Old/New Testament

नवा पाथर क सिलन

10 “ओह समइ, यहोवा मोसे कहेस, ‘तू पहिली सिलन क नाई पाथर फारिके दुइ सिला बनावा। तब तू पचे मोरे लगे पहाड़े पइ आवा। अपने बरे एक काठे क संदूख भी बनावा। ² मइँ पाथरे क सिलन पइ उ सबइ सब्द लिखब जउन पहिंली सिलन पइ लिखे रहेन। तू पहिली सिलन क तोड़ी दिहेन। तब तू पचन्क इ नवी सिलन क सन्दूखे मँ रखइ चाही।’

³ “एह बरे मइँ बबूल क एक ठु सन्दूख बनाएउँ। मइँ पहिली सिलन क तरह पाथर फारिके दुइ सिलन बनाएउँ। तब मइँ पहाड़े पइ गएउँ। मोरे हथवा मँ दुइ सिलन रहिन ⁴ अउर यहोवा ओनही सबदन क लिखेस जेनका उ तब लिखे रहा जब दस हकुमन क उ आगी मँ स तू पचन्क दिहे रहा अउर तू पचे पहाड़े क चारिहुँ कइँती बटुरा रह्या। तब यहोवा पाथर क सिलन मोका दिहस। ⁵ मइँ घूमेउँ अउर पहाड़े क खाले आएउँ। मइँ आपन बनाए भए सन्दूखे मँ सिलन क रखेउँ। यहोवा मोका एन सिलन क ओहमाँ धरइ क आदेस दिहेस।”

⁶ (इस्राएल क लोग याकान क लोगन क कुआँ स मोसेरा क जात्रा किहेन। हुआँ हारुन मरा अउ दफनाव गवा। हारुन क पूत एलीआज़ार हारून क जगह पइ याजक क रुप मँ सेवा सुरु किहस। ⁷ तब इस्राएल क लोग मोसेरा स गुदगोदा गएन अउर उ पचे गुदगोदा स नदियन क पहँटा योतबाता गएन। ⁸ ओह समइ यहोवा लेवी क परिवार समूह क आपन खास काम बरे दूसर परिवार समूहन स अलगाइ दिहस। ओनका यहोवा क करार क सन्दूखे क लइ जाइ क काम, यहोवा क समन्वा खड़ा होइके अउर ओकर सेवा करइ क काम रहा। उ यहोवा क नाउँ पइ उ पचे लोगन क आसीर्बाद देइ क काम भी करत रहेन। उ पचे अब भी इ खास काम करत हीं। ⁹ इहइ कारण अहइ कि लेवी बंस क मनइयन क भुइँया क कउनो हींसा दूसर परिवार समूहन क नाई नाहीं मिल पावा। लेवी बंसियन क हींसे मँ यहोवा पड़ा। यहोवा तोहार परमेस्सर ओकर संग इ वाचा किहेस।)

¹⁰ “मइँ पहाड़े पइ पहिली दाईं क तरह चालीस दिन अउ चालीस रात रुका रह। यहोवा ओह समइ भी मोर बातन क सुनेस। यहोवा तू पचन्क नास न करइ क निहचय किहेस। ¹¹ यहोवा मोसे कहेस, ‘जा अउर मनइयन क जात्रा पइ लइ जा। उ पचे उ देस मँ जइहीं अउ ओहमाँ रइहीं जेका मइँ ओनके पुरखन क देइ क बचन दिहे अहउँ।’

यहोवा असलियत मँ का चाहत ह

¹² “इस्राएल क लोगो, अब सुना! यहोवा, तोहार परमेस्सर जउन चाहत ह उ इ बाटइ: उ चाहत ह कि तू ओकर सम्मान करा अउ ओकर रास्ता प रहा। उ चाहत ह परमेस्सर स पिरेम अउर ओकर अराधना आपन पूरा हिरदइ अउर पूरा आतिमा स करा। ¹³ यहोवा क नेमन अउ आदेसन क पालन करा। मइँ इ सबइ आदेसन तोहका आपन भलाई बरे देत अहइँ।

¹⁴ “हर एक चीज, यहोवा तोहरे परमेस्सर क अहइ। सरग, सबन त ऊँचा उहइ क अहइ। भुइयाँ अउ ओह पइ क सारी चिजियन यहोवा तोहरे परमेस्सर क अहइँ। ¹⁵ यहोवा तोहरे पुरखन स बहोत पिरेम करत रहा। उ ओनसे एतना पिरेम करत रहा कि ओनके सन्तान, तू पचन्क, उ आपन लोग बनाएस। उ कउनो दूसर रास्ट्र क जगह पइ तू पचन्क चुनेस अउ आजु भी तू पचे ओकर चुना भवा लोग अहा।

¹⁶ “तू पचन क आपन हिरदय क खतना करइ चाही।^[a] तू पचन्क अड़ियल होब तजि देइ चाही। ¹⁷ काहेकि यहोवा तोहार परमेस्सर अहइ। उ देवतन क परमेस्सर, अउ देवतन क यहोवा अहइ। उ महान परमेस्सर अहइ। उ अरज करइवाला अउ सक्तीवाला जोद्धा अहइ। यहोवा क निगाहे मँ सबहिं मनई बराबर अहइँ। यहोवा आपन इरादा बदलइ बरे धन नाहीं लेत। ¹⁸ उ अनाथ क अउ राँड़ क निआउ करत ह। उ हमरे देस मँ रहइवाला प्रवासी स पिरेम करत ह। उ ओनका खइया क अउ ओढ़ना देत ह। ¹⁹ एह बरे तू पचन्क भी इ अजनबियन स पिरेम करइ चाही। काहेकि तू पचे खुद भी मिस्र मँ अजनबी रह्या।

²⁰ “तोहका यहोवा आपन परमेस्सर क मान करइ चाही अउ सिरिफ उहइ क उपासना करइ चाही। ओका कबहुँ न तजा। जब तू पचे बचन द्या तउ सिरिफ ओकरे नाउँ क उपयोग करा। ²¹ तू पचन्क ओका बड़कई करइ चाही। उ तोहार परमेस्सर अहइ। उ तोहरे बरे महान अउ अचरजे स भरा भवा काम किहेस ह। इ सबइ कारजन क तू पचे आपन आँखिन स लख्या ह। ²² जब तोहार पुरखन मिस्र ग रहेन तउ सिरिफ सत्तर रहेन। अब यहोवा तोहार परमेस्सर तू पचन्क बहोतइ जियादा मनइयन क रुप मँ बढ़ाइ दिहे अहइ जेतॅना अकासे मँ तारा बाटेन।

यहोवा क सुमिरा

11 “एह बरे तू पचन्क आपन परमेस्सर यहोवा स पिआर करइ चाही। तू पचन्क उहइ करइ चाही जउन उ करइ बरे तू सबन्स कहत ह। तू पचन्क ओकरे नेमन, हुकुमन अउ आदेसन क हमेसा ही मानइ चाही। ² याद रखा सिरिफ तोहार गदेलन उ एक नाहीं अहइ जेका उ लख्या ह अउर जउन यहोवा तोहार परमेस्सर बरे महान काम करइ मँ तजुरबा राखत अहइ। उ सबइ तू लोग रह्या तोहरे सबन्क जउन उ लखेन अउर तू पचे लख्या ह कि यहोवा केतॅना महान, मज़बूत अउ केतॅना सक्तीसाली अहइ। ³ तू पचे ओकरे चमत्कारन क लख्या ह। तू पचे उ सबइ लख्या ह जउन उ मिस्र क राजा फिरौन अउ ओकरे पूरे देस क संग किहस। ⁴ तू पचे मिस्र क फउज, ओनकइ घोड़न अउ रथन क संग यहोवा जउन किहस, लख्या ह। उ सबइ तू सबन्क पाछा करत रहेन, मुला तू पचे लख्या ह, यहोवा ओनका लालसागरे क जले मँ बोर दिहस। तू पचे लख्या ह कि यहोवा ओनका पूरी तरह बरबाद कइ दिहस। ⁵ तू पचे उ सबइ चिजियन क लख्या ह जउन यहोवा तोहार परमेस्सर उ रेगिस्तान मँ तू पचन्क इ जगह मँ आवइ तलक किहेस ह। ⁶ तू पचे लख्या ह कि यहोवा रूबेन क परिवार क एलिआब क दूइ पूतन दातान अउ अबीराम क संग का किहेस। इस्राएल क सबहिं मनइयन लख्या ह कि भुइँया मुँहे क नाई खुलत भवा ह अउ ओन मनइयन, ओनके परिवारे, खेमन, सबहिं नउकरन अउ ओनकर सबहिं जनावरन क निगल लिहस। ⁷ तू पचे यहोवा क जरिये कीन्ह गएन महान कारनामा क लख्या ह।

⁸ “एह बरे आजु जउन आदेस मइँ देत अहउँ, तू पचन क ओन सबन क जरूर मानइ चाही। तबहिं तू पचे सक्तीसाली बनब्या। अउर तू पचे नदी क पार करइ लायक बनब्या अउर उ देस पइ कब्जा करब्या जेहमाँ प्रवेस करइ बरे तू पचे तइयार अहा। ⁹ उ देस मँ तोहार उमिर लम्बी होई। इ उहइ देस अहइ जेका यहोवा तोहरे पुरखन स ओनके अउ ओनके सन्तानन क देइ क बचन दिहे रहा। इ देस मँ दूध अउर सहद बहत ह। ¹⁰ जउने देस क तू पचे पउब्या उ मिस्र क नाई नाहीं अहइ जहाँ से तू पचे आया ह। मिस्र मँ तू पचे बिआ बोअत रह्या अउर पौधन क गोड़न क जरिये नहर स पानी निकाल कइ सबजियन क बगियन क नाईं सींचत रहा। ¹¹ मुला जउन पहँटा तू पचे हाली ही पउब्या उ मँ पहाड़न अउ घाटियन अहइँ। इ भुइँया बरखा स पानी अकासे स पावत ह। ¹² यहोवा तोहार परमेस्सर उ देस क देख-भला करत ह। यहोवा तोहार परमेस्सर बरिस क सुरू स आखिर तलक ओकर देख-भाल लगातार करत रहत ह।

¹³ “‘तू पचन्क जउन आदेसन मइँ आजु देत अहउँ, ओका तोहका होसियारी स जरूर सुनइ चाही। तू पचन क यहोवा तोहार परमेस्सर स पिरेम अउ ओकर सेवा पूरा हिरदय अउ आतिमा स जरूर करइ चाही। अगर तू पचे अइसेन करब्या, ¹⁴ तउ मइँ ठीक समइ पइ तोहरी भुइँया बरे बरखा पठउब। मइँ पतझर अउ बसन्त क समइ क भी बरखा दुआरा तोहका आसीर्बाद देब। तू पचे आपन अन्न, नवा दाखरस अउ तेल बटोरब्या। ¹⁵ अउर मइँ तोहरे खेतन मँ तोहरे पचन्क गोरुअन बरे घास जमाउब। तोहरे पचन्क भोजन बरे बहोत जिआदा होइ।’

¹⁶ “‘मुला होसियार रहा कि ललचाया नाहीं जा। दूसर देवतन क पूजा अउ सेवा करइ बरे जिन घूमा।’ ¹⁷ अगर तू पचे अइसा करब्या तउ यहोवा तू पचन पइ बहोतइ कोहाइ जाइ। उ अकासे क बन्द कइ देइ अउ बरखा नाहीं होइ। भुइँया स फसल नाहीं जमी अउर तू पचे उ नीक देस मँ हाली ही मरि जाब्या जेका यहोवा तू पचन्क देत अहइ।

¹⁸ “इ सब्दन क आपन दिमाग अउर हिरदइ मँ रखा। ऍका आपन कमर अउ कपाल पइ यादगार क रूप मँ रखा। ¹⁹ ऍन नेमन क सिच्छा आपन गदेलन क द्या। ऍनके बारे मँ जउन तू आपन घरे मँ बइठा, जउन तू सड़किया पइ टहरत रहा, जउन तू लोटत रहा अउ जउन जागत भए रहा, बतावा करा। ²⁰ ऍन आदेसन क आपन घरे क दुआरे क चौखट अउ फाटकन पइ लिखा। ²¹ तबहिं तू पचे अउ तोहार गदेलन उ देस मँ लम्बे समइ तलक रइहीं। इ उहइ भुइँया अहइ जेका यहोवा तोहरे पुरखन क देइ क बचन दिहे रहा। तू पचे तब तलक रहब्या जब तलक धरती क ऊपर अकास रही।

²² “होसियार रहा कि तू पचे उ हर एक आदेस क मानत रहा जेका मानइ बरे मइँ तू पचन्स कहेउँ ह। आपन परमेस्सर यहोवा स पिरेम करा। ओकर बताए भए सबहिं राहे प चला। ओहसे लगा रहा। ²³ यहोवा ओन सबहिं रास्ट्रन क ताकत लगाइके बाहर करब। तू पचे ओन रास्ट्रन स भुइँया लेब्या जउन तोहसे पचन्स लम्बा अउ मजबूत अहइँ। ²⁴ उ सारा प्रदेस जेह पइ तू पचे चलब्या, उ तोहार होइ। तोहार देस दक्खिन मँ रेगिस्ताने स लइके लगातार उत्तर मँ लबानोन तलक होइ। इ पूरब मँ फरात नदी स लइके पस्चिमी सागर तलक होइ। ²⁵ कउनो मनई तोहरे पचन्क खिलाफ ठाड़ न होइ। यहोवा तोहार परमेस्सर ओन लोगन्क तू पचन्स डेरवाइ देइ जहाँ कहूँ तू पचे उ देस मँ जाब्या। इ उहइ जेकरे बरे यहोवा पहिले तोहका पचन्क बचन दिहे रहा।

इस्राएलियन बरे चुनाव: आसीर्बाद या अभिसाप

²⁶ “आजु मइँ तू पचन्क आसीर्बाद या अभिसाप मँ स एक क चुनइ क बचन देत अहउँ। ²⁷ तू सबइ बरदान पउब्या, अगर तू पचे यहोवा आपन परमेस्सर क आदेसन क पालन करब्या। मइँ आजु इ आदेसन क तोहका देत अहउँ। ²⁸ मुला तू पचे ओह समइ अभिसाप पउब्या जब तू पचे यहोवा आपन परमेस्सर क आदेसन क मानइ स इन्कार करब्या। ऍह बरे जउने राहे पइ चलइ क आदेस मइँ आजु तू पचन्क दइ देत अहउँ, ओहसे घूमब्या अउ ओन दूसर देवतन क पाछा करब्या जेनका तू पचे जानत्या नाहीं।

²⁹ “जब यहोवा तोहार परमेस्सर तू पचन्क उ देस मँ लावत ह जहाँ तू पचे रहब्या, तब तू पचन्क गरीज्जीम पहाड़े क चोटी पइ जाइ चाही अउ हुआँ स आसीर्बादन क लोगन क सुनावइ चाही। तब तू पचन्क एबाल पहाड़े क चोटी पइ भी जाइ चाही अउ हुआँ स अभिसापन क लोगन क सुनावइ चाही। ³⁰ इ सबइ यरदन नदी क दूसर कइँती कनानी लोगन्क प्रदेस मँ अहइँ जउन यरदन घाटी मँ रहत हीं। इ सबइ पहाड़ गिलगाल सहर क निचके मोरे क बांज क बृच्छन क निअरे पच्छिम कइँती अहइँ। ³¹ तू पचे यरदन नदी क पार कइके जाब्या। तू पचे उ पहँटा क लेब्या जेका यहोवा तोहार परमेस्सर तू पचन्क दइ देत अहइ। इ देस तोहार होइ। जब तू पचे इ देस मँ रहइ लगब्या तउ ³² तोहका ओन सबहिं हुकुमन अउ नेमन क मानब होसियारी स करी चाही जेनका आजु मइँ तू पचन्क दइ देत अहउँ।

परमेस्सर क उपासना क ठउर

12 “इ सबइ नेम अउर हुकुम अहइ जेका तोहका आपन नवा भुइँया मँ होसीयारी क साथ जरूर पालन करइ चाही। यहोवा तोहार पुरखन क परमेस्सर तोहका इ भुइँया दइ दिहा ह जब तलक तू पचन्क इ धरती पइ रही तोहका आपन अधिकार मँ रखइ बरे दिहेस ह। ² तू पचे उ पहँटा क ओन रास्ट्रन स लेब्या जउन अब हुआँ रहत अहइँ। तू पचन्क ओन सबहिं ठउरन क पूरी तरह नास कइ देइ चाही जहाँ इ सबइ रास्ट्र आपन देवतन क पूजत हीं। इ सबइ ठउर ऊँचे पहाड़न, पहाड़ियन अउ सबइ हरिअर बृच्छन क खाले अहइँ। ³ तू पचन्क ओनकर वेदियन क बरबाद करइ चाही अउ ओनके स्मृति पाथरन क टूका-टूका कइ देइ चाही। तू पचन्क ओनके पवित्तर खम्भन क बार देइ चाही। ओनके देवतन क मूरतियन क काट डावइ चाही अउ ओनकर नाउँ हुआँ स मेट देइ चाही।

⁴ “मुला तू पचन्क यहोवा आपन परमेस्सर क उपासना उ तरह नाहीं करइ चाही जउने तरह उ सबइ लोग आपन देवतन क पूजन हीं। ⁵ यहोवा तोहार परमेस्सर तोहरे परिवार समूहे स खास ठउर चुनब। उ हुआँ आपन नाउँ क थापना करी। अउ हुआँ निवास करी तू पचन्क ओकर उपासना करइ बरे उ ठउर प जाइ चाही। ⁶ हुआँ तू पचन्क आपन होमबलि, आपन सबइ बली, दसवाँ हींसा, आपन खास भेंट, यहोवा क बचन दीन्ह गइ भेंट, आपन क इच्छा स भेंट अउर झुण्ड अउ रेवड़ क पहिला पइदा भवा बच्चन क लियावइ चाही। ⁷ तू अउर तोहार परिवार हुआँ यहोवा तोहार परमेस्सर क मौजूदगी मँ भोजन करिहीं। जउने अच्छी चिजियन बरे तू पचे काम किह्या ह आपन परमेस्सर क कारन स तू आनन्द पाउब्या। काहेकि यहोवा तोहार परमेस्सर तोहका आसीर्बाद दिहेस ह।

⁸ “उ उहइ तरह उपासना करत नाहीं रहइ चाही जउने तरह हम उपासना करत आवत अही। अबहिं तलक हम माँ स हर एक जइसा चाहे परमेस्सर क उपासना करत रहा। ⁹ काहे अबहिं तलक हम उ सान्त देस मँ नाहीं पहुँचे रहेन जेका यहोवा तोहार परमेस्सर तू पचन्क देत अहइ। ¹⁰ मुला तू पचे यरदन नदी क पार करब्या अउ उ देस मँ रहब्या जेका यहोवा तोहार परमेस्सर तू पचन्क देत अहइ। हुआँ यहोवा तू पचन्क सबहिं दुस्मनन स चैन स रहइ देइ अउ तू सुरच्छित रहब्या। ¹¹ तब यहोवा आपन बरे खास ठउर चुनी उ हुआँ आपन नाउँ क थापना करी अउर तू पचे ओन सबहिं चीजन्क हुअँइ लइ अउब्या जेनके बरे मइँ आदेस देत हउँ। हुअँइ तू पचे आपन क सबइ होम बलियन, आपन बलियन, दसवाँ हींसा,^[b] आपन इच्छा क भेंट, आपन खास भेंट, अउ आपन क स्वतंत्र इच्छा क भेंट, जउन तू यहोवा क देइ क बचन दिहस ह। ¹² उ ठउरे पइ तू पचे आपन सबहिं लोग, आपन बेटवन अउ बेटियन, मरद अउ मेहरारु नउकरन, अउर आपन सहर मँ बसइया सबहिं लेवीबंसियन क संग बटुर जा। (इ सबइ लेवीबंसी आपन बरे भुइँया क कउनो हींसा न पइहीं।) यहोवा आपन परमेस्सर क मौजूदगी मँ हुआँ आनंद मनावा। ¹³ होसियारी बरता कि तू पचे आपन होम बलियन क जहाँ लखा हुआँ जिन चढ़ावा। ¹⁴ तोहरे परिवार समूहे मँ स कउनो एक क इलाका मँ यहोवा आपन खास ठउर चुनी। हुआँ आपन होमबलि चढ़ावा अउ तू पचन्क बतावा गवा सबहिं आदेसन क हुअँइ करा।

¹⁵ “जउने कउने जगह तू पचे रहा तू कउनो जनावर क मारिके खाइ सकत ह। तू हरिण या नील गाय क साथ ठीक वइसा ही करा। तू पचे ओतना माँस खाइ सकत ह जेतना तू चाहा, जेतना यहोवा तोहार परमेस्सर तू पचन्क देइ। कउनो भी मनई इ गोस क खाइ सकत ह, चाहे उ पवितर होइ या अपवितर होइ। ¹⁶ मुला तू पचन्क रकत नाहीं खाइ चाही। तू पचन्क खून क पानी क तरह जमीन प बहाइ देइ चाही।

¹⁷ “कछू अइसी चिजियन अहइँ जेनका तू पचन्क ओन ठउरन पइ नाहीं खाइ चाही जहाँ तू पचे रहत अहा। इ सबइ अहइँ: आपन अनाज क, दाखरस क, अउ तेल क दसवाँ हींसा। तोहार भेड़ अउ गोरुअन क पहिला पइदा भवा बच्चा, परमेस्सर क वचन दीन्ह गइ भेंट, कउनो आपन इच्छा भेंट या कउनो भी परमेस्सर क दूसर भेंट। ¹⁸ तू पचन्क ओन भेंटन क सिरिफ यहोवा तोहार परमेस्सर क मौजूदगी मँ खाइ चाही यानी यहोवा तोहार परमेस्सर जउने ठउरे क चुनइ। तू पचन्क हुअँइ जाइ चाही अउर आपन पूतन, बिटियन, सबहिं मरद अउ मेहरारु नउकरन अउर तोहरे सहरन मँ बसइयन लेवी बंसियन क संग मिलिके खाइ चाही। यहोवा आपन परमेस्सर क मौजूदगी मँ आनन्द मनावा। जउने चिजियन बरे काम किहा ह ओनकर आनन्द ल्या। ¹⁹ धियान रखा कि इ भोजनन क लेवी बंसियन क संग बाँटिके खा। इ तब तलक करा जब तलक आपन देस मँ रहा।

^20-21 “यहोवा तोहार परमेस्सर इ बचन दिहे अहइ कि उ तोहरे देस क सीमा क अउर बढ़ाई। जब यहोवा अइसा करी तउ उ ओकरे चुने भए खास निवास स दूर रहि सकत ह अउर तोहे पचन्क गोस क भूख अहइ तउ तू पचे कउनो भी तरह क गोस क, जउन तोहरे लगे अहइ खाइ सकत ह। तू पचे यहोवा क दीन्ह झुण्ड अउ समूह मँ स कउनो भी जनावर क मारि सकत ह। इ वइसे ही करा जइसा करइ क हुकुम मइँ दिहे अहउँ। इ गोस, तू पचे जबहिं चाहा जहाँ भी रह्या, खाइ सकत ह। ²² तू पचे इ गोस क वइसे ही खाइ सकत ह जइसे नीलगाय अउर हिरन क गोस खात ह। कउनो भी मनई इ कइ सकत ह चाहे उ सबइ पवित्तर होइँ या अपवित्तर। ²³ मुला निहचय ही खून जिन खा। काहेकि खून मँ जिन्नगी अहइ अउर तू पचन्क उ गोस नाहीं खाइ चाही जेहमाँ अबहिं जिन्नगी होइ। ²⁴ खून जिन खा। तू पचन्क खून क पानी क नाई भुइँया पइ डाइ देइ चाही। ²⁵ तू पचन्क उ सब कछू करइ चाही जेका परमेस्सर उचित समझत ह। एह बरे खून जिन खा। तब तोहार अउ तोहरे सन्तानन क भला होइ।

²⁶ “कउनो भी तरह तोहका आपन पवित्तर बलिदान क अउर वचन क उपहारन क उ जगह पइ लावइ चाही जेका यहोवा चुनी। ²⁷ तू पचन्क आपन होमबलि हुअँइ चढ़ावइ चाही। आपन होमबलि क गोस अउ रकत यहोवा आपन परमेसस्र क वेदी पइ चढ़ावा। रकत क बाहर निकाला। तब तू पचे गोस खाइ सकत ह। ²⁸ जउन आदेस मइँ देत अहउँ ओनका मानइ मँ होसियार रहा। जब तू पचे उ सब कछू करत अहा जउन यहोवा तोहार परमेस्सर बाटइ अउ ठीक अउ अच्छा अहइ, तब हर चीज तोहरे बरे अउ तोहरे सन्ताने बरे भविस्य मँ सदा भला रही।

²⁹ “जब यहोवा तोहार परमेस्सर उ रास्ट्रन क बरबाद करब्या अउ तो ओकर भुइँया पइ कब्जा करब्या। तू पचे हुआँ जाब्या अउ ओनसे भुइँया लेब्या। तू पचे ओनकइ भुइँया पइ रहब्या। ³⁰ किन्तु ओकर पाछे होसियार रहा काहेकि उ तोहार समन्वा बरबाद भवा। ओकरे कैद मँ जिन फँसा जेहसा उ देवतन क पूजा करत अहइ। इ सीखइ क कोसिस न करा कि उ सबइ आपन देवतन क पूजा कइसे करत हीं। ‘उ सबइ जइसे पूजा करत ही वइसेन पूजा करइ क बारे मँ जिन सोचा।’ ³¹ तू पचे यहोवा आपन परमेस्सर क वइसेन उपासना नाहीं करब्या जइसे उ पचे आपन देवतन क करत हीं। काहेकि उ पचे आपन पूजा मँ सब किसिम क बुरी चीजन करत हीं जेनसे यहोवा घिना करत ह। उ पचे आपन देवतन क बलि बरे आपन गदेलन क भी बार देत हीं।

³² “तू पचन्क ओन सबहिं काम क करइ बरे होसियार रहइ चाही जेनके बरे मइँ आदेस देत हउँ। जउन मइँ तू पचन्स कहत हउँ ओहमाँ न तउ कछू जोरा, न ही ओहमाँ स कछू कमती करा।

परमेस्सर आपन पूत क पठएस

(मत्ती 21:33-46; लूका 20:9-19)

12 ईसू दिस्टान्त कथा खोलि के समझावत ओनसे कहइ लाग: “एक मनई अंगूरे क बाग लगाएस अउर ओकरे चारिहुँ कइँती चहरदेवार बनाएस। फिन उ अंगूरे क रस धरइ बरे एक गड़हा खोदेस अउर ओकरे बाद एक ठु बुर्ज खड़ा करेस। फिन उ कछू किसानन क लगाने प दिहस अउ जात्रा प चला गवा।

² “फिन अंगूर पकइ क रितु मँ उ एक ठु नउकर पठएस जेसे उ किसानन स जउन अंगूर पक गवा अहइँ, ओहमाँ स ओकर हींसा लइ आवइ। ³ उ मुला उ सबइ नउकर क पकरिके पीटेन, ओका खालि हाथे भगाइ दिहन। ⁴ उ एक ठु अउ नउकर हुवाँ पठएस। उ किसानन ओकर मुड़वा फोड़त ओका बेज्जत करेन। ⁵ उ फिन एक ठु अउ नउकर पठएस, जेकर उ सब कतल कइ दिहन। उ इ तरह कई ठु नउकरन क पठएस, जेनका उ सब मारेन पीटेन अउर केतनन क मारि डारेन।

⁶ “अब ओकरे लगे पठवइ क आपन पियारा बेटवा ही बचा रहि गवा। आखिर उ ओनके लगे इ कहत पठएस, ‘उ पचे मोरे बेटवा क मान सम्मान जरूर कहि रहीं।’

⁷ “उ किसानन एक दुसरे स कहेन, ‘इ तउ ओकर वारिस अहइ। आवा, ऍका मारि डाइ। अइसे हम पचे एकर वारिस होई जाब।’ ⁸ उ सबइ ओका पकरिके मारि डाएन अउर ओका अंगूर क बागे स बाहेर फेंके दिहन।

⁹ “एह पइ अंगूर क बगिया क मालिक का करी? उ आइके किसानन क मारि डाई अउर बगिया क दुसरे क दइ देई। ¹⁰ का तू पचे पवित्तर सास्तर का बचन नहीं बांच्या:

¹² उ सबइ जान गएन कि जउन दिस्टान्त उ दिहेस ह उ ओकरे खिलाफ रहा। तउ उ पचे ओका गिरफतार करइके कउनो कुचाल खोजइ लागेन, मुला उ पचे मनइयन स डेरात रहेन। एह बरे ओका तजि के गएन।

यहूदी नेतन क ईसू क छलइ क चाल

(मत्ती 22:15-22; लूका 20:20-26)

¹³ तब यहूदी नेतन ईसू क बातन मँ फँसावइ क बरे कछू फरीसियन अउर हेरोदियन क ओकरे नगिचे पठएन। ¹⁴ जउन ओकरे निअरे फरीसियन अउर हेरोदियन रहेन उ सबइ कहेन, “गुरु, हम पचे जानित ह कि तू बहोतइ ईमानदार मनई अहा अउर तू इ बात क रचिकउ फिकिर करत्या नाहीं कि दूसर मनई का सोचत हीं। तू मनई क हैसियत या ओकर रुतबा क ध्यान न देत परमेस्सर क राहे क सीख देत ह। तउ बतावा न कि कैसर क कर देब ठीक बाटइ की नाहीं। हम ओका कर अदा कइ देइ कि नाहीं?”

¹⁵ ईसू ओनकइ चाल चपेट जानि गवा। उ ओनसे कहेस, “तू मोका काहे परखत ह? एक ठु दीनार लिआवा काहेकि ओका मइँ लखि सकउँ।” ¹⁶ तउ उ पचे एक ठु दीनार लइ आएन। फिन ईसू ओनसे पूछेस, “यह पइ केकर चेहरा अउर नाउँ लिखा बाटइ?” उ पचे कहेन, “कैसर क।”

¹⁷ तब ईसू ओनका समझाएस, “जउन कैसर क अहइ, ओका कैसर क द्या अउर जउन परमेस्सर क अहइ ओका परमेस्सर क द्या।” तउ उ पचे अचरजि मँ पड़ि गएन।

सदूकियन क चाल

(मत्ती 22:23-33; लूका 20:27-40)

¹⁸ फिन कछू सदूकियन पुनरुत्थान क नाहीं मनतेन, ओकरे नगिचे आएन अउर उ पचे ओसे पूछेन, ¹⁹ “गुरु, मूसा हमरे बरे लिखेस कि जदि कउनो क भाई मरि जाए अउर ओकरे पत्नी क कउनो लरिका न होइ तउ ओकरे भाई क चाही कि उ ओसे बियाह करइ अउर फिन आपन भाई क बंस क चलावई। ²⁰ एक दाई क बात अहइ कि सात ठु भाई रहेन। सबते बड़का भाई बियाह करेस अउर निपूत होइके मरि गवा। ²¹ फिन दूसर भाई उ स्त्री स बियाह करेस, पर उहउ निपूत होइके मरि गवा। तिसरका भाई भी वइसे करेस। ²² सातहु भाइयन मँ कउनो क कउनो संतान नाहीं भइ। आखिर उ स्त्री भी मरि गइ। ²³ मउत क बाद जबहिं उ पचे जी उठिहीं, तउ बतावा उ स्त्री केकर पत्नी भई? काहेकि उ सातहु ओका आपन पत्नी क तरह राखे रहेन।”

²⁴ ईसू ओनसे कहेस, “तू पचे न तउ पवित्तर सास्तरन क जानत ह अउर न परमेस्सर क ताकत क। का इ कारण नाहीं जेसे तू पचे भटक गवा बाट्या? ²⁵ काहेकि उ सबइ जबहिं मरे भए स जी उठिहीं, तउ ओनकइ बियाह न होई मुला सबइ सरग मँ दूतन क तरह रइहीं। ²⁶ मरे भए स जी उठइ क बातन मँ का तू पचे नाहीं बाँच्या जउन मूसा क कितबिया मँ झाड़ी क बाबत^(B) लिखा बाटइ? हुवाँ परमेस्सर मूसा स कहेस, ‘मइँ इब्राहीम क परमेस्सर, इसहाक क परमेस्सर अउर याकूब क परमेस्सर हउँ।’^{(C) 27} उ मरे भए क परमेस्सर नाहीं मुला जउन जिअत अहइँ ओनकइ परमेस्सर अहइ। तू पचे बहोतइ भारी भूलि मँ पड़ि गवा ह।”