Revised Common Lectionary (Complementary)

Dee 145 Psalm

En Preis Psalm, fonn Doft.

¹ Ekj woa Die eare, mien Gott, O Kjeenijch, un dien Nome fa emma un emma säajne.

² Ekj woa die jieda dach säajne, un ekj woa dien Nome fa emma un emma preise.

³ Dee Herr Gott es groot un emm groote jepreist to woare, un sien Grootet jeit nijch ut to forsche.

⁴ Eene Jennerazion no dee näakjste Jennerazion saul diene Woakje preise, un fonn diene majchtje Woakje räde.

⁵ Ekj woa besenne äwa dee harlijche Ea fonn diene Madastijchkjeit, un dee Dinje fonn diene wunndafolle Woakje.

⁶ Un dee selle räde fonn dee Macht fonn diene besondre Woakje; un ekj woa räde fonn diene Grootheit.

⁷ Dee selle utdrekjlijch räde fonn dien grootet Goots, un dee selle sinje fonn diene Jerajchtijchkjeit.

⁸ Dee Herr Gott es jnädijch un erboarment, langsom to Oaja, un haft grootet Erboarme;

²³ En Jesus saed to siene Jinja: "Enn woarheit saj ekj junt, daut woat schwoa sene fa en rikja Maun en daut Himelsrikj enenn to kome.

²⁴ Ekj saj junt wada: daut es leichta fa en Kameel derch en Noteluag to gone, dan fa en rikja Maun enn Gott sien Rikj enenn to kome."

²⁵ Aus dee Jinja daut heade, weare see seeha erstaunt, en saede: "Waea kaun dan seelich woare?"

²⁶ Jesus kjikjt an aun en saed: "Bie Mensche es daut ommaeajlich, oba bie Gott es aules maeajlich."

²⁷ Donn auntwuad Peeta en saed to am: "Kjikj! wie ha aules felote en sent die nojefolcht, waut woa wie doafaea ha?"

²⁸ En Jesus saed to an: "Enn Woarheit saj ekj junt dee mie sent nojefolcht, daut enn dee Wadajeburt, wan dee Menschesaen opp sien Troon sette woat enn siene Harlichkjeit, woa jie uk opp twalf Troone sette, en woare dee Twlaf Jeschlajchte Iesrael rechte.

²⁹ En waeaemma Hiesa, oda Breeda, oda Sestre, oda Foda, oda Mutta, oda Kjinja, oda Flekje Launt felote haft omm mien Nome haulwe, woat fael meeha kjriehe, en daut eewjet Laewe oawe.

³⁰ Oba fael dee nu daut easchte sent, woare daut latste sene, en latste woare daut easchte sene."