Revised Common Lectionary (Complementary)
Dee 128 Psalm
En leet fonn nehejcht gone.
1 Jesäajent es jieda eena dee däm Herr Gott ferjchte deit, dee enn siene Wäaj waundelt.
2 Dan du saust sejchlaijch daut Frucht fonn diene Henj äte; du saust froo senne un aules es goot to die.
3 Diene Fru saul soo aus ne fruchtboare Wienrank senne bie dee Siede fonn dien Hus; un diene Säns soo aus Oliewebeem romm dien Desch.
4 See! Soo saul dee Maun jesäajent senne dee däm Herr Gott ferjcht.
5 Dee Herr Gott woat die säajne ut Zion, un du saust daut Goots fonn Jerusalem seene aul diene Doag.
6 Jo, du saust diene Säns äare Säns seene. Mucht Fräd opp Iesrael senne.
3 Doaromm, heilje Breeda, dee jie en Aundeel ha aun daen himlische Beroop, betracht daen Apostel en Huagapriesta daen wie bekjanne, Jesus,
2 dee daem tru wea dee am bestemt haud, so aus uk Mooses tru wea enn sien gaunset Hus.
3 Oba disem traft meeha Ea aus Mooses, soo aus dee, dee en Hus but jratre Ea haft aus daut Hus selfst.
4 Dan en jiedat Hus es fon waem jebut, oba Gott esset dee aules jebut haft.
5 Aun eene Haunt, Mooses wea tru enn sien gaunset Hus, aus en Deena, fa en Zeichnes fa daut waut noch enne Tookunft sull jesajcht woare;
6 Oba aune aundre Haunt, Christus aus en Saen aewa sien eajnet Hus, en wie sent daut Hus, wan wie Fetruehe en dee Freid enn onnse Hopninj faust hoole bottem Enj.
Copyright © 2001 by Elmer Reimer