Beginning

Li Hu li Quixtzˈi̱ba li San Pablo reheb laj Colosas

Xqˈuebal xsahileb xchˈo̱l

1  La̱in laj Pablo. La̱in x‑apóstol li Jesucristo xban nak joˈcan quiraj li Dios. Cuochben li hermano Timoteo nak yo̱quin chixtzˈi̱banquil li hu aˈin. ² Yo̱quin chi tzˈi̱bac e̱riqˈuin la̱ex li cuanquex aran Colosas. La̱ex ac xepa̱b chi tzˈakal li Jesucristo. La̱ex chic kech aj pa̱banelil ut rehex chic li Dios. Aˈ taxak li Dios li kaYucuaˈ chi‑osobtesi̱nk e̱re ut tixqˈue taxak e̱re li tuktu̱quil usilal.

Laj Pablo quitijoc chirixeb laj pa̱banel

³ Nak nocotijoc che̱rix junelic nakabantioxi chiru li Dios lix Yucuaˈ li Ka̱cuaˈ Jesucristo. ⁴ Nakabantioxi chiru li Dios xban nak xkabi resil nak cau e̱chˈo̱l chixpa̱banquil li Jesucristo ut xkabi ajcuiˈ resil nak nequera chixjunileb le̱ rech aj pa̱banelil. ⁵ Nak xerabi resil li colba‑ib, xerabi ajcuiˈ resil li sahil chˈo̱lejil cˈu̱lanbil saˈ choxa chokˈ e̱re. Xban nak yo̱quex chixyoˈoninquil aˈan, nequexpa̱ban ut nequera le̱ rech aj pa̱banelil. ⁶ Chanru nak xerabi resil li colba‑ib la̱ex, joˈcan ajcuiˈ nak yo̱queb chirabinquil saˈ chixjunil li ruchichˈochˈ. Nabal yo̱queb chi jalac lix naˈlebeb joˈ nak xjala le̱ naˈleb la̱ex chalen nak xerabi resil li colba‑ib ut quetau ru chi tzˈakal li rusilal li Dios. ⁷ Lix ya̱lal aˈan quichˈoloba̱c che̱ru xban laj Epafras. Aˈan kochben chi cˈanjelac chiru li Cristo ut raro kaban. Aˈan jun cha̱bil aj cˈanjel che̱ru saˈ xcˈabaˈ li Jesucristo. ⁸ Laj Epafras quiyehoc ke nak la̱ex nequera e̱ras e̱ri̱tzˈin xban nak li Santil Musikˈej cuan e̱riqˈuin. ⁹ Ut chalen nak quikabi resil nak xexpa̱ban, joˈcan nak junelic nocotijoc che̱rix. Nakatzˈa̱ma chiru li Dios nak tixcˈut che̱ru cˈaˈru naraj te̱ba̱nu. Ut nakatzˈa̱ma ajcuiˈ chiru li Dios nak li Santil Musikˈej tixqˈue e̱naˈleb chixtaubal ru li xya̱lal. ¹⁰ Nocotijoc che̱rix re nak ti̱cak le̱ yuˈam xban nak rehex chic li Ka̱cuaˈ ut sahak saˈ xchˈo̱l li Dios e̱riqˈuin. Junelic cheba̱nuhak li us ut chetauhak ru chi tzˈakal lix lokˈal li Dios. ¹¹ Nakatzˈa̱ma chiru li Dios re nak cua̱nk xcacuil e̱chˈo̱l xban xnimal xcuanquil li Dios. Chisahokˈ saˈ e̱chˈo̱l ut checuyak xnumsinquil li cˈaˈak re ru nachal saˈ e̱be̱n ut incˈaˈ ta̱chˈina̱nk e̱chˈo̱l. ¹² Chebantioxi chiru li Acuabej Dios li quiqˈuehoc ke chitzˈako̱nk riqˈuin li sahil chˈo̱lejil kochbeneb laj pa̱banel li ac xeˈxtau xya̱lal. ¹³ Li Dios corisi rubel xcuanquil laj tza ut coxkˈaxtesi rubel xcuanquil li Cˈajolbej li kˈaxal raro xban li Dios. ¹⁴ Li Ralal li Dios quicam chiru li cruz re kacolbal ut quixcuy quixsach li kama̱c.

Xban xcamic li Jesucristo, cuanco chic saˈ usilal riqˈuin li Dios

¹⁵ Li Dios incˈaˈ na‑ilman ru. Abanan nakanau chanru li Dios xban nak li Ralal quicˈulun saˈ ruchichˈochˈ chixcˈutbal chiku. Li Jesucristo aˈan li kˈaxal nim xcuanquil chiruheb chixjunil li queˈyoˈobtesi̱c. ¹⁶ Saˈ xcˈabaˈ aˈan, li Dios quixyoˈobtesi chixjunil li cˈaˈak re ru cuan saˈ choxa, joˈ ajcuiˈ li cuan saˈ ruchichˈochˈ. Li Dios quixyoˈobtesi chixjunil li na‑ilman ru, joˈqueb ajcuiˈ chixjunileb li musikˈej, li incˈaˈ na‑ilman ru. Aˈ yal chanru lix cˈanjel li junju̱nk ut lix cuanquileb, li Dios quiyoˈobtesin reheb saˈ xcˈabaˈ li Jesucristo ut aˈan laj e̱chal reheb. ¹⁷ Li Cristo ac cuan ajcuiˈ chak nak toj ma̱jiˈ nequeˈyoˈobtesi̱c li cˈaˈak re ru. Ut chixjunil li cˈaˈak re ru quiyoˈobtesi̱c qˈuebil saˈ xnaˈaj ut aran quicana xban nak li Cristo aˈan yal re saˈ xbe̱n. ¹⁸ Ut aˈan ajcuiˈ najolomin ke la̱o aj pa̱banel ut junajo chic riqˈuin li Cristo. Aˈan li naqˈuehoc re li kayuˈam. Aˈan li xbe̱n quicuacli cuiˈchic chi yoˈyo saˈ xya̱nkeb li camenak ut aˈan li kˈaxal nim xcuanquil saˈ xbe̱n chixjunil. ¹⁹ Li Jesucristo, aˈan tzˈakal Dios ut riqˈuin aˈan cuan chixjunil li cuanquilal xban nak joˈcan quiraj li Acuabej Dios. ²⁰ Xban xcamic li Jesucristo, chixjunil li cuan saˈ choxa joˈ ajcuiˈ li cuan saˈ ruchichˈochˈ naru ta̱cua̱nk chi sum a̱tin riqˈuin li Dios. Ut xban lix quiqˈuel li quihoyeˈ chiru li cruz, li Jesucristo quixqˈue li tuktu̱quil usilal. ²¹ Junxil incˈaˈ nequepa̱b li Dios. Ut xban li ma̱usilal cuan saˈ le̱ chˈo̱l, xicˈ nequeril li Dios ut junes li incˈaˈ us nequeba̱nu. ²² Abanan anakcuan xban lix camic li Cristo quexcˈam saˈ usilal riqˈuin li Dios. Xban nak li Cristo quicam saˈ kacˈabaˈ, naru toxkˈaxtesi chiru li Dios chi ac santobresinbilo ut chi ma̱cˈaˈak chic kama̱c ut chi tzˈakalak re ru li kapa̱ba̱l. ²³ Abanan tento nak texpa̱ba̱nk chi tzˈakal ut cauhak e̱chˈo̱l riqˈuin li Dios saˈ le̱ pa̱ba̱l. Me̱canab xyoˈoninquil li yechiˈinbil e̱re saˈ xcˈabaˈ li colba‑ib xban nak la̱ex ac nequenau nak saˈ e̱cˈabaˈ quicam li Jesucristo. Ut li resil li ac xerabi la̱ex yo̱queb chirabinquil saˈ chixjunil li ruchichˈochˈ. La̱in laj Pablo, tenebanbil saˈ inbe̱n xyebal resilal li colba‑ib.

Laj Pablo cau xchˈo̱l chi cˈanjelac saˈ xya̱nkeb li ma̱cuaˈeb aj judío

²⁴ La̱in nasahoˈ saˈ inchˈo̱l nak yo̱quin chixcˈulbal li raylal saˈ e̱cˈabaˈ. Li Cristo quixye nak teˈxcˈul li raylal li ralal xcˈajol. Joˈcan nak nasahoˈ saˈ inchˈo̱l nak yo̱quin chi tzˈako̱nc riqˈuin li raylal joˈ quixcˈul li Cristo saˈ xcˈabaˈeb chixjunileb li nequeˈpa̱ban re. ²⁵ Li Dios xinixqˈue chi cˈanjelac chiruheb laj pa̱banel. Joˈcan nak re e̱tenkˈanquil nak nincˈanjelac che̱ru re xchˈolobanquil chi tzˈakal lix ya̱lal li ra̱tin li Dios. ²⁶ Li xya̱lal aˈan mukmu chiruheb chixjunileb nak quicuan chak junxil. Abanan anakcuan moco mukmu ta chic. Li Dios yo̱ chixcˈutbesinquil chiruheb li nequeˈpa̱ban re. ²⁷ Li Dios quiraj nak la̱ex li ma̱cuaˈex aj judío, te̱nau nak e̱re ajcuiˈ li colba‑ib. Li resil aˈan mukmu nak quicuan chak. Abanan anakcuan nanauman nak lix ya̱lal li lokˈlaj esil, aˈan aˈin: Nak li Cristo cuan e̱riqˈuin ut saˈ xcˈabaˈ aˈan textzˈako̱nk riqˈuin lix nimal xlokˈal li Dios. ²⁸ Aˈ li Cristo, aˈan li nakachˈolob xya̱lal. Nakaqˈue xnaˈlebeb chixjunil ut nakacˈut xya̱lal chiruheb chi anchal li kachˈo̱l ut chi anchal li kacˈaˈux re nak tzˈakalak ru lix pa̱ba̱leb saˈ xcˈabaˈ li Jesucristo. ²⁹ Joˈcan nak ninyal inkˈe chi cˈanjelac chi anchal inchˈo̱l ut li Cristo naqˈuehoc incacuilal chixba̱nunquil lin cˈanjel chiru li Dios.

2  Nacuaj nak te̱nau nak junelic ninqˈue inchˈo̱l chi tijoc che̱rix la̱ex joˈcan ajcuiˈ chirixeb laj pa̱banel li cuanqueb aran Laodicea. Nintijoc chirixeb chixjunileb laj pa̱banel, li ac nequeˈxnau cuu, joˈ ajcuiˈ li incˈaˈ nequeˈxnau cuu. ² Ut nintzˈa̱ma ajcuiˈ chiru li Dios nak cauhak le̱ chˈo̱l saˈ le̱ pa̱ba̱l. Cherahak taxak e̱rib che̱ribil e̱rib re nak junajak e̱chˈo̱l. Lix naubal li naˈleb aˈin naxqˈue xcacuilal le̱ chˈo̱l. Chetauhak taxak ru chi tzˈakal li xya̱lal li mukmu nak quicuan chak. Li xya̱lal li mukmu nak quicuan chak, aˈan nak li Cristo cuan e̱riqˈuin. ³ Riqˈuin li Cristo naru nakatau li kanaˈleb xban nak caˈaj cuiˈ riqˈuin li Cristo cuan li tzˈakal ya̱l ut aˈan naxnau chixjunil. ⁴ Nintakla xyebal e̱re aˈin re nak incˈaˈ texbalakˈi̱k xbaneb li nequeˈtacchiˈin e̱re. Chanchan cha̱bil a̱tin nequeˈxye, abanan moco ya̱l ta li nequeˈxye. ⁵ Usta ma̱ anihin chak saˈ e̱ya̱nk, abanan junelic nequexincˈoxla. Nasahoˈ saˈ inchˈo̱l chirabinquil nak junaj le̱ chˈo̱l ut cuanquex saˈ ti̱quilal. Nasahoˈ ajcuiˈ saˈ inchˈo̱l chirabinquil nak anchal e̱chˈo̱l nak nequepa̱b li Cristo. ⁶ La̱ex xepa̱b li Cristo ut aˈan chic yal re saˈ e̱be̱n. Joˈcan nak junajakex taxak riqˈuin li Cristo, ut texcua̱nk joˈ naraj aˈan. ⁷ Chexpa̱ba̱nk chi anchal e̱chˈo̱l ut chetzolak e̱rib riqˈuin li Cristo. Cauhak e̱chˈo̱l chixpa̱banquil li cˈaˈru tzolbilex cuiˈ ut junelic chexbantioxi̱nk chiru li Dios.

Li acˈ yuˈam saˈ xcˈabaˈ li Cristo

⁸ Me̱qˈue e̱rib chi balakˈi̱c xbaneb li nequeˈxye nak cuan xnaˈlebeb. Ma̱cˈaˈ na‑oc cuiˈ li cˈaˈru nequeˈxye xban nak lix naˈlebeb moco riqˈuin li Cristo ta nachal. Aˈan yal xnaˈleb li ruchichˈochˈ ut yal xnaˈlebeb li kaxeˈ kato̱n. ⁹ Me̱qˈue e̱rib chi balakˈi̱c xbaneb aˈan. Nakanau nak chixjunil lix lokˈal li Dios ut lix cuanquil cuan riqˈuin li Cristo. Lix lokˈal ut lix cuanquilal quixcˈutbesi nak quicˈulun saˈ ruchichˈochˈ. ¹⁰ Kˈaxal nim xcuanquil li Cristo saˈ xbe̱neb li nequeˈtaklan ut kˈaxal nim ajcuiˈ xcuanquil saˈ xbe̱neb li musikˈej. Ut xban nak li Cristo cuan e̱riqˈuin, nim ajcuiˈ e̱cuanquil la̱ex ut tzˈakal re ru le̱ yuˈam xban nak qˈuebil e̱re xban li Cristo. ¹¹ Xban nak xepa̱b li Jesucristo, junajex chic riqˈuin ut chanchan nak xecˈul li circuncisión, aban ma̱cuaˈ joˈ li circuncisión nequeˈxba̱nu laj judío. Li xecˈul la̱ex, aˈan nak li Jesucristo quirisi saˈ le̱ chˈo̱l lix rahinquil ru li ma̱usilal. ¹² Nak xecˈul li cubi haˈ chanchan nak quexmukeˈ e̱rochben li Cristo ut quexcuacli cuiˈchic chi yoˈyo xban nak acˈ chic le̱ yuˈam nak xepa̱b li nimajcual Dios li quicuaclesin cuiˈchic re li Jesucristo chi yoˈyo saˈ xya̱nkeb li camenak. ¹³ Junxil camenakex nak quexcuan chak xban li ma̱c ut xban nak ma̱jiˈ isinbil saˈ le̱ chˈo̱l lix rahinquil ru li ma̱usilal. Aban anakcuan yoˈyo̱quex chic. Li Dios quicuaclesin cuiˈchic re li Jesucristo chi yoˈyo. Ut joˈcan ajcuiˈ la̱ex, yoˈyo̱quex chic xban nak acˈ chic le̱ yuˈam qˈuebil e̱re xban li Dios ut cuybil sachbil chixjunil le̱ ma̱c. ¹⁴ Cuan tojba ma̱c saˈ kabe̱n xban nak xkakˈet li chakˈrab tzˈi̱banbil chak najter. Abanan li Dios quixye nak tojbil chic rix chixjunil li kama̱c xban nak li Jesucristo quicam chiru li cruz saˈ kacˈabaˈ la̱o. ¹⁵ Nak quicam chiru li cruz li Jesucristo, li Dios quirisi xcuanquileb li nequeˈtaklan ut quirisi ajcuiˈ xcuanquileb li ma̱us aj musikˈej. Ut quixcˈut xxuta̱neb nak quinumta saˈ xbe̱neb. ¹⁶ Michˈinan e̱chˈo̱l cui ani nacuechˈin e̱re riqˈuin li cˈaˈru nequetzaca ut li cˈaˈru nequerucˈ. Chi moco ta̱chˈina̱nk e̱chˈo̱l cui ani nacuechˈin e̱re xban nak incˈaˈ nequeninkˈei lix ninkˈeheb. Cuan li nequeˈxninkˈei lix yoˈlajic li po ut li hiloba̱l cutan. ¹⁷ Chixjunil li cˈaˈru queˈxba̱nu, aˈan yal retalil li cˈaˈru ta̱cˈulma̱nk. Abanan, nak quicˈulun li Cristo, quitzˈakloc ru li cˈaˈru queˈxba̱nu eb aˈan. ¹⁸ Cuan li nequeˈxye nak cha̱bileb ut chanchan nak nequeˈxcubsi ribeb. Abanan moco ya̱l ta. Lix naˈlebeb moco qˈuebil ta xban li Dios. Li cˈaˈru nequeˈxba̱nu, aˈan yal cˈoxlanbil. Nequeˈxlokˈoni li ángel ut nequeˈxye cui incˈaˈ te̱ba̱nu joˈ nequeˈxba̱nu eb aˈan, incˈaˈ te̱cˈul li yechiˈinbil e̱re xban li Dios. Abanan me̱pa̱b li cˈaˈru nequeˈxye xban nak moco ya̱l ta. ¹⁹ Eb aˈan moco cuanqueb ta rubel xcuanquil li Cristo. Joˈcan nak nequeˈxba̱nu li bar cuan nequeˈraj eb aˈan. Abanan la̱o aj pa̱banel, junajo riqˈuin li Cristo ut cau kachˈo̱l riqˈuin xban nak aˈan najolomin ke. Ut aˈan ajcuiˈ natenkˈan ke chi qˈui̱c saˈ li kapa̱ba̱l joˈ naraj li Dios. ²⁰ Chanchan nak quexcam e̱rochben li Cristo nak xexpa̱ban. Acˈ chic le̱ yuˈam ut li cˈaˈru tzolbilex cuiˈ chak junxil saˈ ruchichˈochˈ ma̱cˈaˈ chic xcuanquil saˈ e̱be̱n. ¿Cˈaˈut nak toj nequeqˈue e̱rib chi balakˈi̱c ut chixba̱nunquil le̱ najter naˈleb? ²¹ Cuan li nequeˈxye e̱re: ―Me̱chap aˈan chi moco te̱chˈeˈ ut me̱tzaca, xban nak ma̱c xba̱nunquil aˈan, chanqueb. ¿Cˈaˈut nak nequepa̱b li cˈaˈru nequeˈxye? ²² Chixjunil li cˈaˈak re ru aˈan nalaj na‑osoˈ. Eb li naˈleb aˈan yal cˈoxlanbil ut xnaˈlebeb li cui̱nk. ²³ Chanchan cha̱bil naˈleb li nequeˈxye. Nequeˈxtacuasi rib nak nequeˈlokˈonin ut nequeˈxrahobtesi rib. Chanchan nak nequeˈxcubsi xcuanquileb chi ribileb rib. Aban aˈan incˈaˈ naxjal lix naˈleb xban nak moco nequeˈxcanab ta xrahinquil ru li ma̱usilal.

3  Chanchan nak xexcuacli cuiˈchic chi yoˈyo e̱rochben li Cristo nak xexpa̱ban. Acˈ chic le̱ yuˈam. Joˈcan nak qˈuehomak e̱chˈo̱l chixba̱nunquil li cha̱bil naˈleb ut chexcˈoxlak chirix li cuan saˈ choxa bar cuan cuiˈ li Cristo cˈojcˈo saˈ xnim ukˈ li Dios xban nak kˈaxal nim xcuanquil. ² Junelic checˈoxla li Dios ut me̱cˈoxla chic lix ma̱usilal li ruchichˈochˈ. ³ Lix ma̱usilal li ruchichˈochˈ ma̱cˈaˈ chic xcuanquil saˈ e̱be̱n. Chanchan camenakex chiru. Ac colbilex chic chiru li ma̱usilal xban nak junajex chic riqˈuin li Cristo, ut li Cristo junaj riqˈuin li Dios. ⁴ Caˈaj cuiˈ riqˈuin li Jesucristo cuan kayuˈam. Ut nak tol‑e̱lk cuiˈchic li Jesucristo tixcˈutbesi nak la̱o li ralal xcˈajol, ut totzˈako̱nk riqˈuin lix lokˈal.

Me̱ba̱nu chic li najter naˈleb

⁵ Xban nak acˈ chic le̱ yuˈam, canabomak chi junaj cua xrahinquil ru li incˈaˈ us joˈ li coˈbe̱tac yumbe̱tac, ut li ma̱us aj naˈleb. Ut canabomak xrahinquil ru li ma̱usilal. Ut me̱rahi ru li biomal xban nak li xrahinquil ru li biomal, aˈan chanchan ajcuiˈ xlokˈoninquil li jalanil dios. ⁶ Riqˈuin xba̱nunquil li ma̱usilal aˈin nachal xjoskˈil li Dios ut naxteneb li tojba ma̱c saˈ xbe̱neb li nequeˈkˈetoc re li ra̱tin. ⁷ Joˈcan ajcuiˈ queba̱nu chak la̱ex junxil nak toj cuanquex chak saˈ li ma̱c. ⁸ Aban anakcuan me̱ba̱nu chic chixjunil li cˈaˈ re ru aˈin: mexjoskˈoˈ, me̱poˈ e̱rib chi ribil e̱rib, me̱ba̱nu li ma̱usilal, mexkˈaban, ut mex‑a̱tinac saˈ yibru a̱tin. ⁹ Mexticˈtiˈic. Me̱ba̱nu chic chixjunil li ma̱usilal aˈin xban nak chixjunil li cˈaˈak re ru queba̱nu chak najter ac xerisi saˈ le̱ chˈo̱l. ¹⁰ Anakcuan acˈ chic le̱ yuˈam. Li Dios, aˈan li quijaloc re le̱ yuˈam ut aˈan ta̱tenkˈa̱nk e̱re cuulaj cuulaj chixtzolbal e̱rib riqˈuin re nak te̱tau ru chi tzˈakal chanru li Dios ut te̱ba̱nu li naraj aˈan. ¹¹ La̱o aj pa̱banel juntakˈe̱to chiru li Dios xban nak junajo saˈ li acˈ yuˈam. Moco jalaneb ta laj griego chiruheb laj judío. Moco jalaneb ta li tzolbileb chiruheb li incˈaˈ tzolbileb. Moco jalaneb ta li xeˈxba̱nu li circuncisión chiruheb li incˈaˈ xeˈxba̱nu. Moco jalan ta li junju̱nk usta jalan xtenamit. Moco jalaneb ta li cuanqueb xpatrón chiruheb li ma̱cˈaˈeb xpatrón. Li kˈaxal lokˈ xcˈoxlanquil aˈan aˈin: Li Jesucristo cuan riqˈuineb li junju̱nk li nequeˈpa̱ban re ut junajo chic saˈ xcˈabaˈ li Jesucristo. ¹² Li Dios kˈaxal nequexra ut quixsicˈ e̱ru chokˈ ralal xcˈajol. Joˈcan nak chexcua̱nk saˈ ti̱quilal. Chetokˈoba ruheb le̱ ras e̱ri̱tzˈin ut chetenkˈaheb. Me̱kˈetkˈeti e̱rib. Chexcua̱nk saˈ tu̱lanil ut checuyak li raylal. ¹³ Checuyak e̱rib chiribil e̱rib. Ut cui cuan junak cuan xma̱c che̱ru, checuyak xma̱c. Joˈ nak quixcuy e̱ma̱c li Ka̱cuaˈ, joˈcan ajcuiˈ cheba̱nu la̱ex. ¹⁴ Li kˈaxal lokˈ xba̱nunquil chiru chixjunil li cˈaˈak re ru aˈin, aˈan li rahoc ib xban nak riqˈuin aˈan junajak li kacˈaˈux ut tzˈakalak re ru li takaba̱nu. ¹⁵ Junajakex taxak saˈ le̱ pa̱ba̱l xban nak sicˈbil e̱ru xban li Dios. Chicua̱nk li tuktu̱quilal saˈ le̱ chˈo̱l li naxqˈue li Cristo re nak texcua̱nk saˈ xya̱lal. Ut junelic chebantioxi chiru li Dios li usilal xba̱nu e̱re. ¹⁶ Li ra̱tin li Cristo chicana̱k saˈ e̱chˈo̱l chi junelic re nak cua̱nk e̱naˈleb. Chetzolak e̱rib che̱ribil e̱rib ut chetenkˈa e̱rib che̱ribil e̱rib saˈ le̱ pa̱ba̱l. Chexbicha̱nk re xlokˈoninquil li Dios. Chexbicha̱nk joˈ naxcˈut che̱ru li Santil Musikˈej ut junelic chexbantioxi̱nk chiru li Dios. ¹⁷ Ut chixjunil li cˈaˈru te̱ye ut te̱ba̱nu, cheba̱nuhak re xqˈuebal xlokˈal li Jesucristo. Ut junelic chexbantioxi̱nk chiru li Acuabej Dios saˈ xcˈabaˈ li Ka̱cuaˈ Jesucristo.

Chexcua̱nk saˈ xya̱lal riqˈuineb le̱ ras e̱ri̱tzˈin

¹⁸ Ex ixakilbej, chepa̱ba̱k le̱ be̱lom joˈ e̱cˈulub xba̱nunquil xban nak la̱ex chic aj pa̱banel. ¹⁹ Ut la̱ex be̱lomej, cherahak le̱ rixakil ut mexjoskˈoˈ riqˈuineb. ²⁰ Ut joˈcan ajcuiˈ la̱ex alalbej, junelic chexpa̱ba̱nk chiruheb le̱ naˈ e̱yucuaˈ xban nak aˈan li nacuulac chiru li Ka̱cuaˈ Dios. ²¹ Ex yucuaˈbej, me̱chˈila le̱ ralal e̱cˈajol chi ma̱cˈaˈ rajbal re nak incˈaˈ ta̱chˈina̱nk xchˈo̱leb. ²² Ex aj cˈanjel, junelic chexpa̱ba̱nk chiruheb le̱ patrón. Chanru nak nequexcˈanjelac nak yo̱ che̱rilbal le̱ patrón, joˈcan ajcuiˈ texcˈanjelak nak incˈaˈ yo̱ che̱rilbal. Mexcˈanjelac re xnimobresinquil e̱rib. Chexcˈanjelak ban chi anchal le̱ chˈo̱l xban nak la̱ex nequera li Ka̱cuaˈ Dios. ²³ Nak yo̱quex chi cˈanjelac chiru le̱ patrón, yo̱quex ajcuiˈ chi cˈanjelac chiru li Ka̱cuaˈ Dios xban nak la̱ex rehex chic li Dios. Joˈcan nak chixjunil li cˈaˈru te̱ba̱nu, cheba̱nuhak chi anchal e̱chˈo̱l. ²⁴ Joˈcan cheba̱nu xban nak la̱ex ac nequenau nak li Ka̱cuaˈ Dios ta̱qˈuehok le̱ kˈajca̱munquil li yechiˈinbil e̱re xban nak li Ka̱cuaˈ Jesucristo, aˈan li tzˈakal patrón saˈ e̱be̱n ut yo̱quex chi cˈanjelac chiru. ²⁵ Li ani tixba̱nu li incˈaˈ us tixcˈul xtojbal xma̱c aˈ yal cˈaˈru lix ma̱c xban nak li Dios incˈaˈ naxsicˈ ru ani tixqˈue chixtojbal xma̱c.

4  Ex patrón, chexcua̱nk saˈ usilal riqˈuineb laj cˈanjel che̱ru ut saˈ xya̱lal chetaklaheb xban nak la̱ex nequenau nak cuan e̱patrón saˈ choxa. ² Me̱canab tijoc. Chextijok chi anchal e̱chˈo̱l ut junelic chexbantioxi̱nk chiru li Dios. ³ Ut nak yo̱kex chi tijoc, chextijok ajcuiˈ chak chikix la̱o re nak tixqˈue ke li Dios xyebal resil li colba‑ib saˈ xcˈabaˈ li Cristo. Li xya̱lal li colba‑ib, aˈin mukmu nak quicuan chak. La̱ex nequenau nak cuanquin chi pre̱xil xban xyebal resil li colba‑ib. ⁴ Ut chextijok ajcuiˈ chak chicuix re nak tinru̱k chixchˈolobanquil chi tzˈakal li xya̱lal joˈ naraj li Dios. ⁵ Chexcua̱nk saˈ xya̱lal riqˈuineb li ma̱cuaˈeb aj pa̱banel ut yalak bar cua̱nkex chi kˈek chi cutan junelic te̱chˈolob xya̱lal li colba‑ib chiruheb. ⁶ Junelic cha̱bil chex‑a̱tinak. Sicˈomak chanru tex‑a̱tinak riqˈuineb re nak teˈxqˈue xchˈo̱l chirabinquil. Ut chenauhak chanru xsumenquil li cˈaˈru teˈxpatzˈ e̱re.

Xqˈuebal xsahileb xchˈo̱l laj pa̱banel

⁷ Li hermano Tíquico raro kaban ut cha̱bil aj cˈanjel chiru li Dios cuochben la̱in. Aˈan ta̱yehok resil e̱re chanru cuanquin arin. ⁸ Aˈan aj e nak tintakla e̱riqˈuin. Tixye e̱re chanru nak cuanco arin ut tixqˈue ajcuiˈ xcacuil e̱chˈo̱l saˈ le̱ pa̱ba̱l. ⁹ Ta̱xic ajcuiˈ li kaherma̱n Onésimo rochben. Aˈan e̱rech tenamitil. Aˈan ti̱c xchˈo̱l ut raro kaban. Ut aˈaneb teˈyehok resil e̱re li cˈaˈru yo̱co chixcˈulbal arin. ¹⁰ Laj Aristarco li cuochben nak cuanco saˈ tzˈalam naxtakla ajcuiˈ xsahil e̱chˈo̱l. Naxtakla ajcuiˈ xsahil e̱chˈo̱l laj Marcos li rechˈalal laj Bernabé. Ac xintakla xyebal e̱re nak ta̱cuulak laj Marcos e̱riqˈuin. Nak ta̱cuulak e̱riqˈuin, checˈulak saˈ xya̱lal chi sa saˈ e̱chˈo̱l. ¹¹ Ut naxtakla xsahil e̱chˈo̱l laj Justo. Aj Jesús ajcuiˈ nayeman re. Caˈaj eb cuiˈ li oxib aˈan saˈ xya̱nkeb laj pa̱banel aj judío li yo̱queb chi tenkˈa̱nc cue chixyebal resil li colba‑ib. Ut nequeˈxcˈojob inchˈo̱l. ¹² Joˈcan ajcuiˈ laj Epafras naxtakla ajcuiˈ xsahil e̱chˈo̱l. Aˈan e̱rech tenamitil ut aˈan aj cˈanjel chiru li Cristo. Junelic yo̱ chi tijoc che̱rix re nak texcua̱nk saˈ xya̱lal ut cauhak e̱chˈo̱l saˈ le̱ pa̱ba̱l chixba̱nunquil chi tzˈakal joˈ naraj li Dios. ¹³ La̱in nacuaj nak te̱nau nak laj Epafras junelic nequexcˈoxla ut junelic yo̱ chi tijoc che̱rix. Ut natijoc ajcuiˈ chirixeb li cuanqueb Laodicea joˈqueb ajcuiˈ li cuanqueb aran Hierápolis. ¹⁴ Naxtakla ajcuiˈ xsahil e̱chˈo̱l laj Lucas, laj banonel li kˈaxal raro kaban. Joˈcan ajcuiˈ laj Demas naxtakla xsahil e̱chˈo̱l. ¹⁵ Cheqˈue xsahil xchˈo̱leb laj pa̱banel li cuanqueb aran Laodicea. Ut cheqˈue ajcuiˈ xsahil xchˈo̱l li xNinfas, joˈqueb ajcuiˈ laj pa̱banel li nequeˈxchˈutub rib saˈ li rochoch chixlokˈoninquil li Dios. ¹⁶ Nak acak xeril xsaˈ li hu aˈin la̱ex, te̱takla riqˈuineb laj pa̱banel li cuanqueb Laodicea, re nak teˈril ajcuiˈ xsaˈ li hu eb aˈan. Ut nacuaj nak la̱ex te̱ril xsaˈ li hu li xintakla riqˈuineb aˈan. ¹⁷ Ut cheyehak ajcuiˈ re laj Arquipo nak chixqˈuehak xchˈo̱l chixba̱nunquil li cˈanjel li quiqˈueheˈ re xban li Ka̱cuaˈ Dios. ¹⁸ La̱in laj Pablo. Riqˈuin cuukˈ yo̱quin chixtzˈi̱banquil li cuib oxib chi a̱tin aˈin re xqˈuebal xsahil saˈ e̱chˈo̱l. Nintzˈa̱ma che̱ru nak misach saˈ e̱chˈo̱l nak cuanquin chi pre̱xil. Aˈ taxak li Ka̱cuaˈ Dios chi‑osobtesi̱nk e̱re. Joˈcan taxak.