Beginning

Li Hu reheb laj Hebreo

Li Cˈajolbej naxcutanobresi chiku li xlokˈal li Acuabej Dios

1  Najter kˈe cutan li Ka̱cuaˈ Dios qˈuila sut quixtaklaheb chak li profeta chixyebal li ra̱tin riqˈuineb li kaxeˈto̱nil yucuaˈ. Quixsiqˈui xya̱lal chanru nak tixchˈolob xya̱lal chiruheb. ² Aban anakcuan ma̱cuaˈeb chic li profeta nequeˈyehoc re li ra̱tin li Dios. Aˈ chic li Dios Cˈajolbej. Saˈ xcˈabaˈ aˈan, li Dios quixyi̱b li ruchichˈochˈ ut chixjunil li cˈaˈak re ru cuan. Chixjunil li quixyi̱b quicana saˈ rukˈ li Dios Cˈajolbej. ³ Li Ralal li Dios, aˈan nacutanobresin re lix lokˈal li Acuabej Dios. Ut aˈan ajcuiˈ nacˈutuc chiku chanru lix naˈleb. Li Ralal li Dios, aˈan nacu̱tun re li ruchichˈochˈ riqˈuin lix cuanquilal li ra̱tin xban nak aˈan yal re saˈ xbe̱n li ruchichˈochˈ. Ut nak ac xmayeja rib re risinquil li kama̱c, li Ralal li Dios co̱ saˈ choxa ut quicˈojla saˈ xnim ukˈ li Dios Acuabej, li kˈaxal nim xcuanquil.

Li Dios Cˈajolbej kˈaxal nim xcuanquil chiruheb li ángel

⁴ Li cuanquil quiqˈueheˈ re kˈaxal nim cuiˈchic chiru xcuanquileb li ángel xban nak aˈan li Ralal li Dios. Lix cˈabaˈ quiqˈueheˈ xban li Acuabej Dios, aˈan kˈaxal lokˈ cuiˈchic chiru lix cˈabaˈeb li ángel. ⁵ Nakanau nak kˈaxal lokˈ xban nak li Dios ma̱ jun cua quixye re junak ángel:

¹⁴ Incˈaˈ quixye aˈan reheb li ángel xban nak li ángel yal musikˈejeb chi cˈanjelac chiru li Dios. Li Dios nataklan chak reheb chixtenkˈanquileb li teˈe̱chani̱nk re li colba‑ib.

Li colba‑ib kˈaxal lokˈ

2  Xban nak li Cristo kˈaxal lokˈ chiruheb li ángel, joˈcan nak takaqˈue kachˈo̱l chixpa̱banquil li cˈaˈru xkabi, re nak incˈaˈ ta̱sachk saˈ kachˈo̱l lix ya̱lal. ² Li esilal yebil xbaneb li ángel tzˈakal ya̱l ut eb li incˈaˈ queˈpa̱ban ut eb li queˈxkˈet li chakˈrab, queˈxcˈul xtojbal xma̱queb joˈ xcˈulubeb. ³ Cui eb aˈan queˈxcˈul xtojbal xma̱c, ¿chan put ru nak tocolekˈ la̱o chiru li tojba ma̱c cui nakatzˈekta̱na li lokˈlaj colba‑ib li quixyechiˈi ke li Ka̱cuaˈ Jesucristo? Li Jesucristo quixyechiˈi ke li kacolbal kˈaxal lokˈ. Ut chirix aˈan, eb li queˈabin re li ra̱tin, aˈan eb ajcuiˈ queˈchˈoloban lix ya̱lal chiku. ⁴ Li Dios quixcˈut chiku nak tzˈakal ya̱l aˈan riqˈuineb li retalil ut li milagro li quilajxba̱nu riqˈuin lix nimal xcuanquilal. Ut naxcˈut ajcuiˈ chiku nak ya̱l xban nak naxqˈue li Santil Musikˈej reheb li junju̱nk. Joˈcan nak ac xma̱tan xma̱tan li junju̱nk joˈ naraj li Dios.

Li Ka̱cuaˈ Jesucristo quitzˈejcualoˈ re kacolbal

⁵ Yo̱co chi a̱tinac chirix li acˈ ruchichˈochˈ li ta̱cha̱lk. Li Dios incˈaˈ quixqˈue xcuanquileb li ángel re nak teˈtakla̱nk saˈ xbe̱n aˈan. ⁶ Joˈcaˈin tzˈi̱banbil saˈ li Santil Hu:

Ut nak li Dios quixqˈue chixjunil li cˈaˈak re ru rubel xcuanquil li cui̱nk, ma̱cˈaˈ cuan incˈaˈ ta napa̱ban chiru. Aˈut anakcuan toj ma̱jiˈ nakil nak chixjunil li cˈaˈak re ru cuan nequeˈpa̱ban chiru. ⁹ Abanan nakaqˈue retal chanru nak li Jesucristo quinima̱c ru ut quiqˈueheˈ xlokˈal. Usta quicubsi̱c xcuanquil jarubak cutan chiruheb li ángel, nak quitzˈejcualoˈ, quiqˈueheˈ xlokˈal xban li raylal quixcˈul nak quicam saˈ kacˈabaˈ la̱o. Xban lix nimal rusilal li Dios, li Jesucristo quicam re xcolbal chixjunileb li cuanqueb saˈ ruchichˈochˈ. ¹⁰ Riqˈuin xcˈulbal li raylal, li Jesucristo quitzˈakobresi̱c ru chiru li Dios. Li Ka̱cuaˈ Dios quiyi̱ban re chixjunil li cˈaˈak re ru. Xban aˈan nak aˈ li Dios yal re saˈ xbe̱n. Joˈcan nak quixtakla chak li Jesucristo chi xcˈulbal li raylal ut quicam re xtojbal rix li kama̱c. Ut aˈan ajcuiˈ laj cˈamol be chiruheb li ralal xcˈajol li teˈtzˈako̱nk saˈ lix lokˈal. ¹¹ La̱o nocosantobresi̱c xban li Ka̱cuaˈ Jesucristo. La̱o ut li Jesucristo junaj ajcuiˈ li kachoxahil Yucuaˈ. Xban aˈan li Jesucristo incˈaˈ naxuta̱na̱c chixyebal nak la̱o lix herma̱n. ¹² Quixye chi joˈcaˈin:

¹⁴ Ya̱l nak la̱o ut li Jesucristo junaj li kachoxahil Yucuaˈ. Li Jesucristo quitzˈejcualoˈ joˈ la̱o. Quicuan xquiqˈuel. Quicuan xbakel ut xtibel. Li Jesucristo quicam. Riqˈuin lix camic, li Ka̱cuaˈ Jesucristo quixsach xcuanquil laj tza, xban nak saˈ xcˈabaˈ laj tza nak cuan li ca̱mc. ¹⁵ Chalen chak saˈ kayoˈlajic, nakaxucua ru li ca̱mc. Aban riqˈuin lix camic li Ka̱cuaˈ Jesucristo quirisi li kaxiu chiru li ca̱mc. ¹⁶ Relic chi ya̱l li Ka̱cuaˈ Jesucristo incˈaˈ quichal chixtenkˈanquileb li ángel. Quichal ban chixtenkˈanquileb li ralal xcˈajol laj Abraham. (Ut la̱o ajcuiˈ ralal xcˈajol laj Abraham, xban nak nakapa̱b li Cristo.) ¹⁷ Xban nak li Jesucristo quicˈulun chixtenkˈanquileb li cuanqueb saˈ ruchichˈochˈ tento nak quitzˈejcualoˈ joˈ eb lix herma̱n. Chi ya̱l nak quitzˈejcualoˈ re nak ta̱ruxta̱na ku ut tixtoj rix li kama̱c. Li Jesucristo aˈan lix yucuaˈil aj tij chi cˈanjelac chiru li Dios. ¹⁸ Li Ka̱cuaˈ Jesucristo quixcˈul li raylal ut quiyaleˈ ra̱lenquil. Aban, incˈaˈ quixqˈue rib chi a̱le̱c. Joˈcan nak nim xcuanquil chixtenkˈanquileb li nequeˈyaleˈ ra̱lenquil.

Kˈaxal nim xcuanquil li Ka̱cuaˈ Jesucristo chiru xcuanquil laj Moisés

3  Ex herma̱n, la̱ex sicˈbil e̱ru xban li Dios chokˈ ralal xcˈajol. Cheqˈuehak e̱chˈo̱l chixcˈoxlanquil li Jesucristo. Aˈan li quitakla̱c chak xban li Dios chi cˈanjelac joˈ xyucuaˈil aj tij saˈ li kapa̱ba̱l. ² Li Jesucristo quipa̱ban chi tzˈakal chiru li Dios li quixakaban chak re chi cˈanjelac joˈ xyucuaˈil aj tij. Ut laj Moisés quipa̱ban ajcuiˈ chiru li Dios nak quicˈanjelac chi cˈamoc be chiruheb laj Israel. ³ Abanan li Jesucristo numtajenak cuiˈchic xlokˈal chiru xlokˈal laj Moisés. Li Jesucristo, aˈan chanchan jun aj cablanel. Li ani nayi̱ban junak cab, aˈan kˈaxal nim xcuanquil saˈ xbe̱n usta kˈaxal cha̱bil li cab li naxyi̱b. ⁴ Li junju̱nk chi ochoch cuan ani nayi̱ban re; aˈut li quiyi̱ban re chixjunil li cˈaˈak re ru cuan, aˈan li Ka̱cuaˈ Dios. ⁵ Relic chi ya̱l nak laj Moisés quipa̱ban chiru li Dios ut quicˈamoc be chiruheb laj Israel. Quixchˈolob xya̱lal li cˈaˈru ta̱cˈulma̱nk mokon. Laj Moisés yal aj cˈanjel chiru li Dios. ⁶ Aban li Ka̱cuaˈ Jesucristo, aˈan tzˈakal Ralal li Dios ut cuan xcuanquil chi takla̱nc saˈ xbe̱neb li ralal xcˈajol li Dios. La̱o li ralal xcˈajol li Dios cui caˈaj cuiˈ riqˈuin li Dios nocoyoˈonin ut cauhak kachˈo̱l saˈ li kapa̱ba̱l toj saˈ rosoˈjic li cutan.

Naru to‑oc chi hila̱nc riqˈuin li Dios

¹² Ex herma̱n, cheqˈuehak retal nak ma̱ jun taxak saˈ e̱ya̱nk incˈaˈ tixpa̱b li Dios xma̱c lix ma̱usilal. Ma̱re anchal tixtzˈekta̱na li yoˈyo̱quil Dios. ¹³ Cheqˈuehak ban e̱naˈleb che̱ribil e̱rib rajlal cutan nak toj naru xba̱nunquil. Chetenkˈa e̱rib che̱ribil e̱rib re nak ma̱ jun ta̱balakˈi̱k xban li ma̱c, xban nak li nabalakˈi̱c xban li ma̱c incˈaˈ chic naraj xba̱nunquil li cˈaˈru naraj li Dios. ¹⁴ Totzˈako̱nk riqˈuin xlokˈal li Jesucristo cui nakaqˈue kachˈo̱l chixpa̱banquil. Chanru nak xkatiquib chak xpa̱banquil li Ka̱cuaˈ, joˈcan taxak toj chalen saˈ rosoˈjic li cutan. ¹⁵ Joˈcaˈin tzˈi̱banbil saˈ li Santil Hu li quixye li Dios:

¹⁶ ¿Aniheb li queˈkˈetoc chak re li ra̱tin li Dios li quixye reheb? Aˈaneb chixjunileb li queˈel chak Egipto nak laj Moisés quicˈamoc be chiruheb. ¹⁷ ¿Ani saˈ aj be̱n quijoskˈoˈ li Dios chiru li caˈcˈa̱l chihab? Saˈ xbe̱neb li queˈma̱cob ut queˈcam saˈ li chaki chˈochˈ. ¹⁸ Ut, ¿aniheb aj e quixye li Dios nak relic chi ya̱l incˈaˈ teˈoc chi hila̱nc riqˈuin saˈ li cha̱bil naˈajej? Reheb li queˈkˈetoc re lix chakˈrab. ¹⁹ Ut relic chi ya̱l xbaneb lix kˈetba a̱tin, incˈaˈ queˈoc chi hila̱nc saˈ li cha̱bil naˈajej.

4  Li Dios toj yo̱ ajcuiˈ chixyechiˈinquil li oc chi hila̱nc saˈ li cha̱bil naˈajej. Abanan chikaba̱nu cue̱nt re nak ma̱ jun taxak saˈ kaya̱nk incˈaˈ ta̱oc saˈ li hiloba̱l aˈan. ² La̱o xkabi resil li colba‑ib joˈ nak queˈrabi resil najter. Abanan ma̱cˈaˈ qui‑oc cuiˈ reheb nak queˈrabi xban nak incˈaˈ queˈpa̱ban. ³ Xban nak la̱o xkapa̱b li Dios, to‑oc chi hila̱nc riqˈuin saˈ li cha̱bil naˈajej. Li Dios quia̱tinac chirixeb li kaxeˈto̱nil yucuaˈ nak quixye: Nak quichal injoskˈil, quinye nak relic chi ya̱l ma̱ jokˈe teˈoc chi hila̱nc cuiqˈuin. Quixye aˈan us ta ac chˈolchˈo nak cuan li naˈajej re hila̱nc chalen nak li Dios quixrak lix cˈanjel nak quixyi̱b li ruchichˈochˈ. ⁴ Tzˈi̱banbil saˈ li Santil Hu chirix li xcuuk li cutan li naxye chi joˈcaˈin: Ut li Dios quixrak lix cˈanjel ut quihilan saˈ xcuuk li cutan. ⁵ Ut tzˈi̱banbil ajcuiˈ saˈ li Santil Hu chirixeb li incˈaˈ queˈpa̱ban: Incˈaˈ teˈoc chi hila̱nc cuiqˈuin. ⁶ Queˈrabi li ra̱tin li Dios najter ut cuan li incˈaˈ queˈoc chi hila̱nc riqˈuin xban nak incˈaˈ queˈpa̱ban. Aban li ani napa̱ban anakcuan toj naru ta̱oc chi hila̱nc riqˈuin. ⁷ Najter cuanqueb laj Israel incˈaˈ queˈpa̱ban. Ut nak ac xnumeˈ qˈuila chihab, li Dios quixyechiˈi cuiˈchic li hiloba̱l nak quia̱tinac riqˈuin laj David. Ut laj David quixtzˈi̱ba li quiyeheˈ re li naxye chi joˈcaˈin: Anakcuan cherabi taxak li cua̱tin ut me̱cacuubresi le̱ chˈo̱l, chan. ⁸ Eb li queˈpa̱ban saˈ xya̱nkeb laj Israel queˈoc chi hila̱nc saˈ li naˈajej Canaán nak laj Josué quicˈamoc be chiruheb. Abanan ma̱cuaˈ aˈan li tzˈakal naˈajej re hila̱nc chi junelic. Cui ta aˈan li tzˈakal hiloba̱l, incˈaˈ raj chic quixye li Dios nak toj naru to‑oc chi hila̱nc riqˈuin. ⁹ Joˈcan nak toj cuan li lokˈlaj naˈajej re hila̱nc reheb li nequeˈpa̱ban re li Dios. ¹⁰ Li ani ac x‑oc chi hila̱nc riqˈuin li Dios, aˈan ac xhilan chi tzˈakal, joˈ nak li Dios quihilan nak quixrak lix cˈanjel. ¹¹ Chikaqˈuehak kachˈo̱l chixpa̱banquil li Dios re nak to‑oc chi hila̱nc riqˈuin. Ma̱ ani taxak ke incˈaˈ ta̱oc xban xkˈetba a̱tin joˈ queˈxba̱nu chak junxil nak incˈaˈ queˈpa̱ban. ¹² Li ra̱tin li Dios yoˈyo ut kˈaxal nim xcuanquil. Chanchan jun chˈi̱chˈ caˈ pacˈal xkˈesnal. Riqˈuin lix nimal xcuanquil, li ra̱tin li Dios nacuulac toj saˈ xchamal li ka̱m. Ut naxcˈutbesi chiku chanru li kanaˈleb ut chanru li kacˈaˈux. ¹³ Ma̱ ani naru tixmuk rib chiru li Dios xban nak aˈan quiyi̱ban re chixjunil li cˈaˈak re ru cuan. Cutan saken chiru li Dios li kayehom kaba̱nuhom. Ma̱cˈaˈ mukmu chiru li Dios li toxkachˈolob cuiˈ kayehom kaba̱nuhom.

Li Ka̱cuaˈ Jesucristo, aˈan tzˈakal xyucuaˈil aj tij

¹⁴ Li Ka̱cuaˈ Jesucristo, li Ralal li Dios, aˈan lix yucuaˈil aj tij chokˈ ke. Quitakeˈ saˈ choxa ut cuan chak riqˈuin li Dios Acuabej. Yo̱ chak chi oque̱nc chikix chiru li Dios. Joˈcan nak cauhak taxak kachˈo̱l saˈ li kapa̱ba̱l. ¹⁵ Li Jesucristo aˈan xyucuaˈil aj tij chokˈ ke la̱o. Naxtokˈoba ku xban nak naxnau nak moco kˈaxal cau ta li kachˈo̱l. Nak quicuan arin saˈ ruchichˈochˈ, li Jesucristo quiyaleˈ ra̱lenquil joˈ nak nayaleˈ ka̱lenquil la̱o. Aban li Jesucristo incˈaˈ quima̱cob. ¹⁶ Chotijok chi anchal kachˈo̱l chiru li nimajcual Dios. Aˈan ta̱ril xtokˈoba̱l ku ut riqˈuin xnimal rusilal toxtenkˈa nak cua̱nko saˈ junak raylal.

5  Saˈ xya̱nkeb laj judío cuanqueb xyucuaˈil aj tij. Li junju̱nk sicˈbil ru saˈ xya̱nkeb li cui̱nk chi cˈanjelac chiru li Dios. Naxtenkˈaheb li tenamit riqˈuin xqˈuebal li mayej quicˈ ut li cˈaˈak chic re ru chi mayejil re xtojbal rix lix ma̱queb. ² Li xyucuaˈil aj tij, aˈan yal cui̱nkeb joˈ la̱o. Joˈcan nak naxtokˈoba ruheb ut naxtenkˈaheb saˈ usilal li nequeˈma̱cob xban nak incˈaˈ nequeˈxnau xya̱lal li yo̱queb chixba̱nunquil. ³ Xban nak yal cui̱nk li xyucuaˈil aj tij, joˈcan nak rajlal namayejac re xtojbal rix lix ma̱c aˈan. Ut namayejac ajcuiˈ re xtojbal rix lix ma̱queb chixjunileb li tenamit. ⁴ Lix cˈanjel li xyucuaˈil aj tij kˈaxal lokˈ, aban ma̱ jun naxyoˈob xcˈanjel yal xjunes rib. Eb aˈan sicˈbil ruheb xban li Dios. Li Dios naxxakabeb chi cˈanjelac joˈ nak quixakaba̱c laj Aarón najter. ⁵ Joˈcan ajcuiˈ li Jesucristo. Moco yal xjunes ta quixxakab rib chi cˈanjelac chokˈ xyucuaˈil aj tij. Aban li Dios quiqˈuehoc re lix lokˈal ut quixqˈue chi cˈanjelac nak quixye re: At cualal, anakcuan xinqˈue a̱cuanquil. ⁶ Quiyeheˈ cuiˈchic re xban li Dios joˈ naxye saˈ li Santil Hu: La̱at aj tij chi junelic joˈ nak quicuan laj Melquisedec. ⁷ Nak li Jesucristo quicuan arin saˈ ruchichˈochˈ quiya̱bac nak quitijoc. Chi cau xya̱b xcux quitzˈa̱man chiru li Dios, li cuan xcuanquil chi coloc re chiru li ca̱mc. Ut li Dios quirabi lix tij xban nak quixkˈaxtesi rib re xba̱nunquil lix cˈanjel li Dios. ⁸ Usta Ralal li Dios li Jesucristo, quixcˈul ajcuiˈ li raylal ut quixcˈut chiku chanru li pa̱ba̱nc riqˈuin li raylal quixcˈul. ⁹ Riqˈuin li raylal li quixcˈul li Jesucristo quitzˈakobresi̱c ru chi cˈanjelac chokˈ xyucuaˈil aj tij. Ut saˈ xcˈabaˈ aˈan cuan li colba‑ib chi junelic reheb li teˈpa̱ba̱nk re. ¹⁰ Li Dios quixxakab li Jesucristo chokˈ xyucuaˈil aj tij joˈ nak quicuan laj Melquisedec.

Kˈaxal xiu xiu chokˈ ke cui ta̱cuiba̱nk li kachˈo̱l

¹¹ Toj cuan raj chic nabal naraj chˈoloba̱c xya̱lal che̱ru chirix aˈin. Abanan chˈaˈaj xchˈolobanquil xya̱lal xban nak incˈaˈ chic nequeraj rabinquil. ¹² Anakcuan la̱ex raj chic aj tzolonel xban nak ac junxil nequexpa̱ban. Abanan ta̱raj toj ta̱cˈutekˈ cuiˈchic che̱ru li ac xetzol chak junxil nak xepa̱b chak li Dios. Chanchanex chic li cˈulaˈal li toj natuˈuc li toj ma̱jiˈ natzacan. ¹³ La̱ex nequenau nak junak cˈulaˈal toj natuˈuc toj ma̱cˈaˈ xnaˈleb. Incˈaˈ naxnau bar cuan li us ut bar cuan li incˈaˈ us. ¹⁴ Eb li che̱quel cristian jalan xtzacae̱mkeb. Moco sicˈbil ta ru li nequeˈxtzaca. Aˈan retalil nak ac xeˈqˈui saˈ xpa̱ba̱leb ut nequeˈxnau chic bar cuan li us ut bar cuan li incˈaˈ us.

6  Joˈcan nak incˈaˈ yo̱kex chi cˈoxlac junes chirix li xetzol chak saˈ xticlajic le̱ pa̱ba̱l. Toj cuan ban nabal te̱tzol chirix li Cristo re nak texqˈui̱k saˈ le̱ pa̱ba̱l. Ac nequenau nak ma̱cuaˈ riqˈuin kayehom kaba̱nuhom natauman li colba‑ib. Riqˈuin ban xpa̱banquil li Dios. ² Ac nequenau xya̱lal li cubi haˈ. Nequenau xya̱lal li xqˈuebal li kukˈ saˈ xbe̱neb laj pa̱banel. Ac nequenau nak teˈcuacli̱k cuiˈchic chi yoˈyo li camenak. Ut nequenau ajcuiˈ nak ta̱cuulak xkˈehil nak ta̱rakekˈ a̱tin chi junaj cua saˈ xbe̱neb li ma̱jiˈ nequeˈpa̱ban. ³ Anakcuan chikaqˈue kachˈo̱l chixtzolbal kib re nak toqˈui̱k saˈ li kapa̱ba̱l. Joˈcan takaba̱nu cui li Dios naxqˈue ke. ⁴ Cuanqueb li ac xeˈxtau xya̱lal. Xeˈxcˈul li rusilal li Dios. Xeˈxcˈul li Santil Musikˈej. ⁵ Nequeˈxnau nak ya̱l li ra̱tin li Dios. Ac xeˈtzˈakon caˈchˈin riqˈuin lix cuanquil li acˈ ruchichˈochˈ li ta̱cha̱lk. ⁶ Cuan li ac xeˈtzˈakon riqˈuin li rusilal li Dios ut nequeˈxtzˈekta̱na chirix xchˈo̱l. Chanchan nak yo̱queb cuiˈchic chixqˈuebal chiru cruz li Jesucristo, li Ralal li Dios. Yo̱queb chixqˈuebal chi hobecˈ ut chi seˈe̱c xbaneb li tenamit. Eb aˈan incˈaˈ chic naru teˈyotˈekˈ xchˈo̱l ut incˈaˈ chic teˈxjal xcˈaˈux xban nak yo̱queb chixtzˈekta̱nanquil li Jesucristo. ⁷ Li ani naxba̱nu li naxye li ra̱tin li Dios, aˈan chanchan li chˈochˈ narucˈ li haˈ. Cha̱bil li acui̱mk na‑el chiru ut nacˈanjelac re laj acuinel. Li chˈochˈ aˈan osobtesinbil xban li Dios. Li ani naxba̱nu li naraj li Dios osobtesinbil xban li Dios. ⁸ Aban li ani incˈaˈ naxba̱nu re li naxye li ra̱tin li Dios, aˈan chanchan li chˈochˈ junes qˈuix ut yibru pim na‑el chiru; ma̱cˈaˈ na‑oc cuiˈ li chˈochˈ aˈan. Li ani incˈaˈ naxba̱nu li naraj li Dios, tzˈekta̱nanbileb xban li Dios ut cˈatbil nak teˈosokˈ.

Li Cristo nocoxtenkˈa re nak incˈaˈ ta̱chˈina̱nk li kachˈo̱l

⁹ Ex inherma̱n, usta xkaye chi joˈcan, ninnau nak la̱ex moco joˈcanex ta chic anakcuan. Cha̱bil chic le̱ naˈleb xban nak colbilex. ¹⁰ Li Dios ti̱c xchˈo̱l. Naxnau chanru le̱ cˈanjel. Li Dios naxnau nak nequera aˈan. Nacˈutun ajcuiˈ nak nequera li Dios xban nak xetenkˈa le̱ rech aj pa̱banel junxil ut toj yo̱quex ajcuiˈ chixtenkˈanquileb anakcuan. Incˈaˈ nasach saˈ xchˈo̱l li Dios le̱ cˈanjel li nequeba̱nu. ¹¹ Takaj nak che̱junju̱nkalex te̱qˈue e̱chˈo̱l chixba̱nunquil li usilal chalen toj saˈ rosoˈjic le̱ yuˈam. Chi joˈcan te̱cˈul chi tzˈakal le̱ kˈajca̱munquil li yechiˈinbil e̱re xban li Dios. ¹² Incˈaˈ nakaj nak te̱cuiba e̱chˈo̱l. Cheba̱nu ban joˈ nequeˈxba̱nu li nequeˈpa̱ban chi anchal xchˈo̱l. Incˈaˈ nequeˈtitzˈ. Nequeˈxcuy ut nequeˈre̱chani li yechiˈinbil xban li Dios. ¹³ Ma̱cˈaˈ junak mas nim xcuanquil chiru li Dios. Joˈcan nak li Dios quixpatzˈ xcˈabaˈ chi ribil rib nak quixyechiˈi li rosobtesinquil laj Abraham. ¹⁴ Quixye re: Relic chi ya̱l tatcuosobtesi ut tinqˈue chi qˈuia̱nc la̱ cualal a̱cˈajol. ¹⁵ Joˈcan nak laj Abraham najt quixcuy roybeninquil ut incˈaˈ quititzˈ toj retal quixcˈul lix ma̱tan quiyechiˈi̱c re xban li Dios. ¹⁶ Nak na‑uxman li juramento napatzˈman xcˈabaˈ junak li kˈaxal nim xcuanquil re nak nachˈola ru li ya̱l ut narakeˈ ajcuiˈ li cuechˈi̱nc ib. ¹⁷ Joˈcan nak li Dios quixyechiˈi li ma̱tan riqˈuin juramento. Quiraj xcˈutbal chiruheb li teˈe̱chani̱nk re nak tzˈakal ya̱l li yo̱ chixyebal. Ut incˈaˈ tixjal ru li ra̱tin. ¹⁸ Joˈcan utan nak li cuib chi naˈleb aˈin incˈaˈ naru xjalbal ru. Aˈaneb aˈin: xbe̱n, nak li Dios quixyechiˈi li ma̱tan; ut xcab, nak quixba̱nu li juramento. Riqˈuin aˈan nakanau nak li Dios incˈaˈ naticˈtiˈic. Joˈcan nak cauhak taxak li kachˈo̱l. La̱o xkasicˈ li kacolbal riqˈuin li Dios ut nakanau nak take̱chani li quixyechiˈi ke. Aˈan li nakayoˈoni. ¹⁹ Nakayoˈoni nak takacˈul li junelic yuˈam. Aˈan naxqˈue xcacuil li kachˈo̱l joˈ nak li ancla naxchap li jucub chiru li haˈ. Cau rib ut incˈaˈ na‑ecˈan saˈ xnaˈaj. Xban nak nakapa̱b li Jesucristo, cuanco chi sum a̱tin riqˈuin li Dios. ²⁰ Li Jesucristo ac xco̱ saˈ li santil choxa chi jaloc a̱tin chikix. Aˈan laj cˈamol be chiku. Li Jesucristo, aˈan tzˈakal xyucuaˈil aj tij chi junelic joˈ nak quicuan laj Melquisedec.