Revised Common Lectionary (Complementary)

Dee 25 Psalm

En Psalm fonn Doft.

¹ Ekj häw miene Seel opp no die, O Herr Gott.

² O mien Gott, ekj doo enn die fetruehe, lot mie nijch to schaunde woare; lot miene Fiend nijch jewenne äwa mie.

³ Jo, lot kjeena dee enn die fetruehe deit to schaunde woare; lot dän to schaunde woare dee oone Uasoak sindje.

⁴ Moak mie diene Wäaj to erkjane, O Herr Gott, doo mie enn dien Stijch ennleare.

⁵ Leid mie enn diene Woarheit, un doo mie ennleare, dan du best miene Radunks Gott, ekj lua opp die dän Dach äwa.

⁶ Behool, O Herr Gott, diene Erboarmunje un diene Leeftolijchkjeit, dan dee sent fonn Eewijchkjeit häa.

⁷ Doo dee Sind fonn miene Jugent nijch behoole, oda mien Äweträde; doo aun mie denkje enn dien Erboarme omm dien Goots haulwe, O Herr Gott.

⁸ Dee Herr Gott es Goot un Opprajcht, doaromm woat hee Sinda enn daen Wajch ennleare.

⁹ Hee woat dee Saunftmootje enn Jerejcht leide, un hee woat dee Saunftmootje sien Wajch ennleare.

2 Doaromm, wann doa irjent waut fa Troost es enn Christus, irjent waut fa Jemeenschofft emm Jeist, irjent en Jaumahoat, irjent waut fa Metliet;

² dan moakt miene Freid foll daut jie ju eenich sent, junt aula jlikje goot sent, aewareen denke, en aula toop een Ziel habe.

³ Doot nusscht ut stollte ennbilness, oda ut Tsank, leewa enn Deemut acht eena daem aundra hecha aus sikj selfst.

⁴ Seet nich bloos ut no daut waut junt selfst intreseat, oba uk daut waut daem Naeakjsten intreseat.

⁵ Doot soo denke aus Jesus Christus docht;

⁶ dee fonn Natua ut Gott wea, oba Gott jlikj senne nich met Jewault musst faust jehoole woare;

⁷ leewa muak sikj selfst ohne Ea, neem Kjnachts Natua aun, en wort jebuare en aunjeseene so aus en jeweenlija Mensch,

⁸ en deemieticht sikj selfst, en wort jehuarsaum bott aum Doot, sogoa daen Doot aum Kjriets.

⁹ Doaromm haft Gott am tom aulahechste jestalt, en haft am en Nome jejaeft, dee aewa aule aundre Nomes steit;

¹⁰ so daut enn Jesus sien Nome aule Kjneehe sikj beaje sele, emm Himel, oppe Ead, en unjare Ead;

¹¹ en daut jieda Tung bekjanne saul daut Jesus Christus de Herr es, to Gott daem Foda siene Ea.

¹² Doaromm, miene leefste, soo aus jie emma sent jehuarsaum jewast, nich bloos aus ekj bie junt wea, oba sogoa nu leewa daut ekj fonn junt wajch sie, oabeit june Seelichkjeit ut met Forcht en Tsetre.

¹³ Wiel Gott es dee, dee enn ju oabeit beides daut Felange to ha, en uk sien Wele to doone soo aus am daut jefelt.

²³ Aus hee em Tempel enenn kjeem en lead, kjeeme Huagaprieste en Elteste fom Follkj no am en fruage am: "Derch waut fonne Follmacht deist du dise Dinje? en waea jeef die dee Follmacht?"

²⁴ En Jesus auntwuad en saed to an: "Ekj woa junt uk ne Froag stale, en wan jie mie daut saje, dan woa ekj junt uk saje derch waut fonne Follmacht ekj dit doo.

²⁵ Daem Jehaun siene Taufe, fonn wua wea dee, fom Himel, oda fonn Mensche?" See raede unja sikj selfst en saede: "Wan wie saje, fom Himel, dan woat hee saje: 'Wuaromm jleewd jie am dan nich?'

²⁶ Oba wan wie saje: fonn Mensche; dan mott wie onns aengste fa daut Follkj,' dan dee hilde aule daut Jehaun en Profeet wea.

²⁷ See auntwuade Jesus en saede: "Wie weete nich." En hee saed to an: "Dan saj ekj junt uk nich derch waut fonne Follmacht ekj dise Dinje doo.

²⁸ Oba waut meen jie? En Maun haud twee Kjinja. He kjeem nom easchta en saed: 'Mien Kjint, go en oabeid fonndoag enn mien Wiengoade.'

²⁹ Hee auntwuad am en saed: "Ekj go, Herr.' Oba hee jinkj nich.

³⁰ Hee kjeem no daem tweeda en saed daut naemlije. En hee auntwuad en saed: 'Ekj wel nich,' oba lota wea am daut leet, en hee jinkj doch.

³¹ Woone fonn dise beid deed sien Foda sien Wele?" See saede: "Dee latsta." Jesus saed to an: Enn WEoarheit saj ekj junt, daut dee Takskollakjta en Huare woare eeha enn Gott sien Rikj enenn gone aus jie.

³² Dan Jehaun kjeem no junt em Jerajchtichkjeits Wajch, en jie jleewde am nich; oba dee Takskollakjte en Hure jleewde am; en aus jie daut sage, deed jie doch nich Buesse am to jleewe.