Beginning

Acˈ chic li katzˈejcual takacˈul saˈ choxa

5  Li katzˈejcual arin saˈ ruchichˈochˈ chanchan jun li ochoch li na‑osoˈ. La̱o nakanau nak li katzˈejcual arin saˈ ruchichˈochˈ na‑osoˈ. Abanan ta̱cua̱nk chic jun katzˈejcual saˈ choxa li tixqˈue ke li Dios. Moco joˈ ta li ochoch arin saˈ ruchichˈochˈ li na‑osoˈ xban nak yi̱banbil xban cui̱nk. Li katzˈejcual aran saˈ choxa incˈaˈ ta̱osokˈ. Cua̱nk ban chi junelic. ² Nak cuanco saˈ li tzˈejcualej aˈin, noco‑ayaynac ut nakaj ta ac xkatau li katzˈejcual saˈ li choxa li tixqˈue ke li Dios. ³ Ma̱cuaˈako musikˈej chi ma̱cˈaˈ li katzˈejcual. Ta̱cua̱nk ban li katzˈejcual li tixqˈue ke li Dios. ⁴ Nak cuanco arin saˈ ruchichˈochˈ riqˈuin li katzˈejcual aˈin, noco‑ayaynac xban li raylal nakacˈul. Incˈaˈ raj chic nakaj li katzˈejcual li na‑osoˈ. Ma̱cuaˈ xban nak nakaj ca̱mc. Xban nak nakaj ta ac xkatau li katzˈejcual saˈ choxa li ta̱cua̱nk chi junelic. ⁵ Aˈ li Dios aˈan li coxcauresi re nak naru takacˈul li katzˈejcual saˈ choxa. Ut quixqˈue ke li Santil Musikˈej re nak takanau chi tzˈakal nak takacˈul li cˈaˈru naxyechiˈi ke. ⁶ Joˈcan nak junelic cau kachˈo̱l riqˈuin li Dios nak cuanco saˈ ruchichˈochˈ. Nakanau nak joˈ najtil cuanco saˈ ruchichˈochˈ, moco cuanco ta chak riqˈuin li Ka̱cuaˈ Jesucristo saˈ choxa. ⁷ Nak yoˈyo̱co arin saˈ ruchichˈochˈ, toj ma̱jiˈ nakil ru li Ka̱cuaˈ. Abanan cau kachˈo̱l nak li Ka̱cuaˈ cuan kiqˈuin. ⁸ La̱in ninye nak cau kachˈo̱l riqˈuin li Dios. Nakaj raj ca̱mc ut xcanabanquil li katzˈejcual aˈin re nak naru toxic saˈ choxa chi cua̱nc riqˈuin li Ka̱cuaˈ Jesucristo. ⁹ Joˈcan nak junelic nakaqˈue kachˈo̱l chixba̱nunquil li cˈaˈru naraj li Ka̱cuaˈ usta cuanco arin saˈ ruchichˈochˈ malaj saˈ li Santil Choxa. ¹⁰ Nakanau nak chikajunilo toxkacˈut kib chiru li Cristo re nak aˈan ta̱rakok a̱tin saˈ kabe̱n. Ut li junju̱nk tixcˈul lix kˈajca̱munquil aˈ yal chanru lix yehom xba̱nuhom nak xcuan saˈ ruchichˈochˈ, ma us malaj incˈaˈ us quixba̱nu.

Chocua̱nk chi sum a̱tin riqˈuin li Dios

¹¹ Joˈcan nak nakaxucua ru li Dios ut nakaqˈue kachˈo̱l chixchˈolobanquil lix ya̱lal. Ut li Dios naxnau chi tzˈakal nak ti̱c li kachˈo̱l. Ut la̱in nacuaj nak te̱nau ajcuiˈ la̱ex. ¹² Incˈaˈ yo̱quin chixyebal aˈin e̱re re xnimobresinquil cuib. Yo̱quin ban chixqˈuebal e̱naˈleb re nak ta̱sahokˈ e̱chˈo̱l cuiqˈuin ut re nak te̱nau xsumenquil li yo̱queb chixnimobresinquil rib riqˈuin lix yehom xba̱nuhomeb ut incˈaˈ nequeˈxqˈue xcuanquil li ti̱quil chˈo̱lej. ¹³ Cuan nequeˈyehoc nak incˈaˈ tuktu kajolom. Abanan li cˈaˈru nakaba̱nu, aˈan re xqˈuebal xlokˈal li Dios. Cui la̱ex nequecˈoxla nak tuktu kajolom, us, xban nak us chokˈ e̱re la̱ex li cˈaˈru nakaba̱nu. ¹⁴ Xban nak kˈaxal nocoxra li Cristo, joˈcan nak nakaqˈue kachˈo̱l chi cˈanjelac chiru. Nakanau chi tzˈakal nak li Cristo quicam saˈ kacˈabaˈ la̱o chikajunilo. Ut xban nak quicam aˈan, chikajunilo camenako chic chiru li ma̱c. ¹⁵ Quicam saˈ kacˈabaˈ chikajunilo la̱o re nak incˈaˈ yoˈyo̱ko yal chi joˈcan chixba̱nunquil li cˈaˈru nakaj kajunes kib. Yoˈyo̱ko ban re nak takaba̱nu li cˈaˈru naraj li Cristo li quicam ut quicuacli cuiˈchic chi yoˈyo saˈ kacˈabaˈ la̱o. ¹⁶ Incˈaˈ chic nakaqˈue retal chanru nak cuanqueb li junju̱nk saˈ ruchichˈochˈ. Anakcuan la̱o chic aj pa̱banel ut jalan chic li kanaˈleb. Junxil nak toj ma̱jiˈ nocopa̱ban incˈaˈ xkaqˈue xcuanquil li Cristo xban nak xkacˈoxla nak yal cui̱nk. Abanan anakcuan nakanau chic lix ya̱lal. ¹⁷ Joˈcan ut cui junak xpa̱b li Cristo, acˈobresinbil aˈan. Lix yuˈam quicuan junxil xnumeˈ ut anakcuan acˈ chic lix yuˈam. ¹⁸ Chixjunil aˈin xkama̱tani riqˈuin li Dios ut aˈan ajcuiˈ li quicˈamoc ke saˈ usilal riqˈuin saˈ xcˈabaˈ li Jesucristo. Ut aˈan ajcuiˈ li quixakaban ke chixchˈolobanquil xya̱lal li colba‑ib re nak cuan li teˈpa̱ba̱nk ut teˈcua̱nk saˈ usilal riqˈuin li Dios. ¹⁹ Aˈan aˈin li yo̱quin chixyebal: Li Dios coxcˈam cuiˈchic saˈ usilal riqˈuin saˈ xcˈabaˈ li Cristo. Ut incˈaˈ chic naxqˈue saˈ xchˈo̱l li kama̱c. Li Dios quixkˈaxtesi ke li cˈanjel aˈin re nak takachˈolob xya̱lal re nak li ani teˈpa̱ba̱nk teˈcˈamekˈ saˈ usilal riqˈuin li Dios. ²⁰ Joˈcan ut nak la̱o taklanbilo saˈ xcˈabaˈ li Jesucristo. Li Dios naxtoˈoni lix tzˈu̱mal ke re nak ta̱a̱tinak e̱riqˈuin. Saˈ xcˈabaˈ li Jesucristo nakatzˈa̱ma che̱ru nak checˈamak e̱rib saˈ usilal riqˈuin li Dios. ²¹ Li Jesucristo ma̱ jun sut quima̱cob. Abanan li Dios quixqˈue li kama̱c saˈ xbe̱n li Cristo re nak saˈ xcˈabaˈ aˈan, la̱o takatau lix ti̱quilal kachˈo̱l li naxqˈue li Dios.

6  La̱o aj cˈanjelo chiru li Dios ut aˈan natenkˈan ke chixchˈolobanquil lix ya̱lal che̱ru. La̱ex li ac xecˈul li rusilal li Dios. Nintzˈa̱ma che̱ru nak incˈaˈ te̱canab chi ma̱cˈaˈ rajbal. Cheqˈuehak ban xcuanquil. ² Joˈcaˈin tzˈi̱banbil saˈ li Santil Hu: Nak xcuulac xkˈehil, xaya̱ba incˈabaˈ ut xatcuabi. Saˈ xkˈehil xcˈulbal li colba‑ib, xatintenkˈa, chan li Dios. Joˈcan nak la̱in ninye e̱re nak anakcuan xkˈehil xcˈulbal li rusilal li Dios. Anakcuan ajcuiˈ naru texcolekˈ. ³ La̱o incˈaˈ nakaj xba̱nunquil li cˈaˈak re ru li ta̱ramok re chiruheb li ani teˈraj pa̱ba̱nc re nak ma̱ ani ta̱cuechˈok rix li cˈanjel li yo̱co chixba̱nunquil. ⁴ Chixjunil li nakaba̱nu, aˈan nacˈutuc re nak la̱o aj cˈanjelo chiru li Dios. Nakacuy xnumsinquil chixjunil li raylal, li rahobtesi̱c ut li rahil chˈo̱lejil li nakacˈul. ⁵ Xosaqˈueˈ, xoqˈueheˈ saˈ tzˈalam, xeˈxtu̱b rib saˈ kabe̱n re kacamsinquil, xkatacuasi kib chi cˈanjelac, xoyoˈlec, ut xkacuy kasaˈ xban nak ma̱cˈaˈ katzacae̱mk. ⁶ Riqˈuin aˈin nequenau nak la̱o aj cˈanjelo chiru li Dios. Saˈ ti̱quilal yo̱co chixba̱nunquil. Nakanau li xya̱lal. Nabal li raylal nakacuy ut cuanco saˈ usilal. Li Santil Musikˈej cuan kiqˈuin ut chi anchal kachˈo̱l nocorahoc. ⁷ Nakachˈolob li xya̱lal che̱ru. Chixjunil li nakaba̱nu, nakaba̱nu riqˈuin lix cuanquil li Dios. Junak li soldado cuan xchˈi̱chˈ re pletic saˈ lix nim ukˈ ut cuan xchˈi̱chˈ saˈ lix tzˈe re xcolbal rib. Ut li kachˈi̱chˈ la̱o, aˈan xti̱quilal li kachˈo̱l. ⁸ Cuan li nequeˈxqˈue kalokˈal ut cuan ajcuiˈ li nequeˈxsach kacuanquil. Cuan li nequeˈhoboc ke ut cuan ajcuiˈ li nequeˈoxlokˈin ke. Ut cuan ajcuiˈ li nequeˈyehoc re nak la̱o aj balakˈ. Abanan la̱o junelic nocoa̱tinac saˈ xya̱lal. ⁹ Cuan li nequeˈxba̱nu joˈ li incˈaˈ nequeˈxnau ku, abanan chixjunileb nequeˈxnau ku. Caˈchˈin chic ma̱ xocam, abanan toj yoˈyo̱co. Kˈaxal ra xkacˈul abanan li Dios incˈaˈ nocoxcanab chi camsi̱c. ¹⁰ Kˈaxal ra cuanco, abanan junelic sa saˈ kachˈo̱l. Nebaˈo, abanan nabal nequeˈxcˈul xbiomal nak nakachˈolob chiruheb li xya̱lal. Ma̱cˈaˈ cuan ke arin saˈ ruchichˈochˈ, abanan nakanau nak biomo xban nak cuan li rusilal li Dios kiqˈuin. ¹¹ Ex herma̱n, la̱ex li cuanquex Corinto, nequexinra. Joˈcan nak xinye e̱re chixjunil li cuan saˈ inchˈo̱l. ¹² La̱in nequexinra la̱ex, abanan la̱ex nacˈutun che̱ru nak incˈaˈ niquine̱ra. ¹³ Yo̱quin chi a̱tinac e̱riqˈuin joˈ nak naa̱tinac junak li yucuaˈbej riqˈuin li ralal xcˈajol. Nintzˈa̱ma che̱ru nak tine̱ra joˈ nak nequexinra la̱in.

Me̱lokˈoni chic li yi̱banbil dios

¹⁴ Me̱junaji e̱rib riqˈuineb li toj ma̱jiˈ nequeˈpa̱ban. ¿Ma naru ta biˈ ta̱cua̱nk saˈ comonil li ti̱quilal riqˈuin li ma̱usilal? ¿Ma naru ta biˈ ta̱cua̱nk chi sum a̱tin li santilal riqˈuin li ma̱c? ¹⁵ ¿Ma naru ta biˈ ta̱cua̱nk chi sum a̱tin li Cristo riqˈuin laj tza? ¿Ma naru ta biˈ teˈcua̱nk chi sum a̱tin laj pa̱banel riqˈuineb li toj ma̱jiˈ nequeˈpa̱ban? ¹⁶ ¿Ma xcˈulubeb ta biˈ li yi̱banbil dios nak teˈcua̱nk saˈ rochoch li yoˈyo̱quil Dios? Ma̱min ta̱ru̱k. La̱in ninye e̱re nak la̱o aj pa̱banelo, la̱o li rochoch li yoˈyo̱quil Dios. Li Dios, aˈan li quixye chi joˈcaˈin:

7  Joˈcan ut ex inherma̱n, chixjunil aˈin yechiˈinbil ke la̱o. Joˈcan nak chikacanabak chixjunil li ma̱usilal li namuxuc ru li katibel ut li ka̱m. Xban nak nakaxucua ru li Dios chikaqˈue kachˈo̱l chi cua̱nc saˈ santilal.

Laj Pablo quisahoˈ saˈ xchˈo̱l nak queˈxjal xcˈaˈuxeb laj Corinto

² Nintzˈa̱ma che̱ru nak choe̱ra. Ma̱cˈaˈ xkaba̱nu e̱re. Ma̱ ani xkaba̱nu raylal re ut ma̱ ani xkapoˈ xchˈo̱l ut ma̱ ani xkabalakˈi. ³ Incˈaˈ xinye aˈin re e̱kˈusbal. Ac xinye e̱re nak junelic nequexinra. Junelic cua̱nkex saˈ inchˈo̱l nak yoˈyo̱kin ut chalen toj saˈ lin camic. ⁴ Cau inchˈo̱l e̱riqˈuin ut nasahoˈ inchˈo̱l xyebal e̱resilal. Cˈojcˈo inchˈo̱l e̱ban. Usta yo̱quin chixcˈulbal li raylal, abanan kˈaxal sa saˈ inchˈo̱l. ⁵ Chalen kacˈulunic arin Macedonia ma̱ bar naru nocohilan. Yalak bar nocorahobtesi̱c ut nequeˈraj pletic kiqˈuin. Ut yo̱ ajcuiˈ kacˈaˈux che̱rix la̱ex. ⁶ Abanan li Dios naxcˈojob xchˈo̱leb li raheb saˈ xchˈo̱l. Ut aˈan quixqˈue xcacuilal kachˈo̱l riqˈuin lix cˈulunic laj Tito. ⁷ Moco caˈaj cuiˈ ta riqˈuin xcˈulunic laj Tito nak quisahoˈ inchˈo̱l. Riqˈuin ban ajcuiˈ rabinquil nak laj Tito sa saˈ xchˈo̱l e̱riqˈuin. Quixserakˈi ke nak la̱ex te̱raj rilbal cuu ut quixye cue nak xyotˈeˈ e̱chˈo̱l nak xrahoˈ inchˈo̱l e̱ban. Ut quixye ajcuiˈ cue nak niquine̱cˈoxla. Kˈaxal cuiˈchic quisahoˈ inchˈo̱l chirabinquil aˈan. ⁸ Usta xrahoˈ inchˈo̱l junxil nak xrahoˈ e̱chˈo̱l la̱ex xban li hu quintakla e̱riqˈuin, abanan incˈaˈ nayotˈeˈ inchˈo̱l nak quintakla xban nak ninnau nak junpa̱t ajcuiˈ xrahoˈ e̱chˈo̱l xban. ⁹ Anakcuan nasahoˈ saˈ inchˈo̱l. Moco xban ta nak xrahoˈ e̱chˈo̱l inban. Riqˈuin ban nak xyotˈeˈ e̱chˈo̱l ut xejal e̱cˈaˈux. Xecuy li raylal aˈan joˈ naraj li Dios. Anakcuan nequetau ru nak moco ra ta xkaba̱nu e̱re. ¹⁰ Cui junak narahoˈ xchˈo̱l xban li incˈaˈ us naxba̱nu, li jun aˈan naxtau lix colbal xban nak nayotˈeˈ xchˈo̱l ut naxjal xcˈaˈux joˈ naraj li Dios. Ut ma̱ ani narahoˈ xchˈo̱l xban li colba‑ib. Abanan cui junak narahoˈ xchˈo̱l xban li incˈaˈ us naxba̱nu ut incˈaˈ nayotˈeˈ xchˈo̱l, li jun aˈan incˈaˈ naxtau li colba‑ib. ¹¹ Qˈuehomak retal chanru nak xextenkˈa̱c xban nak xecuy li raylal joˈ naraj li Dios. Quixqˈue xcacuil e̱chˈo̱l saˈ le̱ pa̱ba̱l. Anakcuan nequeraj rilbal cuu ut nequeraj xpatzˈbal xcuybal le̱ ma̱c. Nachal chic e̱joskˈil ut e̱xiu xban li incˈaˈ us li nequeˈxba̱nu li cuanqueb saˈ e̱ya̱nk. Nequeraj nak laj ma̱c teˈxtoj rix lix ma̱queb. Riqˈuin chixjunil aˈin nacˈutun nak la̱ex ma̱cˈaˈ e̱ma̱c riqˈuin li cˈaˈru quicˈulman. ¹² Joˈcan ut nak xintzˈi̱ba li hu aˈan incˈaˈ xinba̱nu saˈ xcˈabaˈ li quiba̱nun ma̱usilal chi moco saˈ xcˈabaˈ li quicˈuluc raylal. Xinba̱nu ban re nak chicˈutu̱nk chiru li Dios nak cˈojcˈo e̱chˈo̱l cuiqˈuin. ¹³ Xban nak xeba̱nu li cˈaˈru xinye e̱re, quicˈojla lin chˈo̱l. Ut kˈaxal cuiˈchic nasahoˈ lin chˈo̱l riqˈuin lix sahil xchˈo̱l laj Tito e̱riqˈuin la̱ex nak xeqˈue xcacuilal xchˈo̱l. ¹⁴ Nequenau nak junelic ninye e̱re li xya̱lal. Ut incˈaˈ xincˈut inxuta̱n nak xinye re laj Tito nak la̱ex cha̱bilex xban nak x‑el ajcuiˈ chi ya̱l li cˈaˈru xinye re laj Tito nak xecˈut le̱ cha̱bilal chiru. ¹⁵ Ut laj Tito kˈaxal cuiˈchic nequexra nak najulticoˈ re chanru nak xecˈul aˈan saˈ xya̱lal ut xeqˈue xcuanquil nak xeba̱nu li cˈaˈru quixye e̱re. ¹⁶ Nacˈojla inchˈo̱l riqˈuin li cˈaˈru nequeba̱nu ut sa inchˈo̱l e̱riqˈuin.

Chosihi̱nk chi sa saˈ kachˈo̱l

8  Anakcuan, ex inherma̱n, nacuaj nak tinserakˈi e̱re chanru nak li Dios riqˈuin xnimal ruxta̱n yo̱ chixtenkˈanquileb laj pa̱banel li cuanqueb Macedonia chixba̱nunquil li usilal. ² Quiyaleˈ rix lix pa̱ba̱leb xban li qˈuila raylal xeˈxcˈul. Abanan numtajenak lix sahil xchˈo̱leb. Usta kˈaxal nebaˈeb, abanan chanchan biomeb xban nak nabal xeˈxsi re xtenkˈanquileb li rech aj pa̱banelil. ³ La̱in ninnau nak queˈxqˈue li joˈ qˈuial queˈru xqˈuebal ut toj queˈxqˈue cuiˈchic xtzˈakob chi anchaleb xchˈo̱l. ⁴ Qui‑ala saˈ xchˈo̱leb tenkˈa̱nc. Ut queˈxye ke nak chi anchaleb xchˈo̱l queˈraj xtenkˈanquileb li rech aj pa̱banelil li cuanqueb Jerusalén. ⁵ Incˈaˈ xkacˈoxla nak nabal ta teˈxqˈue. Queˈxkˈaxtesi rib chiru li Dios ut queˈxyechiˈi ajcuiˈ rib chikatenkˈanquil joˈ naraj li Dios. ⁶ Joˈcan nak xkatzˈa̱ma chiru laj Tito nak ta̱xic cuiˈchic e̱riqˈuin re nak textenkˈa xchoybal li cˈanjel xetiquib xban xcha̱bilal e̱chˈo̱l. Aˈan ajcuiˈ li quitiquiban re xxocbal li mayej aˈin. ⁷ La̱ex cau e̱chˈo̱l saˈ le̱ pa̱ba̱l. Nequenau li xya̱lal ut nequenau xchˈolobanquil li ya̱l. Nequeqˈue e̱chˈo̱l chi cˈanjelac joˈ naraj li Dios, ut nocoe̱ra. Joˈcan nak nakatzˈa̱ma che̱ru nak cheqˈue le̱ mayej chi anchal e̱chˈo̱l. ⁸ La̱in incˈaˈ yo̱quin xminbal e̱ru. Yo̱quin ban chixyebal e̱re chanru nak eb laj Macedonia nequeˈxqˈue xmayej chi anchaleb xchˈo̱l ut nacuaj ajcuiˈ xnaubal ma chi anchal e̱chˈo̱l nequexrahoc la̱ex. ⁹ La̱ex ac nequenau nak kˈaxal nim li rusilal li Ka̱cuaˈ Jesucristo. Aˈan quixcanab chak lix biomal saˈ choxa ut quicuan saˈ nebaˈil arin saˈ ruchichˈochˈ yal e̱ban la̱ex. Quixba̱nu chi joˈcaˈin yal re nak la̱ex te̱cˈul li biomal li naxqˈue li Dios. ¹⁰ Nacuaj xyebal e̱re cˈaˈru nincˈoxla chirix le̱ mayej. Us cui te̱choy xba̱nunquil li xetiquib jun haber. La̱ex li xbe̱n li queye nak textenkˈa̱nk. Ut la̱ex ajcuiˈ li xbe̱n li quetiquib xba̱nunquil. ¹¹ Joˈcan nak us cui te̱choy xba̱nunquil li xetiquib junxil. Chi anchal e̱chˈo̱l xetiquib tenkˈa̱nc. Anakcuan te̱qˈue li joˈ nimal joˈ chˈinal naxqˈue rib che̱ru. ¹² Li ani na‑ala saˈ xchˈo̱l xqˈuebal xmayej, li Dios naxcˈul lix mayej aˈ yal joˈ nimal cuan chiru. Li Dios incˈaˈ naxpatzˈ li ma̱cˈaˈ chiru. ¹³ Incˈaˈ yo̱quin chixyebal aˈin re nak li jun chˈo̱l teˈtenkˈa̱k chi nabal ut la̱ex texcana̱k chi ma̱cˈaˈ chic cuan e̱re. Nacuaj ban nak cua̱nk e̱re la̱ex ut cua̱nk ajcuiˈ reheb li jun chˈol chic re nak ma̱ ani ta̱cana̱k chi ma̱cˈaˈ cuan re. ¹⁴ Anakcuan riqˈuin li joˈ qˈuial cuan e̱re, chetenkˈaheb li ma̱cˈaˈ cuan reheb. Ma̱re saˈ jun cutan ma̱cˈaˈ cua̱nk e̱re la̱ex ut aˈan eb chic teˈtenkˈa̱nk e̱re riqˈuin li joˈ qˈuial cuan reheb aˈan. ¹⁵ Joˈcaˈin tzˈi̱banbil saˈ li Santil Hu chirix li maná li quixqˈue li Dios: Li ani quixxoc nabal, ma̱cˈaˈ qui‑elaˈan chiru. Ut li ani caˈchˈin quixxoc, quitzˈakloc ajcuiˈ chiru.

Laj Tito quitakla̱c chixtenkˈanquileb laj Corinto

¹⁶ Ninbantioxi chiru li Dios xban nak laj Tito naxqˈue xchˈo̱l che̱tenkˈanquil joˈ nak ninqˈue inchˈo̱l la̱in. ¹⁷ Quintzˈa̱ma chiru laj Tito nak ta̱xic e̱riqˈuin ut quixcˈul xchˈo̱l. Toj ma̱jiˈ ajcuiˈ nintzˈa̱ma chiru nak aˈan ac x‑ala saˈ xchˈo̱l nak ta̱xic e̱riqˈuin. ¹⁸ Yo̱co chixtaklanquil jun chic li herma̱n e̱riqˈuin rochben laj Tito. Aˈan naˈno ru xbaneb chixjunileb laj pa̱banel yalak bar xban nak cha̱bil li cˈanjel naxba̱nu re xchˈolobanquil li xya̱lal li colba‑ib. ¹⁹ Aˈan li quixakaba̱c xbaneb laj pa̱banel re ta̱xic chikix nak toxic chixcanabanquil li ma̱tan aˈin. Li ma̱tan aˈin, aˈan re xqˈuebal xlokˈal li Ka̱cuaˈ ut re nak teˈxnau li kech aj pa̱banelil nak nakaj xtenkˈanquileb. ²⁰ Yo̱co chixba̱nunquil li cˈanjel aˈin chi us re nak ma̱ ani ta̱cuechˈok rix li kacˈanjel nak toxic chixcanabanquil li nimla ma̱tan aˈin. ²¹ Nakaqˈue kachˈo̱l chixba̱nunquil li cˈaˈru us; moco caˈaj cuiˈ ta chiru li Dios. Chiruheb aj ban cuiˈ li cui̱nk. ²² Ut yo̱co chixtaklanquil jun chic li kaherma̱n chirixeb. Qˈuila cua xkaqˈue retal nak naxqˈue xchˈo̱l chixba̱nunquil li cˈaˈak re ru re xtenkˈanquil li rech aj pa̱banelil. Xban nak aˈan cau xchˈo̱l e̱riqˈuin, joˈcan nak sa xchˈo̱l chi xic e̱riqˈuin. ²³ Cui ani teˈpatzˈok chirix laj Tito, te̱ye reheb nak aˈan cuech aj cˈanjelil. Cuochben che̱tenkˈanquil. Ut eb li cuib chic chi herma̱n, aˈan taklanbileb xbaneb laj pa̱banel. Xban nak ti̱queb xchˈo̱l saˈ lix pa̱ba̱l, nequeˈxqˈue xlokˈal li Cristo. ²⁴ Nak teˈcuulak e̱riqˈuin checˈulakeb saˈ xya̱lal. Checˈut chiruheb nak nequera le̱ rech aj pa̱banelil. Chi joˈcan yalak bar ta̱qˈuehekˈ retal nak ya̱l li cha̱bil esil li xinye che̱rix.

9  Incˈaˈ tento tintzˈi̱bak e̱riqˈuin chirix li ma̱tan li te̱takla riqˈuineb laj pa̱banel aran Jerusalén. ² Ninnau nak chi anchal e̱chˈo̱l nequeraj xtenkˈanquileb. Ut xinye e̱resilal reheb laj Macedonia. Xinye chi joˈcaˈin: Laj pa̱banel li cuanqueb Acaya chalen jun haber qui‑ala saˈ xchˈo̱leb xtenkˈanquileb li rech aj pa̱banelil, chanquin reheb. Ut xban nak la̱ex yo̱quex chixqˈuebal e̱chˈo̱l chi tenkˈa̱nc eb aˈan teˈraj ajcuiˈ tenkˈa̱nc. ³ Ut yo̱quin chixtaklanquileb li herma̱n aˈin e̱riqˈuin re nak textenkˈa chixcauresinquil le̱ mayej re nak ta̱e̱lk chi ya̱l li cˈaˈru xinye che̱rix. ⁴ Cui ma̱jiˈ cauresinbil le̱ mayej nak tincuulak cuochbeneb li herma̱n aj Macedonia, te̱cˈut inxuta̱n la̱in xban nak ac xinserakˈi reheb nak cauresinbil le̱ mayej ut te̱cˈut ajcuiˈ e̱xuta̱n la̱ex. ⁵ Joˈcan nak xincˈoxla nak us xtaklanquileb li herma̱n xbe̱n cua nak toj ma̱jiˈ ninxic la̱in. Textenkˈa xcauresinquil li mayej li xeyechiˈi. Ut nak tincuulak, ac xocbilak e̱ban, re nak ta̱cˈutu̱nk nak moco minbil ta e̱ru chixqˈuebal. Xeqˈue ban xban nak nequeraj xba̱nunquil. ⁶ Cheqˈuehak retal li naˈleb aˈin: li ani caˈchˈin narau, caˈchˈin ajcuiˈ li tixkˈol. Ut li ani nabal narau, nabal ajcuiˈ tixkˈol. ⁷ Li junju̱nk tixqˈue li joˈ qˈuial ta̱ala̱k saˈ xchˈo̱l xqˈuebal. Incˈaˈ tixqˈue chi ra saˈ xchˈo̱l, chi moco minbilak ta ru xban nak li Ka̱cuaˈ naxra li ani naxqˈue chi sa saˈ xchˈo̱l. ⁸ Nim xcuanquil li Dios. Ut aˈan tixqˈue e̱re chixjunil re nak junelic ta̱tzˈaklok e̱re li cˈaˈak re ru nacˈanjelac e̱re ut re ajcuiˈ nak ta̱ru̱k textenkˈa̱nk riqˈuin chixjunil li cha̱bil cˈanjel. ⁹ Joˈcaˈin tzˈi̱banbil saˈ li Santil Hu: Li ani naxtenkˈa li nebaˈ chi anchal xchˈo̱l, lix cha̱bilal aˈan cuan chi junelic. ¹⁰ Li Dios junelic naxqˈue li iyaj re laj acuinel ut naxqˈue li kacua. Ut aˈan tixqˈue ajcuiˈ li cˈaˈru ta̱cˈanjelak ke. Ut tixqˈue re̱kaj ut tixtambresi aˈ yal chanru nocosihin. ¹¹ Li Dios junelic naxqˈue chi nabal li cˈaˈru e̱re re nak ta̱ru̱k te̱tenkˈaheb chi anchal e̱chˈo̱l li ma̱cˈaˈ cuanqueb re. Ut nabaleb ajcuiˈ li teˈbantioxi̱nk chiru li Dios riqˈuin li ma̱tan li xetakla chikix. ¹² Ma̱cuaˈ caˈaj cuiˈ xtenkˈanquileb li herma̱n yo̱quex nak nequeba̱nu li usilal aˈin. Yo̱quex ban ajcuiˈ xqˈuebal xlokˈal li Dios xban nak eb li herma̱n nequeˈbantioxin chiru li Dios e̱ban la̱ex. ¹³ Ut nequeˈxqˈue ajcuiˈ xlokˈal li Dios xban nak cau e̱chˈo̱l la̱ex saˈ le̱ pa̱ba̱l. Moco caˈaj cuiˈ ta riqˈuin nak nequeye nak nequexpa̱ban nak nacˈutun le̱ pa̱ba̱l. Nacˈutun ban ajcuiˈ xban nak nequeqˈue e̱chˈo̱l chixtenkˈanquileb li ma̱cˈaˈ cuanqueb re. Ut chi joˈcan nequetenkˈa chixjunileb laj pa̱banel. ¹⁴ Teˈxqˈue retal nak lix nimal rusilal li Dios cuan e̱riqˈuin. Joˈcan nak la̱ex raro̱quex xbaneb li herma̱n ut teˈtijok che̱rix. ¹⁵ Bantiox re li Dios nak quixqˈue ke li ma̱tan li kˈaxal numtajenak xlokˈal. Ut li ma̱tan aˈin, aˈan li Ka̱cuaˈ Jesucristo.