Beginning

Li Xcab Hu li Quixtzˈi̱ba li San Juan

Laj Juan natzˈi̱bac riqˈuin jun li ixk aj pa̱banel

¹ La̱in aj cˈamol be cha̱cuu saˈ la̱ pa̱ba̱l. At hermana, nintzˈi̱bac a̱cuiqˈuin la̱at li sicˈbil a̱cuu xban li Dios. Ut nintzˈi̱bac ajcuiˈ riqˈuineb la̱ cualal a̱cˈajol. Ya̱l nak la̱in nequexinra. Moco caˈaj ta cuiˈ la̱in ninrahoc e̱re. Nequexraheˈ aj ban cuiˈ xbaneb chixjunileb li nequeˈxnau li xya̱lal. ² Nequexkara xban nak junaj li nakapa̱b ut lix ya̱lal aˈan ta̱cua̱nk kiqˈuin chi junelic. ³ Aˈ taxak li rusilal, li ruxta̱n ut li tuktu̱quilal li naxqˈue li Dios Acuabej ut li Jesucristo li Alalbej chicua̱nk e̱riqˈuin saˈ xya̱lal ut riqˈuin rahoc. ⁴ Cˈajoˈ nak nasahoˈ saˈ inchˈo̱l chirilbaleb la̱ cualal a̱cˈajol nak cuanqueb saˈ xya̱lal. Joˈcaˈin li kataklanquil xban li Dios Acuabej. ⁵ Ut anakcuan nintzˈa̱ma cha̱cuu nak chikarahak taxak kib chi kibil kib. Li chakˈrab aˈin moco acˈ ta. Abanan qˈuebil chak ke chalen chak saˈ xticlajic li kapa̱ba̱l. ⁶ Cui nakara kib chi kibil kib, nakapa̱b li kachakˈrabinquil xban li Dios. Chalen chak saˈ xticlajic, li Dios quixye ke nak tento takara kib chi kibil kib.

Eb laj tzolonel aj balakˈ

⁷ Ninnumsi cuiˈchic saˈ e̱xic li naˈleb aˈin xban nak nabaleb laj tzolonel aj balakˈ cuanqueb saˈ ruchichˈochˈ. Eb li cui̱nk aˈin incˈaˈ nequeˈxchˈolob li xya̱lal nak li Jesucristo quitzˈejcualoˈ ut tzˈakal cui̱nk nak quicˈulun saˈ ruchichˈochˈ. Eb li cui̱nk aˈin aj balakˈeb ut xicˈ nequeˈril li Jesucristo. ⁸ Cheqˈuehak retal che̱ribil e̱rib re nak incˈaˈ ta̱cana̱k chi ma̱cˈaˈ rajbal le̱ cˈanjel chiru li Dios. Tzˈakalak ban re ru xkˈajca̱munquil le̱ cˈanjel te̱cˈul riqˈuin li Dios. ⁹ Cui ani junak naxqˈue xtzˈakob li quix‑chˈolob li Jesucristo, li jun aˈan ma̱cˈaˈ li Dios riqˈuin. Abanan cui nakapa̱b li cˈaˈru quixchˈolob li Jesucristo, li Dios Acuabej cua̱nk kiqˈuin ut cua̱nk ajcuiˈ kiqˈuin li Jesucristo li Cˈajolbej. ¹⁰ Cui nacuulac junak e̱riqˈuin ut nequenau nak jalan li yo̱ chixchˈolobanquil che̱ru chiru li quixchˈolob li Jesucristo, me̱cˈul saˈ le̱ rochoch chi moco te̱ye re nak li Dios chi‑osobtesi̱nk re. ¹¹ Xban nak li ani naxtzˈa̱ma chiru li Dios nak ta̱rosobtesiheb laj balakˈ, aˈan ta̱tzˈako̱nk riqˈuin lix yibal ru lix cˈanjeleb.

Xchakˈrabinquileb

¹² Cuan raj chic nabal tinye e̱re, abanan incˈaˈ nacuaj xtzˈi̱banquil saˈ li hu aˈin. La̱in nacuaj xic e̱riqˈuin re nak toa̱tinak ut takil xsahil kachˈo̱l chi kibil kib. ¹³ Nequeˈxtakla xsahil a̱chˈo̱l eb li ralal xcˈajol la̱ chakˈnaˈ, li sicˈbil ru xban li Dios. Joˈcan taxak.

Li Rox Hu li Quixtzˈi̱ba li San Juan

Xqˈuebal xsahil xchˈo̱l

¹ Nintzˈi̱bac a̱cuiqˈuin, at hermano Gayo. La̱in aj cˈamol be cha̱cuu saˈ la̱ pa̱ba̱l. Relic chi ya̱l nak nacatinra. ² At inherma̱n, yo̱quin chi tijoc cha̱cuix re nak us tat‑e̱lk riqˈuin chixjunil li cˈaˈru ta̱ba̱nu. Ut nintijoc ajcuiˈ cha̱cuix re nak cauhakat. Ninnau nak ti̱c la̱ chˈo̱l chiru li Dios. ³ Cˈajoˈ nak nasahoˈ saˈ inchˈo̱l nak nequeˈcˈulun li herma̱n cuiqˈuin ut nacuabi resil nak ti̱c a̱chˈo̱l. Ut ninnau nak yo̱cat chixba̱nunquil li xya̱lal. ⁴ Aˈan aˈin li kˈaxal nasahoˈ cuiˈ inchˈo̱l nak nacuabi resil nak eb li kaherma̱n cuanqueb saˈ xya̱lal. Eb aˈan chanchaneb li cualal incˈajol xban nak queˈpa̱ban chicuu.

Laj Gayo cha̱bil quixba̱nu riqˈuin xtenkˈanquileb li herma̱n

⁵ At inherma̱n, kˈaxal lokˈ li nacaba̱nu nak nacatenkˈaheb li herma̱n, usta incˈaˈ nacanauheb ru. ⁶ Eb aˈan queˈxchˈolob xya̱lal arin chiruheb li herma̱n chanru nak nacaraheb. Chatenkˈaheb chi cha̱bil joˈ naraj li Dios nak teˈxic chixyebal ra̱tin li Dios saˈ jalan naˈajej. ⁷ Eb aˈan xeˈoc chi xic xban nak teˈraj xba̱nunquil xcˈanjel li Jesucristo. Ut incˈaˈ queˈxcˈul xkˈajca̱munquileb chiruheb li ma̱jiˈ nequeˈxpa̱b li Dios. ⁸ Joˈcan nak tento takatenkˈaheb li cui̱nk aˈin xban nak kech aj cˈanjeleb chixchˈolobanquil li xya̱lal.

Lix yibal ru xnaˈleb laj Diótrefes

⁹ Cuan cˈaˈru xintzˈi̱ba saˈ li hu li xintakla riqˈuineb laj pa̱banel aran. Abanan li herma̱n Diótrefes, aˈan naxnimobresi rib ut incˈaˈ naxcˈul xchˈo̱l li cˈaˈru xintzˈi̱ba. Naraj takla̱nc saˈ e̱ya̱nk ut incˈaˈ naxqˈue incuanquil. ¹⁰ Nak tinxic aran toxinkˈus ut che̱ru che̱junilex tinye li cˈaˈru yo̱ chixba̱nunquil. Yo̱ chixyebal cˈaˈak re ru chi a̱tinul chikix. Ut moco nacˈojla ta xchˈo̱l riqˈuin aˈan. Toj cuan cuiˈchic cˈaˈak re ru incˈaˈ us naxba̱nu. Incˈaˈ naxcˈuleb li herma̱n saˈ li rochoch ut naxic chixtacchiˈinquileb li herma̱n li nequeˈraj raj xcˈulbal li ulaˈ, ut narisiheb saˈ xya̱nkeb laj pa̱banel cui nequeˈxcˈul li rulaˈeb.

Cha̱bil resil chirix laj Demetrio.

¹¹ At inherma̱n, ma̱tzol a̱cuib riqˈuin li incˈaˈ us. Aˈ ban li us ta̱ba̱nu. Li ani naba̱nun re li us, aˈan ralal xcˈajol li Dios. Ut li ani naxba̱nu li incˈaˈ us, toj ma̱jiˈ naxpa̱b li Dios. ¹² Chixjunileb nequeˈxye nak cha̱bil li herma̱n Demetrio. Ut relic chi ya̱l nak lix yuˈam nacˈutuc re lix cha̱bilal. Joˈcan ajcuiˈ nakaye la̱o. Ut la̱at nacanau nak li nakaye la̱o aˈan ya̱l.

Xrakbal li hu riqˈuin sahil chˈo̱lej

¹³ Cuan raj nabal chic tinye a̱cue, abanan incˈaˈ nacuaj xtzˈi̱banquil saˈ li hu aˈin. ¹⁴ Yo̱quin chixcˈoxlanquil nak chi se̱b takil kib re nak ta̱ru̱k taka̱tina kib. ¹⁵ Chicua̱nk taxak li tuktu̱quil usilal a̱cuiqˈuin. Eb li herma̱n arin nequeˈxtakla xsahil a̱chˈo̱l. Ut chaqˈue ajcuiˈ xsahil xchˈo̱leb li kech aj pa̱banelil chi xjunju̱nkaleb.

Li Hu li Quixtzˈi̱ba li San Judas

Laj Judas natzˈi̱bac riqˈuineb li bokbileb xban li Dios

¹ La̱in laj Judas, laj cˈanjel chiru li Jesucristo. La̱in ri̱tzˈin laj Jacobo. Nintzˈi̱ba li hu aˈin reheb laj pa̱banel, li bokbileb ut raro̱queb xban li Dios Acuabej ut colbileb xban li Jesucristo. ² Checˈulak taxak chi nabal li ruxta̱n li Dios, joˈ ajcuiˈ li tuktu̱quil usilal ut li rahoc.

Eb laj tzolonel aj balakˈ

³ Ex inherma̱n, anchal inchˈo̱l nak yo̱quin chixcˈoxlanquil tzˈi̱bac e̱riqˈuin chirix li kacolbal saˈ comonil. Aban xinqˈue retal nak ta̱ajma̱nk ru nak tintzˈi̱bak e̱riqˈuin re xtzˈa̱manquil che̱ru nak te̱yal e̱kˈe chixcolbal rix le̱ pa̱ba̱l. Aˈan li junaj chi pa̱ba̱l kˈaxtesinbil chak ke xban li Dios. ⁴ Nintzˈi̱ba li hu aˈin xban nak cuanqueb aj balakˈ queˈxchˈic rib saˈ e̱ya̱nk chi mukmu. Eb aˈan nequeˈxye nak laj pa̱banel naru teˈxba̱nu yalak cˈaˈru chi ma̱usilal ut xban li rusilal li kaDios, ma̱cˈaˈ teˈxcˈul. Nequeˈxsach xcuanquil li Ka̱cuaˈ Jesucristo, laj e̱chal ke. Eb aˈan aj kˈetoleb ra̱tin li Dios ut chalen chak junxil cutan ac xakabanbil chak li rakba a̱tin saˈ xbe̱neb. ⁵ Usta ac xchˈolobaman che̱ru, nacuaj cuiˈchic xjulticanquil e̱re chanru nak li Ka̱cuaˈ Dios quirisiheb chak lix tenamit aj Israel saˈ li naˈajej Egipto. Ut mokon chic quixsacheb li incˈaˈ queˈpa̱ban chiru saˈ xya̱nkeb laj Israel. ⁶ Ninjultica ajcuiˈ che̱ru nak cuan li ángel queˈxtzˈekta̱na lix lokˈal qˈuebileb re joˈ ajcuiˈ lix naˈajeb. Anakcuan tzˈaptzˈo̱queb saˈ li kˈojyi̱n xban li Dios ut bacˈbo̱queb riqˈuin cadena toj ta̱cuulak xcutanquil li rakba a̱tin. ⁷ Joˈcan ajcuiˈ queˈxcˈul li tenamit Sodoma ut Gomorra joˈqueb ajcuiˈ li tenamit cuanqueb chixcˈatk. Juntakˈe̱teb lix naˈlebeb riqˈuineb li ángel li queˈma̱cob. Queˈmuxuc caxa̱r ut queˈma̱cob ajcuiˈ riqˈuin rech cui̱nkilal ut riqˈuin rech ixkilal. Queˈxkˈaxtesi rib chixba̱nunquil chixjunil li ma̱usilal. Lix cˈatic eb li tenamit aˈan, aˈan re xcˈutbesinquil chiku nak cuan xtojbal rix li ma̱c. Aˈan li ta̱cˈulma̱nk mokon saˈ li xam li ta̱cua̱nk chi junelic. ⁸ Usta nanauman li cˈaˈru quixcˈul li tenamit Sodoma ut Gomorra, abanan toj cuanqueb ajcuiˈ aj balakˈ li nequeˈxpa̱b li yal yoˈobanbil naˈleb. Ut nequeˈxtzˈajni rib riqˈuin li ma̱c. Nequeˈxtzˈekta̱na lix cuanquil li Ka̱cuaˈ ut nequeˈxmajecua li cuanqueb xcuanquil ut li cuanqueb xlokˈal. ⁹ Ut li ángel Miguel, li kˈaxal nim xlokˈal, incˈaˈ quixqˈue rib chokˈ aj rakol a̱tin saˈ xbe̱n laj tza. Nak li ángel queˈxcuechˈi rib riqˈuin laj tza chirix lix tzˈejcual laj Moisés, li ángel incˈaˈ quixhob chi moco quiraj xrakbal a̱tin saˈ xbe̱n. Quixye ban re: Li Ka̱cuaˈ Dios chikˈusuk a̱cue, chan. ¹⁰ Ut eb laj balakˈ aˈin nequeˈxmajecua ru li cˈaˈak re ru lokˈ, li incˈaˈ nequeˈxtau ru. Chanchaneb li xul li ma̱cˈaˈeb xnaˈleb. Nequeˈxsach rib chixba̱nunquil li cˈaˈak re ru chi ma̱usilal. ¹¹ Ra teˈxcˈul. Lix naˈlebeb aˈan joˈ lix naˈleb laj Caín. Chanchaneb laj Balaam, xban nak nequeˈxrahi ru li tumin ut junes aˈan chic nequeˈxcˈoxla. Nequeˈxtzˈekta̱na lix chakˈrab li Dios ut nequeˈxnimobresi rib joˈ quixba̱nu laj Coré. Xban aˈan nak teˈosokˈ. ¹² Xuta̱nal chokˈ e̱re nak cuanqueb laj balakˈ saˈ e̱ya̱nk nak nequeba̱nu le̱ ninkˈe re sahil chˈo̱lej. Eb laj balakˈ caˈaj cuiˈ li num cuaˈac ut num ucˈac nequeˈxba̱nu ut incˈaˈ nequeˈxuta̱nac. Junes xchˈolaninquileb rib nequeˈxcˈoxla. Eb laj balakˈ aˈan chanchaneb li chok li ma̱cˈaˈ hab chi saˈ, li nacˈameˈ yalak bar xban li ikˈ. Laj balakˈ ma̱cˈaˈ nequeˈoc cuiˈ. Chanchaneb li cheˈ li incˈaˈ nequeˈu̱chin, li namichˈman chi junaj cua ut nachakic. ¹³ Nak na‑el chak xcuokx li palau xban xcacuil rok li haˈ, nalemeb rib chire li haˈ lix tzˈajnil li haˈ. Joˈcan ajcuiˈ lix xuta̱neb laj balakˈ xban li ma̱usilal li nequeˈxba̱nu. Chanchaneb li chahim li yal naxbeni rib yalak bar chiru choxa. Eb li cui̱nk aˈin ac xakabanbileb chi xic chi junaj cua toj saˈ xchamal ut xkˈojyi̱nal li tojba ma̱c. ¹⁴ Laj Enoc, aˈan lix cuukil chak chirix laj Adán. Quia̱tinac chirixeb li cui̱nk aˈin joˈ quicˈuteˈ chiru xban li Dios. Laj Enoc quixye: ―Abihomak, chan. Tol‑e̱lk li Ka̱cuaˈ rochben li qˈuila okˈob chi ángel. ¹⁵ Ta̱cha̱lk chi rakoc a̱tin saˈ xbe̱neb chixjunil ut chixchˈolobanquil lix ma̱queb riqˈuin lix yehom xba̱nuhomeb joˈ eb ajcuiˈ riqˈuin li xicˈ aj a̱tin xyehomeb chirix li Ka̱cuaˈ, chan laj Enoc. ¹⁶ Eb aˈin aj cuechˈoneleb. Ma̱cˈaˈ nacuulac chiruheb. Caˈaj cuiˈ li cˈaˈru naxrahi ru li tzˈejcualej nequeˈxba̱nu. Nequeˈa̱tinac re xnimobresinquileb ribeb. Nequeˈxkˈunbesi junak riqˈuin kˈunil a̱tin yal re li cˈaˈru nequeˈraj riqˈuin.

Xchˈolobanquil xnaˈleb eb laj pa̱banel

¹⁷ Ut la̱ex ex inherma̱n, tento nak ta̱cua̱nk saˈ e̱chˈo̱l eb li a̱tin li queˈxye chak lix apóstol li Ka̱cuaˈ Jesucristo. ¹⁸ Eb li apóstol queˈxye e̱re nak ta̱nachˈok chak rosoˈjiqueb li cutan teˈcha̱lk eb laj balakˈ aj majecuanel. Aˈ li ma̱c li naxrahi ru lix tzˈejcualeb, aˈan li nequeˈxba̱nu. ¹⁹ Eb li cui̱nk aˈin, aˈaneb li nequeˈyoˈoban jachoc ib. Nequeˈxrahi ru lix ma̱usilal li ruchichˈochˈ ut li Santil Musikˈej ma̱cˈaˈ riqˈuineb. ²⁰ Aˈut la̱ex, ex inherma̱n, cauhak taxak e̱chˈo̱l saˈ le̱ santil pa̱ba̱l. Ut chextijok riqˈuin xcuanquil li Santil Musikˈej. ²¹ Chenauhak nak nequexra li Dios ut incˈaˈ chicuiba̱nk e̱chˈo̱l. Cheroybenihak nak tol‑e̱lk li Ka̱cuaˈ Jesucristo ut riqˈuin lix nimal ruxta̱n tixqˈue le̱ yuˈam chi junelic. ²² Cheqˈuehak xnaˈlebeb li nequeˈcuiban xchˈo̱l. ²³ Qˈuehomak le̱ chˈo̱l chixcolbal e̱ras e̱ri̱tzˈin. Chanchan li yo̱kex chirisinquileb saˈ xxamlel li xbalba. Ut li jun chˈol chic eb laj kˈetol a̱tin, cheruxta̱naheb ru aban tinye e̱re: cheqˈuehak retal. Incˈaˈ chextzˈako̱nk riqˈuineb lix ma̱usilal xban nak numtajenakeb cuiˈchic lix ma̱usilal. Xicˈ cheril lix ma̱queb joˈ junak kˈel tˈicr numtajenak xtzˈajnil ru.

Xnimanquil ru li Dios

²⁴ Ut anakcuan lokˈoninbil taxak li nimajcual Dios. Aˈan kˈaxal nim xcuanquil che̱colbal re nak incˈaˈ texma̱cobk. Nim ajcuiˈ xcuanquil che̱kˈaxtesinquil saˈ xnimal xlokˈal li Dios chi ma̱cˈaˈak e̱ma̱c ut chi sa saˈ e̱chˈo̱l. ²⁵ Lokˈoninbil taxak li junaj chi Dios, laj Colol ke saˈ xcˈabaˈ li Ka̱cuaˈ Jesucristo. Aˈan taxak chinima̱k xcuanquil ut xlokˈal chalen chak najter kˈe cutan, ut toj chalen anakcuan ut chi junelic. Joˈcan taxak.