M’Cheyne Bible Reading Plan
Jesus Teach His Guys How Fo Pray
11 One time Jesus stay pray in one place. Wen he pau pray, one guy he teaching tell um, “Boss, teach us guys fo pray, jalike John wen teach his guys.”
2 Jesus say, “Dis how you pray:
‘Fadda,
We like all da peopo know fo shua how awesome you stay,
An dat you stay good an spesho.
We like you come King fo everybody now.
3 Give us our food fo today an every day.
4 Let us go, an hemo our shame
Fo all da bad kine stuff we do to you,
Jalike we let da odda guy go,
An we no stay huhu at him
Fo all da bad kine stuff he do to us.
No let us get chance fo do bad kine stuff.’ ”
5 An he tell his guys, “Tink! If you go one friendʼs house at midnite an tell um, ‘My friend, lend me three loaf bread, 6 cuz my odda friend stay going on one trip, an he wen come my house, an I no mo notting fo give him fo eat.’ 7 Den if yoa friend inside his house tell you, ‘No bodda me! Da door stay lock awready, an me an my kids stay in bed. I no can get up fo give you anyting.’ 8 So, wat? I tell you, even if he yoa friend, he no goin get up an give you da bread. Still yet, cuz you no shame, an you stay aksing him, he goin get up an give you everyting you need. 9 So I tell you: Aks, an you goin get. Look, you goin find. Knock, da door goin open fo you. 10 All da peopo dat aks, goin get. Da guy dat look fo um, he goin find. An da guy dat knock da door, da door goin open fo him. 11 If yoa boy aks you fo one fish, you give um one snake? Nah! 12 If he aks you fo one egg, you give um one scorpion? Nah! 13 Eh, you guys no good, but you know how fo give good kine stuff to yoa kids. Fo shua den, yoa Fadda inside da sky, he everytime good, an he goin give his Good an Spesho Spirit to you guys cuz you aks him fo um.”
Jesus An Beelzebul
14 Had one guy dat get one bad kine spirit, dat make da guy so he no can talk. Jesus wen make da bad spirit let go da guy. Wen da bad spirit let um go, da guy dat no can talk wen start fo talk. An all da peopo, wen blow dea minds. 15 But some guys say, “Nah! Was Beelzebul, da Devil. He da main leada guy fo da bad kine spirits, you know. Beelzebul, he da one wen give Jesus da power fo make dat spirit let go da guy, az why!”
16 Odda guys wen try fo trick Jesus. Dey aks um fo show dem someting awesome from God in da sky fo make proof who him. 17 But Jesus wen know wat dey tinking, an he tell um, “Da country dat go agains each odda, bus up itself. Da town o da ohana dat go agains each odda, no can stay strong. 18 If da Devil make his own guys let go da peopo, den he going agains himself. How he goin stay one strong king? I saying dis cuz you guys wen say dat I make da bad kine spirits let go da peopo, cuz dea leada guy Beelzebul give me power fo do um. 19 You guys say, dat da leada guy fo da bad kine spirits, he da one dat give me power fo make um let go da peopo. Kay den. Who give yoa guys da power fo make da bad kine spirits let go da peopo, aah? Da Devil give um da power, o wat? Not da Devil, dass fo shua. Yoa own guys goin show dat wat you say stay wrong. 20 But if I make da bad kine spirits let go da peopo, cuz I get power from God, dat show dat God stay King, an he stay hea now by you guys, an you guys neva know.
21 If one big moke get all his knifes an clubs fo guard his house, den his stuffs stay safe. 22 But if one mo bigga moke come, an bus him up, he goin take away da knifes an clubs. Da first moke wen trus da knifes an clubs, but da mo bigga moke goin rip off all da stuffs, an split um up wit his own guys.
23 If you no stay wit me, den you stay agains me. Da guy dat no work wit me, he ony work agains me.”
Da Bad Spirit Come Back
24 “Wen one bad kine spirit let go one guy, dat spirit go all ova da boonies fo find one place fo rest, but no can find notting. Den he say, ‘Eh, mo betta I go back to da guy I wen take ova befo.’ 25 Wen he go dea, da guy stay clean inside, jalike wen you sweep one house an fix um up. 26 Den da spirit go get seven odda spirits mo worse den him, an dey all go take ova da guy, an stay dea. So in da end, da guy dat had da bad kine spirit come mo worse den befo.”
Stay Good Inside Fo Real Kine
27 Wen Jesus say dat, one wahine from da peopo wen say, “Da wahine dat wen born you an nurse you, she da one dat stay good inside!” 28 But Jesus tell, “Da peopo dat hear wat God say, an do um, dey da ones dat stay real good inside!”
Show Us Proof!
29 All da peopo wen stay jamming aroun Jesus, an he say, “Da peopo nowdays, dey do bad kine stuff. Dey everytime like see proof dat I fo real. An dey no goin see um. Dey ony goin see one proof jalike da guy Jonah wen make befo time. 30 Jonah, he talk fo God long time ago. He wen make proof fo da peopo inside Nineveh town dat he come from God. O same jalike me, da Guy Dass Fo Real, I goin make proof fo da peopo nowdays, dat I come from God. 31 Wen da peopo dat stay hea nowdays goin stand in front God da Judge, da Queen from Sheba far away da sout side goin stand up too, an make proof dat da peopo dat stay hea nowdays, dey not so smart. Cuz befo time she wen come from far away fo hear wat da akamai guy, King Solomon, wen say. An look! Get one guy mo importan den Solomon stay hea now. Dass me! 32 Wen da peopo dat stay hea nowdays goin stand in front God da Judge, da peopo inside Nineveh town goin stand up too, an make proof dat da peopo dat stay hea nowdays, dey stay doing bad kine stuff. Cuz wen Jonah wen teach da Nineveh peopo, dey wen come sorry fo all da bad kine stuff dey wen do, an pau do um. An now get one guy mo importan den Jonah stay hea now. Dass me!”
Da Light Fo Da Body
33 “You no light one candle an den cover um up. You put um up on top one high place, yeah? Den everybody dat come inside da house can see da light. 34 Da eye jalike one lamp fo inside yoa body. So if you get good heart fo help peopo, dass jalike yoa eye okay an you stay all light inside. But if you one greedy bugga, dass jalike yoa eye stay no good an you stay all dark inside! 35 Make shua you get da light inside you, an you no stay dark inside. 36 So, if you get good heart inside you, an you not greedy, dass jalike you get light inside you fo shua!”
Jesus Scold Da Pharisee Guys An Da Teachas Dat Teach Godʼs Rules
37 Wen Jesus pau talk, one Pharisee guy wen aks him fo come inside his house fo eat. So he go inside, an sit down fo eat. 38 But da Pharisee guy see dat Jesus no wash first befo he eat jalike dem, an he tink plenny bout dat. 39 So da Boss Jesus tell him, “You know, you Pharisee guys, jalike you, you guys clean ony da outside a da cup an da plate. But inside yoa heart, you guys stay full a bad kine stuff, an you like stash everyting fo yoaself. 40 You guys no tink! Da One dat wen make da outside, make da inside too! 41 Give to da peopo dat no mo notting from da stuffs you get, an you know wat? Everyting goin come okay fo you guys, da way God see you.
42 “Auwe you Pharisee guys! You goin get it! You guys give God ten percent a everyting, even da mint, an da rue spice, an all da odda kine herbs. But same time, no bodda you guys if you no do da right tings, an you guys no mo love an aloha fo God. Mo betta, make shua you do da right tings, an get love an aloha fo God, an no foget da ten percent too.
43 “Auwe you Pharisee guys! You guys goin get it! You guys everytime like fo sit down in da spesho chairs inside da Jewish churches, an like all da peopo talk nice to you in da open market. 44 Auwe! Cuz you guys mahke inside, jalike da graves dat da peopo no can see, an dey walk on top um cuz dey donno get one grave dea.”
45 One teacha dat teach Godʼs Rules wen tell um, “Teacha, wen you say dat, you talk bad to us too.”
46 Jesus say, “Auwe you teacha guys dat teach Godʼs Rules! You guys goin get it! Cuz you like make all kine rules! Jalike you stack up big heavy kine stuffs on top da peopoʼs shouldas, dat real hard fo carry. But you guys no like help da peopo fo do wat yoa rules say, even litto bit. 47 Auwe you guys! Cuz you make nice tombs fo da guys dat wen talk fo God, but was yoa ancesta guys wen kill um. 48 So you show you tink dass good, wat yoa ancesta guys wen do. Dey wen kill da guys dat wen talk fo God, an you guys make dea tombs! 49 Dass why God wen know wat he talking bout wen he say, ‘I goin send um guys dat talk fo me, an guys I send all ova fo tell da Good Stuff, an dey goin kill some, an make oddas suffa.’ 50 So da peopo dat stay hea nowdays, dey goin get da blame fo all da guys dat peopo eva wen kill cuz dey talk fo God, 51 from da first one Abel to Zekariah. Dey wen kill Zekariah right inside da temple yard, wit Godʼs spesho place one side, an da altar da odda side. Dass right! An I like tell you guys dis: Da guys dat stay hea nowdays, dey goin get all da blame.
52 “Auwe, you teachas dat teach Godʼs Rules! You guys goin get it! You guys donno wat God say, an you no let da peopo dat like know wat he say find out. Jalike you guys wen take away da key fo open da door so peopo can know wat God stay say.”
53 Wen Jesus go way from dat place, da teachas dat teach Godʼs Rules an da Pharisee guys wen start fo gang up on him, an try fo make him tell dem all kine stuff. 54 Dey like trick him wit wat he tell dem so dey can bus him.
Da Tings Dat Godʼs Spirit Give Us Guys Da Power Fo Do
12 Eh, bruddas an sistas, I like you guys know bout da tings dat Godʼs Spirit give us guys da power fo do. 2 You guys know awready, dat befo you guys was Godʼs peopo, all da time someting wen make you guys go afta da idol kine gods dat no can even talk, an pray to dem. 3 Dass why I like make shua you guys know dat nobody dat stay tight wit Godʼs Spesho Spirit goin say, “Jesus stay damn!” An nobody goin say “Jesus stay da Boss” if dey no stay tight wit Godʼs Spesho Spirit.
4 Godʼs Spirit give diffren peopo da power fo do all diffren kine tings, but all dat come from da same Spirit. 5 Get diffren kine ways fo work fo God, but all da worka guys get da same Boss. 6 God make all diffren kine tings happen fo all da diffren peopo, but get da same God dat stay making everyting happen fo everybody.
7 God show everybody wat his Spirit stay doing, dass fo help everybody togedda. 8 He give his Spirit to some guys fo give dem da power fo tell odda peopo wass da bestes ting fo do. Fo odda guys, da same Spesho Spirit give um da power so dey can tell wat dey undastan. 9 He give odda peopo da power fo trus God plenny, cuz dey stay tight wit his Spirit. Odda peopo, dey can make da sick peopo come good. 10 An odda peopo, God give um da power fo do awesome kine stuff dat show Godʼs power. Fo odda peopo, he give um da power fo talk fo God, an oddas, he give um da power fo figga wat spirits come from God an wat spirits not from God. Oddas can talk diffren kine languages. Oddas can tell wat da diffren languages mean. 11 Da same Spirit, he do all dis. He give everybody da power fo do da ting dat he like dat guy fo do.
Inside One Body Get Plenny Diffren Parts
12 Same ting wit da body, you know. You ony get one body, an inside da body, get plenny parts. No matta get plenny parts inside da body, ony get one body.
Same ting wit Godʼs Spesho Guy Christ an his ohana. 13 Us guys stay tight wit da one Spirit. Dass why, wen us guys wen get baptize, we all come jalike we one peopo. No matta we Jewish o not, no matta we gotta work like slaves o not, God wen give all us guys da One Spirit, jalike we all drink water from da same puka.
14 Inside our body, no mo jus one part -- get plenny diffren parts. 15 Wat if yoa foot wen go say, “Me, I not one hand, so gotta be, I not from dis guyʼs body!” You tink dat mean da foot not from da guyʼs body? No way! 16 An wat if yoa ear wen go say, “Me, I not one eye, so gotta be, I not from dis guyʼs body!” Same ting, you tink dat mean dat da ear not from da guyʼs body? Not even! 17 If all yoa body was one eye, how you goin hear? If all yoa body was one ear, how you goin smell? 18 But you know, God wen make our body one ting, an he wen put all diffren kine parts inside, jalike he wen like. 19 If our whole body was jus one part, den no mo body, yeah? 20 But fo real kine, our body get plenny parts, an dass wat make da whole body one ting.
21 Da eye no can tell da hand, “I no need you, you know!” Da head no can tell da foot, “I no need you, you know!” 22 Get tings inside da body dat us guys figga not so strong, but eh! we need um. 23 Get odda tings inside da body dat us guys figga not importan, but eh! we take good care dem. An get tings inside da body, we figga dey not fo show, so we make um so dey look okay. 24 Da tings inside da body dat look okay, no need do notting fo dem.
But you know, wen God wen put everyting togedda fo make da body, he wen take da tings dat not so importan an make um importan, 25 cuz he no like da body be all split up. He like everyting inside da body fo work togedda wit each odda, same same. 26 If one part a da body suffa, all da odda parts suffa, same time. If one part a da body stay awesome, all da odda parts feel good, same time.
27 Same ting wit you guys. You jalike Christʼs body. Everybody jalike one part inside Christʼs body. 28 From all da peopo dat come togedda fo church, da numba one importan ting, God send some guys all ova da place fo tell wat he wen say. Numba two, he make some peopo his talka guys. Numba three, he make some peopo teachas. Den, he give some peopo da power fo do all kine awesome stuff dat show Godʼs power. Odda peopo can make da sick peopo come good. Odda peopo can help. Odda peopo can put tings togedda strait. An odda peopo, he give um da power so dey can talk diffren kine languages.
29 Now, wat you guys tink? God send everybody all ova da place fo tell wat he wen say? Nah. He make everybody talk fo him? Nah. He make everybody teacha guys? Nah. He make everybody do awesome kine stuff? Nah. 30 He give everybody da power fo make da sick peopo come good? Nah. He make everybody so dey can talk diffren kine languages? Nah. He make everybody so dey can tell wat da diffren kine language mean? Nah.
31 Now, you guys go all out so you guys can handle da mos importan stuff God give you.
Still yet, I like show you guys da bestes way fo live:
Copyright © 2000 by Wycliffe Bible Translators International. All rights reserved