Beginning

Laj Melquisedec

7  Laj Melquisedec aˈan li rey re li tenamit Salem. Aˈan ajcuiˈ laj tij chiru li nimajcual Dios. Laj Melquisedec qui‑el chak chixcˈulbal laj Abraham ut quirosobtesi nak quisukˈi chak chixsachbal ruheb li rey. ² Ut li joˈ qˈuial quire̱chani chak laj Abraham saˈ li ple̱t riqˈuineb li rey, quixqˈue li junju̱nk saˈ xlaje̱tkil re laj Melquisedec. Li cˈabaˈej Melquisedec naraj naxye “rey re li ti̱quilal”. Ut li cˈabaˈej Salem naraj naxye “tuktu̱quil usilal”. Joˈcan nak laj Melquisedec, aˈan rey re li ti̱quilal ut rey re li tuktu̱quil usilal. ³ Incˈaˈ nanauman ani lix yucuaˈ laj Melquisedec chi moco lix naˈ chi moco lix xeˈto̱nil yucuaˈ. Incˈaˈ nanauman chirix lix yoˈlajic chi moco lix camic. Laj Melquisedec, aˈan retalil li Jesucristo ut aˈan laj tij chi junelic. ⁴ Qˈuehomak retal nak laj Melquisedec, kˈaxal nim xcuanquil chiru laj Abraham. Laj Abraham, aˈan xyucuaˈeb laj Israel, abanan quixqˈue re laj Melquisedec li junju̱nk saˈ xlaje̱tkil li quire̱chani chak saˈ li ple̱t. ⁵ Tzˈi̱banbil saˈ li chakˈrab li quiqˈueheˈ re laj Moisés nak eb li cristian teˈxqˈue reheb laj tij li junju̱nk saˈ xlaje̱tkil li cˈaˈru cuan reheb. Eb laj tij, aˈan eb li ralal xcˈajol laj Leví. Queˈxba̱nu chi joˈcan usta laj Abraham, aˈan lix xeˈto̱nil yucuaˈ chixjunileb, laj tij joˈqueb ajcuiˈ li cristian. ⁶ Laj Melquisedec ma̱cuaˈ xcomoneb li ralal xcˈajol laj Leví aban laj Abraham quixqˈue li junju̱nk saˈ xlaje̱tkil re laj Melquisedec. Nim xcuanquil laj Abraham xban nak ac yechiˈinbil re li rosobtesinquil xban li Dios. Aban laj Melquisedec kˈaxal nim cuiˈchic lix cuanquil. Joˈcan nak quirosobtesi laj Abraham. ⁷ Nakanau chi tzˈakal nak li na‑osobtesin, aˈan li nim xcuanquil chiru li na‑osobtesi̱c. Joˈcan nak nakanau nak nim xlokˈal laj Melquisedec chiru xlokˈal laj Abraham. ⁸ Eb laj tij aj Israel queˈxcˈul ajcuiˈ li junju̱nk saˈ xlaje̱tkil. Aˈaneb yal cui̱nkeb ut queˈcam. Abanan laj Melquisedec moco quicam ta. Joˈcan tzˈi̱banbil saˈ li Santil Hu. ⁹ Eb li ralal xcˈajol laj Leví, aˈan eb laj tij. Eb aˈan li queˈcˈuluc re li junju̱nk saˈ xlaje̱tkil li queˈxqˈue laj Israel. Laj Abraham aˈan lix xeˈto̱nil yucuaˈ laj Leví. Joˈcan nak naru xyebal nak eb li ralal xcˈajol laj Leví queˈxqˈue li junju̱nk saˈ xlaje̱tkil re laj Melquisedec xban nak laj Abraham quixqˈue li junju̱nk saˈ xlaje̱tkil saˈ xcˈabaˈeb aˈan. ¹⁰ Naru xyebal chi joˈcan usta toj ma̱jiˈ nequeˈyoˈla li ralal xcˈajol laj Leví xban nak laj Abraham, aˈan lix xeˈto̱nil yucuaˈeb. Riqˈuin aˈan nakanau nak laj Melquisedec nim xcuanquil chiruheb li ralal xcˈajol laj Leví. ¹¹ Li ralal xcˈajol laj Leví ut laj Aarón, aˈaneb li nequeˈchˈoloban chiruheb laj Israel lix ya̱lal lix chakˈrab li Dios li quixye laj Moisés. Abanan chi moco li chakˈrab chi moco eb laj tij li ta̱ru̱k ta̱colok ke. Cui ta eb laj tij ut li chakˈrab, incˈaˈ raj chic quitakla̱c chak junak aj tij kˈaxal nim xcuanquil joˈ nak quicuan laj Melquisedec. Laj tij li quitakla̱c chak ma̱cuaˈ xcomoneb laj Aarón. ¹² Laj tij li quitakla̱c chak jalan chic lix cˈanjel. Joˈcan nak quijala ajcuiˈ ru li chakˈrab. ¹³ Li a̱tin aˈin tzˈi̱banbil chirix li Jesucristo. Aˈan ma̱cuaˈ ralal xcˈajol laj Leví. Aˈan ralal xcˈajol laj Judá. Ma̱ jun ralal xcˈajol laj Judá xakabanbil chokˈ aj tij chi mayejac. ¹⁴ Laj Moisés, nak quia̱tinac chirixeb laj tij, ma̱ jun cua quixye nak saˈ xya̱nkeb ta li ralal xcˈajol laj Judá ta̱e̱lk chak junak aj tij. Ut li Jesucristo quiyoˈla saˈ xya̱nkeb li ralal xcˈajol laj Judá.

Kˈaxal nim xcuanquil li Jesús chiru xcuanquil laj Melquisedec

¹⁵ Riqˈuin aˈin nanauman nak li Jesucristo nim xcuanquil chiruheb laj tij li queˈcuan saˈ xya̱nkeb aj Israel. Li Jesucristo, aˈan aj tij joˈ nak quicuan laj Melquisedec ut aˈan ma̱cuaˈ ralal xcˈajol laj Leví. ¹⁶ Li Jesucristo incˈaˈ quixakaba̱c chokˈ aj tij joˈ quixye li chakˈrab. Xakabanbil ban chokˈ aj tij xban nak nim xcuanquil ut yoˈyo chi junelic. ¹⁷ Joˈcaˈin tzˈi̱banbil saˈ li Santil Hu chirix li Ka̱cuaˈ Jesucristo: La̱at aj tij chi junelic joˈ nak quicuan laj Melquisedec. ¹⁸ Joˈcan nak li chakˈrab li quicuan junxil ma̱cˈaˈ chic rajbal xban nak ma̱cˈaˈ chic xcuanquil. ¹⁹ Ma̱ ani nacoleˈ xban li chakˈrab li quicuan chak junxil. Abanan cuan kayoˈon anakcuan kˈaxal nim xcuanquil chiru li chakˈrab. Li kayoˈon, aˈan li Jesucristo. Ut xban aˈan cua̱nko chi sum a̱tin riqˈuin li Dios. ²⁰ Li Jesucristo xakabanbil chokˈ aj tij xban li Dios riqˈuin juramento. ²¹ Abanan ma̱cuaˈ riqˈuin juramento nak queˈxakaba̱c chokˈ aj tij li ralal xcˈajol laj Leví. Aˈut li Ka̱cuaˈ Jesucristo xakabanbil chokˈ aj tij xban li Dios riqˈuin juramento. Tzˈi̱banbil saˈ li Santil Hu chi joˈcaˈin:

²² Riqˈuin li juramento aˈin, saˈ xcˈabaˈ li Jesucristo, nim xcuanquil li acˈ contrato, ut kˈaxal lokˈ chiru li quicuan junxil. ²³ Najter nabaleb laj tij queˈcuan chak. Incˈaˈ queˈcana saˈ xcˈanjel chi junelic li junju̱nk xban nak nequeˈcam ut jalan chic nacana chokˈ re̱kaj. ²⁴ Aban li Ka̱cuaˈ Jesucristo aˈan chic li tzˈakal laj tij. Ma̱ jaruj chic ta̱sicˈma̱nk junak re̱kaj xban nak aˈan yoˈyo chi junelic. ²⁵ Li Jesucristo aˈan tzˈakal ta̱colok reheb chixjunileb li nequeˈpa̱ban re li Dios saˈ xcˈabaˈ aˈan. Li Jesucristo yoˈyo chi junelic ut naa̱tinac chirixeb chiru li Dios. ²⁶ Li Ka̱cuaˈ Jesucristo, aˈan li tzˈakal xyucuaˈil aj tij. Ut aˈan li natenkˈan ke chi tzˈakal. Moco juntakˈe̱t ta lix yuˈam riqˈuineb laj ma̱c. Li Jesucristo santo ut ma̱cˈaˈ xma̱c. Aˈan co̱ saˈ choxa ut aran quiqˈueheˈ xnimal xlokˈal. ²⁷ Li Jesucristo ma̱cuaˈ joˈqueb lix yucuaˈileb aj tij li queˈcuan saˈ xya̱nkeb laj Israel. Eb aˈan cuulaj cuulaj nequeˈxmayeja li xul re xtojbal rix lix ma̱queb joˈ ajcuiˈ lix ma̱queb li tenamit. Aban li Jesucristo jun sut ajcuiˈ quixmayeja rib re xtojbal rix li kama̱c. ²⁸ Joˈ tzˈi̱banbil saˈ li chakˈrab najter, eb li xakabanbil chokˈ xyucuaˈil aj tij, aˈan yal cui̱nkeb. Abanan mokon, nak quisacheˈ xcuanquil li chakˈrab, li Dios quixxakab riqˈuin juramento li Ralal chokˈ xyucuaˈil aj tij. Riqˈuin ut aˈan li Jesucristo tzˈakal re ru chi cˈanjelac chi junelic.

Li Jesucristo, aˈan xyucuaˈil aj tij chokˈ ke la̱o

8  Aˈan aˈin xya̱lal li yo̱co chixyebal e̱re: ya̱l nak cuan jun tzˈakal xyucuaˈil aj tij nacˈanjelac chikix. Aˈan li Jesucristo li cˈojcˈo chak saˈ xnim ukˈ li Dios saˈ lix nimajcual xcuanquilal saˈ choxa. ² Li Jesucristo nacˈanjelac saˈ li Santil Naˈajej saˈ choxa li yi̱banbil xban li Dios, ut ma̱cuaˈ saˈ li naˈajej yi̱banbil xbaneb li cui̱nk. ³ Chixjunileb li xyucuaˈil laj tij xakabanbileb chi mayejac xul ut cˈaˈak chic re ru chi mayejil. Joˈcan ajcuiˈ li Jesucristo tento tixqˈue junak mayej. ⁴ Cui toj cuan ta arin saˈ ruchichˈochˈ incˈaˈ ajcuiˈ ta̱cˈanjelak joˈ junak reheb laj tij xban nak eb laj tij nequeˈmayejac joˈ naxye lix chakˈrab laj Moisés. ⁵ Li cˈaˈru nequeˈxba̱nu eb laj tij yal jun retalil li na‑uxman saˈ li choxa. Nakanau nak yal retalil xban li cˈaˈru quiyeheˈ re laj Moisés nak oc re chixyi̱banquil li tabernáculo. Li Dios quixye re: Chaqˈue retal ut chaba̱nu chixjunil joˈ li retalil quincˈut cha̱cuu saˈ xbe̱n li tzu̱l Sinaí. ⁶ Aˈut lix cˈanjel li Jesucristo numtajenak xcuanquil chiru li queˈxba̱nu chak eb laj tij junxil. Saˈ li acˈ contrato li Jesucristo chic naa̱tinac chikix chiru li Dios. Kˈaxal cha̱bil li acˈ contrato xban nak riqˈuin aˈan kˈaxal lokˈ cuiˈchic li yechiˈinbil ke xban li Dios. ⁷ Cui ta tzˈakal re ru li contrato quixba̱nu chak junxil incˈaˈ raj chic quixqˈue junak acˈ contrato. ⁸ Aban li Dios quiril nak incˈaˈ us yo̱queb chixba̱nunquil li tenamit li cuanqueb rubel xcuanquil li xbe̱n contrato. Joˈcan nak quixye reheb li tzˈi̱banbil saˈ li Santil Hu:

¹³ Nak li Dios quixye nak tixba̱nu jun chic li acˈ contrato aˈan naraj naxye nak li najter contrato yo̱ chi sachc xcuanquil ut ma̱cˈaˈ chic xcˈanjel ta̱cana̱k.

Li Tabernáculo aˈan retalil li choxa

9  Li xbe̱n contrato cuan xchakˈrab naxye chanru nak nalokˈoniman li Dios ut cuan jun li muheba̱l re lokˈoni̱nc yi̱banbil xbaneb li cui̱nk tabernáculo xcˈabaˈ. ² Joˈcaˈin nak yi̱banbil li naˈajej. Tasbil saˈ xyi riqˈuin jun nimla tˈicr. Saˈ li xbe̱n tasal cuan li candil cuukub xxamlel ut cuan ajcuiˈ li me̱x bar naqˈueman cuiˈ li mayejanbil caxlan cua. Li xbe̱n tasal aˈan Santil Naˈajej xcˈabaˈ. ³ Li naˈajej li cuan jun pacˈal li tˈicr, aˈan Lokˈlaj Santil Naˈajej xcˈabaˈ. ⁴ Aran cuan jun xcˈatbal li pom yi̱banbil riqˈuin oro, ut cuan ajcuiˈ jun li Lokˈlaj Ca̱x letzbil oro chirix. Chi saˈ li Lokˈlaj Ca̱x aˈan cuan li xar oro bar cuiˈ cˈu̱lanbil li maná. Cˈu̱lanbil ajcuiˈ saˈ li ca̱x lix xukˈ laj Aarón li quituxmec ut qui‑atzˈumac. Ut cˈu̱lanbil ajcuiˈ aran li cuib chi pec ti̱c ru li tzˈi̱banbil cuiˈ li laje̱b chi chakˈrab. ⁵ Ut saˈ xbe̱n li Lokˈlaj Ca̱x cuan cuib li querubines yi̱banbileb riqˈuin oro chanchaneb li ángel. Aˈan retalil nak cuan li Dios aran. Lix xiqˈueb naxcˈul rib saˈ xbe̱n lix tzˈapbal re li ca̱x bar naqˈueman cuiˈ li mayej quicˈ re xcuybal li ma̱c. Abanan anakcuan incˈaˈ takachˈolob nabal chic chirix aˈan. ⁶ Joˈcaˈin nak queˈcˈanjelac saˈ li naˈajej li queˈxlokˈoni cuiˈ li Dios. Rajlal cutan queˈoc laj tij saˈ li xbe̱n tasal chixba̱nunquil lix cˈanjel. ⁷ Aban saˈ lix cab tasal caˈaj cuiˈ li xyucuaˈil aj tij na‑oc jun sut chiru li jun chihab. Ut nak na‑oc saˈ li Lokˈlaj Santil Naˈajej aˈan, naxcˈam xquiqˈuel li xul ut naxmayeja re ta̱cuyekˈ lix ma̱c aˈan ut re ajcuiˈ nak ta̱cuyekˈ xma̱queb li tenamit. ⁸ Riqˈuin li a̱tin aˈin, chirix li lokˈoni̱nc junxil saˈ li tabernáculo, li Santil Musikˈej naxcˈut chiku nak moco yalak ani ta naru na‑oc toj chi saˈ li Lokˈlaj Santil Naˈajej riqˈuin li Dios xban nak toj cuan xcˈanjel li najter chakˈrab chiruheb ut toj yo̱queb chi cˈanjelac saˈ li xbe̱n tasal. Joˈcan nak li xbe̱n tasal aˈan naramoc re li oqueba̱l chiruheb saˈ li Lokˈlaj Santil Naˈajej. ⁹ Chixjunil aˈin, aˈan jun retalil chokˈ ke anakcuan nak junxil quilajeˈmayejac. Aban li cˈatbil mayej ut li cˈaˈak chic re ru chi mayejil incˈaˈ quirisi lix ma̱queb. ¹⁰ Saˈ lix pa̱ba̱leb junxil cuan li chakˈrab chirix li cˈaˈru teˈxtzaca ut cˈaˈru teˈrucˈ joˈ ajcuiˈ chanru nak teˈchˈajok re xsantobresinquileb rib. Usta incˈaˈ quijala lix naˈlebeb, aban tento queˈxba̱nu li chakˈrab aˈan toj quicuulac xkˈehil nak li Dios quixjal nak quixqˈue li acˈ naˈleb. ¹¹ Aban ac xcˈulun li Jesucristo ut aˈan chic li tzˈakal xyucuaˈil aj tij chokˈ ke la̱o. Ut xkacˈul li rusilal li Dios li quixqˈue ke saˈ li acˈ contrato. Li Jesucristo incˈaˈ nacˈanjelac saˈ junak tabernáculo yi̱banbil xbaneb li cui̱nk arin saˈ ruchichˈochˈ. Kˈaxal lokˈ cuiˈchic li naˈajej li nacˈanjelac cuiˈ. ¹² Li Ka̱cuaˈ Jesucristo co̱ saˈ li Lokˈlaj Santil Naˈajej saˈ choxa. Aˈan incˈaˈ quixmayeja xquiqˈuel li chiba̱t chi moco ral cuacax. Quixmayeja ban lix lokˈlaj quiqˈuel. Jun sut ajcuiˈ quixmayeja rib re xqˈuebal li kacolbal chi junelic. ¹³ Saˈ lix pa̱ba̱leb junxil cuan nak riqˈuin li cˈaˈru nequeˈxba̱nu laj tij, nequeˈxmux ru lix cˈanjel saˈ li tabernáculo. Ut re xsachbal lix paltileb queˈxmayeja li chiba̱t ut li toro. Lix quiqˈuel ut lix chahil li cˈatbil tukˈ ix cuacax narachrachi̱c saˈ xbe̱neb laj tij. ¹⁴ Cui lix quiqˈuel li xul naru naxsach lix paltileb, kˈaxal nim cuiˈchic xcuanquil lix quiqˈuel li Jesucristo xban nak aˈan narisi li kama̱c. Li Santil Musikˈej quixtenkˈa li Jesucristo nak quixmayeja rib chiru li Dios re xtojbal rix li kama̱c. Li Jesucristo tzˈakal cha̱bil. Ma̱cˈaˈ xma̱c ut lix quiqˈuel narisi li kama̱c li nacˈamoc chak re li ca̱mc saˈ kabe̱n. Naxsakobresi li kacˈaˈux re nak caˈaj cuiˈ chiru li yoˈyo̱quil Dios tocˈanjelak. ¹⁵ Anakcuan cuan li acˈ contrato xban xcamic li Jesucristo. Chixjunileb li bokbileb xban li Dios ta̱cua̱nk xcuybal lix ma̱queb, eb li queˈcuan rubel xcuanquil li xbe̱n contrato joˈ ajcuiˈ la̱o li cuanco rubel xcuanquil li acˈ contrato. Ut ta̱cua̱nk kayuˈam chi junelic joˈ quixyechiˈi li Dios. Li Jesucristo quicam chiru cruz re kacolbal. Riqˈuin lix lokˈlaj quiqˈuel quixtoj rix li kama̱c. ¹⁶ La̱ex ac nequenau nak junak cui̱nk cuan cˈaˈru re naxye cˈaˈru ta̱re̱chani li ralal xcˈajol junju̱nk. Ut aˈan ta̱uxma̱nk nak acak xcam. ¹⁷ Li a̱tin aˈin ma̱cˈaˈ xcˈanjel nak toj yoˈyo li xyehoc re. Toj chirix ban lix camic ta̱cˈanjelak. ¹⁸ Joˈcan nak li xbe̱n contrato quixakaba̱c chak xcuanquil riqˈuin xquiqˈueleb li xul nak queˈmayeja̱c. ¹⁹ Nak laj Moisés quixye chixjunil li chakˈrab reheb li tenamit, quixchap li cocˈ rukˈ li pim hisopo xcˈabaˈ ut caˈchˈin li caki lana. Quixtzˈa saˈ xquiqˈuel li chiba̱t ut li ral cuacax yubil riqˈuin haˈ. Quixrachrachi li quicˈ chiru li hu tzˈi̱banbil cuiˈ li chakˈrab ut quixrachrachi ajcuiˈ saˈ xbe̱neb li tenamit. ²⁰ Tojoˈnak quixye reheb: Riqˈuin li quicˈ aˈin xakabanbil xcuanquil li contrato li quixqˈue li Dios chokˈ e̱re, chan. ²¹ Ut laj Moisés quixrachrachi li quicˈ chiru li tabernáculo joˈ ajcuiˈ chiru chixjunil li cˈaˈak re ru nacˈanjelac saˈ li tabernáculo re xlokˈoninquil li Dios. ²² Joˈ tzˈi̱banbil saˈ li chakˈrab, tento xsantobresinquil riqˈuin quicˈ chixjunil li quicˈanjelac chiruheb. Ma̱cˈaˈ xcuybal li ma̱c cui incˈaˈ ta̱hoyekˈ li quicˈ.

Riqˈuin lix camic li Jesucristo quixtoj rix li kama̱c

²³ Joˈcan nak tento nak queˈxrachrachi lix quiqˈuel li xul chiru li tabernáculo joˈ ajcuiˈ chiruheb li cˈaˈ re ru cuan chi saˈ re xsantobresinquileb. Li tabernáculo yal retalil li choxa. Ut li choxa santobresinbil riqˈuin jun mayej kˈaxal cuiˈchic lokˈ. Aˈan lix lokˈlaj quiqˈuel li Ka̱cuaˈ Jesucristo. ²⁴ Li Cristo incˈaˈ nacˈanjelac saˈ junak tabernáculo yi̱banbil xbaneb li cui̱nk. Nacˈanjelac ban saˈ choxa. Li tabernáculo quicuan, aˈan yal retalil li choxa. Li Jesucristo co̱ saˈ choxa ut anakcuan aran yo̱ chi jaloc a̱tin chikix chiru li Dios. ²⁵ Rajlal chihab na‑oc lix yucuaˈil aj tij saˈ li Lokˈlaj Santil Naˈajej ut naxmayeja xquiqˈuel li xul. Aban moco joˈcan ta quixba̱nu li Jesucristo. Aˈan jun sut ajcuiˈ quixmayeja lix lokˈlaj quiqˈuel nak quicam. ²⁶ Cui ta quixmayeja rib nabal sut, nabal sut raj quicam chalen saˈ xticlajic li ruchichˈochˈ. Aban incˈaˈ quixba̱nu chi joˈcan. Li Jesucristo quicˈulun re xrakbal li xbe̱n contrato ut jun sut ajcuiˈ quixmayeja rib. Ut riqˈuin aˈan cuan xcuybal li ma̱c. ²⁷ Chixjunil li tenamit jun sut ajcuiˈ teˈca̱mk ut li Ka̱cuaˈ Dios ta̱rakok a̱tin saˈ xbe̱neb. ²⁸ Joˈcan nak li Jesucristo jun sut ajcuiˈ quixmayeja rib re risinquil lix ma̱queb li qˈuila tenamit. Mokon tol‑e̱lk cuiˈchic, aban ma̱cuaˈ chic re cuyuc ma̱c ta̱cha̱lk. Tol‑e̱lk ban li Jesucristo re xtzˈakobresinquil li kacolbal chikajunil li yo̱co chi yoˈoni̱nc re.

10  Li chakˈrab li quiqˈueheˈ re laj Moisés yal retalil li usilal talajeˈcha̱lk mokon. Saˈ li chakˈrab aˈan naxye nak teˈmayejak rajlal chihab aban moco riqˈuin ta li mayejac quiti̱cobresi̱c lix yuˈameb. ² Cui ta riqˈuin li mayejac ta̱e̱lk lix ma̱queb incˈaˈ raj chic nequeˈmayejac rajlal chihab. Abanan nequeˈrecˈa saˈ li ra̱meb nak toj cuan lix ma̱queb. Joˈcan nak incˈaˈ queˈxcanab li mayejac. ³ Lix ya̱lal li mayejac nequeˈxba̱nu aˈan re xjulticanquil chiruheb nak toj cuanqueb xma̱c. ⁴ Lix quiqˈuel li chiba̱t ut li toro incˈaˈ narisi li ma̱c. ⁵ Joˈcan nak li Ka̱cuaˈ Jesucristo, nak ac cha̱lc re saˈ ruchichˈochˈ, quixye re li Acuabej Dios:

⁸ Joˈcaˈin quixye li Cristo re li Dios: Incˈaˈ nacuulac cha̱cuu li cˈatbil mayej chi moco li cˈaˈak re ru chi mayejil re risinquil li ma̱c. Xelajeˈxba̱nu aˈin xban nak joˈcan tzˈi̱banbil saˈ li chakˈrab junxil. Quixye li a̱tin aˈin usta ac tzˈi̱banbil saˈ li chakˈrab nak teˈmayejak. ⁹ Ut quixye ajcuiˈ: Cueˈquin, at Ka̱cuaˈ. Tinba̱nu li nacacuaj, chan. Joˈcan nak li Dios quirisi xcuanquil li mayejac xul ut chokˈ re̱kaj li mayej aˈan quixqˈue li Jesucristo chi ca̱mc chiru li cruz. ¹⁰ Li Jesucristo quixba̱nu li quiraj li Dios nak quixmayeja rib chiru li cruz. Jun sut ajcuiˈ quixmayeja rib, ut riqˈuin lix camic cuybil li kama̱c ut santobresinbilo. ¹¹ Saˈ xya̱nkeb laj Israel, chixjunileb laj tij cuulaj cuulaj nequeˈmayejac ut li mayej aˈan incˈaˈ narisi li ma̱c. ¹² Abanan li Jesucristo jun sut ajcuiˈ quixmayeja rib nak quicam re xcuybal xsachbal li ma̱c. Chirix aˈan co̱ saˈ choxa ut quicˈojla saˈ xnim ukˈ li Dios. ¹³ Ut aran yo̱ chiroybeninquil nak ta̱cuulak xkˈehil nak tixyekˈ saˈ rok eb li xicˈ nequeˈiloc re. ¹⁴ Xban nak jun sut ajcuiˈ quixmayeja rib li Jesucristo nak quicam chiru li cruz, ma̱cˈaˈ chic xma̱queb chiru li Dios li santobresinbileb. ¹⁵ Joˈcan ajcuiˈ li Santil Musikˈej naxchˈolob xya̱lal chiku nak aˈan tzˈakal ya̱l xban nak joˈcaˈin naxye saˈ li Santil Hu:

¹⁸ Joˈcan nak cui ac cuybil sachbil li kama̱c, ma̱cˈaˈ chic xcˈanjel li mayejac re risinquil li ma̱c.

Naru tocua̱nk chi sum a̱tin riqˈuin li Dios

¹⁹ Joˈcan utan ex herma̱n, anakcuan naru tocua̱nk chi sum a̱tin riqˈuin li Dios xban nak quihoyeˈ lix lokˈlaj quiqˈuel li Jesucristo nak quicam chiru li cruz saˈ kacˈabaˈ. ²⁰ Riqˈuin lix camic li Jesucristo quixsach xcuanquil li tˈicr li quicuan saˈ li tabernáculo ut quixqˈue li acˈ naˈleb re xtaubal li junelic yuˈam ut anakcuan naru tocua̱nk chi sum a̱tin riqˈuin li Dios. ²¹ Li Jesucristo, aˈan lix yucuaˈil aj tij chokˈ ke la̱o li ralal xcˈajol li Dios. ²² Joˈcan nak chikaqˈue kib rubel xcuanquil li Dios chi anchal kachˈo̱l ut chi ma̱cˈaˈak kaxiu xban nak nakecˈa nak ma̱cˈaˈ chic li kama̱c. Chˈajbil chic li ka̱m xban xquiqˈuel li Jesucristo ut cubsinbil chic kahaˈ. ²³ Joˈcan nak cauhak taxak kachˈo̱l saˈ li kapa̱ba̱l xban nak li Dios naxqˈue li cˈaˈru naxyechiˈi ke. ²⁴ Chikasicˈ chanru takatenkˈa kib re nak takara kib ut chikaba̱nu usilal chi kibil kib. ²⁵ Cuanqueb li incˈaˈ nequeˈxic saˈ li chˈutubaj ib. Abanan incˈaˈ takaba̱nu joˈ nequeˈxba̱nu eb aˈan. Junelic ban takachˈutub kib re xlokˈoninquil li Dios. Chikaqˈue xcacuub li kachˈo̱l chi kibil kib. Tento takaba̱nu aˈan xban nak chi se̱b tol‑e̱lk li Jesucristo. ²⁶ Cui junelic yo̱co chi ma̱cobc chi ac nakanau xya̱lal li ra̱tin li Dios, ma̱cˈaˈ chic xcuybal li kama̱c xban nak nakanau nak ma̱c yo̱co chixba̱nunquil. ²⁷ Cui junelic yo̱ko chi ma̱cobc, caˈaj chic li rakba a̱tin ut lix xamlel li tojba ma̱c yo̱co chiroybeninquil bar cuiˈ teˈcˈatekˈ li xicˈ nequeˈiloc re li Ka̱cuaˈ Dios. ²⁸ Junxil incˈaˈ qui‑ileˈ xtokˈoba̱l ru li ani quikˈetoc re xchakˈrab laj Moisés. Cui cuan cuib malaj oxib li queˈxye nak ya̱l nak xkˈet li chakˈrab, quirakeˈ a̱tin saˈ xbe̱n ut queˈxcamsi. ²⁹ Numtajenak cuiˈchic ra teˈxcˈul li nequeˈtzˈekta̱nan re li Ralal li Dios ut nequeˈxsach xcuanquil lix quiqˈuel xban nak riqˈuin xquiqˈuel li Jesucristo xakabanbil xcuanquil li acˈ contrato ut santobresinbilo la̱o. Numtajenak cuiˈchic ra teˈxcˈul li nequeˈxmajecua li Santil Musikˈej li naqˈuehoc ke li rusilal li Dios. ³⁰ La̱o nakanau nak li Dios quixye chi joˈcaˈin:

³¹ Kˈaxal xucuajel nak ta̱rakok a̱tin li yoˈyo̱quil Dios saˈ xbe̱neb li nequeˈtzˈekta̱nan re. ³² Aban chinak saˈ e̱chˈo̱l chanru xecˈul junxil nak tojeˈ xepa̱b li Cristo. Nabal chi raylal quilaje̱cˈul ut incˈaˈ xchˈinan e̱chˈo̱l. ³³ Cuan saˈ e̱ya̱nk li xicˈ queˈileˈ ut queˈhobeˈ chiruheb li tenamit. Ut la̱ex quextzˈakon riqˈuin li raylal li queˈxcˈul. ³⁴ La̱ex quiyotˈeˈ e̱chˈo̱l chi rilbal le̱ rech aj pa̱banelil li cuanqueb chi pre̱xil. Ut incˈaˈ quirahoˈ saˈ le̱ chˈo̱l nak quimakˈeˈ che̱ru li cˈaˈru e̱re xban nak nequenau nak saˈ li choxa cuan e̱ma̱tan kˈaxal cuiˈchic lokˈ. Le̱ ma̱tan li cuan saˈ choxa incˈaˈ nalaj incˈaˈ na‑osoˈ. ³⁵ Joˈcan nak cauhak taxak e̱chˈo̱l saˈ le̱ pa̱ba̱l ut riqˈuin aˈan cuan e̱kˈajca̱munquil. ³⁶ La̱ex tento te̱cuy li cˈaˈru na‑ux e̱re re nak te̱ba̱nu li naraj li Dios. Ut riqˈuin aˈan te̱cˈul li yechiˈinbil e̱re xban li Dios. ³⁷ Joˈcaˈin tzˈi̱banbil saˈ li Santil Hu:

³⁹ Aban, la̱o ma̱cuaˈo xcomoneb li nequeˈxcanab xpa̱banquil li Dios. Eb aˈan teˈxic saˈ xbalba. La̱o nakapa̱b li Dios ut tocolekˈ.