Revised Common Lectionary (Complementary)

Dee 26 Psalm

En Psalm fonn Doft.

¹ Doo mie rejchte, O Herr Gott, dan ekj ha enn daut Follstendijchkjeit fonn mien Hoat jewankt, ekj ha uk enn däm Herr Gott fetruet. Ekj woa nijch wajch rutsche.

² Forsch mie ut, O Herr Gott, un proow mie, moak mien Jewesse un mien Hoat rein.

³ Dan dien Erboarme es fer miene Uage, un ekj ha enn diene Woarheit jewaundelt.

⁴ Ekj ha nijch met Mensche jesäte dee leaje; un ekj woa nijch bie dee Heijchle enenn gone.

⁵ Ekj ha dee Beese äare Fesaumlunj jehaust, un woa nijch met dee Gottloose sette.

⁶ Ekj woa miene Henj enn Onnschult wausche, soo woa ekj romm dien Aultoa gone, O Herr Gott,

⁷ to heare moake met dee Stem fonn Danke, un aul diene wunndafolle Woakje tale.

⁸ O Herr Gott, ekj ha dän Plauts fonn dien Hus leef jehaut, un dee Städ wua diene Harlijchkjeit wont.

⁹ Dee Leew mott nich faulsch senne. Hausst daut Beese, hoolt daut goodet faust.

¹⁰ Siet ju unjarenaunde aus Breeda fonn Hoate Goot; doot eena daem aundre enn Ea faeatrakje.

¹¹ Siet iewrich, nich ful; drinjent em Jeist; deent daem Herr.

¹² Siet froo en Hopninj, jeduldich enn Triebsaul, hoolt aun em Jebaed.

¹³ Halpt dee Heilje met wua Mangel es, siet emma Gaustfrie.

¹⁴ Saeajent daen, dee junt fefolje; saeajent, doot nich fedaume.

¹⁵ Freit junt met daen dee sikj freie, en hielt met daen dee hiele.

¹⁶ Hat eenalei Senn unjeranaunda. Seakjt nich no daut waut huach es, leewa hoolt ju met daen dee deemietich sent. Hoolt junt nich selfst fa Kluak.

¹⁷ Tolt nich Beeset trigj fa Beeset, fesorcht leewa Goodet fa aule Mensche.

¹⁸ Wan maeajlich, soo wiet es junt daut aunbelangt, feseakjt met aulem enn Fraed to laewe.

¹⁹ Leefste Frind, doot nich selfst Rach eewe, jaeft leewa Oaja Rum, dan daut steit jeschraewe: "Rach eewe es miene Sach; ekj woa trigjtole, sajcht de Herr".

²⁰ Oba wan dien Fient hungat, fooda am; wan am darscht, jef am to drinke; wan du daut deist woascht du am doaderch jleajendje Kole oppem Kopp laje.

²¹ Lot daut Beese nich aewa ju jewenne; leewa jewennt aewe daut Beese met Goodet.

²¹ Fonn donn aun funk Jesus aun siene Jinja to wiese daut hee no Jerusalem gone musst, en doa fael liede derch dee Elteste, en Huagapriesta, en Schreftjeleade, en musst doot jemoakt woare, en dan aum dredde Dach opptostone.

²² Donn neem Peeta am auntsied, en beschwicht am en saed: "Mucht Gott die halpe, Herr! soont saul die nich paseare!"

²³ Oba hee dreid sikj omm, en saed to Peeta: "Go hinja mie, Soton; du best mie en Aunstoos! du denkst nich soo aus Gott, oba soo aus Mensche!"

²⁴ Donn saed Jesus to siene Jinja: "Wan irjentewaea mie wel nofolje, dan lot am sikj selfst aufsaje, en sien Kjriets opp sikj naeme, en dan mie nofolje.

²⁵ Dan waeaemma sien Laewe rade wel, woat daut feleare; en waeaemma sien Laewe feleare woat omm mienet haulwe, woat daut finje.

²⁶ Dan waut woat en Mensch daut nutse wan hee de gaunse Welt sull jewenne, oba siene eajne Seel feleare? oda waut kaun en Mensch enn tusch jaewe fa siene Seel?

²⁷ Dan de Mensche saen es dicht biem kome met siene Enjel enn sien Foda siene Harlichkjeit, en dan woat hee en jieda eenem doano beloone aus sien Waundel es jewast.

²⁸ Enn Woarheit saj ekj junt: Doa sent soone dee hia stone, dee daen Doot nich schmakje woare, bott see daen Menschesaen woare kome seene enn sien Kjeenichrikj."