Old/New Testament

मूसा इस्राएल क मनइयन स बतियात ह

1 मूसा क जरिये इस्राएल क मनइयन क दीन्ह गवा सँदेसा इ अहइ। उ ओनका इ सँदेसा तबहिं दिहे रहा जब उ पचे यरदन नदि क पूरब क रेगिस्तान मँ रहेन। इ सूफ क निकट रहा जउन कि पारान रेगिस्तान अउ तोपेल, लाबान, हसेरोत अउ दीजाहाब सहरन क बीच मँ रहा।

² होरेब अरथात सिनाई पहाड़े स सेईर पहाड़ स होइके कादेसबर्ने क जात्रा सिरिफ गियारा दिना क रही। ³ मुला जब मूसा इस्राएल क मनइयन क इ ठउरे प संदेसा दिहस तब इस्राएल क मनइयन क मिस्र तजे भए चालीस बरिस होइ गवा रहेन। इ चालिस बरिस क गियारहवें महीना क पहिला दिन रहा, जब मूसा इस्राएल क मनइयन स बातन किहेस। उ ओनसे उहइ सबहिं बातन कहेस जउन यहोवा ओका कहइ क हुकुम दिहे रहा। ⁴ इ तब भवा जब मूसा एमोरियन क राजा सीहोन जउन हिब्रोन मँ रहत रहेन अउर बासान क राजा ओग क जउन एद्रेई क असतारोत मँ रहत रहेन। ⁵ उहइ समइ उ पचे यरदन नदी क पूरब कइँती मोआब क पहँटा मँ रहेन अउर मूसा परमेस्सर क हुकुमन क अरथ बतावत रहा। मूसा कहेस:

⁶ “यहोवा, हमार परमेस्सर होरब पहाड़े पइ हम स कहेस। उ कहेस, ‘तू पचे बहोत समइ स इ पहाड़े प ठहर चुका बाट्या। ⁷ एमोरी लोगन क पहाड़ी देस अउर चारिहुँ कइँती क पहँटा मँ जा। यरदन घाटी, पहाड़ी प्रदेस, पच्छिमी नीची भुइँया, दक्खिन क रेगिस्तान मँ अउ समुद्र तट मँ जा। कनानी लोगन क देस मँ अउर लबानोन मँ बड़की नदी परात तलक जा। ⁸ लखा, मइँ इ समूचइ देस तोहका दिए अहउँ। भितरे जा अउ ओह पइ कब्जा करा। इ उहइ देस बाटइ जेका देइ क बचन मइँ तोहरे पुरखन इब्राहीम, इसहाक अउ याकूब क दिहे रहेउँ। मइँ इ प्रदेस ओन लोगन क अउ ओन लोगन क सन्ताने क देइ बरे बचन दिहे रहेउँ।’”

मूसा प्रमुखन क नियुक्ति करत ह

⁹ मूसा कहेस, “ओह समइ जब मइँ तू पचन स बात किहे रहेउँ तबहिं कहे रहेउँ, ‘मइँ अकेल्ले तू लोगन्क अगुअइ करइ अउ देखरेख करइ मँ समरथ नाहीं अहउँ। ¹⁰ यहोवा तू पचन्क परमेस्सर क्रम स मनइयन क ऍतना बढ़ाएस ह कि तू पचे अब ओतॅना होइ ग अहा जेतॅना अकासे मँ तारा बाटेन! ¹¹ होइ सकत ह यहोवा, तोहरे पुरखन क परमेस्सर, आज तू पचे जेतना अहा, ओहसे हजार गुना जियादा करइ। होइ सकत ह उ तू पचन क आसीर्बाद देइ जउन उ तोहका सबन्क देइ क बचन दिहेस ह। ¹² का मइँ अकेल्ले तोहार देखरेख अउर तोहरी सबइ समस्या अउ वाद-विवाद क हल कइसे कइ सकत हउँ? नाहीं! ¹³ एह बरे: हर एक परिवार समूह स कछू सम्मानित मनइयन क चुना। मइँ ओनका तोहार नेता बनाउब। ओन बुद्धिमान मनइयन क चुना जउन समझदार अउ तजरबेकार अहइँ।’

¹⁴ “अउर तू पचे कहया, ‘अइसा करब नीक अहइ।’

¹⁵ “ऍह बरे, मइँ बुद्धिमान अउर सम्मानित मनइयन क लीन्ह जउन तोहार जरिया चुना भवा अहइ अउ ओनका तोहार प्रमुखन बनाएउँ। मइँ ओनमाँ स कछू क हजार क, कछू क सौ क, कछू क पचास क अउ कछू क दस क प्रमुख बनाएउँ ह। मइँ तोहरे परिवार समूहे बरे अधिकारियन क भी नियुक्त किहेउँ ह।

¹⁶ “ओह समइ, मइँ तोहरे इ सबइ प्रमुखन क तोहार निआवाधीस बनाए रहेउँ। मइँ ओनसे कहे रहेउँ, ‘आपन मनइयन क बीचउ बीच वाद-प्रतिवाद क सुना। हर एक मोकदमा क फैसला सही सही करा। एकर कउनो महत्व नाहीं कि मोकदमा दुइ ठु इस्राएली मनइयन क बीच बाटइ या इस्राएली अउर बिदेसी क बीच। तू पचन्क हर एक मोकदमा क फैसला सही करइ चाही। ¹⁷ जब तू फैसला करा तब इ जिन सोचा कि कउनो मनई दूसर क बराबरी मँ जियादा महत्व क बाटइ। तोहका पचन्क हर एक मनई क फैसला एक तरह समुझिके करइ चाही। कउनो स जिन डेराअ काहेकि तोहार फैसला परमेस्सर स आवा अहइ। मुला अगर कउनो मोकदमा ऍतना जटिल होइ चुका होइ कि तू पचे फैसला न कइ सका तउ ओका मोरे लगे लिआवा। मइँ एकर मोकदमा क फैसला करब।’ ¹⁸ उहइ समइ, मइ उ सबइ बातन क बताए रहेउँ जेका तू पचन्क करइ चाही।

जासूस कनान देस मँ जात अहइँ

¹⁹ “तब हम पचे उहइ कीन्ह जेका यहोवा हमार परमेस्सर हम पचन्क हुकुम दिहे रहा। हम पचे होरेब पहाड़े क तजा अउर एमोरी लोगन्क पहाड़े क जात्रा कीन्ह। हम पचे ओन बड़की अउ सबइ भयंकर भुइँया स होइके गएन जेका तू पचे भी लखे रह्या। हम पचे कादेसबर्ने पहोंच गएन। ²⁰ तब मइँ तू पचन्स कहे रहेउँ, ‘तू पचे एमोरी लोगन्क पहाड़ी प्रदेस मँ आइ चुका अहा। यहोवा हमार परमेस्सर इ देस हमका देई। ²¹ लखा, यहोवा तोहार परमेस्सर उ देस क तोहार समन्वा कइ दिहेस। अगवा बढ़ा अउ भुइयाँ क आपन बनाइ ल्या। तोहरे पुरखन क यहोवा परमेस्सर तू पचन्क अइसा करइ क आदेस दिहे अहइ। एह बरे जिन डेराअ, कउनो तरह क चिन्ता जिन करा!’

²² “तब तू सबहिं मोरे लगे आया अउ बोल्या, ‘पहिले उ देस क लखइ क बरे कछू मनइयन क पठवा। उ सबइ क हुआँ क देस क धियान स लखि द्या। उ सबइ तब वापस आइ सकत हीं अउ हम लोगन्क उ रस्ता बताइ सकत हीं जेनसे हम सबन्क जाइ क बाटइ अउर ओन सहरन क बताइ सकत हीं जेनके ताईं हम पचन्क पहुँचइ क अहइ।’

²³ “मइँ सोचेउँ कि इ नीक बिचार अहइ। एह बरे मइँ तू मनइयन मँ स हर परिवार समूह बरे एक ठु मनई क हिसाब स बारह मनइयन क चुनेस। ²⁴ तबहिं उ सबई मनइयन हम पचन्क पीछे तजिके पहाड़ी पहँटा मँ गएन। उ पचे एसकोल क घाटी मँ गएन। उ पचे भुइँया क विभिन्न जगह क छान-बीन किहेन। ²⁵ उ पचे उहइ पहँटा क कछू फल लिहन अउ ओनका हमरे लगे लिआएन। उ पचे हम लोगन्क विवरण दिहन अउ कहेन, ‘इ नीक देस अहइ जेका यहोवा हमार परमेस्सर हमका दइ देत अहइ।’

²⁶ “मुला तू पचे ओहमाँ जाइसे इन्कार कइ दिहा। तू पचे यहोवा आपन परमेस्सर क हुकुम क मानइ स इन्कार कइ दिहा। ²⁷ तू पचे आपन सिबिर मँ सिकाइत किहा। तू पचे कहया, ‘यहोवा हमसे घिना करत अहइ। उ हम पचन्क मिस्र स बाहेर एमोरी मनइयन क देइ बरे लइ आवा जेहसे उ पचे हमका नस्ट कइ सकइँ। ²⁸ अब हम पचे कहाँ जाई? हमार भाई हम पचन्क डेराएन। उ पचे कहेन, “हुआँ क लोग हम पचन्स बड़वार अउ लम्बा अहइँ, उ सहर बड़ा अहइँ अउ ओनकइ देवार आसमान क छुअत हीं। अउ हम पचे देत्य^[a] क सन्तानन क हुआँ लखा।”’

²⁹ “तब मइँ तू पचन्स कहेउँ, ‘घबराअ जिन! ओन लोगन्स डेराअ नाहीं! ³⁰ यहोवा तोहार परमेस्सर तोहरे समन्वा जाइ अउ तोहरे बरे लड़ी। उ उहइ करी जे तू ओका मिस्र मँ देखावत रहा। ³¹ तू पचे हुआँ आपन समन्वा ओका रेगिस्तान मँ जात भवा लख्या ह। तू पचे लख्या कि यहोवा तोहार परमेस्सर तोहका पचन्क वइसेन ही लइ आवा जइसे कउनो मनई आपन पूत क लिआवत ह। यहोवा पूरा रस्ता भइ तू पचन्क रच्छा करत भवा तोहका सबन्क हिआँ पहोंचाएस ह।’

³² “मुला तबहुँ तू पचे आपन परमेस्सर पई नाहीं पतियाना। ³³ जब तू पचे जात्रा करत रह्या तब उ तोहरे आगे तोहार डेरा डावइ बरे जगहिया हेरइ गवा। तोहका सबन्क इ बतावइ बरे कि तू पचन्क कउने राहे प जाइ क अहइ उ राति क आगी मँ अउ दिन मँ बदरी मँ चला।

मनइयन क कनान जाइ प मनाही

³⁴ “यहोवा तोहार कहब सुनेस, उ कोहाइ गवा। उ प्रण किहस। उ कहेस, ³⁵ ‘तू सबइ लोगन जउन अबहुँ जिअत रहेन सबहिं पापी अहइँ। उ लोगन स कउनो भी मनई नीक देसे मँ न जाई, जेका देइ क बचन मइँ तोहरे पुरखन क दिहे अहउँ। ³⁶ यपुन्ने क पूत कालेब ही सिरिफ उ देस क लखी। मइँ कालेब क उ देस देब जेह पइ उ चला ह अउर मइँ उ देस क कालेब क सन्तानन क देब। काहेकि कालेब उ सबइ किहेस जउन मोर हुकुम रहा।’

³⁷ “यहोवा तू लोगन क कारण मोसे भी नाखुस रहा। उ मोसे कहेस, ‘तू भी उ देस मँ नाहीं जाइ सकत्या। ³⁸ मुला तोहार सहायक, नून क बेटवा यहोसू उ देस मँ जाइ। यहोसू क हौसला बढ़ावा, काहेकि उहइ इस्राएल क लोगन्क भुइँया पइ आपन कब्जा जमावइ बरे लइ जाई।’ ³⁹ यहोवा हम पचन्स कहेस, ‘तू पचे कहया, कि तोहरे नान्ह-नान्ह गदेलन दुस्मन क जरिये लइ लीन्ह जइहीं। मुला उ सबइ उ देस मँ जाई। मइँ तोहरी गल्तियन बरे तोहरे गदेलन क दोखी नाहीं मानत हउँ। काहेकि उ पचे अबहिं ऍतना नान्ह-नान्ह बाटेन कि उ पचे इ जान नाहीं सकतेन कि का सही बाटइ अउ का गलत। उ पचे हुवाँ जाब अउर मइँ उ पचन्क उ धरती ओकर देस क रुप मँ देब। ⁴⁰ मुला तू पचन क लाल सागर जाइवाला मार्ग स रेगिस्तान क सफर करइ चाही।’

⁴¹ “तबहिं तू पचे कहया, ‘मूसा, हम पचे यहोवा क खिलाफ किहे अही। मुला अब हम पचे आगे बढ़ब अउ जइसे पहिले यहोवा हमार परमेस्सर हुकुम दिहे रहा वइसेन ही लड़ब।’

“तब तू पचन मँ स हर एक जुद्ध बरे औजार धारण किहस। तू पचे पहाड़ी-देस तलक जाई क तैयारी किहस। ⁴² मुला यहोवा मोसे कहेस, ‘मनइयन स कहा कि उ पचे हुआँ न जाइँ अउर न लड़इँ। काहेकि मइँ ओनकर संग न देब अउ ओनकर दुस्मन ओनका हराइ देइहीं।’

⁴³ “एह बरे, मइँ तू लोगन स बात किहेउँ, मुला तू पचे मोर एक न सुन्या। तू पचे यहोवा क हुकुम मानइ स इन्कार कइ दिहा। तू पचे घमण्ड स बेउहार किहेस अउर तू पचे पहाड़ी-देस तलक चलि गवा। ⁴⁴ तबहिं एमोरी लोग जउन उहइ पहाड़ी पहँटा मँ रहत ही तोहरे खिलाफ होइ गएन। उ पचे तोहार पीछा उहइ तरह किहेन जइसे मधुमक्खी तोहार पीछा करत ह। उ पचे तोहार सेईर स लइके होर्मा तलक पूरा रास्ता मँ बुरी तरह हराएन। ⁴⁵ तू पचे लउट्या अउ यहोवा क समन्वा रोया-चिचियाया। मुला यहोवा तोहार बात कछू नाहीं सनेस। उ तोहार बात सुनइ स इन्कार कइ दिहस। ⁴⁶ एह बरे तू सबइ कादेस मँ बहोत समइ तलक रुका रह्या।

इस्राएल क लोग रेगिस्तान मँ भटकत हीं

2 “तब हम पचे घूमि गए अउ लाल सागर क सड़क होइके रेगिस्तान क जात्रा किहेस इ उहइ अहइ जइसा यहोवा मोका आदेस दिहे रहेन। हम पचे सेईर क पहाड़ी पहँटा क चारिहुँ कइँती अनेक दिना तलक चलत रहेन। ² तब यहोवा मोसे कहेस, ³ ‘तू पचे इ पहाड़ी क चारिहुँ कइँती बहोत जियादा भटक चुका बाट्या। अब उत्तर कइँती घूमा। ⁴ उ मोसे तोसे इ कहइ क कहेस, तू पचे सेईर प्रदेस स होइके जाब्या। इ प्रदेस तू लोगन्क रिस्तेदारन एसाव क सन्तानन क अहइ। उ पचे तोहसे डेराइ जइहीं। बहोत सावधान रहा। ⁵ ओनसे जुद्ध जिन करा। मइँ ओकर एक फुट भुइँया तलक तोहका नाहीं देबउँ। काहेकि मइँ एसाव क सेईर क पहाड़ी प्रदेस ओनके कब्जे मँ दइ दीन्हेउँ। ⁶ तू पचन्क एसाव क लोगन्क हुआँ पइ भोजन करइ या पानी पिअइ क मूल्य चुकावइ चाही। ⁷ इ याद राखा कि यहोवा तोहार परमेस्सर, तोहका तू सबइ जउन कछू भी किह्या ओन सबहिं बरे आसीर्बाद दिहस। उ इ लम्बे चौड़े रेगिस्ताने स तोहार जात्रा जानत ह। यहोवा तोहार परमेस्सर इ सबइ चालीस बरिसन मँ तोहरे संग रहा ह। तू पचन्क कउनो भी चीजन क कमी नाहीं रही।’

⁸ “एह बरे, हम लोग सेईर मँ रहइवालन आपन रिस्तेदारन क लगे स अगवा बढ़ गए। हम पचे यरदन घाटी स एलत अउ एस्योनगेबेर सहरन क जाइवालिन स़ड़क क पाछे तजि दिहेन। तब हम पचे उ सड़क पइ घूमि गए जउन मोआब क रेगिस्तान कइँती जात अहइ।

आर प्रदेस मँ इस्राएल

⁹ “यहोवा मोसे कहेस, ‘मोआब क लोगन्क परेसान जिन करा। ओनके खिलाफ जंग जिन छेड़ा। मइँ ओनकइ कउनो भी भुइँया तू पचन्क नाहीं देब। उ पचे लूत क सन्तानन^[b] अहइँ, अउर मइँ ओनका आर प्रदेस दिहे अहउँ।’”

¹⁰ (पहिले, आर मँ एमी लोग रहत रहेन। उ पचे सक्तीसाली मनई रहेन अउर हुआँ ओनमाँ बहोत स रहेन। उ पचे अनाकी लोगन क तरह बहोत लम्बा रहेन। ¹¹ अनाकी लोगन क तरह, एमी रपाई लोगन क एक ठु हींसा समुझा जात रहेन। मुला मोआबी लोग ओनका एमी कहत रहेन। ¹² पहिले होरी लोग भी सेईर मँ रहत रहेन। मुला एसाव क सन्तानन ओनकर भुइँया लइ लिहन। एसाव क सन्तानन होरी लोगन क नास कइ दिहन। तब एसाव क सन्तानन हुआँ रहइ लागेन। इ वइसा ही किहेन जइसा इस्राएल उ भुइँया क कब्जा करइ मँ किहेन जउन यहोवा ओनका दिहे रहेन।)

¹³ “यहोवा मोसे कहेस, ‘अब तइयार होइ जा अउर जेरेद घाटी क पार जा।’ एह बरे हम जेरेद घाटी क पार किहेन। ¹⁴ कादेसबर्ने क तजइ अउ जेरेद घाटी क पार करइ मँ अड़तीस बरिस क समइ बीता रहा। उ पीढ़ी क सबहिं जोधा मरि चुका रहेन। यहोवा सपथ लिहेस कि अइसा ही होई। ¹⁵ यहोवा ओन लोगन क खिलाफ तब तलक करत रहेन जब तलक उ सबइ सिबिर स न नस्ट होइ गएन।

¹⁶ “जब सबहिं जोधन मरि गए रहेन अउर चला गए रहेन। ¹⁷ तब यहोवा मोसे कहेस, ¹⁸ ‘आजु तू पचन्क आर सहर क सीमा क पार कइके मोआब क इलाका मँ लइ जाबइ। ¹⁹ जब तू लोग ओकर भुइँया स होइके गुजरब्या तउ ओनका तंग जिन कर्या। ओनसे जिन लड़्या काहेकि मइँ तू पचन्क ओनकर भुइँया न देब। काहेकि मइँ उ भुइँया लूत क संतानन क नियन्त्रण करइ बरे दिहेउँ ह।’”

²⁰ (उ प्रदेस रपाइ लोगन्क देस भी कहा जात ह। उ सबइ ही मनइयन पहिले हुआँ रहत रहेन। अम्मोनी क लोग ओनका “जमजुम्मी लोग” कहत रहेन। ²¹ जमजुम्मी लोग बहोत सक्तीसाली रहेन अउर ओनमाँ स बहोत स हुआँ रहेन। उ पचे अनाकी लोगन क नाई लम्बा रहेन। मुला यहोवा जमजुम्मी लोगन क अम्मोनी लोगन बरे नास कइ दिहस। अम्मोनी लोग जमजुम्मी लोगन्क प्रदेस छीन लिहन अउ अब उ पचे हुआँ रहत रहेन। ²² परमेस्सर इहइ काम एसाव क सन्तानन बरे किहस जउन सेईर मँ रहत रहेन। उ पचे हुआँ रहइवालन होरी लोगन्क नास कइ दिहन। अब एसाव क सन्तानन हुआँ रहत अहइँ जहाँ पहिले होरी लोग रहत रहेन। ²³ अव्वियन गाँवन मँ गाजा तलक रहत रहेन। मुला कछू लोगन कप्तोरी स आएन अउर ओका नस्ट कइ दिहेन। अबहिं कप्तोरियन ओकर जगह मँ रहत अहइँ।)

एमोरी लोगन क खिलाफ जुद्ध करइ क हुकुम

²⁴ “यहोवा मोसे कहेस, ‘जात्रा बरे तइयार होइ जा। अर्नोर्न नदी क घाटी से होइके जा। मइँ तू पचन्क हेसबोन क राजा सीहोन पइ विजय पावइ क सक्ती देत हउँ। मइँ तोहका सबन्क उ देस जीतइ क सक्ती देत हउँ। एह बरे ओकरे खिलाफ लड़ा अउ ओकरे देस पइ कब्जा करब सुरु करा। ²⁵ आजु मइँ तू पचन्क समूचइ संसार क लोगन क डेरावइवाला बनाउब सुरु करत अहउँ। उ पचे तोहरे बारे मँ खबर पइहीं अउ उ पचे भय स काँप उठीहीं। जब उ पचे तोहरे बारे मँ सोचिहीं तब उ पचे घबराइ जइहीं।’

²⁶ “कदेमोत क रेगिस्तान स मइँ हेसबोन क राजा सीहोन क लगे दूतन क पठएउँ। दूतन सीहोन क समन्वा सान्ति-सन्धि राखेस। उ पचे कहेन, ²⁷ ‘आपन देस स होइके हम पचन्क जाइ द्या। हम लोग सड़क पइ ठहरब। हम पचे सड़किया क दाहिन या बाएँ कइँती न मुड़ि जाब। ²⁸ हम पचे जउन खइया क खाब या जउन पानी पिअब ओकर बरे पैसा चुकाउब। हम पचे सिरिफ तोहरे देस स पइदल जात्रा करइ क अनुमति चाहित ह। ²⁹ आपन देस स होइके तू पचे हम पचन्क यरदन नदी क पार कइके ओह देस मँ पहोंच तलक जाई जेका यहोवा हमार परमेस्सर हमका दइ देत बाटइ। एसाव क सन्तानन अउर आर मँ बसइया मोआबी लोग आपन देस स हमका जाइ अनुमति दइ दिहन ह।’

³⁰ “मुला हेसबोन क राजा सीहोन, आपन देस स हमका जाइ नाहीं दिहस। यहोवा, तोहार परमेस्सर, ओका बहोत जिद्दी बनाइ दिहस। यहोवा इ एह बरे किहस कि उ सीहोन क तोहरे कब्जा मँ दइ सकइ अउ उ अब इ कइ दिहेस ह।

³¹ “यहोवा मोसे कहेस, ‘मइँ राजा सीहोन अउ ओकरे देस क तोहका सबन्क देत अहउँ। भुइँया लेब सुरु करा। इ तब तोहार होई।’

³² “तब राजा सिहोन अउ ओकर सब लोग हम पचन्स यहस मँ जुद्ध करइ बाहेर निकरेन। ³³ मुला यहोवा हमार परमेस्सर ओका हमका दइ दिहस। हम पचे ओका, ओकरे बेटवन क, अउ ओकरे सब लोगन क हराएन। ³⁴ हम पचे ओन सबइ सहरन पइ कब्जा कइ लीन्ह। तउ हम पचे सहर क सबइ मनइयन, मेहरारु अउ गदेलन क पूरी तरह नास कइ दीन्ह। हम पचे कउनो क जिअत नाहीं तजा। ³⁵ हम पचे जउन सहरन क जीत लीन्ह ओनमाँ स सिरिफ जनावॅरन अउ कीमती चीजन्क लइ लीन्ह। ³⁶ हम पचे अरोएर सहर क जउन अर्नोर्न क घाटी मँ बाटइ अउ उ घाटी क बीच दूसर सहर क भी हरावा। यहोवा हमार परमेस्सर हमका अर्नोर्न घाटी अउ गिलाद क बीच क सबहिं सहरन क हार जाइ दीन्ह। कउनो सहर हम लोग बरे एतनॉ जियादा मज़बूत नाहीं रहेन। ³⁷ मुला उ प्रदेस क निचके नाहीं गए, जउन अम्मोनी लोगन्क रहा। तू पचे यब्बोक नदी क किनारे या पहाड़ी प्रदेसन क सहरन क निअरे नाहीं गया। तू पचे अइसे कउनो ठउरे क निअरे नाहीं गया जेका यहोवा हमार परमेस्सर तोहका आदेस दिहस रहा।

बासान क लोगन क संग जुद्ध

3 “हम पचे घूमि गए अउ बासान क जाइवाली सड़क पइ चलतइ रहेन। बासान क राजा ओग अउ ओकर सबहिं लोग एद्रेइ मँ हम लोगन स लड़इ बरे आएन। ² यहोवा मोसे कहेस, ‘ओग स जिन डेराअ, जेका मइँ तोहरे हाथे मँ देइ दिहेस ह। मइँ एकरे सबहिं लोगन अउ भुइँया क तोहका सबन्क दइ देब। तू पचे ऍका वइसे ही हरउब्या जइसे तू पचे हेसबोन क सासक एमोरी राजा सीहोन क हराया।’

³ “इ तरह यहोवा हमार परमेस्सर बासान क राजा ओग अउ ओकर सबहिं लोगन्क हमरे हाथे मँ दिह्या। हम पचे ओका लोगन पइ तब तलक हमला किहेस जब तलक हर कछू खतम नाहीं होइ गएन। ⁴ तब हम पचे उ समइ उ सबइ सहरन पइ कब्जा कीन्ह रहेन। एक भी अइसा सहर नाहीं बचा जेका हम पचे नाहीं लिहेन। हम पचे ओन लोगन स बासान मँ ओग क राज्ज अगोब प्रदेस क सबइ साठ सहरन क लीन्ह। ⁵ इ सबहिं सहरन ऊँची देवारन अउ दुआरन मँ मजबूत छड़न क संग बहोत मजबूत रहेन। अनेक दूसर सहरन बे देवारे क रहेन। ⁶ हम पचे ओनका वइसे बरबाद कीन्ह जइसे हेसबोन क राजा सीहोन क नगरन क बरबाद किहे रहे। हम पचे हर एक सहर क ओनके मनइयन क संग, मेहररुअन अउ गदेलन क भी बरबाद कीन्ह। ⁷ मुला हम पचे सबहिं गइयन अउ कीमती चीजन्क अपने लगे राखा।

⁸ “उहइ समइ मँ हम पचे एमोरी लोगन्क दुइ ठु राजा स भुइँया लीन्ह। इ भुइँया यरदन नदी क दूसरी कइँती पूरब तरफ अहइ। इ भुइँया अर्नोर्न घाटी स लइके हर्मोन पहाड़े तलक अहइ। ⁹ (सिदोनी हेर्मोन पहाड़े क ‘सिर्योन’ कहत हीं, मुला एमोरी ऍका ‘सनीर’ कहत हीं।) ¹⁰ हम पचे समूचइ समथर मइदान क सहर, समूचइ गिलाद, अउ समूचइ बासान मँ सल्का अउ एदेई तलक अधिपत्य कायम कीन्ह। उ सबइ सहर बासान मँ ओग क समराज्ज क सहरन रहेन।”

¹¹ (बासान क राजा ओग एक रपाई मनई रहा जउन अबहिं तलक जिअत रहा। ओग क पलंग लोहे क बनी रही। इ करीब नौ हाथ लम्बी अउ चार हाथ चौड़ी रही। रब्बा सहर मँ इ अबहिं तलक अम्मोनी लोगन क संग बाटइ।)

यरदन नदी क पूरब क भुइँया

¹² “उ समइ उ भुइँया क हम पचे जीत लिहे रहे अउर मइँ एका रूबेन परिवार समूह क अउ गादी परिवार समूह क अर्नोन घाटी क अरोएर स लइके गिलाद क आधा पहाड़ी भाग तलक ओकरे सहरन क संग दिहेउँ ह। ¹³ मनस्से क आधा परिवार समूह क मइँ गिलाद क दूसर आधा हींसा अउ समूचइ बासान दिहेउँ यानी अर्गोब क पूरा छेत्र बासान ओग क राज्ज रहा।”

(बासान क छेत्र रपाइयन क प्रदेस कहा जात रहा। ¹⁴ याईर, मनस्से क सन्तानन मँ स एक, अर्गोब क समूचा छेत्र जेका बासान कहा जात रहा, कब्जा कइ लिहेन। उ प्रदेस गसूरी अउर माका लोगन क इलाका तलक फइल गएन। याईर पाछे इ प्रदेस क नाउँ आपन नाउँ पइ राखेस। इहइ स आजु भी याईर प्रदेस क नाउँ स सुमिरइ जात ह।)

¹⁵ “मइँ गिलाद माकीर क दिहेउँ। ¹⁶ अउर रूबेन परिवार समूह क अउ गाद परिवार समूह क मइँ उ प्रदेस दिहेउँ जउन अर्नोन घाटी स यब्बोक नदी तलक जात ह। घाटी क बीच एक चउहद्दी बाटइ। यब्बोक नदी अम्मोनी लोगन क चउहद्दी अहइ। ¹⁷ यरदन घाटी मँ यरदन नदी पच्छिम चउहद्दी बनावत ह। इ छेत्र क उत्तर मँ किन्नेरेत झील अउर दक्खिन मँ अराबा समुद्दर बाटइ अरथात जेका लवण सागर कहत हीं। इ पूरब मँ पिसगा क चोटी क तलहटी मँ बना अहइ।

¹⁸ “ओह समइया, मइँ तोहका आदेस दिहे रहेउँ: ‘यहोवा, तोहार परमेस्सर तू पचन्क रहइ बरे यरदन नदी क इ कइँती क प्रदेस दिहेउँ ह। मुला अब तोहरे पचन्क जोधन बरे आपन औजार उठावइ चाही। तोहका दूसर इस्राएली परिवार समूहन क भी नदी क पार होइ क अगुवाइ करइ चाही। ¹⁹ तोहार मेहररुअन, गदेलन अउर तोहार गोरुअन हिआँ ओन सहरन मँ रइहीं जेनका मइँ तू पचन्क दिहेउँ ह। मइँ जानत हउँ कि तोहरे लगे बहोत स गोरुअन अहइँ। ²⁰ मुला तोहे पचन्क आपन इस्राएली रिस्तेदारन क मदद यरदन नदी क दूसर किनारे उ प्रदेस क पाइ लेतेन तलक करइ चाही जउन यहोवा तोहार परमेस्सर दिहेस ह। ओनकइ मदद तब तलक करा जब तलक यहोवा ओनकइ जीवन मँ सान्ति न देइ जइसा तू पचे हिआँ पाइ लिहा ह। तब तू पचे हिआँ आपन देस मँ लउटि सकत ह जेका मइँ तू पचन्क दिहेउँ ह।’

²¹ “तब मइँ यहोसू स कहेउँ, ‘तू पचे उ सबइ लख्या ह जउन यहोवा तोहार परमेस्सर इ दुइ राजा लोगन क संग किहेस ह। यहोवा अइसा ही ओन सबहिं राज्जन क संग करब जउन जगह तू जात रहा। ²² इ सबइ देसन क राजा लोगन स जिन डेराअ, काहेकि यहोवा तोहार परमेस्सर, तोहरे बरे लड़ी।’

मूसा क कनान मँ प्रवेस करइ स मनाही

²³ “मइँ उ समइ यहोवा स विसेख कृपा क पराथना किहेउँ, ²⁴ ‘यहोवा मोर सुआमी, मइँ तोहार सेवक अहउँ। तू मोका आपन महानत सक्ती देखाइ सुरू किहस ह। सरग या भुइँया पइ कउनो अइसा दूसर परमेस्सर नाहीं अहइ, जउन तू किह्या ह तोहरे तरह महान अउ सक्तीसाली काम कइ सकइ। ²⁵ मइँ तोहसे विनती करत हउँ कि तू मोका उ पार जाइ द्या अउ यरदन नदी क दूसर कइँती क नीक प्रदेस, सुन्नर पहाड़ी पहँटा अउर लबानोन क लखइ द्या।’

²⁶ “मुला यहोवा तोहरे कारण मोह पइ नाखुस रहा। उ मोर बात सुनइ स इन्कार कइ दिहा। उ मोसे कहेस, ‘बस करा! एकरे बारे मँ मोका दूसर सब्द जिन कहा। ²⁷ पिसगा पहाड़े क चोटी पइ जा। पच्छिउँ कइँती, उत्तर कइँती, दक्खिन कइँती, पूरब कइँती लखा। ओनका तू आपन आँखिन स लखा काहेकि तू पचे यरदन नदी क पार नाहीं कइ पउब्या। ²⁸ तू पचन क यहोसू क निर्देर्स देइ चाही। ओका मजबूत अउ हिम्मती बनावा। काहेकि यहोसू लोगन क यरदन नदी क पार लइ जाइ। यहोसू ओन भुइँया क जउन तू लखत रहा ओका कब्जा करइ मँ तोहार मदद करी ओहमाँ तोहका रहइ क देइ।’

²⁹ “ऍह बरे हम पचे बेत-पोर क दूसर कइँती घाटी मँ रुकि गए।”

ईसू आपन मउत क भविस्सबाणी किहेस

(मत्ती 20:17-19; लूका 18:31-34)

³² फिन उ सबइ यरूसलेम जात जात रस्ता मँ रहेन, ओनमें ईसू सबते आगे चलत जात रहा। उ सबइ खुबइ अचिरजे मँ डेरानेन। जउन पाछे रहेन, उ पचे ससान रहेन। ईसू बारहु प्रेरितन क एक कइँती लइ गवा अउर ओनका बतावइ लाग कि ओकरे संग का घटइवाला अहइ। ³³ “सुन, हम पचे यरूसलेम जात अही, अउर मनई क पूत क दुराव स मुख्ययाजकन अउर धरम सास्तिरियन पकड़वाइ के दइ देइहीं। अउर उ सबइ ओका मउत क सजा देइके गैर यहूदी क दइ देइहीं। ³⁴ जउन ओकर हँसी करिहीं अउर उ पचे ओह पइ थुकिहीं। उ सबइ ओका कोड़ा स पिटहीं अउर मारि डइहीं। तीन दिना क पाछे उ जी जाई।”

याकूब अउर यूहन्ना क ईसू स हठ

(मत्ती 20:20-28)

³⁵ फिन जब्दी क बेटवन याकूब अउर यूहन्ना ओका लगे आएन अउर ओसे कहेन, “गुरु, हम चाहित ही कि हम जउन तोसे करइ क कही, ओका तू हमरे बरे कइ द्या।”

³⁶ ईसू ओनसे कहेस, “तू मोसे आपन बरे का करवावइ क चाहत ह?”

³⁷ उ सबइ ओसे कहेन, “तू आपन महिमा मँ हम पचेन क बइठइ क अधिकार द्या। हम पचेन मँ एक ठु तोहरे दाएँ अउर एक ठु तोहरे बाएँ बइठइ।”

³⁸ ईसू ओनसे कहेस, “तू जानत ह नाहीं कि तू सबइ का कहत ह। जउन लुटिया मइँ पिअइ जात हउँ, का तू पी सकत ह? का जउन बपतिस्मा मइँ लेवइ क हउँ, का तू पचे उ बपतिस्मा क लइ सकत ह?”

³⁹ उ पचे ओसे कहेन, “हम वइसा करि सकित ह।” फिन ईसू ओनसे कहेस, “का तू सबइ लुटिया भरि के पीब्या जउन मइँ करि सकत हउँ? जउन बपतिस्मा मइँ लेइ का हउँ, का तू सबइ लइ सकत ह? ⁴⁰ मुला मोरे दाँए अउर बाँए बइठइ का जगहिया देब मोर अधिकार नाहीं अहइ। इ जगहियन ओनही मनइयन क बरे अहइँ, जेनके बरे उ सबइ तइयार कीन्ह ग अहइँ?”

⁴¹ जब बाकि दसहु ऍकरे बारे मँ सुनेन तउ उ पचे याकूब अउर यूहन्ना प गुस्सा करेन। ⁴² फिन ईसू आपन लगे ओनका बोलाएस अउर ओनसे कहेस, “तू जानत ह कि जउन गैर यहूदियन प राज करत हीं, उ हुकुम ओन पइ चलावत हीं अउर ओनका अउर ओनके मुख्य नेतन क ओन प प्रभाव बाटइ। ⁴³ मुला तोहरे संग अइसा नाहीं बाटइ। तू सबन मँ जउन बड़वार होइ चाहत ह, उ तोहार नउकर बनइ। ⁴⁴ अउर तू पचन मँ जउन मुखिया बना चाहइ उ तोहार गुलाम बनइ। ⁴⁵ मनइँ क पूत हु सेवा करावइ नाहीं आइ अहइ मुला उ सेवा करइ आइ अहइ अउर आपन जीउ क बहोतन क छुटकारा बरे आइ अहइ।”

आँधर क आँखिन

(मत्ती 20:29-34; लूका 18:35-43)

⁴⁶ फिन उ सबइ यरीहो आएन अउर जब ईसू एक भारी भीर क संग आपन चेलन क लइके यरीहो जात रहा तउ तिमाई क बेटवा बरतिमाई नाउँ क एक ठो आँधर भिखमंगा सरक क किनारे बइठा रहा। ⁴⁷ जब उ सुनेस कि नासरत क ईसू अहइ, उ चिचिआइ क कहइ लाग, “ईसू, दाऊद क पूत! मो पर दाया कर!”

⁴⁸ अउर बहोत मिला ओका डाटेन अउर ओका चुप रहइ क कहेन। तब ओकर अवाज ऊँच स ऊँच होत गइ, “दाऊद क पूत! मो प दाया कर!”

⁴⁹ तउ ईसू रुका अउ कहेस, “ओका मोरे लगे बोलॉवा।”

एह पइ उ सबइ आँधर क बोलाएन अउर ओसे कहेन, “मनवा क मजबूत करा खरा ह्वा। ईसू तोहका बोलावत ह।” ⁵⁰ उ आँधर आपन लबादा फेंकि दिहस अउर उछरि पड़ा अउर फिन ईसू क लगे गवा।

⁵¹ तब ईसू ओसे कहेस, “तू मोसे आपन बरे का करवावइ चाहत ह?”

आँधर ओसे कहेस, “हे गुरु, मइँ पुनि देखइ चाहत हउँ।”

⁵² तउ ईसू ओनसे कहेस, “जा। तोहरे बिसवास स तोहार उद्धार भवा।” अउर उ फउरन देखइ लायक होइ सका। फिन उ ईसू का पाछे सरक प होइ गवा।