M’Cheyne Bible Reading Plan
Da Beginning
1 Aloha, my friend Teofilus,
Plenny guys wen write down da tings dat wen happen wit us. 2 Dey wen write down da stuff da odda guys wen see from da time Jesus wen start fo teach, an dey wen teach us an plenny odda peopo bout wat wen happen. 3 An me, I wen check out real good all da stuff dat wen happen from da start, an I tink dat I like write um down fo you one by one. 4 Den you can know dat da stuff you wen learn stay true.
John Da Baptiza Goin Born
5 Wen Herod stay king fo Judea, had one priest guy name Zekariah. He wen work wit da Abijah priest hui. Elizabet, she his wife. She wen come from da Aaron priest ohana. 6 Zekariah an his wife wen do da right tings da way God see um. Everyting da Boss wen tell um fo do, an all Godʼs Rules, dey wen do, an no mo nobody poin finga dem. 7 Dey no mo kids cuz Elizabet no can. She an Zekariah stay old now.
8 An wen happen dat wen Zekariah wen go in front God inside da temple, fo do da priest kine job wit his priest hui, 9 da priest guys wen pick Zekariah fo go inside Godʼs Spesho Place an burn da incense dat time. Dey wen pick um Jun Ken A Po kine, cuz dass how dey wen do um. 10 An all da peopo stand outside praying wen da time wen come wen he suppose to burn da incense. 11 Den Zekariah wen spock one angel messenja guy from da Boss Up Dea In Da Sky dat wen come, standing on da right side by da altar wea da incense stay burn. 12 Wen Zekariah see da angel guy he wen come mix up an scared. 13 But da angel guy wen tell, “No scared, Zekariah! God wen hear wat you wen aks, an yoa wife Elizabet goin born one boy. You goin name him John. 14 You goin stay real good inside cuz a him, an plenny peopo going stay good inside cuz he wen born. 15 He goin be one importan guy, da way da Boss Up Dea In Da Sky see um. He no goin drink no wine o da odda kine booze. Godʼs Spesho Spirit goin take charge a him befo he born. 16 He goin bring back plenny Israel peopo fo trus God dea Boss. 17 He goin come first, befo da Boss come, wit da same kine spirit an power dat Elijah wen get. He goin make da faddas get love fo dea kids again. An da peopo dat no do wat dey suppose to do, he goin make dem tink right jalike da peopo dat do da right tings. He goin make da peopo ready fo wen da Boss Up Dea In Da Sky come.”
18 Zekariah wen aks da angel guy, “How I goin know dis fo shua? I one old man, an my wife, she old too.”
19 Da angel guy wen tell, “I Gabriel, da one dat stand in front God, an he wen send me fo tell you dis good stuff. 20 From now on, you no can talk notting, till yoa boy born, cuz you neva trus wat I wen say. Dis goin happen fo shua at da right time.”
21 All da time dis stay going on, da peopo stay wait fo Zekariah outside, an dey wen tink how come he wen stay long time inside da temple. 22 Wen he come outside, he no can talk to dem. So dey wen tink he wen see someting spesho inside dea, cuz he wen make signs wit his hands, but no can talk.
23 Wen da time pau fo his job, he wen go home. 24 Afta dat his wife Elizabet wen come hapai, an fo five months she wen stay hide inside da house. 25 She say, “Da Boss Up Dea In Da Sky wen do dis fo me. He wen show me he do someting good fo me, an he wen take away my shame wit da peopo.”
Jesus Goin Born
26 Afta six months God wen send da angel messenja Gabriel to one town Galilee side name Nazaret. 27 He come by one wahine name Mary. She neva come togedda wit one guy yet, but she make ready fo marry one guy name Joseph. He from King Davidʼs ohana. 28 Da angel guy come by her an say, “Aloha! Da Good Boss Up Dea In Da Sky goin do someting spesho fo you. He stay wit you.”
29 Mary come mix up cuz a wat he wen say, an tinking wat dat mean. 30 Da angel guy say,
“Mary, no scared.
God wen pick you, cuz he like do plenny good stuff fo you.
31 You goin come hapai, an goin born one boy.
You goin name him ‘Jesus.’
32 He goin be importan,
An God goin call him ‘my Boy dat come from me,
Da God Dass Mo Importan Den All Da Odda Gods.’
God da Boss goin make him one king
Jalike King David, his ancesta guy.
33 He goin stay King fo Jacobʼs ohana, da Israel peopo, foeva.
Dat no goin pau eva.”
34 Mary aks him, “How dis can be? I neva even sleep wit one guy.”
35 Da angel guy say, “Godʼs Spesho Spirit goin come ova you. Da God Dass Mo Importan Den All Da Odda Gods, his power goin cover you. An dat baby you goin get, God goin call him ‘Spesho Fo Me’ an ‘Godʼs Boy’. 36 You know Elizabet, yoa ohana? No matta she stay old, she goin born one boy too. Peopo say she no can born babies, but she six months hapai awready. 37 Notting too hard fo God.”
38 Mary say, “I da Boss helpa. Do um to me jalike you wen say.” Den da angel guy wen go way.
“Aloha!”
1 Dis letta from Paul. God wen tell me fo be his guy, cuz he like send me all ova da place fo tell peopo bout Jesus Christ, da Spesho Guy he wen send. An Brudda Sostenes, he helping me write dis. 2 Dis letta fo you church peopo dat come togedda fo God inside Corint town. God wen make you guys spesho fo him cuz you stay tight wit Jesus Christ. He wen tell you guys fo come be his spesho peopo. Dass jalike all da odda peopo all ova da world dat talk to da Boss Up Dea wen dey need help. Jesus Christ, he da Spesho Guy God Wen Send, an he da Boss fo dem guys an fo us guys. 3 God, he our Fadda, an Jesus Christ, he our Boss. I like dem do plenny good kine stuffs fo you guys, an make yoa hearts rest inside.
Mahalo Plenny!
4 Everytime I tink bout you guys, I tell God “Mahalo plenny fo dem Corint peopo!” God get good heart, so he do plenny good stuffs fo you guys, cuz you guys stay tight wit his Spesho Guy Jesus Christ. 5 An he make you guys rich inside wit all kine good tings, cuz you guys stay tight wit Christ. Cuz a dat, you guys know da importan kine stuff you guys need fo know, an da bestes way fo tell um. 6 All da good kine stuff us guys wen tell you guys bout Christ, stay solid awready inside you guys. Dass how come you guys stay shua dat Christ stay fo real. 7 So, you guys awready get all da good tings God give his peopo. You guys stay ready an waiting fo da time wen God goin show everybody our Boss Jesus Christ. 8 Christ da One dat goin make you guys strong an solid all da way, till da time wen our Boss, Jesus Christ, goin come back to dis world. Dat way you guys no goin jam up, an nobody can poin finga at you guys. 9 God, he da One dat wen tell you guys fo come tight wit his Boy, our Boss Jesus Christ, an God everytime do wat he say.
Get Church Peopo Dat Like Split Up
10 Eh, bruddas an sistas! I talking fo our Boss Jesus Christ wen I beg you guys fo tink da same way, an no split up. Gotta stick togedda, so you guys know how fo tink da same way, an can figga out tings da same way!
11 Some peopo from Sista Cloeʼs house wen tell me dat some a you guys stay make argue wit each odda. 12 Dis how I figga. Sound like you guys stay talking lidis: One guy say dis, “Me, I stick wit Paul!” One nodda guy say, “Me, I stick wit Apollos!” An anodda guy say, “Me, I stick wit Peter!” An dis odda guy go say, “Me, I stick wit Christ!”
13 So, wat? No can split up Christ ohana, you know! Eh! You guys tink was me dat wen go mahke on top da cross fo you guys? No way! You guys tink wen dey baptize you, dat make you guys my guys, o wat? Not even! 14 I tank God dat I neva baptize nobody ova dea by you guys. Ony da guys Crispus an Gaius. 15 Dass why nobody ova dea can say dat dey wen get baptize fo come Paulʼs guys. 16 -- Oh yeah, I rememba dis, I wen baptize some peopo in Stefanas house too. But I no can rememba if I wen baptize odda peopo ova dea by you guys.
17 Eh, you know, wen Christ wen send me, no was ony fo baptize! Da main ting he wen send me fo, was fo tell all da Good Kine Stuff Bout Him! An he neva like me talk bout him jus fo sound smart. Cuz if I wen jus talk smart kine da way peopo tink, dat goin take away da power from wat wen happen wen Christ wen go mahke on top da cross.
Christ Get Power From God
18 All da stuff we telling bout how Christ wen mahke on top da cross, dat stuff sound stupid to da peopo dat stay going wipe out fo real kine. But fo us guys, he taking us outa all da bad kine stuff we stay in. So den, da stuff bout Christ an da cross get plenny power from God fo help us guys. 19 Dass jalike wat Isaiah wen write inside da Bible befo time:
God say,
“All dis stuff da smart guys know,
I goin make um come jalike notting.
No matta how smart dey stay,
I goin make everyting dey know jalike no good.”
20 So wat den? Wat goin happen to da smart guys? An to da teacha guys dat teach da Rules? An to da guys dat nowdays can talk good an make you tink anodda way? Eh! God wen make all dem guys look stupid! He wen make all da smarts dat come from dis world come jalike notting!
21 You know God, he so smart, he neva let da peopo inside dis world figga how dey can know him fo real kine. Cuz da kine smarts dey get inside dis world, not nuff. God, he figga lidis: mo betta send some guys aroun fo tell da peopo bout him, no matta get peopo dat tink da guys he send kinda crazy fo talk lidat. But God figga dat from da stuff his peopo tell, odda peopo can go trus him, an dass how he goin take um outa da bad kine stuff dey stay doing.
22 You know, da Jewish peopo, dey everytime like us guys fo do someting awesome fo show proof dat we get Godʼs power. An da Greek peopo, dey ony like hear da smart kine stuff dat dey tink az da trut. 23 But us guys dat talk fo God, we stay tell peopo all ova da place how God wen send dis Spesho Guy Christ ova hea, an how odda guys wen hang um on top one cross an kill um. Da Jewish peopo, wen dey hear dat, dey no can handle, cuz dey tink Godʼs Spesho Guy no goin mahke eva. An da Greek peopo, wen dey hear um, dey tink, “Dass stupid!” 24 But get odda peopo, some a dem Jewish peopo an some a dem not Jewish, dey da ones God wen tell fo come be his peopo. Fo dem, Christ show um dat God get plenny power an he stay real smart. 25 Cuz no matta da peopo tink God stupid, he still mo smart den dem. No matta dey tink God not strong, he still mo strong den dem.
26 Eh, bruddas an sistas! Fo undastan wat I mean, tink bout wat wen happen wit you guys wen God wen tell all you guys fo come be his spesho peopo. If you tink da way da peopo inside da world tink, no mo plenny guys wit you guys dat get plenny smarts, o get da kine power fo make odda peopo do wat dey like. No mo plenny guys wit you guys dat come from one ohana wit big name. 27 But God wen pick da peopo dat odda peopo from dis world tink lolo. Cuz he goin make da smart peopo look shame, dass why. An da peopo dat look like dey not strong hea inside dis world, God wen pick dem, cuz he goin make da strong kine peopo look shame too. 28 He wen pick da peopo dat no mo big name hea inside dis world, an da kine dey make fun of, an dose dat no mean notting to nobody. God goin use dem fo make da peopo who tink dey it, come jalike notting. 29 So dat nobody can talk big wen dey stand in front God.
30 You guys know how come you guys stay tight wit Jesus Christ? Cuz God like, dass why! God, he wen make Jesus da One dat can give us guys all his smarts. An Jesus make us guys get um right wit God, an come peopo dat stay spesho fo God, an he cut us guys loose from da power da bad kine stuff get ova us! 31 So den, jalike da Bible wen say befo time: “Anybody like talk big, mo betta dey ony talk big bout da Boss, an not bout demself!”
Copyright © 2000 by Wycliffe Bible Translators International. All rights reserved