Beginning

Li Xcab Hu li Quixtzˈi̱ba li San Pablo reheb laj Tesalónica

Xqˈuebal xsahileb xchˈo̱l

1  La̱in laj Pablo. Cuochben laj Silvano ut laj Timoteo nak yo̱co chixtzˈi̱banquil li hu aˈin e̱riqˈuin la̱ex laj pa̱banel li cuanquex aran Tesalónica. La̱ex rehex chic li Dios li kaYucuaˈ ut rehex chic li Ka̱cuaˈ Jesucristo. ² Aˈ taxak li usilal ut li tuktu̱quilal chicua̱nk e̱riqˈuin, li naxqˈue li Dios li kaYucuaˈ ut li Ka̱cuaˈ Jesucristo.

Li Ka̱cuaˈ Jesucristo ta̱cha̱lk chi rakoc a̱tin

³ Ex inherma̱n, incˈaˈ nakacanab xbantioxinquil chiru li Dios saˈ e̱cˈabaˈ la̱ex. Tento takabantioxi chiru li Dios xban nak yo̱ chi cacuu̱c e̱chˈo̱l saˈ le̱ pa̱ba̱l ut kˈaxal cuiˈchic nequera e̱rib che̱ribil e̱rib. ⁴ Joˈcan nak kˈaxal sa saˈ kachˈo̱l chixserakˈinquil resil le̱ pa̱ba̱l reheb li nequeˈpa̱ban re li Dios yalak bar. Nakaye reheb chanru nak nequexpa̱ban chi anchal e̱chˈo̱l ut cau e̱chˈo̱l nak yo̱quex chixcuybal xnumsinquil li raylal ut li ra xi̱cˈ. ⁵ Xban nak nequecuy xnumsinquil li raylal nacˈutun nak li Dios yo̱ che̱tenkˈanquil. Li Dios ta̱rakok a̱tin saˈ ti̱quilal. Tento nak te̱cuy li raylal re nak li Dios tixye nak e̱cˈulub oc saˈ lix nimajcual cuanquilal ut saˈ xcˈabaˈ ajcuiˈ aˈan nak yo̱quex chixcˈulbal li raylal. ⁶ Kˈaxal ti̱c xchˈo̱l li Dios. Joˈcan nak tixqˈue raylal saˈ xbe̱neb li nequeˈrahobtesin e̱re. ⁷ Abanan la̱ex li yo̱quex chixcˈulbal raylal, li Dios texqˈue chi hila̱nc kochben la̱o ut incˈaˈ chic takacˈul raylal. Aˈin ta̱cˈulma̱nk nak li Ka̱cuaˈ Jesucristo tixcˈutbesi chak rib nak ta̱cha̱lk toj saˈ choxa. Ta̱cha̱lk rochbenakeb chak lix ángel li cuanqueb xcuanquil. ⁸ Chanchan li rakˈ xam nak ta̱cha̱lk li Ka̱cuaˈ Jesucristo riqˈuin xnimal xlokˈal chi rakoc a̱tin. Tixqˈueheb chixtojbal xma̱queb li ani incˈaˈ nequeˈpa̱ban re li Dios joˈ ajcuiˈ li ani incˈaˈ nequeˈraj rabinquil resilal li colba‑ib li naxqˈue li Ka̱cuaˈ Jesucristo. ⁹ Lix tojbal rixeb lix ma̱c li tixqˈue, aˈan li sachc chi junelic nak teˈisi̱k chiru li Ka̱cuaˈ Jesucristo ut chiru lix nimal xlokˈal ut lix cuanquilal. ¹⁰ Chixjunil aˈin ta̱cˈulma̱nk saˈ li cutan nak tol‑e̱lk cuiˈchic li Ka̱cuaˈ Jesucristo. Saˈ li cutan aˈan li Jesucristo ta̱lokˈoni̱k xbaneb chixjunileb li nequeˈpa̱ban re. La̱ex cuanquex saˈ xya̱nkeb aˈan. Rehex chic li Cristo xban nak ac xepa̱b li xya̱lal li xkachˈolob che̱ru. ¹¹ Joˈcan nak junelic nocotijoc che̱rix ut nakatzˈa̱ma chiru li Dios nak cha̱bilakex taxak re nak e̱cˈulubak cua̱nc chokˈ ralal xcˈajol li Dios. Nakatzˈa̱ma chiru nak riqˈuin taxak xnimal xcuanquil, textenkˈa chixba̱nunquil li us re nak tzˈakalak re ru le̱ yehom e̱ba̱nuhom saˈ xcˈabaˈ le̱ pa̱ba̱l. ¹² Nocotijoc che̱rix re nak la̱ex junelic te̱nima xlokˈal li Ka̱cuaˈ Jesucristo. Ut la̱ex tex‑oxlokˈi̱k ajcuiˈ xban nak rehex chic li Cristo. Aˈ taxak li Dios ut li Ka̱cuaˈ Jesucristo riqˈuin xnimal rusilal chitenkˈa̱nk e̱re re nak joˈcan taxak chi‑uxma̱nk.

2  Ex inherma̱n, anakcuan tinchˈolob xya̱lal che̱ru chirix lix cˈulunic li Ka̱cuaˈ Jesucristo ut lix chˈutubanquil kib riqˈuin. ² Nintzˈa̱ma che̱ru nak me̱qˈue e̱rib chi balakˈi̱c xbaneb li teˈyehok nak ac xcuulac xkˈehil lix cˈulunic li Ka̱cuaˈ Jesucristo. Ma̱re ta̱yehekˈ e̱re xban junak li profeta, malaj xban junak cui̱nk ta̱a̱tinak e̱riqˈuin, malaj xban junak ta̱tzˈi̱bak e̱riqˈuin ut tixye nak la̱o xkatzˈi̱ba li hu aˈan. Abanan me̱pa̱b li cˈaˈru teˈxye eb aˈan xban nak moco ya̱l ta. ³ Ma̱cˈaˈ ta cˈaˈru chexbalakˈi̱k cuiˈ. Li Ka̱cuaˈ Jesucristo incˈaˈ ta̱cha̱lk chi ma̱jiˈak natzˈekta̱na̱c li Dios xbaneb nabal chi tenamit. Ut ta̱cha̱lk ajcuiˈ li cui̱nk laj kˈetol chakˈrab. Aˈan li ta̱cˈuluk re li sachc chi junaj cua. ⁴ Aˈan tixqˈue xcuanquil xjunes rib ut xicˈ ta̱ril yalak cˈaˈ chi diosil ut li cˈaˈak re ru nalokˈoniman saˈ ruchichˈochˈ. Tixnimobresi rib saˈ xbe̱n chixjunil toj retal nak ta̱cˈojla̱k saˈ rochoch li Dios ut aˈan chic tixqˈue rib chokˈ dios. ⁵ ¿Ma incˈaˈ jultic e̱re nak quinye chak e̱re chixjunil aˈin nak toj cuanquin chak e̱riqˈuin? ⁶ La̱ex ac nequenau cˈaˈru li naramoc re nak toj ma̱jiˈ nachal laj kˈetol chakˈrab. Abanan nak ta̱cuulak xkˈehil, ta̱cˈulu̱nk. ⁷ Li ma̱usilal ac cuan saˈ ruchichˈochˈ, abanan toj ma̱jiˈ nanumta chi us. Ta̱cuulak xkˈehil nak li Dios incˈaˈ chic tixram li ma̱usilal ut li ma̱usilal ta̱numta̱k arin saˈ ruchichˈochˈ. ⁸ Saˈ eb li cutan aˈan ta̱cˈutbesi̱k laj kˈetol chakˈrab. Tojoˈnak li Ka̱cuaˈ Jesucristo ta̱cˈulu̱nk riqˈuin xnimal xlokˈal. Ta̱apusi̱k laj kˈetol chakˈrab xban li Ka̱cuaˈ ut aran ta̱osokˈ. Chi joˈcan ta̱sachekˈ chixjunil lix cuanquil saˈ xcˈulunic li Ka̱cuaˈ Jesucristo. ⁹ Laj kˈetol chakˈrab ta̱cha̱lk riqˈuin xcuanquil laj tza. Tixcˈutbesi nak cuan xcuanquil chixba̱nunquil li milagros ut sachba chˈo̱lej re xbalakˈinquil li cristian. ¹⁰ Tixbalakˈiheb li teˈsachekˈ xban nak queˈxtzˈekta̱na li xya̱lal li quicoloc raj reheb. ¹¹ Joˈcan nak li Dios tixqˈueheb chixpa̱banquil li moco ya̱l ta. ¹² Li Dios quixba̱nu chi joˈcaˈin riqˈuineb re nak teˈxcˈul xtojbal xma̱queb chixjunileb li incˈaˈ queˈpa̱ban re li ya̱l. Aˈ ban chic li ma̱usilal quicuulac chiruheb xba̱nunquil.

Li Dios quixsicˈ ku re nak tocolekˈ

¹³ Ex inherma̱n, tento nak la̱o tobantioxi̱nk chiru li Dios che̱rix la̱ex. Raro̱quex xban li Ka̱cuaˈ Jesucristo. Li Dios quisicˈoc chak e̱ru chalen chak saˈ xticlajic re nak texcolekˈ xban nak santobresinbilex chic xban li Santil Musikˈej ut xban nak nequepa̱b li ya̱l. ¹⁴ Aˈan aj e nak li Dios quixsicˈ e̱ru re nak te̱pa̱b li evangelio li xkachˈolob che̱ru re nak textzˈako̱nk riqˈuin lix nimal xlokˈal li Ka̱cuaˈ Jesucristo. ¹⁵ Joˈcan ut ex herma̱n, cauhak taxak e̱chˈo̱l saˈ le̱ pa̱ba̱l. Me̱canab xpa̱banquil le̱ tijbal li xkachˈolob che̱ru nak xoa̱tinac e̱riqˈuin. Chi moco te̱canab xpa̱banquil li cˈaˈru xkatakla xyebal e̱re saˈ li hu li xkatakla e̱riqˈuin. ¹⁶ Li Ka̱cuaˈ Jesucristo ut li Dios li kaYucuaˈ, li narahoc ke, xban xnimal rusilal naxcˈojob kachˈo̱l chi junelic ut naxqˈue xcacuilal kachˈo̱l chi oybeni̱nc. ¹⁷ Aˈan ta ajcuiˈ chicˈojoba̱nk e̱chˈo̱l ut chiqˈuehok e̱cacuilal re xyebal ut re xba̱nunquil li cˈaˈru us.

Laj Pablo naxtzˈa̱ma chiruheb nak teˈtijok chirix

3  Ut anakcuan ex inherma̱n, cuan cuiˈchic cˈaˈru nacuaj xtzˈa̱manquil che̱ru. Nintzˈa̱ma che̱ru nak textijok chikix re nak ta̱yema̱nk li ra̱tin li Ka̱cuaˈ Jesucristo yalak bar ut cheˈxqˈue xlokˈal ut cheˈpa̱ba̱nk taxak joˈ nak quexpa̱ban la̱ex. ² Chextijok ajcuiˈ chikix re nak li Dios ta̱colok ke chiruheb li cui̱nk li incˈaˈ useb xnaˈlebeb ut nequeˈba̱nun re li ma̱usilal xban nak moco chixjunileb ta nequeˈpa̱ban re li Dios. ³ Aˈut li Ka̱cuaˈ Jesucristo, aˈan ti̱c xchˈo̱l ut junelic naxba̱nu li cˈaˈru naxye. Aˈan ta̱qˈuehok xcacuil e̱chˈo̱l ut aˈan ajcuiˈ ta̱colok e̱re chiru laj tza. ⁴ Ut cˈojcˈo kachˈo̱l saˈ e̱be̱n la̱ex saˈ xcˈabaˈ li Ka̱cuaˈ Jesucristo nak yo̱quex chixba̱nunquil li xkajultica che̱ru ut nakanau nak te̱ba̱nu li bar cuan takaye e̱re. ⁵ Aˈ taxak li Ka̱cuaˈ Jesucristo chitenkˈa̱nk e̱re chixnaubal nak raro̱quex xban li Dios ut chicua̱nk taxak e̱riqˈuin li cuyuc li naxqˈue li Cristo.

Tento nak totrabajik re nak cua̱nk cˈaˈru ke

⁶ Ut nakajultica che̱ru ex herma̱n, saˈ xcˈabaˈ li Jesucristo nak cherisi e̱rib riqˈuineb li herma̱n li yal subuc cutan nequeˈxba̱nu ut incˈaˈ nequeˈxpa̱b le̱ tijbal qˈuebil e̱re kaban. ⁷ La̱ex ac nequenau ajcuiˈ chanru xkaba̱nu nak xocuan e̱riqˈuin. Cheba̱nu joˈ xkaba̱nu la̱o. Incˈaˈ xosubuc cutan nak xocuan e̱riqˈuin. ⁸ Incˈaˈ xocuaˈac yal chi ma̱tan. Incˈaˈ xkacˈul katenkˈanquil nak xocuan saˈ e̱ya̱nk. Xkatacuasi ban kib chi cˈanjelac chi kˈek chi cutan re nak ta̱cua̱nk cˈaˈru ke re xnumsinquil li cutan junju̱nk ut ma̱ ani xkachˈiˈchˈiˈi saˈ e̱ya̱nk. ⁹ Moco xban ta nak ma̱cuaˈ ta kacˈulub xcˈulbal katenkˈanquil nak xkaba̱nu aˈan. Xkaba̱nu chi joˈcan yal re nak te̱tzol e̱rib kiqˈuin. ¹⁰ Ut nak toj cuanco chak e̱riqˈuin, xkajultica li xya̱lal aˈin che̱ru: li ani incˈaˈ naraj trabajic, incˈaˈ ta̱qˈuehekˈ xcua. ¹¹ Nakaye aˈin e̱re xban nak xkabi resil nak cuan junju̱nk saˈ e̱ya̱nk yal subuc cutan yo̱queb. Junes moloc a̱tin nequeˈxba̱nu ut incˈaˈ nequeˈraj trabajic. ¹² Saˈ xcˈabaˈ li Ka̱cuaˈ Jesucristo, ninye reheb li incˈaˈ nequeˈraj trabajic nak tento teˈtrabajik saˈ xya̱lal re nak ta̱cua̱nk cˈaˈru reheb re xnumsinquil li cutan junju̱nk. ¹³ Ut la̱ex, ex herma̱n, incˈaˈ taxak textitzˈk chixba̱nunquil li us. ¹⁴ Cui ut cuan junak saˈ e̱ya̱nk incˈaˈ naraj xpa̱banquil li a̱tin aˈin li xkatzˈi̱ba e̱re saˈ li hu aˈin, cheqˈuehak retal aˈan. Ut me̱rochbeni e̱rib riqˈuin re nak ta̱xuta̱na̱k. ¹⁵ Abanan incˈaˈ xi̱cˈ te̱ril. Cheqˈuehak ban xnaˈleb joˈ nak naqˈueheˈ xnaˈleb junak li i̱tzˈinbej.

Laj Pablo naxchakˈrabiheb

¹⁶ Aˈ taxak li Ka̱cuaˈ Jesucristo li naqˈuehoc tuktu̱quil usilal, chiqˈuehok e̱re li tuktu̱quilal chi junelic riqˈuin yalak cˈaˈru nequecˈul. Aˈ taxak li Ka̱cuaˈ Jesucristo chicua̱nk e̱riqˈuin che̱junilex. ¹⁷ La̱in laj Pablo. Riqˈuin cuukˈ yo̱quin chixtzˈi̱banquil lin cˈabaˈ joˈ cˈaynakin chixba̱nunquil rajlal nak nintzˈi̱ba li hu. Aˈan retalil nak la̱in xintaklan re li hu aˈin. Ut yo̱quin chixtaklanquil xsahil e̱chˈo̱l. ¹⁸ Aˈ taxak li usilal li naxqˈue li Ka̱cuaˈ Jesucristo chicua̱nk e̱riqˈuin che̱junilex. Joˈcan taxak.