M’Cheyne Bible Reading Plan

Wat Da Peopo Teach Long Time Ago

7 Den some Pharisee guys an teacha guys dat teach Godʼs Rules wen go from Jerusalem by Jesus. ² Dey spock Jesus guys, how dey eat. Befo dey eat, dey no wash dea hands da way da Pharisee guys say dey gotta wash um.

³ You know, da Pharisee guys an all da Jewish peopo, dey no eat till dey wash dea hands. But dey suppose to wash um jalike da ancesta guys wen teach from long time ago. ⁴ Wen dey come back from da market, dey no eat till dey wash dea hands dat way. Get plenny odda stuffs dey gotta do lidat. First, dey gotta wash da cups, da pitchas, an da pots jus right, da way dea ancesta guys wen teach um, so den dey can pray.

⁵ So da Pharisee guys an da teacha guys dat teach Godʼs Rules, dey tell Jesus, “Eh, da guys you teaching, no good how dey do! How come dey no live da way da ancesta guys wen teach from long time ago? Dey no wash dea hands dat way befo dey eat!”

⁶ Jesus tell um, “Da guy Isaiah wen talk fo God long time ago, an fo shua he talking bout you guys! Cuz you guys say one ting an do anodda. Isaiah wen write dis:

⁸ Jesus say, “You guys no like do wat God stay tell you. You guys ony do wat odda peopo wen teach you.”

⁹ An he tell um, “You guys jalike da sly mongoose, yeah?! You guys know how fo dump Godʼs Rules, so you guys can stick wit wat some peopo wen teach you long time ago. ¹⁰ Moses wen tell, ‘Show respeck fo yoa fadda an mudda.’ He say dis too: ‘Whoeva swear at his fadda o mudda, gotta kill him.’

¹¹ “But you teacha guys say, ‘If one guy get someting dat he can use um fo help his fadda o mudda, he can say to dem, “I no goin use um fo help you guys, cuz bumbye I goin give um to God.” ’ ¹² Den you guys say da guy no need help his fadda o mudda. ¹³ You guys make no good wat God wen say, so you can stick wit da kine stuff yoa ancesta guys wen teach from long time ago. You guys do plenny odda tings lidat, an teach da odda peopo fo do um too.”

Wat Make You Pilau Inside, So You No Can Pray

¹⁴ Den Jesus wen tell da peopo, “Come. Listen an try undastan. ¹⁵ Wat you guys put inside yoa mout no mean you pilau inside so you no can pray, but wat come outa yoa mout, dass wat make you pilau inside so you no can pray. ¹⁶ If you wen hear dat, den listen!”

¹⁷ Latas he wen go way from da peopo, an go inside one house, an da guys he teaching come an say, “Try tell us wat da ting mean dat he wen tell um.” ¹⁸ He tell um, “Wot! You guys still yet no can undastan? You jalike da odda peopo! You gotta figga dis way: Wateva go inside da guy no can make him pilau inside so he no can pray. ¹⁹ Cuz dat ting no go inside da heart, but go inside da stomach, an bumbye come out.” (Wen Jesus say dat, he make um okay fo eat any kine stuff.)

²⁰ Den Jesus say, “Da kine stuff dat come outa one guy, dass wat make him pilau inside so he no can pray. ²¹ Get all kine bad kine stuff come out from inside da heart. Dass how everybody figga how dey can do bad kine stuff; dey not married an dey still yet go fool aroun; dey rip off da odda peopo; dey kill; dey married an still yet go fool aroun; ²² dey like corral everyting fo demself; dey feel good wen dey do bad; dey like bulai da odda guy; dey no mo shame fo any kine; bodda dem wen da odda guy get someting good; dey talk stink bout da odda peopo; dey get big head; dey ack stupid cuz dey no like tink. ²³ All dat bad kine stuff, dass wat come from inside da heart. Az why peopo stay pilau inside an dey no can pray.”

One Wahine Trus Jesus

²⁴ From dea Jesus go Tyre side. He wen go inside one house, an he no like nobody know wea he stay. But no can. Everybody wen find out. Get one wahine, from da Fonicia peopo, Syria side. She Greek, not Jewish, from da kine peopo dat da Jews call “dogs.” Her litto girl get one bad kine spirit dat wen take ova her, an make her do all kine stuff. Da mudda wen hear bout Jesus, an right den an dea she wen go by him. She wen go down by his feet, an beg him fo make da bad kine spirit let go her girl.

²⁷ Jesus say, “First, gotta feed da kids, you know. No good take da food from da kids an throw um down to da dogs.”

²⁸ She say, “Dass right, Boss. But even da dogs unda da table eat wat fall down from da table, yeah?”

²⁹ Jesus tell her, “Wow! You trus me fo real kine! You can hele on home. Da bad kine spirit gone awready from yoa girl!”

³⁰ So she go back home. Dea was da girl. She resting on top da bed, an no mo bad kine spirit.

Jesus Make One Guy Come Good

³¹ Jesus wen hele on from Tyre side, an go thru Sidon. Den he go Galilee Lake near da Ten Towns. ³² Dey bring one guy who no can hear o talk right. Dey beg Jesus fo put his hands on top da guy. ³³ Jesus take him by da side wea neva have nobody. Den he wen stick his finga inside da guyʼs ears, an spit, an touch da guyʼs tongue. ³⁴ Jesus wen look up to da sky, an moan, an say, “Efata!” Dat mean, “Open up!” ³⁵ An right den an dea da guyʼs ears an his tongue come okay, an he can talk good.

³⁶ Jesus tell dem guys, “No tell nobody bout dis!” But da mo he say dat, da mo dey was telling. ³⁷ All dis really wen blow da peopoʼs minds. Dey say, “Dis guy, he really do everyting good! He even make da peopo who no can hear, hear, an da peopo who no can talk, talk!”

Afta You Mahke, Da Rules No Mo Power

7 Eh, all you bruddas an sistas dat undastan how da Rules stay. I like tell you guys dis: from all da time you stay alive, da Rules get power ova you. But afta you mahke, da Rules no mo power ova you. ² Da Rules say, if get one wahine dat stay married to one guy, she gotta stick wit da guy da whole time he stay alive. But if da husban mahke, den she no need do wat da Rules fo da husban an da wife say. ³ If she go live wit one nodda guy, an her husban alive still yet, dass mean she one wahine dat fool aroun behind her husbanʼs back. But den, if her husban stay mahke, den da Rules fo da husban an da wife no mo notting fo do wit her no moa. An if she go marry one nodda guy, dat mean she no go fool aroun behind her mahke husbanʼs back.

⁴ Same ting wit you guys, my bruddas an sistas! Christ wen go mahke, his body, everyting. Same ting jalike you guys wen mahke awready, so now da Rules no mo notting fo do wit you guys. Dass why now you guys can come his guys, an stay tight wit dis guy Christ dat wen come back alive afta he wen mahke. All dis jalike dat wahine can marry one nodda guy now, an no mo problem. So now, wat you do an how you ack, everyting fo God.

⁵ Befo time, us guys wen ony like do da kine bad stuff our bodies wen like do. Cuz we wen know da Rules, we wen like go agains um, an dat ony wen make us guys da kine peopo dat do wat we not suppose to. From dat, wat we wen do an how we wen ack dat time, everyting was fo cut us guys off from God. ⁶ Befo time we gotta do wat da Rules say. Now we no need, cuz jalike we wen mahke awready. Da old way, da Rules inside da Bible neva let us go. But da new way, us guys get Godʼs Spirit in charge a us! Az why us guys can work fo God now.

Da Bad Kine Stuff Dat Stay Inside Us

⁷ So den, wat mo we can say? Da Rules no good, o wat? Not even! If I neva undastan da Rules, den no way I go undastan wat kine stuff stay bad inside me. Jalike I neva know I not suppose to like get odda peopoʼs stuffs fo myself, if da Rules neva say, “No like get odda peopoʼs stuffs fo yoaself.” ⁸ But cuz da Rules wen say dat, den dass jalike da bad kine stuff inside me wen make me like get all kine stuffs fo myself. If neva have da Rules, da bad kine stuff no mo power ova peopo.

⁹ Da way I wen stay live befo time, I neva know da Rules. Den bumbye, I wen find out dat God wen say dat get tings I not suppose to go do -- an right den an dea, jalike all da bad kine stuff inside me wen wake up an make me go do dose tings! ¹⁰ Den, az jalike I wen mahke inside. Had da Rules so dat peopo can come alive fo real kine. But den fo me, jalike was da Rules dat wen cut me off from get um right wit God. ¹¹ Da Rules wen tell how I gotta make awready. But had inside me bad kine stuff dat wen use da Rules dat God say fo bulai me. Cuz a dat, jalike was da Rules dat wen cut me off from get um right wit God.

¹² But den same time, da Rules stay spesho fo God, an everyting da Rules say we gotta do, all dat stay spesho fo God, stay right, an good.

¹³ Da Rules stay some good. But you tink was da Rules wen cut me off from get um right wit God? Not even! Was da bad kine stuff inside me dat wen go use da Rules fo cut me off from God. Da Rules stay good, but dey show dat da bad kine stuff stay bad fo real kine, an dey cut us off from get um right wit God. So wen God say how us guys gotta make, dat show dat da bad kine stuff inside us no good!

Da War Inside Us

¹⁴ We know dat da Rules come from Godʼs Spesho Spirit. But me, I ony one guy. I make jalike I one slave dat gotta do ony bad kine stuff. ¹⁵ I donno wat I stay doing. Cuz, eh, I no do da tings I like do. I do da tings dat I no like. ¹⁶ If I do da tings I no like do, den I know dat da Rules stay good. ¹⁷ Cuz dass not me dat do um, but da bad kine stuff dat stay inside me stay do um.

¹⁸ I know dat no mo notting good inside me. Everytime inside me I like do da bad kine stuff. I like do da good kine stuff, but den, I donno how fo do um! ¹⁹ Da good kine stuff dat I like do, I no do um. But da bad kine stuff I no like do, I do um. ²⁰ Now, wen I do wat I no like, az not me dat make me do um, but da bad kine stuff dat stay inside me.

²¹ Dat show, jalike wen get one rule dat say, wen I like do da good kine stuff, get da bad kine stuff inside me dat no like me do um. ²² I stay real good inside wen I tink bout da Rules from God. ²³ But jalike get one diffren kine rule inside me dat everytime jam me up. Da way I tink, I like do wat stay good, but I no can. Jalike da bad kine rule stay inside my body, an stay make me one prisona dat jus gotta go do any kine bad kine stuff.

²⁴ Auwe! I stay all sore inside! Jalike no mo nobody dat can take me outa da bad kine stuff befo all dat go cut me off from God! ²⁵ But you know wat? God, he da One dat can get me outa dat! Mahalo plenny to God cuz our Boss Jesus Christ can do um! So dis how I stay: My own self, I stuck. No matta my head like do everyting Godʼs Rules say fo do -- da way I stay inside, jalike get one nodda rule dat say I gotta do bad kine stuff.