M’Cheyne Bible Reading Plan
Jesus Make One Sick Guy Come Good
14 One Rest Day, one Pharisee guy wen tell Jesus fo come his house fo eat. He one main leada fo da Pharisee guys. An da Pharisee guys an da guys dat teach Godʼs Rules wen watch Jesus real good. 2 Had one sick guy dat show up ova dea in front Jesus. He get da kine sick dat make da arms an da legs come fat. 3 Jesus wen aks da Pharisee guys an da guys dat teach Godʼs Rules, “You tink da Rules say dass good fo make one guy come good on da Rest Day, o wat?”
4 But dey neva say notting. So he wen take da sick guy, an make um come good, an tell um fo go. 5 Den he tell dem, “If da Rest Day, an one a you guys get one boy o one cow dat fall down inside one deep water hole, you goin pull um out right away, o wat? No matta da Rest Day, yeah?”
6 But dey no can say notting.
Da Guys Dat No Try Be Numba One
7 Jesus see dat befo dey eat, some guys ova dea wen pick da main places by da table. So he tell um dis fo teach um: 8 He say, “Wen somebody tell you fo come da wedding lu‛au, no go sit down by da place fo da spesho wedding guys. You do dat, an den one guy mo importan den you goin come. 9 Den da boss fo da lu‛au dat wen tell him an you fo come, he goin tell you, ‘Give dis guy yoa place.’ Den you goin come shame, an take da place fo da guy dass not importan. 10 Mo betta, wen dey tell you fo come, go take da place fo da guy dass not importan. Den wen da boss fo da lu‛au come, he goin tell you, ‘My friend, ova hea mo betta.’ Den everybody dea goin get respeck fo you cuz a dat. 11 Cuz whoeva make himself importan, no goin be importan, an whoeva make himself not importan, goin be importan.”
12 Den Jesus tell da guy dat wen tell um fo come his place fo eat, “Wen you make one lunch o one dinna, no tell yoa friends, o yoa bruddas, o yoa ohana, o da rich guys nex door fo come. You do dat, an bumbye dey goin tell you fo come dea house, an dat goin pay you back fo wat you wen do. 13 Mo betta, wen you make one lu‛au, tell da guys dat no mo notting fo come, da guys dat no can move, da guys dat no can walk, an da guys dat no can see. 14 Den you goin stay good inside. Cuz dem guys no can pay you back bumbye. But God, he goin give you back someting good fo wat you wen do, wen da peopo dat wen do da right tings come back alive.”
Da Story Bout Da Big Lu‛au
15 One guy dat stay sitting at da table wen hear dat, an he tell Jesus, “Fo shua, da guys dat goin sit down at Godʼs table wen he come King, dey can stay good inside!”
16 Jesus tell, “You wen hear da story bout da guy dat wen make one big lu‛au? He aks plenny peopo fo come. 17 Bumbye he send his worka guy fo tell da peopo, ‘Come on! Everyting stay ready!’ 18 But dey all wen start fo make up story. Da first guy wen tell da worka guy, ‘I jus wen buy one field, an I gotta go look um. Sorry.’ 19 Anodda guy say, ‘I jus wen buy ten cows fo plow, an I goin go see if dey strong nuff fo work. Sorry.’ 20 Anodda guy say, ‘I jus wen get married, so I no can go wit you.’ 21 Da worka guy go tell his boss. Da boss fo da house wen come huhu, an tell da worka guy, ‘Hurry up! Go out by da big an small roads inside town, an bring back da guys dat no mo notting, da guys dat no can move, da guys dat no can see, an da guys dat no can walk.’ 22 Bumbye da worka guy come an say, ‘We wen do wat you wen say, an still yet get room.’ 23 Da boss tell da worka guy, ‘Go out by da big an small roads in da country side an make da peopo come in, so my house can come full. 24 I telling you now, da peopo I wen tell first, not one a dem goin taste my lu‛au food.’ ”
Goin Cost Plenny Fo Be Jesus Guy
25 Plenny peopo wen go wit Jesus. He turn aroun to dem, an say, 26 “Whoeva come by me, an get love an aloha fo dea fadda an mudda, dea wife an kids, dea bruddas an sistas -- an even fo demself too, mo den dey get love an aloha fo me, dey no can be my guy. 27 Whoeva no like suffa fo me, o even mahke on top one cross, dey no can be my guy.
28 “If one a you guys tink you goin make one tower, you betta sit down first an figga out how much goin cost, fo know if you get nuff money fo finish da tower, yeah? 29 If you no do dat, you goin make da foundation, an den you no can make da rest. Den everybody goin bus laugh at you. 30 Dey goin say, ‘Dis guy wen start fo make litto bit, an he no can finish da job.’
31 “If one king going out wit ten tousand army guys fo fight anodda king, an da odda king come agains um wit twenty tousand army guys, da guy wit ony ten tousand army guys goin sit down first an figga if him an his guys strong nuff fo fight da odda king an his guys, yeah? 32 If he not strong nuff, he goin send talka guys fo meet da odda king wen he still stay far away, an dey goin talk so dey no fight.” 33 Jesus say, “Same ting. You guys no can be my guys if you no give up everyting you get.”
Da No Good Salt
34 “Salt stay good. But if da salt no mo taste, no way you can make um work like salt again. 35 Dat kine salt no good fo even da dirt o da manure pile. Ony ting can do, throw um away. If you hear dis, you betta listen!”
Christ Wen Come Back Alive Afta He Wen Mahke
15 Eh, bruddas an sistas! I like you guys fo rememba da Good Kine Stuff From God dat I wen tell you first time. You guys wen learn um good, an you standing strong cuz you stick wit um. 2 If you guys hang in dea wit da Good Kine Stuff From God dat I wen tell you guys awready, dass how you guys goin get outa da bad kine stuff you stay in. Ony if you guys no hang in dea, den was wase time, an you guys trus God fo notting.
3 From all da stuffs I wen learn first, an den I wen tell you guys, dis da main ting: Christ, da Spesho Guy God Wen Send, he wen mahke cuz us guys was doing bad kine stuff, jalike da Bible wen say befo time. 4 Dey wen bury him. Den, day numba three, Christ wen come back alive, jalike da Bible wen say befo time. 5 Den Christ wen let Peter see him, an den his Twelve Guys wen see him. 6 Afta dat, mo den five hundred bruddas an sistas was togedda, an he wen let all dem see him. Mos a dem stay alive still yet, ony some a dem wen mahke awready. 7 Den Christ wen let James see him, an afta, all da guys he wen send all ova da place, dey wen see him too.
8 Me, I was da last guy fo see Christ. Jalike I da baby dat wen born late. 9 You know, dem odda guys dat Christ wen send all ova da place, dey all mo importan den me. I even wen go try fo hurt da church peopo dat come togedda fo God. Dass why I not good nuff fo peopo call me one messenja guy fo God. 10 But God, he so good to me! He wen make me how I stay now. An he neva wase time wen he wen do so plenny good stuff fo me. Afta he wen do um, den I wen work mo hard den all da odda guys. But no was me -- was God, you know, dat wen do all da good tings fo me, an he stay working inside me still yet.
11 But no matta me o da odda guys, we all teach da same ting. Everytime we tell da peopo da Good Stuff From God. An dass wat you guys wen trus.
Da Mahke Guys Goin Come Back Alive
12 Kay den. Wen us guys teach bout Christ, da Spesho Guy God Wen Send, we tell everybody he wen come back alive afta he wen mahke, yeah? So how come, get some a you guys, dat tell, “No, da mahke guys, dey no goin come back alive, you know.” Wot! 13 Eh! If da peopo dat mahke no goin come back alive, dat mean, Christ neva come back alive, too! 14 An if Christ neva come back alive, den all da stuff us guys stay telling da peopo, dat no mean notting, an wase time if you guys trus him.
Wat Goin Happen Cuz Christ Wen Come Back Alive
20 Eh! But not lidat, you know! Godʼs Spesho Guy Christ, he wen come back alive afta he wen mahke! He jalike da first fruit dey pick from da farm, an plenny mo goin come afta. Christ, he da first guy dat eva wen come back alive afta he wen mahke, an goin get plenny mo mahke peopo dat goin come back alive bumbye, same ting. 21 Had one guy Adam jalike us guys, dat wen do someting bad, an dat make all us odda guys mahke. An had one nodda guy Christ jalike us guys, dat wen do someting good, an cuz a dat, da mahke peopo goin come back alive! 22 Cuz everybody, dey Adam kine guys, an dass why dey all gotta mahke. Same ting, everybody dat stay tight wit Christ, God goin make dem come alive.
23 But everyting gotta happen da right time, you know. Christ, he da first guy dat wen come back alive, jalike da first fruit dey pick from da farm. Bumbye, wen Christ come back hea, his peopo goin come back alive too. 24 An afta, everyting goin pau. Dat time, Christ da King goin wipe out all da spirits dat say, “Me, I da leada! I stay in charge a everyting ! I get da right fo make how I like! I strong!” Same time, Christ da King goin turn ova everyting to God his fadda. 25 Christ gotta stay da King, you know, till God bus up all da peopo dat go agains Christ, an show dat Christ da winna ova dem. 26 An get one nodda ting dat stay agains us guys -- we gotta mahke. Dass da last ting God goin wipe out. Den from dat time, nobody gotta mahke. 27 Da Bible wen say befo time, “God make his Spesho Guy be da boss ova everyting.” But you know, wen he say “everyting get him fo boss” -- fo shua, he not talking bout God, da One dat wen make him be da boss ova everyting. 28 But bumbye, afta Godʼs Boy come da boss fo everyting fo real kine, den, he goin turn ova everyting to God, da One dat wen make him be da boss fo everyting. Den God goin stay in charge a everyting, fo everybody.
Da Peopo Who No Stay Shua Dat Christ Wen Come Back Alive
29 If no was lidat, how come get guys dat go get baptize fo da mahke guys? If da mahke guys no goin come back alive fo shua, how come dey getting baptize fo da mahke guys? 30 An us guys, how come we risking our life everytime, if da mahke guys no goin come back alive? 31 Same ting, every day I stay shua dat I risking my life! But I swear to God, bruddas an sistas, no bodda me if I mahke. I real proud a you guys, you know, cuz I stay tight wit our Boss Jesus Christ, da Spesho Guy God Wen Send. 32 No matta I fight guys dat ack jalike wild animals Efesus side, dass okay! But if I ony do um all by myself, an not fo God, wase time, you know. If da peopo dat mahke no goin come back alive, den mo betta us guys figga jalike da peopo talk, “Eh! Eat plenny! Drink up! Cuz tomorrow we all goin mahke die dead!”.
33 Eh! No go tink da wrong ting lidat! Jalike dey tell, “You hang out wit da bad kine guys, dat going mess you up from being one good guy!” 34 Wise up! Make like you suppose to! Stop doing da bad kine stuff! Cuz even get some peopo dat donno God, you know. I talking lidis fo make you guys shame.
Wat Kine Body We Goin Get Wen We Come Back Alive?
35 But somebody goin aks, “How da mahke guys goin come back alive bumbye? Wat kine body dey goin get?”
36 You aks lidat, fo shua you not tinking. Wen you plant one seed, da seed gotta mahke first, yeah? Ony afta dat, can come alive an grow. 37 Wen you plant um, you not planting someting dat look like da ting dat goin grow, yeah? You plant da dry seed, wheat seed o some odda kine seed. 38 But God, he da One dat make da seed, an he figga wat da plant goin look like wen come up. Every diffren kine seed, wen start fo grow, goin look diffren. 39 Jus cuz you call plenny kine tings “one body,” dat no mean dey all da same kine ting. Da peopo, dey get one kine body. Da animals, dey get one nodda kine. Da birds, one nodda kine. Da fishes, one nodda kine. 40 An get diffren kine tings inside da sky an inside da world. Da tings inside da sky, dey stay awesome, but dey diffren den da tings inside da world. An da tings dat get body hea inside da world, dey all awesome too, but dey diffren den da tings inside da sky. 41 Da sun awesome, but not same kine awesome jalike da moon. An da moon stay awesome, but not jalike da stars, yeah? An da stars, dey awesome too, but diffren kine awesome. An da way one star shine, one nodda star shine diffren, but all stay awesome still yet, yeah?
42 Wen da mahke guys come back alive, same ting goin happen jalike wit da seed, you know. Dey put da guyʼs body inside da groun an he come rotten. But wen da guy come back alive, he no goin mahke eva! 43 Wen dey put da dead body inside da groun, ony ugly. But wen da guy come back alive, he goin be awesome! Wen dey put da body inside da groun, da guy no can do notting. But wen he come back alive, he goin be strong awready! 44 Befo dey put da dead body inside da groun, was one guy dat can ony tink an feel, yeah? But afta he come back alive, goin be Godʼs Spirit dat make da guy live fo real kine! Get peopo dat can ony tink an feel, you know, an get peopo dat get real kine life from Godʼs Spirit. An dey get diffren kine bodies. 45 Dis wat da Bible wen say befo time: Da first guy dat was jalike us guys was Adam. He “wen come alive an he wen tink an feel.” But da last Adam kine guy is Christ. He get one spirit inside him dat can make odda peopo come alive fo real kine too.
46 First ting, get da guy dat can ony tink an feel. Den latas, get da guy dat get da real kine life from Godʼs Spirit. 47 Da first guy Adam wen come from da groun. God wen make him from da dust. Da odda guy Christ, he wen come from da sky. 48 An us guys dat come from da dust, we jalike dat odda guy Adam dat God wen make from da dust. But da peopo dat stay tight wit God in da sky, dey stay jalike da Christ guy dat wen come from da sky. 49 Us guys, right now we look jalike da Adam guy dat God wen make from da dust. Bumbye, we goin come jalike da Christ guy dat come from da sky, too.
50 Eh bruddas an sistas! Let me tell you guys someting. Peopo wit blood an bones inside, not nuff fo come Godʼs kids an get him fo dea King! Peopo wit body dat goin come rotten, dey no can handle da good kine stuff dat no goin come rotten eva. 51 So, listen up! I like tell you guys one ting dat was secret befo time! From all us guys, get some guys dat no goin mahke! But all us guys, we all goin come diffren! 52 Dis all goin happen real fast, mo fast den you can blink yoa eye. Goin happen bumbye, wen time fo blow da last trumpet. Goin get da noise from da trumpet. Right den, da mahke guys goin come back alive. No way dey goin mahke an come rotten one mo time! Same ting wit us guys, we all goin come diffren. 53 All dis stuff dat goin come rotten, gotta come diffren kine, so bumbye no come rotten one mo time. Dis body dat can mahke now, gotta come diffren kine, so no can mahke eva again! 54 Dat time, wen da body dat can come rotten now, goin come diffren kine, an no goin come rotten eva again! Da body dat can mahke now, goin come diffren kine, an no goin mahke eva again! Dat time, goin happen jalike da Bible wen say befo time:
“We no goin mahke no moa,
Cuz Christ, he da winna ova dat!”
an
55 “Da Devil dat like make us guys mahke,
He wen lose awready!
We no goin cry inside,
Cuz da Devil no can zap us guys mahke no moa!”
56 How come he can zap us guys now an we mahke? Cuz we wen do da bad kine stuff, az why. An how come da bad kine stuff we do, get plenny power lidat? Cuz Godʼs Rules show dat da bad kine stuff stay plenny wrong, az why. 57 But now, everyting stay diffren! All us guys like tell God, “Mahalo plenny!” He wen make us guys da winnas ova da bad kine stuff, cuz our Boss Jesus Christ, he da winna fo real kine!
58 So den, bruddas an sistas, my good friends. Stand strong an solid. No let notting shake you guys up. You guys stay working fo da Boss awready, so den, go do mo an mo plenny good kine stuffs fo him everytime. You guys know dis: Wen you guys stay tight wit da Boss, no matta you work hard an sweat plenny, no goin be wase time!
Copyright © 2000 by Wycliffe Bible Translators International. All rights reserved