxcanab chi yoˈyo. ⁹ Xkacˈoxla nak ac tenebanbil ca̱mc saˈ kabe̱n. Us ajcuiˈ nak quikacˈul chi joˈcan re nak cua̱nk xcacuilal kachˈo̱l riqˈuin li Dios li nacuaclesin re li camenak chi yoˈyo ut incˈaˈ takacˈoxla nak cuan xcacuilal kachˈo̱l kajunes kib. ¹⁰ Li Dios, aˈan li quicoloc chak ke chiru li ca̱mc nak corahobtesi̱c. Ut nakanau chi tzˈakal nak aˈan ta̱colok ke chi junelic. ¹¹ Abanan nakatzˈa̱ma ajcuiˈ che̱ru nak junelic textijok chikix. Cui nabaleb li nequeˈtijoc chikix, nabaleb ajcuiˈ li teˈbantioxi̱nk chiru li Dios nak torosobtesi. ¹² Kˈaxal nasahoˈ kachˈo̱l xban nak nakanau nak saˈ ti̱quilal nococuan saˈ ruchichˈochˈ. Ut chi anchal kachˈo̱l xocuan saˈ ti̱quilal nak xocuan e̱riqˈuin la̱ex. Moco xban ta nak cuan kanaˈleb kajunes la̱o nak cuanco saˈ ti̱quilal. Li Dios ban natenkˈan ke riqˈuin lix nimal ruxta̱n. ¹³ Moco saˈ jaljo̱quil ru a̱tin ta nintzˈi̱bac e̱riqˈuin. Tzˈakal re ru li nintzˈi̱ba. Nacuaj nak te̱tau ru chi tzˈakal li nintzˈi̱ba e̱riqˈuin chicuix la̱in. ¹⁴ Cuan tana li xetau ru ut cuan tana incˈaˈ. Abanan nacuaj nak te̱tau ru chi tzˈakal nak la̱in x‑apóstol li Jesucristo re nak sahak saˈ e̱chˈo̱l cuiqˈuin nak tol‑e̱lk li Jesucristo ut sahak ajcuiˈ inchˈo̱l la̱in e̱riqˈuin la̱ex. ¹⁵ Caˈ sut raj xincˈoxla numecˈ e̱riqˈuin xban nak ninnau nak xine̱cˈul raj chi sa saˈ e̱chˈo̱l. Joˈcan nak xinnumeˈ raj e̱riqˈuin nak xinchal arin Macedonia. ¹⁶ Ut nincˈoxla numecˈ e̱riqˈuin nak tinsukˈi̱k. Ut ninnau nak tine̱tenkˈa la̱ex chi xic aran Judea. ¹⁷ ¿Cˈaˈru nequecˈoxla chirix aˈin? ¿Ma incˈaˈ ta biˈ nincˈoxla chi us li cˈaˈru ninye? ¿Ma yal xcab rix inchˈo̱l ta biˈ li cˈaˈru yo̱quin chixba̱nunquil? ¿Ma ho̱n ta biˈ ninye us ut junpa̱t chic tinye incˈaˈ joˈ nequeˈxba̱nu li ma̱jiˈ nequeˈxpa̱b li Cristo? ¹⁸ Li Dios naxnau nak incˈaˈ yo̱quin chix‑yebal e̱re us cui nacuecˈa nak incˈaˈ ta̱ru̱k tinba̱nu. ¹⁹ Li Jesucristo li Ralal li Dios ma̱ jun sut quixye us cui aˈan naxnau nak incˈaˈ tixba̱nu. Aˈan junelic ya̱l li cˈaˈru naxye. Ut la̱in cuochbeneb laj Silvano ut laj Timoteo nakachˈolob xya̱lal li Cristo che̱ru la̱ex. ²⁰ Chixjunil li yechiˈinbil ke xban li Dios, nakacˈul saˈ xcˈabaˈ li Jesucristo. Joˈcan nak saˈ xcˈabaˈ li Jesucristo nakaye “joˈcan taxak” re xqˈuebal xlokˈal li Dios. ²¹ Saˈ xcˈabaˈ li Jesucristo, li Dios naxqˈue xcacuilal kachˈo̱l saˈ li kapa̱ba̱l la̱o joˈ ajcuiˈ la̱ex. Ut aˈan ajcuiˈ quisicˈoc chak ku re nak tocˈanjelak chiru. ²² Ut li Dios quixtakla chak li Santil Musikˈej chi cua̱nc kiqˈuin chokˈ retalil nak reho chic. Xban nak li Santil Musikˈej cuan kiqˈuin, nakanau chi ya̱l nak takacˈul chixjunil li quixyechiˈi ke. ²³ La̱in incˈaˈ xcuaj e̱kˈusbal. Joˈcan nak incˈaˈ xco̱in e̱riqˈuin aran Corinto. Li Dios naxnau nak ya̱l li yo̱quin chixyebal. ²⁴ Moco yo̱co ta xminbal e̱ru saˈ le̱ pa̱ba̱l. Ac cau e̱chˈo̱l saˈ le̱ pa̱ba̱l. Yo̱co ban che̱tenkˈanquil re nak sahak e̱chˈo̱l saˈ le̱ pa̱ba̱l.

2  Joˈcan nak xincˈoxla nak toj ma̱jiˈ chic tinxic e̱riqˈuin xban nak incˈaˈ nacuaj xqˈuebal xrahil e̱chˈo̱l. ² Cui inma̱c la̱in nak ta̱rahokˈ e̱chˈo̱l, ¿ani ta chic ta̱qˈuehok xsahil inchˈo̱l la̱in xban nak caˈaj cuiˈ la̱ex nequeqˈue xsahil inchˈo̱l? Cui ta xincuulac e̱riqˈuin xinqˈue raj xrahil e̱chˈo̱l. ³ Joˈcan nak xintzˈi̱ba li hu li xintakla e̱riqˈuin. Incˈaˈ xco̱in e̱riqˈuin xban nak incˈaˈ xcuaj xrahoˈ inchˈo̱l e̱ban la̱ex li xeqˈue raj xsahil inchˈo̱l. Ninnau nak nasahoˈ ajcuiˈ e̱chˈo̱l la̱ex cui sa saˈ inchˈo̱l la̱in. ⁴ Nak xintzˈi̱bac e̱riqˈuin xinyotˈeˈ ut xinya̱bac xban nak xrahoˈ saˈ inchˈo̱l. Incˈaˈ xintzˈi̱bac e̱riqˈuin re xqˈuebal xrahil e̱chˈo̱l. Re ban nak te̱nau nak kˈaxal raro̱quex inban.

Checuyak xma̱c li quixba̱nu li incˈaˈ us

⁵ Li ani quixqˈue xrahil inchˈo̱l xban li incˈaˈ us quixba̱nu, moco caˈaj cuiˈ la̱in ta quixqˈue xrahil inchˈo̱l. Quixqˈue aj ban cuiˈ xrahil e̱chˈo̱l la̱ex. Aban ma̱re cuan ajcuiˈ incˈaˈ quirahoˈ xchˈo̱l xban. Abanan ninnau nak cuan ajcuiˈ queˈrahoˈ xchˈo̱l xban. Incˈaˈ nacuaj xkˈusbal chi kˈaxal cau. ⁶ Tzˈakal lix kˈusbal li yo̱ chixcˈulbal e̱riqˈuin. ⁷ Us cui te̱cuy xma̱c anakcuan ut te̱cˈojob xchˈo̱l xban nak naru nachˈinan cuiˈchic xchˈo̱l. ⁸ Nintzˈa̱ma che̱ru nak checˈutak chiru nak nequera. ⁹ Xban aˈan nak xintzˈi̱bac e̱riqˈuin junxil. Ut xintzˈi̱bac ajcuiˈ xban nak nacuaj xnaubal ma te̱ba̱nu chixjunil li cˈaˈru ninye e̱re. ¹⁰ Cui te̱cuy xma̱c aˈan la̱in tincuy ajcuiˈ xma̱c. Li ani te̱cuy xma̱c la̱ex, tincuy ajcuiˈ xma̱c la̱in. Cui ani nincuy xma̱c, aˈan ninba̱nu re e̱tenkˈanquil ajcuiˈ la̱ex. Ut li Cristo naxnau nak ninba̱nu chi anchal inchˈo̱l. ¹¹ Takacuy xma̱c re nak laj tza incˈaˈ ta̱numta̱k saˈ kabe̱n xban nak chikajunilo ac nakanau nak aˈan cuan xnaˈleb chi balakˈic.

Laj Pablo ra saˈ xchˈo̱l xban nak ma̱ ani laj Tito aran Troas

¹² Nak quincuulac saˈ li tenamit Troas chi cˈanjelac chiru li Ka̱cuaˈ, kˈaxal queˈxqˈue xchˈo̱l chirabinquil nak quinchˈolob xya̱lal li colba‑ib saˈ xcˈabaˈ li Jesucristo. ¹³ Abanan nak quincuulac Troas quirahoˈ inchˈo̱l xban nak ma̱ ani aran li kaherma̱n Tito chixyebal cue chanru cuanquex. Joˈcan nak quinchakˈrabiheb ut quincˈulun arin saˈ li naˈajej Macedonia.

La̱o taklanbilo xban li Dios chixchˈolobanquil xya̱lal chirix li Jesucristo

¹⁴ Nakabantioxi re li Dios xban nak yalak bar nocoxic li Cristo nacˈamoc be chiku ut naxqˈue kacuanquilal chi e̱lc chi us riqˈuin chixjunil. Nak nakachˈolob xya̱lal li Cristo, chanchan xbo̱c li sununquil ban li naxic yalak bar. ¹⁵ Chanchano li sununquil ban li quixmayeja li Cristo chiru li Dios. Lix bo̱c nacuulac riqˈuineb li nequeˈcoleˈ ut nacuulac ajcuiˈ riqˈuineb li nequeˈsach. ¹⁶ Chiruheb li nequeˈsach chanchan xchuhil li camenak li nacamsin. Abanan chiruheb li nequeˈcoleˈ chanchan jun sununquil ban li naqˈuehoc yuˈam. ¿Ani tzˈakal cuan xnaˈleb chixchˈolobanquil li xya̱lal li colba‑ib? ¹⁷ Caˈaj cuiˈ la̱o li taklanbilo xban li Dios. Chi anchal kachˈo̱l nococˈanjelac chiru li Dios saˈ xcˈabaˈ li Cristo xban nak reho chic. Moco juntakˈe̱to ta riqˈuineb li jun chˈol chic li incˈaˈ nequeˈxqˈue xlokˈal li ra̱tin li Dios. Chanchaneb aj yaconel nak nequeˈxsicˈ xtumineb riqˈuin xyebal li ra̱tin li Dios.

Li xya̱lal chirix li acˈ contrato

3  ¿Ma yo̱quin ta biˈ chixnimobresinquil cuib nak nequecˈoxla la̱ex nak ninye nak la̱in aj cˈanjel chiru li Dios? ¿Ma tento ta biˈ nak cua̱nk li kahu joˈ nequeˈxba̱nu li jun chˈo̱l chic re xyebal resil aniheb re nak te̱pa̱b li cˈaˈru nequeˈxye? ¿Ma naru ta biˈ takapatzˈ li kahu e̱re la̱ex? ² La̱ex chanchanex li kahu tzˈi̱banbil saˈ li kachˈo̱l ut chixjunileb naru teˈril. Nak teˈril le̱ cha̱bilal teˈxqˈue retal nak cha̱bil li kacˈanjel. ³ Le̱ yuˈam la̱ex chanchan jun li hu tzˈi̱banbil xban li Cristo. Ut la̱o xkachˈolob li xya̱lal che̱ru. Li hu aˈin moco tzˈi̱banbil ta chiru pec chi moco tzˈi̱banbil ta riqˈuin tinta. Tzˈi̱banbil ban saˈ le̱ ra̱m xban lix Musikˈ li yoˈyo̱quil Dios. ⁴ Naru nakaye aˈin xban nak cau kachˈo̱l riqˈuin li Dios saˈ xcˈabaˈ li Jesucristo. ⁵ Ma̱ jun cˈanjel naru nakayoˈob kajunes, chi moco naru nakacˈoxla xba̱nunquil. Li Dios ban naxqˈue kacuanquil chixba̱nunquil li cˈaˈru nakaba̱nu. ⁶ Li Dios naxqˈue kacuanquilal chixchˈolobanquil li xya̱lal li acˈ contrato, li natauman cuiˈ li acˈ yuˈam. Li acˈ yuˈam incˈaˈ natauman riqˈuin xba̱nunquil li cˈaˈru tzˈi̱banbil saˈ li chakˈrab xban nak li chakˈrab naxteneb li ca̱mc saˈ kabe̱n. Li acˈ yuˈam qˈuebil ke xban li Santil Musikˈej. ⁷ Li chakˈrab li quiqˈueheˈ re laj Moisés tzˈi̱banbil chiru pec ut quicˈutun xlokˈal li Dios nak quixqˈue li chakˈrab aˈin. Quilemtzˈun li riloba̱l laj Moisés ut eb laj Israel incˈaˈ queˈxcuy rilbal usta junpa̱t ajcuiˈ quicuan saˈ li riloba̱l laj Moisés lix lokˈal li Dios. Li najter chakˈrab aˈin li quicˈamoc chak re li ca̱mc saˈ kabe̱n quicˈulun riqˈuin xlokˈal li Dios. ⁸ Abanan kˈaxal numtajenak cuiˈchic xlokˈal li cˈanjel li naxba̱nu kiqˈuin li Santil Musikˈej. ⁹ Cui cuan xlokˈal li najter chakˈrab li quicˈamoc chak li tojba ma̱c saˈ kabe̱n, kˈaxal cuiˈchic numtajenak xlokˈal li acˈ yuˈam li naxqˈue ke li Santil Musikˈej li naqˈuehoc xti̱quilal li kachˈo̱l chiru li Dios. ¹⁰ Li chakˈrab cuan xlokˈal junxil. Abanan incˈaˈ naxtau xlokˈal li acˈ yuˈam xban nak numtajenak cuiˈchic xlokˈal. ¹¹ Cui cuan xlokˈal li najter chakˈrab li quinumeˈ xcuanquil, kˈaxal cuiˈchic nim xlokˈal li acˈ yuˈam li cuan chi junelic. ¹² Xban nak nakanau nak lix lokˈal li acˈ yuˈam ma̱cˈaˈ rosoˈjic, joˈcan nak kˈaxal cau kachˈo̱l chixchˈolobanquil li xya̱lal ut ma̱cˈaˈ nakamuk che̱ru. ¹³ Incˈaˈ nakaba̱nu joˈ quixba̱nu laj Moisés najter nak quixtzˈap li riloba̱l riqˈuin tˈicr re nak eb laj Israel incˈaˈ teˈril nak yo̱ chi e̱lc lix lokˈal. ¹⁴ Xban xcacuilal xchˈo̱leb incˈaˈ queˈxtau ru nak lix lokˈal li najter chakˈrab ta̱e̱lk. Ut chalen anakcuan incˈaˈ ajcuiˈ nequeˈxtau ru. Chanchan nak li tˈicr aˈan toj yo̱ chi ramoc chiruheb li xya̱lal nak nequeˈrabi li najter chakˈrab. Ut li tˈicr aˈan na‑el caˈaj cuiˈ riqˈuin xpa̱banquil li Cristo. ¹⁵ Chalen anakcuan nak nequeˈrabi lix chakˈrab laj Moisés, chanchan nak junak tˈicr naramoc re li xya̱lal chiruheb ut incˈaˈ nequeˈxtau ru. ¹⁶ Abanan li tˈicr aˈan na‑el nak junak tixpa̱b li Ka̱cuaˈ Jesucristo. ¹⁷ Ut li Ka̱cuaˈ, aˈan ajcuiˈ li Santil Musikˈej. Li ani cuan li Santil Musikˈej riqˈuin, aˈan moco cuan ta chic rubel xcuanquil li chakˈrab chi moco li ma̱c. Libre ban chic cuan. ¹⁸ La̱o aj pa̱banel moco tzˈaptzˈo ta li kiloba̱l riqˈuin tˈicr re xtzˈapbal xlokˈal li Dios joˈ quixba̱nu laj Moisés. Chanchano ban jun lem nak nakacˈut xlokˈal li Ka̱cuaˈ. Ut li Ka̱cuaˈ aˈan ajcuiˈ li Santil Musikˈej li nocoxjalanobresi ut naxqˈue kalokˈal re nak yo̱ko xcˈutbal xlokˈal li Cristo.

Li cˈanjel qˈuebil ke xban li Dios kˈaxal lokˈ

4  Yal xban rusilal li Dios nak quixqˈue ke li cˈanjel aˈin re xchˈolobanquil xya̱lal li acˈ contrato. Joˈcan nak incˈaˈ nachˈinan kachˈo̱l. ² Nakatzˈekta̱na chi junaj cua xba̱nunquil li ma̱usilal li moco uxc ta naraj li nequeˈxba̱nu li jun chˈol chic. Incˈaˈ nocobalakˈin. Ut incˈaˈ nakapoˈ ru li ra̱tin li Dios. Nakachˈolob ban chi tzˈakal li xya̱lal re nak chixjunileb teˈxqˈue retal nak saˈ xya̱lal cuanco chiru li Dios. ³ Cui incˈaˈ natauman ru li xya̱lal li colba‑ib li nakachˈolob la̱o, aˈ li incˈaˈ nequeˈxtau ru, aˈan eb li nequeˈsach. ⁴ Incˈaˈ nequeˈxtau ru xban nak laj tza naramoc re lix ya̱lal chiruheb li incˈaˈ nequeˈpa̱ban. Naxba̱nu aˈan re nak incˈaˈ teˈxtau ru li xya̱lal li colba‑ib li nacˈutuc chiku lix lokˈal li Cristo, ut lix lokˈal li Dios. ⁵ Incˈaˈ yo̱co chixchˈolobanquil che̱ru nak la̱o toe̱pa̱b. Yo̱co ban chixchˈolobanquil xya̱lal nak li Jesucristo aˈan li Ka̱cuaˈ. Ut la̱o yal aj cˈanjelo che̱ru saˈ xcˈabaˈ li Jesucristo. ⁶ Nak toj kˈojyi̱n chak ru li ruchichˈochˈ, li Dios quixye, “Chicua̱nk li cutan re xcutanobresinquil ru li ruchichˈochˈ.” Ut aˈan ajcuiˈ li nacutanobresin re li kacˈaˈux re nak naru takanau chanru lix lokˈal li Dios. Ut li Jesucristo naxcˈut chiku lix lokˈal li Dios. ⁷ La̱o chanchano li chˈochˈ ucˈal li naxocman cuiˈ li terto xtzˈak. La̱o yal tzˈejcualo. Abanan li Dios naxcutanobresi li kacˈaˈux re nak ta̱cˈutu̱nk nak lix nimajcual cuanquilal li Dios li cuan kiqˈuin, moco ke ta. Re ban li Dios.

Cauhak kachˈo̱l saˈ li kapa̱ba̱l re nak takacuy xnumsinquil li raylal nakacˈul

⁸ Qˈuila pa̱y chi raylal nachal saˈ kabe̱n, abanan nakacuy xnumsinquil. Cuan nak incˈaˈ nakatau ru li yo̱co chixcˈulbal abanan incˈaˈ nachˈinan kachˈo̱l. ⁹ Nocorahobtesi̱c, abanan li Dios incˈaˈ nocoxcanab kajunes. Cuan nak nocoeˈxsacˈ xban nak nequeˈraj kacamsinquil. Abanan li Dios nacoloc ke chiruheb. ¹⁰ Yalak bar nocoxic cuan ketalil chiru li katibel nak nequeˈxyal kacamsinquil joˈ queˈxba̱nu re li Cristo. Nakacuy aˈan re nak ta̱cˈutu̱nk chiruheb chixjunileb nak li Cristo yoˈyo ut aˈan nacoloc ke chiru li ca̱mc. ¹¹ Junelic nequeˈraj kacamsinquil xban nak nococˈanjelac chiru li Jesucristo. Abanan incˈaˈ nocoeˈxcamsi xban nak li Cristo yoˈyo ut cuan xcuanquil saˈ kabe̱n usta yal cui̱nko. ¹² Abanan xban nak nakacuy li raylal, la̱ex ta̱cua̱nk le̱ yuˈam chi junelic. ¹³ Cau kachˈo̱l saˈ li kapa̱ba̱l. Joˈcaˈin tzˈi̱banbil saˈ li Santil Hu li quixye laj David. “Cuan inpa̱ba̱l. Joˈcan nak nina̱tinac chirix”, chan. Joˈcan ajcuiˈ la̱o, cuan ajcuiˈ kapa̱ba̱l. Joˈcan nak nocoa̱tinac chirix. ¹⁴ Nakanau nak li Dios quicuaclesin cuiˈchic re chi yoˈyo li Ka̱cuaˈ Jesucristo. Joˈcan ajcuiˈ la̱o. Nakanau nak toxcuaclesi cuiˈchic chi yoˈyo joˈ nak quixcuaclesi li Jesucristo ut toxcˈam riqˈuin kochbenakex la̱ex. ¹⁵ Chixjunil li raylal nakacˈul, aˈan re e̱ra̱bal la̱ex re nak te̱cˈul li rusilal li Dios. Cui nabaleb teˈcˈuluk re li rusilal li Dios, nabaleb ajcuiˈ teˈbantioxi̱nk chiru li Dios ut teˈxqˈue xlokˈal. ¹⁶ Joˈcan nak incˈaˈ nachˈinan kachˈo̱l. Li katibel yo̱ chi lajc, yo̱ chi osocˈ. Abanan li ka̱m acˈobresinbil rajlal cutan xban li Dios. ¹⁷ Li raylal li nakacˈul arin saˈ ruchichˈochˈ, aˈan junpa̱t ajcuiˈ ut nakacuy xnumsinquil. Li raylal nakacˈul, yo̱ chikacauresinquil re jun li kalokˈal ma̱cˈaˈ joˈ xchakˈal ru ut ta̱cua̱nk chi junelic. ¹⁸ Incˈaˈ nakaqˈue kachˈo̱l chirix li cuan arin saˈ ruchichˈochˈ, li na‑ilman ru. Nakaqˈue ban kachˈo̱l chirix li cuan aran saˈ choxa, li incˈaˈ na‑ilman ru. Li cˈaˈru na‑ilman ru nalaj na‑osoˈ. Abanan li incˈaˈ na‑ilman ru cuan chi junelic.