Book of Common Prayer

¹⁰ И навистина, Бог, Кој е Творец на се и Кому Му припаѓа се, постапи соодветно, кога преку страдања Го издигна Исуса во совршен водач, зашто Исус на многу Божји чеда им донесе спасение и слава. ¹¹ Сега и Исус, и оние што ги освети, имаат еден ист небесен Татко. Затоа Исус не се срами да ги нарече браќа, ¹² кога на Бог Му се обраќа со следниве зборови:

„Твоето име меѓу браќата ќе Го проповедам,

и сред собранието ќе Те прославувам^[a]!“

¹³ А го рече и следното:

„Во Бога ќе ја положам Својата доверба.“

И потоа: „Еве Ме заедно со чедата што Ми ги даде Бог^[b]!“

¹⁴ Бидејќи „чедата“ - како што Тој ги нарече - се луѓе од крв и месо, и самиот Исус стана како нив, со цел преку Својата смрт да го уништи Ѓаволот, кој ја има власта над смртта, ¹⁵ и да не ослободи сите нас, кои цел живот живееме како робови на стравот од смртта.

¹⁶ Јасно е дека Исус не дојде да им помогне на ангелите, туку на Авраамовите потомци^[c]. ¹⁷ Затоа, Тој мораше во се да стане сличен на Своите „браќа“, за да стане нивни верен и милостив Првосвештеник пред Бог. Така можеше да принесе жртва што ќе ги отстрани гревовите на луѓето. ¹⁸ Сега, кога и Тој помина низ страдања и искушенија, може да ни помага кога ние минуваме низ искушенија.

Раѓањето на Исус, Месијата

¹⁸ А еве како се случи раѓањето на Исус, Месијата: Неговата мајка Марија беше свршена за Јосиф; но, уште додека таа беше девица, преку Светиот Дух во нејзината утроба се зачна дете. ¹⁹ Тогаш нејзиниот свршеник Јосиф, кој беше праведен човек и не сакаше јавно да ја посрами, реши во тајност да ја остави. ²⁰ Но токму кога науми да го стори тоа, насон му се јави ангел Господов и му рече: „Јосифе, чедо Давидово, не плаши се да ја земеш Марија за жена, зашто Детето зачнато во неа е од Светиот Дух. ²¹ Таа ќе роди Син на кој ќе Му дадеш име Исус^[a], зашто Тој ќе го спаси својот народ од неговите гревови.“

²² А сето ова се случи за да се исполни она што Господ го беше кажал преку пророкот Исаија: ²³ „Ете, девица ќе зачне и ќе роди Син; и ќе го наречат Имануел, што во превод значи ,Бог е со нас.‘“

²⁴ Кога стана од спиење, Јосиф постапи така како што му беше наредил ангелот Господов, и ја зеде Марија за своја жена. ²⁵ Но Јосиф ја запази Марија како девица, се додека таа не роди Син^[b], на кој тој Му даде име Исус.